(ᐆᑦᑑᑉᐱᕆ 21, 2020 – ᐃᖃᓗᑦᑑᑦᑎᐊᕐᒃ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃ) ᓴᖅᑮᓚᐅᖅᑐᑦ ᓄᓇᕗᒻᒥ ᐱᖁᑎᕐᔪᐊᓕᕆᓂᕐᒧᑦ ᐊᐳᖅᑕᕐᕕᐅᕙᑦᑐᓂᒃ ᐅᓂᒃᑳᑦ ᐅᓪᓗᒥ, ᓯᕗᓪᓕᐹᑦᓯᐊᒥ ᐊᑕᖐᔪᖅ ᖃᐅᔨᓴᕐᓂᖅ ᐱᖁᑎᕐᔪᐊᓂᒃ ᓄᓇᕗᒻᒥ ᑕᑯᓐᓇᕐᓗᒋᑦ ᐊᓯᓕᒫᖏᑦ ᑲᓇᑕᒥ. ᐃᓘᓐᓇᖏᓐᓂᒃ ᐱᖁᑎᕐᔪᐊᓕᕆᓂᕐᒧᑦ ᐱᓕᕆᕝᕕᓐᓂ ᕿᒥᕐᕈᔭᐅᓚᐅᖅᑐᓂ, ᓄᓇᕗᑦ ᓵᙵᑦᓯᔪᖅ ᐅᔾᔨᓇᖅᑐᒥᒃ ᐊᐳᖅᑕᕕᓐᓂᒃ ᑕᑯᓐᓇᖅᑕᐅᓗᑎᒃ ᑲᓇᑕᓕᒫᒥ ᐊᑐᖅᑕᐅᖃᑦᑕᓲᓂᒃ.
ᐅᓂᒃᑳᖅ ᑐᑭᓯᓇᓱᐊᕈᑎ ᑎᑭᐅᑎᓯᒪᔪᓂᒃ ᐱᖁᑎᕐᔪᐊᓂᒃ ᓯᕗᓪᓕᐅᔾᔭᐅᔭᕆᐊᓕᓐᓂᒃ ᐃᓚᒋᔭᐅᓪᓗᑎᒃ ᐃᓪᓗᓕᕆᓂᖅ, ᖃᕆᓴᐅᔭᓕᕆᓂᖅ ᕗᕌᑦᕙᓐ, ᐋᓐᓂᐊᖅᑐᓕᕆᓂᖅ, ᐆᒻᒪᖅᑯᑎᓕᕆᓂᖅ, ᐊᒻᒪᓗ ᑐᓚᑦᑕᕐᕖᑦ ᐃᑦᓴᕖᓪᓗ. ᖃᐅᔨᓴᕈᑎᓂ ᑕᑯᑦᓴᐅᔪᖅ ᓄᓇᕗᒻᒥ ᐱᖁᑎᕐᔪᐊᖏᑦ ᓈᖕᒪᙱᒐᔪᓐᓂᖏᓐᓂᒃ, ᓱᒃᑰᓪᓗᑎᒃ ᓴᓇᒋᐊᕆᐊᓖᑦ, ᐅᕝᕙᓘᓐᓃᑦ ᐱᑕᖃᙱᓯᐊᒻᒪᕆᑦᑐᑎᒃ ᑕᑯᒋᐊᕐᓗᒍ ᑲᓇᑕᒥ ᑐᙵᕕᒋᖃᑦᑕᖅᑕᖓ.
