ᓴᖅᑭᖅᑕᐅᑲᐅᑎᒋᔭᕆᐊᓖᑦ
(ᒪᐃ 13, 2026 – ᐃᖃᓗᐃᑦ, ᓄᓇᕗᑦ) – ᓄᓇᕗᑦ ᑐᙵᕕᒃ ᑎᒥᖓ ᐃᓇᑦᓯᔪᖅ ᓄᓇᕗᒻᒥ ᐃᓄᐃᑦ ᑕᑯᓐᓇᖁᓪᓗᒋᑦ, ᑐᑭᓯᒃᑲᓐᓂᕈᑎᒃᓴᖏᓐᓂᒃ ᓂᕈᐊᕋᑦᓴᐃᑦ ᒥᑦᓵᓄᑦ, ᐊᒻᒪᓗ ᐃᓚᒋᔭᐅᓗᑎᒃ ᓂᕈᐊᖅᑕᐅᓯᒪᔪᓄᑦ ᐊᐅᓚᓂᕆᔭᐅᓲᓂᒃ ᑕᑯᓐᓇᕐᓗᒋᑦ ᖃᕆᓴᐅᔭᒃᑯᑦ ᓂᕈᐊᕋᑦᓴᓕᒫᑦ ᐋᔩᕐᓂᖏᑦ.
ᑲᑐᔾᔨᖃᑎᖃᕐᓗᑎᒃ ᐅᕙᒍᑦ ᑕᓚᕖᓴᖓᓂᒃ, ᑐᙵᕕᒃᑯᑦ ᐊᐅᓚᑦᓯᓂᐊᖅᑐᑦ ᑕᑯᑦᓴᐅᑦᓴᐅᑎᒋᔪᓂᒃ ᐊᖓᔪᖅᑳᒧᑦ ᓂᕈᐊᕋᑦᓴᓂᒃ ᑕᓪᓕᒥᕐᒥ, ᒪᐃ 15, 2026, ᐱᒋᐊᕐᓂᐊᖅᑐᑦ 6-ᒨᖅᑲᑦ ᖃᐅᔨᓴᐅᑦ ᑲᓇᓐᓇᐅᑉ ᖃᐅᔨᓴᐅᑖᒍᑦ. ᐋᔩᕋᕐᓂᖅ ᑕᑯᑦᓴᐅᑦᓴᐅᑎᒋᓂᐊᖅᑐᖅ ᐅᕙᒍᑦ ᑕᓚᕖᓴᖓᒍᑦ ᐊᒻᒪᓗ ᑐᙵᕕᒃᑯᑦ ᖃᕆᓴᐅᔭᒃᑯᑦ ᕙᐃᔅᐳᒃᑲᖓᒍᑦ, ᑕᑯᓐᓇᖅᑕᐅᒍᓐᓇᓂᐊᖅᑐᖅ ᓄᓇᕗᒻᒥ ᓯᓚᑖᓂᓗ.
