ᓴᒃᑯᑕᐅᑲᐅᑎᒋᔭᕆᐊᓕᒃ
(ᕖᕝᕗᐊᕆ 11, 2026 – ᐋᑐᕚ, ᐋᓐᑎᐅᕆᔪ) ᓄᓇᕗᑦ ᑐᙵᕕᒃ ᑎᒥᖓ ᖁᕕᐊᓲᑎᓖᑦ ᐊᕐᕕᐊᑦ ᓄᓇᓕᖓ ᓂᕈᐊᖅᑕᐅᓂᖓᓂᒃ ᓯᓚᑦᑐᖅᓴᕐᕕᖃᕐᕕᐅᓂᐊᓕᕐᓂᖓᓂᒃ ᐃᓄᐃᑦ ᓄᓇᖓᓂ ᓯᓚᑦᑐᖅᓴᕐᕕᕐᔪᐊᖓᓂ, ᓇᓗᓇᐃᒃᑯᓯᖅᓯᓪᓗᑎᑦ ᐱᕚᓪᓕᖅᑐᒻᒪᕆᐅᓂᖏᓐᓂᒃ ᐃᓄᖕᓄᑦ−ᓯᕗᒃᑲᖅᑖᖑᔪᒥᒃ ᐃᓕᓐᓂᐊᕐᓂᓕᕆᔪᖃᕐᓂᐊᕐᓂᖓᓂᒃ.
“ᑕᒪᓐᓇ ᐅᐱᓐᓇᖅᑐᒻᒪᕆᐅᕗᖅ ᐊᒻᒪᓗ ᐊᑑᑎᖃᑦᓯᐊᖅᖢᓂ ᐅᓪᓗᖅ ᐃᓄᖕᓄᑦ, ᐃᓄᐃᑦ ᓄᓇᖓᓄᑦ, ᓄᓇᕗᒻᒧᑦ, ᐊᒻᒪᓗ ᐊᒃᓱᒻᒪᕆᒃ ᑲᓇᑕᒧᑦ,” ᐅᖃᖅᖢᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐹᓪ ᐃᕐᖓᐅᑦ. “ᐃᓱᒪᓕᐅᕈᑕᐅᓂᖓ ᓯᓚᑦᑐᖅᓴᕐᕕᓪᓗᐊᑕᖃᕐᕕᐅᓂᐊᕐᓂᖓ ᐃᓄᐃᑦ ᓄᓇᖓᑕ ᓯᓚᑦᑐᖅᓴᕐᕕᕐᔪᐊᖓᓄᑦ ᐊᕐᕕᐊᓃᓐᓂᐊᕐᓗᓂ ᐊᔾᔨᖃᖅᑐᖅ ᓴᙱᓂᖓᓂᒃ ᓄᓇᓕᑉ, ᐃᓄᒃᑎᑐᑦ ᐊᒻᒪᓗ ᐃᓄᐃᑦ ᐃᓕᖅᑯᓯᖓ ᑐᙵᕕᖃᒻᒪᕆᖦᖢᓂ, ᐊᒻᒪᓗ ᐃᓄᐃᑦ ᖃᐅᔨᒪᓂᖏᑦ ᐊᒻᒪᓗ ᓯᕗᓕᖅᑎᐅᓂᖏᑦ ᐊᑯᓂᐊᓗᒃ ᑐᑭᒧᐊᑦᑎᑦᑎᓯᒪᓂᖃᓕᖅᑐᑦ ᐃᓕᓐᓂᐊᕐᓂᕐᒥᒃ.”
ᐊᕐᕕᐊᑦ ᐃᓄᖕᓄᑦ−ᓯᕗᒃᑲᖅᑖᖑᔪᒥᒃ ᐃᓕᓐᓂᐊᕈᑎᒃᓴᓕᐅᕐᕕᐅᓯᒪᓕᕐᒪᑦ ᑐᙵᕕᖃᐅᖅᖢᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐃᓄᐃᑦ ᐃᓕᖅᑯᓯᑦᑎᕚᓗᖏᑕ ᐱᒻᒪᕆᒋᔭᖏᓐᓂᒃ ᐊᒻᒪᓗ ᑐᙵᕕᖏᓐᓂᒃ. ᐃᓱᒪᓕᐅᕐᓂᖏᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᑲᑎᒪᔨᖏᑦ ᓯᓚᑦᑐᖅᓴᕐᕕᖃᕐᕕᐅᓂᐊᕐᓗᓂ ᐊᕐᕕᐊᓂ ᐃᓕᓴᖅᓯᓯᒪᕗᑦ ᓴᙱᓂᖏᓐᓂᒃ ᐊᒻᒪᓗ ᓇᓗᓇᐃᖅᓯᓪᓗᑎᑦ ᐃᓄᐃᑦ ᐃᓕᓐᓂᐊᕐᓂᖏᑦ ᐃᓄᐃᑦ ᓄᓇᖏᖕᓄᑦ ᐱᒋᔭᐅᒻᒪᑕ.