“ᓄᓇᕗᒻᒥ ᐃᓄᐃᑦ ᕿᓄᙱᑦᑐᑦ ᐊᔾᔨᐅᙱᑦᑐᒥᒃ ᐱᔭᐅᓂᖅᓴᐅᒍᒪᓂᕐᒥᒃ. ᐊᐱᖅᓲᑎᕗᓪᓕ ᑕᐃᒫᑦᓴᐃᓐᓇᖅ ᐱᔭᐅᒍᒪᓪᓗᑕ ᐱᖁᑎᕐᔪᐊᖃᖅᑎᑕᐅᕙᓐᓂᖏᑎᑐᑦ ᐱᔨᑦᓯᕈᑎᓄᓪᓗ ᐊᓯᖏᓐᓄᑦ ᑲᓇᑕᒥᐅᓄᑦ ᓂᕆᐅᒋᔭᐅᕙᑦᑐᓂᒃ ᑲᓇᑕᒥ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓ ᑐᙵᕕᒃᑯᑦ. “ᐊᖏᓂᖓ ᐊᐳᖅᑕᕐᕕᐅᕙᑦᑐᖅ ᖁᐊᖅᓵᓇᙱᒻᒪᕆᑦᑐᖅ ᓄᓇᕗᒻᒥ ᐃᓄᓐᓄᑦ: ᖃᐅᑕᒫᑦ ᐊᑐᕋᑦᑎᒍ ᐃᓅᓯᑦᑎᓐᓂ. ᐊᐳᖅᑕᕐᕕᒃ ᐊᐳᖅᓯᒪᒍᑕᐅᒻᒪᑦ ᐱᔪᓐᓇᕋᔭᖅᑕᕋᓗᐊᑦᑎᓐᓄᑦ, ᐊᒻᒪᓗ ᑲᓱᖅᑎᑕᐅᒋᐊᖃᕐᓂᖓ ᐊᑐᖅᑕᐅᒋᐊᓕᒃ ᑎᓕᓯᔾᔪᑕᐅᓗᓂ ᓴᐃᒻᒪᖃᑎᒌᓐᓂᕐᒧᑦ”
ᓴᓂᕌᒍᑦ ᐱᖁᑎᕐᔪᐊᖑᔭᕆᐊᓕᓐᓂᒃ ᖃᐅᔨᓴᕐᓂᐅᑉ 55 ᐱᖁᑎᕐᔪᐊᓄᑦ ᖃᐅᔨᒪᔾᔪᑎᓄᑦ, ᐅᓂᒃᑳᒥ ᓇᓗᓇᐃᖅᑐᖅᑕᐅᓯᒪᔪᑦ ᐃᓅᓯᕐᒧᑦ ᐊᒃᑐᐃᓂᖃᖅᓯᒪᓂᖓ ᑕᐃᒪᐃᑦᑐᖅ ᐊᐳᖅᑕᕐᕕᒃ ᓄᓇᕗᒻᒥ ᐃᓄᓐᓄᑦ. ᐃᓄᖅᓯᓯᒪᓂᖓ ᓈᖕᒪᑦᑐᓂᒃ ᐱᖁᑎᕐᔪᐊᖃᙱᓂᕐᒧᑦ ᐅᓗᕆᐊᓇᖅᑐᖅ ᓈᖕᒪᖏᓪᓕᐅᕈᑕᐅᓪᓗᐊᑕᖃᑦᑕᖅᑐᓄᑦ ᓄᓇᕗᒻᒥ ᐃᓄᐃᑦ ᐱᖃᕆᐊᖃᕐᓂᖏᓐᓂᒃ ᖃᓄᐃᙱᑦᓯᐊᕆᐊᖃᕐᓂᖏᓐᓄᓪᓗ, ᐃᓚᒋᔭᐅᓪᓗᓂ ᑮᓇᐅᔭᓕᐅᕈᑎᒃᓴᖃᕆᐊᖃᕐᓂᖅ, ᓂᕆᔭᑦᓴᖃᑦᓯᐊᕆᐊᖃᕐᓂᖅ, ᐊᓪᓛᑦ ᓄᕙᔾᔪᐊᕐᓇᖅ-19-ᒧᑦ ᐸᕐᓇᓯᒪᒋᐊᖃᕐᓂᖅ.
