ᑐᓴᕋᑦᓴᓕᕆᔩᑦ

ᑐᙵᕕᒃᑯᑦ ᑐᙵᓱᑦᑎᑦᓯᔪᖅ ᒐᕙᒪᑐᖃᒃᑯᑦ ᐃᓱᒪᓕᐅᕈᑎᖓᓂᒃ ᐹᕕᓐᓛᓐ ᐱᓕᕆᒃᑲᓐᓂᕈᒪᓂᖓ 2 ᑐᒃᓯᕋᐅᑎᖓᓂᒃ

ᓴᖅᑭᑎᑕᐅᑲᐅᑎᒋᔪᒃᓴᖅ

ᑐᙵᕕᒃᑯᑦ ᑐᙵᓱᑦᑎᑦᓯᔪᖅ ᒐᕙᒪᑐᖃᒃᑯᑦ ᐃᓱᒪᓕᐅᕈᑎᖓᓂᒃ ᐹᕕᓐᓛᓐ ᐱᓕᕆᒃᑲᓐᓂᕈᒪᓂᖓ 2 ᑐᒃᓯᕋᐅᑎᖓᓂᒃ

(ᓅᕙᐃᒻᕙ 17, 2022, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᑐᙵᓱᑦᑎᑦᓯᔪᖅ ᒥᓂᔅᑕ ᑖᓐ ᕚᓐᑕᐅ ᐃᓱᒪᓕᐅᕈᑎᖓᓂᒃ, ᐃᓄᓕᕆᔨᑐᖃᒃᑯᓐᓄᑦ ᒥᓂᔅᑕ, ᑭᒡᒐᑐᐃᓪᓗᓂ ᑲᒪᒋᔭᖃᖅᑐᓂᒃ ᒥᓂᔅᑕᓂᒃ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ (NIRB) ᐃᓱᒪᒃᓴᖅᓯᐅᑲᓐᓂᕈᑎᒃᓴᒧᑦ ᐅᓂᒃᑳᖏᓐᓂᒃ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᖅᑏᑦ (ᐹᕕᓐᓛᓐ) ᓄᓘᔮᓂ ᐱᓕᕆᐊᒧᑦ ᐱᓕᕆᒃᑲᓐᓂᕈᒪᓂᖓ 2 ᑐᒃᓯᕋᐅᑎᖓᓂᒃ ᑐᓂᔭᐅᓚᐅᖅᑐᒥᒃ ᒪᐃ 13, 2022 (ᑖᓐᓇ “ᐅᓂᒃᑳᖅ”). NIRB ᓇᓗᓇᐃᓚᐅᖅᑕᖓ ᐅᓂᒃᑳᓂ ᑲᒪᒋᔭᐅᔪᒪᔪᖅ 2 ᑲᔪᓯᑎᑕᐅᒋᐊᖃᙱᓐᓂᖓᓂᒃ, ᒥᓂᔅᑕ ᕚᓐᑕᐅ ᐊᖏᕈᑎᖃᓚᐅᖅᑐᖅ ᐅᓂᒃᑳᓂᒃ. ᒐᕙᒪᑐᖃᒃᑯᑦ ᐃᓱᒪᓕᐅᕈᑎᖓ ᓇᓗᓇᐃᕈᑕᐅᔪᖅ ᐃᓱᓕᔾᔪᑕᐅᓂᖓᓂᒃ NIRB ᐱᓕᕆᒃᑲᓐᕈᒪᔾᔪᑎ 2 ᐃᓱᒪᓕᐅᕈᑎᖃᕋᓱᐊᕐᓂᕐᒧᑦ ᐊᒻᒪᓗ ᐱᓕᕆᒃᑲᓐᓂᕈᒪᔾᔪᑕᐅᔪᒧᑦ 2 ᑐᒃᓯᕋᐅᒻᒧᑦ.
“ᑖᓐᓇ ᐃᓱᒪᓕᐅᕈᑕᐅᖁᔭᐅᓯᒪᔪᖅ ᐃᓄᓐᓄᑦ ᐊᒻᒪᓗ ᐃᓱᒪᓕᐅᕈᑕᐅᖁᔭᐅᓯᒪᔪᖅ ᐊᑦᑐᖅᑕᐅᓯᒪᔪᓄᑦ ᓄᓇᓕᓐᓂ ᒫᓐᓇᐅᓂᖓᓂ, ᐅᔾᔨᓇᖅᑐᓂᒃ ᐊᒻᒪᓗ ᓈᖕᒪᖏᑦᑐᓂᒃ ᐊᑦᑐᐃᓂᖃᑐᐃᓐᓇᕆᐊᖃᕐᓂᖓᓄᑦ ᑕᕆᐅᕐᒥᒃ, ᑕᕆᐅᕐᒥᐅᑕᓂᒃ ᐆᒪᔪᓂᒃ, ᐃᖃᓗᓐᓂᒃ, ᑐᑦᑐᓂᒃ ᐊᒻᒪᓗ ᐊᓯᖏᓐᓂᒃ ᓄᓇᒥᐅᑕᕐᓂᒃ ᓂᕐᔪᑎᓂᒃ, ᐱᕈᖅᑐᓂᒃ ᐊᒻᒪᓗ ᐃᒪᕆᔭᐅᕙᑦᑐᓂᒃ ᓇᓕᖅᑯᑦᓯᓯᒪᙱᓗᐊᕐᒪᑦ ᐃᑯᓪᓚᕈᑎᒃᓴᓕᐊᖑᓯᒪᔪᖅ ᑕᕝᕙᓂ ᐱᓕᕆᐊᖑᒃᑲᓐᓂᕈᒪᔪᒧᑦ 2 ᑐᒃᓯᕋᐅᑎᓂ, ᐊᒻᒪᓗ ᓈᖕᒪᖏᑦᑐᓄᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐃᓄᐃᑦ ᐊᖑᓇᓱᖃᑦᑕᖅᑐᑦ, ᐱᖅᑯᓯᕐᒥᑎᒍᑦ ᐊᐅᓚᓂᖃᖅᐸᑦᑐᑦ ᐊᒻᒪᓗ ᓂᕿᖃᑦᓯᐊᖃᑦᑕᓂᕐᒧᑦ,” ᐅᖃᖅᑐᖅ ᐊᖓᔪᖅᑳᖅ ᐊᓗᑭ ᑰᑦᑎᖅ.