ᑲᑎᓐᓂᐅᔪᖅ ᓄᓇᕗᒻᒥ ᐃᓄᓐᓄᑦ ᑐᓴᕐᕕᖃᕈᓐᓇᑎᑦᓯᓂᐊᖅᑐᖅ ᑐᕋᐃᓐᓇᖅᑐᒥᒃ ᓂᕈᐊᕋᑦᓴᓂᒃ, ᑐᑭᓯᒃᑲᓂᕐᓗᑎᒃ ᓯᕗᓪᓕᐅᑎᒍᒪᔭᖏᓐᓂᒃ ᑕᑯᓐᓇᒐᖏᓐᓂᓪᓗ, ᐊᒻᒪᓗ ᑐᓴᐅᒪᓕᕐᓗᑎᒃ ᑐᖔᓂ ᓂᕈᐊᕐᓇᐅᑉ ᐅᓪᓗᖓᑕ. ᑐᙵᕕᒃᑯᑦ ᐃᓇᑦᓯᒻᒥᔪᑦ ᓄᓇᕗᒻᒥ ᐃᓄᓐᓂᒃ ᐃᓚᒋᔭᐅᖁᓪᓗᒋᑦ ᑐᓂᓯᖃᑦᑕᕐᓗᑎᒃ ᐊᐱᖅᑯᑎᓂᒃ ᐃᓱᒪᒃᓴᖅᓯᐅᕈᑎᒃᓴᓂᒃ ᑐᙵᕕᒃᑯᑦ ᕙᐃᔅᐳᒃᖓᓄᑦ. ᑭᒃᑯᑐᐃᓐᓇᕐᓂᒃ ᐊᐱᖅᑯᑏᑦ ᐃᑲᔫᑎᓂᐊᖅᑐᑦ ᑐᑭᒧᐊᒍᑕᐅᓗᑎᒃ ᐋᔩᕋᕐᓂᐅᔪᒧᑦ ᐊᒻᒪᓗ ᑖᒃᑯᓇᙵᑦ ᓈᖕᒪᖏᓪᓕᐅᕈᑕᐅᔪᓂᒃ ᐊᒻᒪᓗ ᐱᔪᒪᔭᐅᔪᓂᒃ ᐱᖕᒪᕆᐅᔪᓂᒃ ᓄᓇᓕᓕᒫᓄᑦ ᓄᓇᕗᒻᒥ.
ᐋᔩᕋᕐᓂᖅ ᑕᑯᑦᓴᐅᑦᓴᐅᑎᒋᓂᐊᖅᑐᖅ ᐃᓄᒃᑎᑐᓪᓗ ᖃᓪᓗᓈᑎᑐᓪᓗ ᐃᑲᔫᑎᒃᓴᒥᒃ ᐊᑐᐃᓐᓇᖃᖁᓪᓗᒋᑦ ᑕᑯᓐᓇᖅᑐᑦ ᓄᓇᕗᓕᒫᒥ.
ᓄᓇᕗᒻᒥ ᐃᓄᐃᑦ ᓂᕈᐊᕈᓐᓇᓂᐊᖅᑐᑦ ᑐᙵᕕᒃᑯᑦ ᐊᖓᔪᖅᑳᒧᑦ ᑕᒪᐅᓇᑐᐃᓐᓇᖅ ᓂᕈᐊᖅᑎᑦᓯᓂᖓᓂ ᓂᕈᐊᕐᓇᐅᑉ ᐅᓪᓗᖓᓂ, ᒪᐃ 27, 2026, ᖃᐅᔨᓴᐅᑦ 10−ᒥ ᐅᓪᓗᒃᑯᑦ 7-ᒧᓄᑦ ᐅᓐᓄᓴᒃᑯᑦ ᓄᓇᖓᑕ ᖃᐅᔨᓴᐅᑖᒍᑦ, ᐅᕝᕙᓘᓐᓃᑦ ᓂᕈᐊᖅᐸᒌᕐᓇᒥ ᒪᐃ 20, 2026 ᖃᐅᔨᓴᐅᑦ 10−ᒥ ᐅᓪᓗᒃᑯᑦ 7-ᒧᓄᑦ ᐅᓐᓄᓴᒃᑯᑦ ᓄᓇᓖᑦ ᖃᐅᔨᓴᐅᑖᒍᑦ.
ᑐᑭᓯᒋᐊᒃᑲᓂᕐᕕᑦᓴᖅ ᑐᒥᕕᒃᑯᑦ ᐊᖓᔪᖅᑳᒥᒃ ᑕᒪᐅᓇᐃᓐᓇᖅ ᓂᕈᐊᖅᑎᑦᓯᓂᖓᓂᒃ, ᑕᑯᒋᐊᕐᓗᒋᑦ ᑎᑎᕋᖅᓯᒪᔭᕗᑦ ᐊᐱᖅᑯᑕᐅᒐᔪᑦᑐᑦ (FAQ), ᐅᕙᓂ elections.tunngavik.com.
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᑦᓴᖅ
ᐋᓂ ᑖᒻᓕᓐᓴᓐ
ᑐᑭᒧᐊᒃᑎᑦᑎᔨ ᑐᓴᐅᒪᔪᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