ᑕᖅᑭᕆᓚᐅᖅᑕᑎᓐᓂ, ᒐᕙᒪᑐᖃᒃᑯᑦ ᐊᖏᕈᑎᖃᕆᐊᒃᑲᓐᓂᓚᐅᖅᑐᑦ ᒪᑐᓯᓂᐊᕐᓂᕐᒥᒃ ᐅᑭᐅᑕᖅᑐᒥ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐱᖁᑎᕐᔪᐊᓕᕆᓂᕐᒧᑦ ᐊᐳᖅᑕᕐᕕᖏᓐᓂᒃ ᐃᓚᒋᓪᓗᓂᐅᒃ ᑯᐃᓐ ᑭᒡᒐᖅᑐᐃᔨᖓᑕ ᐅᖃᐅᓯᕆᓚᐅᖅᑕᖏᓐᓂᒃ.
“ᑕᕝᕘᓇ ᐅᓂᒃᑳᒃᑯᑦ, ᖃᐅᔨᒪᓕᖅᑐᒍᑦ ᐊᖏᑎᒋᓂᖓᓂᒃ ᓄᓇᕗᒻᒥ ᐱᖁᑎᕐᔪᐊᓕᕆᓂᕐᒧᑦ ᐊᐳᖅᑕᕕᒃ. ᒫᓐᓇ ᒐᕙᒪᑐᖃᒃᑯᑦ ᐱᓇᓱᐊᖃᑎᖃᕆᐊᖃᓕᖅᑐᑦ ᓄᓇᕗᒻᒥ ᐃᓄᓐᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᒃᓴᖏᓐᓂᒃ ᑎᑭᐅᑎᒍᑎᒋᓗᒋᑦ ᐊᖏᕈᑎᒋᓯᒪᔭᒥᓄᑦ,” ᐅᖃᖅᑐᖅ ᑰᑦᑎᖅ. “ᐃᓄᐃᑦ ᐊᑐᐃᓐᓇᐅᓕᖅᑐᑦ ᑕᒪᑦᓱᒥᖓ ᐱᔭᕆᐊᓕᒻᒥᒃ ᐃᖅᑲᓇᐃᔭᖃᑎᖃᕐᓂᕐᒥᒃ ᐋᑐᕚᒥᒃ.”
ᑐᓴᕐᓗᐊᕐᓇᐃᑦ ᐅᓂᒃᑳᓂ:
- ᓄᓇᕗᑦ ᖁᑦᓯᓂᖅᐹᖑᔪᖅ ᐊᖏᕐᕋᕆᔭᐅᔪᓂ ᐸᖕᒥᐅᓗᐊᖃᑦᑕᖅᑐᓂ ᑲᓇᑕᒥ, ᐊᒻᒪᓗ ᐊᖏᓂᖅᐹᖑᓪᓗᓂ ᐃᓪᓗᖏᑦ ᓴᓇᒋᐊᕆᐊᓕᒻᒪᕆᐅᔪᑦ (6-ᖏᖅᑕᒐᓚᑦᑐᒥᒃ ᑲᓇᑕᒥ ᐊᔾᔨᒌᙱᒍᑎᖓ).
- ᓄᓇᕗᒻᒥ ᐃᓅᓴᓐᓂᖅᐹᑦ ᐃᖅᑲᓇᐃᔭᖅᑎᖏᑦ ᐊᒻᒪᓗ ᐊᑐᖅᑕᐅᕙᑦᑐᓂ ᐋᓐᓂᐊᕕᓐᓂ ᐃᓪᓕᕐᓂ ᐃᓄᒋᐊᒃᑎᒋᓂᖏᑎᒍᑦ ᑲᓇᑕᒥ (1,095 ᐃᓄᖏᑦ ᐊᑕᐅᓯᕐᒥ ᐃᓪᓕᕐᒥ, ᑕᑯᓐᓇᕐᓗᒍ ᑲᓇᑕᓕᒫᒥ 409−ᒨᖓᖃᑦᑕᑎᓪᓗᒋᑦ).
- ᓱᑲᓐᓂᖅᐹᖑᒍᓐᓇᖅᑐᖅ ᐃᑭᐊᖅᑭᕕᒃᑯᑦ ᓱᑲᓐᓂᕆᒍᓐᓇᖅᑕᖓ ᐊᑐᐃᓐᓇᐅᔪᖅ ᓄᓇᕗᒻᒥ 8-ᖏᖅᓱᖅᑐᒥᒃ ᓱᒃᑲᐃᓂᖅᓴᖅ ᑲᓇᑕᓕᒫᒥ ᑎᑭᐅᑎᓯᒪᓂᖓᒍᑦ.