ᑐᙵᕕᒃᑯᑦ ᐊᖓᔪᖅᑳᖓᑕ−ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᖃᕆᐊᒃᑲᓐᓂᓚᐅᖅᑐᖅ “ᖃᐅᔨᒪᒐᓗᐊᖅᑐᒍᑦ ᑭᖑᕙᕆᐊᖅᑕᐅᓂᖓ ᐊᖏᓕᒋᐊᖅᑕᐅᒍᒪᓂᖓᑕ ᐸᕐᓇᐅᑦ ᓲᕐᓗ ᐱᓕᕆᐊᖑᒃᑲᓐᓂᕈᒪᔪᒧᑦ 2 ᑭᖑᕙᕈᑕᐅᓂᐊᕐᒪᑦ ᑲᔪᓯᑎᑦᓯᓂᕐᒧᑦ ᐅᓄᖅᑐᓂᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᑲᔫᑕᐅᓇᔭᖅᑐᓂᒃ ᓄᓇᓕᓐᓄᑦ − ᑭᓯᐊᓂ, ᐊᖏᔪᐊᓘᒻᒪᑦ ᐊᖏᓕᒋᐊᕈᑕᐅᓇᔭᖅᑐᖅ ᐱᓕᕆᐊᖑᒃᑲᓐᓂᕈᒪᔪᖅ 2 ᐊᐅᓚᓂᖃᑦᓯᐊᕆᐊᖃᕈᑎᒋᕚ ᑲᒪᒋᔭᐅᓂᖓ, ᐊᔾᔨᒌᒥᒃ ᓴᐳᔾᔨᓯᒪᒋᐊᖃᕐᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᓗᒪ ᐃᑯᓪᓚᕈᑎᒃᓴᓂᒃ ᐊᑦᑐᐃᓂᕆᓇᔭᖅᑕᖓ ᓂᕐᔪᑎᓂᒃ, ᐊᕙᑎᒥᒃ, ᐊᒻᒪᓗ ᐃᓄᐃᑦ ᐱᖅᑯᓯᕐᒥᑎᒍᑦ ᐃᓄᓯᖏᓐᓂᒃ. ᐃᓄᐃᑦ ᐃᑲᔪᖅᓱᐃᔪᑦ ᒥᐊᓂᖅᓯᓯᐊᕐᓂᕐᒥᒃ ᓄᓇᒦᑦᑐᓂᒃ ᐱᕙᓪᓕᐊᑎᑦᓯᓂᕐᒥᒃ, ᐊᒻᒪᓗ ᓇᓗᙱᓚᒍᑦ ᐹᕕᓐᓛᓐ ᓇᕝᕚᓂᐊᕐᓂᖓᓂᒃ ᓯᕗᒧᐊᒃᑲᓐᓂᕈᑎᒃᓴᒥᓂᒃ, ᐊᑐᕐᓗᒋᑦ ᐱᓕᕆᐊᖓᓄᑦ ᓇᓗᓇᐃᒃᑯᑕᖅᑖᕆᐊᙵᕈᑎᒋᓚᐅᖅᑕᓂ ᐊᒻᒪᓗ ᐊᖏᖅᑕᐅᔾᔪᑎᒋᓚᐅᖅᑕᓂ ᑕᕝᕘᓇ ᓂᒋᐊᓃᑦᑐᒥ ᐊᖅᑯᑎᕐᔪᐊᓕᐅᕐᓂᕐᒥᒃ ᓯᑏᓐᔅᕕ ᐃᓐᓚᑦᒧᑦ ᐊᓯᐊᒍᓪᓘᓐᓃᑦ, ᑲᔪᓯᑎᑦᓯᖁᓪᓗᒋᑦ ᐃᑲᔫᑎᖃᕈᓐᓇᖅᑐᓂᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᐊᒻᒪᓗ ᓄᓇᕗᒻᒥ ᒪᑭᒪᔾᔪᑎᓄᑦ.”

-30-

ᑐᑭᓯᒋᐊᒃᑲᓂᕐᕕᒃᓴᖅ:
ᑭᐊᕙᓐ ᑲᑉᓗᑦᓯᐊᒃ
ᑐᓴᐅᒪᔾᔪᑎᓕᕆᔨᒃᑯᓐᓂ ᑐᑭᒧᐊᒃᑎᑦᑎᔨ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006

Download (PDF, 53KB)

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: