ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᐊᔪᐃᓐᓇᖅᑐᑦ ᑲᓇᑕᒥᒃ ᓴᓐᖏᔪᒥᒃ ᐊᑭᕋᖅᑐᖁᓪᓗᒋᑦ ᓇᑦᓯᕋᔭᓐᓂᒃ ᐱᖃᑦᑕᕈᒪᐃᕐᓂᖏᓐᓄᑦ

(ᒪᐃ 6, 2009 – ᑲᖏᖅᖠᓂᖅ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐊᖓᔪᖅᑳᖓᑦᑕ ᑐᖏᓕᖓ ᑮᓇᐅᔭᓕᕆᓂᕐᒧᑦ, ᕋᐃᒪᓐ ᓂᖏᐅᑦᓯᐊᖅ ᖁᐊᖅᓵᓚᐅᖅᑐᖅ ᑐᓴᓕᕋᒥ ᑕᕆᐅᑉ ᐊᑭᐊᓂᒃ European Union-ᑯᑦ ᒐᕙᒪᖏᑦ ᑲᔪᓯᑎᑦᓯᔪᒥᓂᐅᒻᒪᑕ ᓯᕗᓪᓕᖅᐹᒥ ᐅᖃᓕᒫᖅᑕᐅᓂᖓᓂᒃ ᓄᖅᑎᑦᓯᓂᐅᑉ ᑎᑭᑎᑕᐅᖃᑦᑕᕐᓂᖏᓐᓂᒃ ᓇᑦᓯᕋᔭᐃᑦ.

“ᑕᒪᓐᓇ ᓄᖅᑲᖓᑎᑦᓯᓂᐅᔪᖅ ᖁᐊᖅᓵᕐᓇᖏᒃᑲᓗᐊᖅᓱᓂ, ᓱᓕ ᖁᐊᖅᓵᕐᓇᖅᑐᖅ ᑕᐃᒪᐃᑦᑐᒥᒃ ᐋᖅᑮᔪᖃᕐᓂᐊᖅᐸᑦ ᑐᓐᖓᕕᖃᕆᐊᖃᕐᒪᑕ ᐊᑑᑎᓪᓚᕆᑦᑐᓂᒃ ᐃᓱᒪᒋᔭᑐᐃᓐᓇᕐᓂᐅᖏᑦᑐᖅ. ᐅᖓᑖᓃᑦᑐᑦ 5-ᒥᓕᐊᓐ ᓇᑦᓰᑦ ᐋᑦᓛᓐᑎᒃ ᑕᕆᐅᖓᓂ ᑕᒪᓐᓇ ᓄᖅᑲᑎᑦᓯᓂᐅᔪᖅ ᓴᐳᔾᔨᓂᕐᒨᖓᓐᖏᒻᒪᑦ.” ᐅᖃᖅᑐᖅ ᓂᖏᐅᑦᓯᐊᖅ.

ᓇᓚᐅᑦᓵᖅᑕᐅᓯᒪᔪᑦ ᖃᐃᕈᓖᑦ ᐋᑦᓛᓐᑎᒃ ᑕᕆᐅᖓᓂ ᐊᑯᕐᖓᓐᓃᑦᑐᑦ 5.4 ᐊᒻᒪᓗ 5.8-ᒥᓕᐊᓐ.

1993-ᖑᑎᓪᓗᒍ, ᑕᕆᐅᑉ ᐊᑭᓂᒥᐅᑦ ᓄᖅᑲᑎᑦᓯᓚᐅᖅᓯᒪᒻᒥᒻᒪᑕ “ᓇᑦᓯᐊᒥᓂᕐᓂᒃ” (ᓇᑦᓯᐊᒥᓃᑦ). ᑕᐃᒪᐃᑦᑎᓪᓗᒍ ᐱᔭᐅᒍᒪᓗᐊᕈᓐᓃᓚᐅᖅᓯᒪᔪᑦ ᐊᑭᑭᓪᓕᑦᓱᑎᓪᓗ ᕿᓰᑦ ᐊᒻᒪᓗ ᑕᒪᓐᓇ ᐊᑦᑐᐃᓯᒪᔪᔪᖅ ᐃᓄᓐᓂᒃ ᐃᓄᐃᓪᓗ ᓄᓇᓕᖏᓐᓂᒃ.