ᓄᓇᕗᑦ ᑐᙵᕕᒃ ᑎᒥᖓ ᑐᓴᖅᑎᑦᑎᓚᐅᖅᓯᒪᕗᑦ ᐃᒪᓐᓇᐅᔪᑦ $50 ᒥᓕᐊᓐ ᑮᓇᐅᔭᑦ ᐊᑐᖅᑕᐅᓂᐊᕐᒪᑕ ᓴᓇᔭᐅᓂᖓᓂᒃ ᐃᓄᐃᑦ ᓄᓇᖓᑕ ᓯᓚᑦᑐᖅᓴᕐᕕᕐᔪᐊᖓᓂᒃ ᐃᓕᓴᕕᐅᒐᔭᖅᑐᒥᒃ. ᑕᒪᓐᓇ ᖄᖓᒍᒃᑲᓐᓂᐅᓯᒪᕗᖅ ᐊᕐᕌᓂ ᑐᓂᓯᓂᐊᕐᓂᕋᖅᓯᒪᓚᐅᖅᓯᒪᓪᓗᑎᑦ $2 ᒥᓕᐊᓐᓂᒃ ᑮᓇᐅᔭᓂᒃ. ᓯᓚᑦᑐᖅᓴᕐᕕᕐᔪᐊᖅ ᐃᑲᔫᓯᐊᖅᑖᓛᕆᕗᑦ ᐃᒪᓐᓇᓂᒃ $50 ᒥᓕᐊᓐ ᑮᓇᐅᔭᓂᒃ ᐃᓕᓐᓂᐊᖅᑏᑦ ᐃᒡᓗᒃᓴᖏᖕᓄᑦ ᐊᒻᒪᓗ $35 ᒥᓕᐊᓐ ᑮᓇᐅᔭᓂᒃ ᐃᓕᓐᓂᐊᕈᑎᒃᓴᓕᐅᕐᓂᕐᒨᖓᒐᔭᕐᓗᑎᑦ.
ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᑕᐃᑲᙶᖅᓯᒪᔪᑦ ᓄᓇᕗᑦ ᑐᙵᕕᒃ ᑎᒥᖓᑕ ᐃᖅᑲᓇᐃᔭᕐᓂᐊᖅᑐᑦ ᐱᓕᒻᒪᒃᓴᖅᑎᑕᐅᓂᖏᑦᑕ ᑮᓇᐅᔭᓂᖏᖕᓂᒃ, ᐊᔪᙱᑦᑎᑕᐅᓯᒪᔪᑦ ᐊᑎᓕᐅᖅᑕᐅᓂᖓᓂᒃ ᓄᓇᕗᒻᒥ ᐊᑐᓕᖅᑎᑦᑎᓂᕐᒧᑦ ᑳᓐᑐᕌᒃᑦ−ᖑᔪᒥᒃ, ᐊᒻᒪᓗ ᐊᔾᔨᖃᑦᑎᐊᓪᓗᐊᕕᐅᑎᑦᑐᑦ ᓄᓇᕗᑦ ᑐᙵᕕᒃ ᑎᒥᖓᑕ ᑲᒪᒋᔭᖃᕆᐊᖃᕐᓂᖓᑦ ᑖᒃᑯᑎᒎᓇᖅ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᒍᑦ ᓯᕗᒧᐊᑦᑎᑦᑎᓗᑎᑦ ᐃᓅᓯᖏᓐᓂᒃ, ᐃᓕᖅᑯᓯᖏᓐᓂᒃ, ᐊᒻᒪᓗ ᑮᓇᐅᔭᓕᐅᕈᓐᓇᕐᓂᕐᒧᑦ ᖃᓄᐃᑦᑕᐃᓕᓂᖏᑦ ᐃᓄᐃᑦ.