“ᐊᑦᑐᐃᓗᐊᑦᑕᐃᓕᒪᓂᖃᕋᓱᑦᑑᒐᓗᐊᑦ ᓄᖅᑲᖓᑎᑦᓯᓂᖓᑦ ᐃᓄᓐᓂᒃ ᐊᒻᒪᓗ ᓄᓇᓕᕗᑦ ᓄᖅᑲᖓᑎᑦᓯᕕᐅᒐᑎᒃ. ᑭᓯᐊᓂᓕ ᐊᑑᑎᓯᒪᔪᖅ ᑕᑯᓐᓇᖅᓱᒍ ᓄᖅᑲᑎᑦᓯᔪᖃᕐᒪᑦ, ᐱᔭᐅᖏᑦᑑᑑᔪᖃᕋᓗᐊᖅᑎᓪᓗᒍ, ᐊᑦᑐᐃᓂᕐᓗᓐᓂᖃᓲᖅ ᑭᓇᒃᑯᓕᒫᓂᒃ. ᓄᖅᑲᖓᑎᑦᓯᓂᖅ ᐃᒻᒪᖃ ᐊᔾᔨᐅᓐᖏᑎᑦᓯᒍᓐᓇᖅᑑᒐᓗᐊᑦ ‘ᐃᓄᐃᑦ’ ᐊᒻᒪᓗ ‘ᐱᖅᑯᓯᖅ’ ᑭᓯᐊᓂ ᕿᑎᖓᓃᑦᑐᖃᓐᖏᒻᒪᑦ.” ᐅᖃᓚᐅᖅᑐᖅ ᓂᖏᐅᑦᓯᐊᖅ.

ᒐᕙᒪᑐᖃᒃᑯᑦ ᒥᓂᔅᑕᖓᑦ ᓄᓇᕐᔪᐊᕐᒥ ᑕᐅᖅᓰᖃᑦᑕᕐᓂᕐᒧᑦ, ᓯᑖᒃᕕᐅᓪ ᑕᐃ ᐅᓇᒻᒥᓱᓐᓂᐊᕐᓂᕋᖅᑐᖅ ᑕᕆᐅᑉ ᐊᑭᐊᓂ ᓇᑦᓯᕋᔭᐃᑦ ᓄᖅᑲᖅᑎᑕᐅᓂᖏᓐᓂᒃ ᓄᓇᕐᔪᐊᕐᒥ ᑕᐅᖅᓰᖃᑦᑕᕐᓂᕐᒧᑦ ᑎᒥᐅᔪᑎᒍᑦ.

“ᓄᖅᑲᖓᑎᑦᓯᓂᐅᔪᖅ ᑲᔪᓯᑎᑕᐅᓯᒪᓕᖅᑐᖅ ᓯᕗᓪᓕᖅᐹᒥ ᐅᖃᓕᒫᖅᑕᐅᓂᖓ, ᑭᓯᐊᓂ ᓱᓕ ᐱᕕᑦᓴᖅᑕᓕ ᐊᑭᕋᖅᑐᕐᓂᕐᒥᒃ ᒪᓕᒐᕈᓐᖏᓐᓂᖓᓂ. ᑐᓐᖓᓱᑦᑎᑉᐸᑕ ᒥᓂᔅᑕ ᑕᐃ ᑐᓂᒪᓂᖓᓄᑦ ᐊᑭᕋᖅᑐᕐᓂᕐᒧᑦ ᓄᖅᑲᑎᑦᓯᓂᐅᔪᒥᒃ ᓄᓇᕐᔪᐊᕐᒥ ᑕᐅᖅᓰᖃᑦᑕᕐᓂᕐᒧᑦ ᑎᒥᐅᔪᑎᒍᑦ. ᐃᓅᓪᓗᑕ ᑲᓇᑕᒥᐅᓐᖑᓪᓚᑕᓗ ᐅᓇᑕᖃᑎᒌᖏᓐᓇᕐᓂᐊᖅᑐᒍᑦ ᓄᖅᑲᖅᑎᑦᓯᓂᐅᔪᒥᒃ.”

ᑐᑭᓯᒋᐊᒃᑲᓐᓂᕕᑦᓴᖅ:

ᕖᔭᐃ ᕚᓐᔅ
ᐊᐅᓚᑦᓯᔨᐅᑉ ᑐᖏᓕᖓ ᑐᓴᐅᒪᔪᓕᕆᓂᕐᒥ
ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ
ᐅᖄᓚᐅᑖ: (867) 975-4905 ᐊᑭᖃᓐᖏᑦᑐᖅ: 1-888-646-0006

www.tunngavik.com