“ᓯᓚᑦᑐᖅᓴᕐᕕᒻᒥ ᐃᓕᓐᓂᐊᕐᓂᖅ ᓴᙱᓛᖑᖃᑕᐅᕗᖅ ᐊᖅᑯᑎᒋᔭᐅᓗᓂ ᐃᓄᐃᑦ ᓇᖕᒥᓂᖅᓱᓕᖁᓪᓗᒋᑦ, ᓴᙱᔪᒥᒃ ᐊᐅᓚᑦᓯᓂᖃᕐᓗᑎᑦ, ᐊᒻᒪᓗ ᐱᕈᖅᐸᓪᓕᐊᔪᑯᓗᓐᓂᒃ ᓄᓇᓕᖃᖁᓪᓗᒋᑦ,” ᐅᖃᖅᖢᓂ ᐃᕐᖓᐅᑦ. “ᐃᓄᐃᑦ ᓄᓇᖓᖕᓂ ᓯᓚᑦᑐᖅᓴᕐᕕᕐᔪᐊᖅ ᐱᕕᖃᓕᖅᑎᑦᑎᓂᐊᖅᑐᖅ ᐃᓄᐃᑦ ᐃᓕᓐᓂᐊᖅᑎᓄᑦ ᐊᖏᕐᕋᖏᑕ ᖃᓂᒋᔭᖏᓐᓃᓐᓂᖅᓴᐅᓗᑎᑦ, ᐃᑲᔪᑐᖅᑕᐅᓕᕐᓗᑎᑦ ᐃᓄᐃᑦ ᐃᓕᓴᐃᔨᖏᑦ ᐊᒻᒪᓗ ᖃᐅᔨᒪᔨᐅᔪᑦ, ᐃᖅᑲᓇᐃᔮᖅᑖᖅᑎᑦᑎᓗᓂ, ᐊᒻᒪᓗ ᐊᑯᓂᐅᔪᒧᑦ ᐃᑲᔫᑎᖃᖅᑎᑦᑎᓗᓂ ᐊᕐᕕᐊᓂ ᐊᒻᒪᓗ ᐃᓄᐃᑦ ᓄᓇᖓᓂ.”
ᓄᓇᕗᑦ ᑐᙵᕕᒃ ᑎᒥᖓ ᖁᔭᓐᓇᒦᖅᑐᒻᒪᕆᐅᕗᑦ ᐊᒻᒪᓗ ᖁᔭᓕᓂᖃᒻᒪᕆᑦᑐᑎᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂ ᓯᕗᓕᖅᑎᐅᓚᐅᕐᓂᖏᖕᓄᑦ ᐊᒻᒪᓗ ᑕᐅᑐᙳᐊᒐᖃᖅᓯᒪᓂᖏᖕᓄᑦ ᓯᓚᑦᑐᖅᓴᕐᕕᕐᔪᐊᖅᑕᖃᕐᓗᓂ ᓄᓇᑦᑎᓐᓂ, ᐊᒻᒪᓗ ᖁᔭᒋᓪᓗᒋᑦ ᐊᕐᕕᐊᕐᒥᐅᑦ ᐅᐸᓗᖓᐃᔭᖅᓯᒪᓂᖏᓐᓄᑦ ᐃᓕᓐᓂᐊᕐᕕᖃᕐᓂᐊᕐᓗᑎᑦ, ᐊᒻᒪᓗ ᖁᔭᓐᓇᒦᖅᖢᒋᑦ ᑕᐃᒃᑯᐊᓕᒫᑦᓯᐊᖅ ᑕᖃᔪᐃᑦᑑᓪᓗᑎᑦ ᐃᖅᑲᓇᐃᔮᖃᖅᓯᒪᔪᑦ ᐱᒻᒪᕆᐅᔪᖅ ᐃᓄᐃᑦ ᓄᓇᖓᓂ ᓯᓚᑦᑐᖅᓴᕐᕕᕐᔪᐊᖅ ᐱᕚᓪᓕᕈᑎᒋᔭᐅᓕᖁᓪᓗᒍ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