- ᓄᓇᕗᑦ ᑖᓐᓇᑐᐊᖅ ᑲᓇᑕᐅᑉ ᐊᕕᑦᑐᖅᓯᒪᓂᖏᓐᓂ ᐅᑭᐅᖅᑕᖅᑐᖏᓐᓂᓗ ᑕᑯᔭᒐᖃᕐᕕᖃᙱᑦᑐᖅ ᑐᑦᑕᕐᕕᒻᒥ ᐅᕝᕙᓘᓐᓃᑦ ᐃᑦᑕᕐᓂᓴᖃᕐᕕᒻᒥᒃ.
- ᐊᕝᕙᒐᓚᖏᑦ ᓄᑕᖅᑲᑦ ᐃᓅᓕᖅᓯᒪᔪᑦ ᓄᓇᕗᒻᒥ ᐃᓄᓐᓄᑦ ᐃᕐᓂᐊᖑᖃᑦᑕᖅᑐᑦ ᖃᓪᓗᓈᓂ ᐋᓐᓂᐊᕕᓐᓂ, ᐊᒻᒪᓗ ᐊᒥᓲᓂᖅᓴᐃᑦ ᐃᖢᐊᖅᓴᐃᔾᔪᑎᕐᔪᐊᓄᑦ ᒪᒥᓴᖅᑕᐅᒋᐊᓖᑦ ᓄᓇᕗᑦ ᓯᓚᑖᓅᕆᐊᖃᖃᑦᑕᖅᑐᑦ.
ᓄᓇᕗᑦ ᑐᙵᕕᒃ ᑎᒥᖓᑕ ᒥᑦᓵᓄᑦ
ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᑲᑐᔾᔨᖃᑎᒌᑦ ᑭᒡᒐᖅᑐᐃᔪᖅ ᓄᓇᕗᒻᒥ 33,000−ᓂᒃ ᐃᓄᓐᓂᒃ ᐊᒻᒪᓗ ᐱᔪᓐᓇᐅᑎᖏᓐᓂᒃ ᓄᓇᕗᑦ ᐊᖏᕈᑎᖏᑎᒍᑦ. ᐃᓄᐃᑦ 83%-ᒋᔭᖏᑦ ᓄᓇᕗᑦ ᐃᓄᒋᐊᒃᑎᒋᓂᖓᑕ. ᑐᙵᕕᒃᑯᑦ ᐊᐅᓚᑕᐅᔪᑦ ᑲᑎᒪᔨᓄᑦ ᓂᕈᐊᖅᑕᐅᓯᒪᔪᓄᑦ ᓄᓇᕗᒻᒥ ᐃᓄᓐᓄᑦ ᐅᑭᐅᓕᓐᓄᑦ 16-ᓂᒃ ᐅᖓᑖᓂᓗ. ᑐᙵᕕᒃᑯᑦ ᐋᖅᑭᐅᒪᑦᓯᖃᑦᑕᖅᑐᑦ ᐊᐅᓚᑦᓯᖃᑦᑕᖅᑐᑎᓪᓗ ᐃᓄᐃᑦ ᐱᓕᕆᐊᒃᓴᖏᓐᓂᒃ ᐊᖏᕈᑕᐅᓯᒪᔪᓂ ᓄᓇᕗᑦ ᐊᖏᕈᑎᖏᓐᓂ ᐊᒻᒪᓗ ᖃᐅᔨᒪᒋᐊᖅᑎᐅᓪᓗᑎᒃ ᒐᕙᒪᑐᖃᒃᑯᑦ ᐊᒻᒪᓗ ᓄᓇᕗᑦ ᒐᕙᒪᖓ ᑲᔪᓯᑎᑦᓯᓕᕋᓗᐊᕐᒪᖔᑕ ᐱᓇᓱᐊᒐᑦᓴᒥᓂᒃ.
-30-
ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:
ᓇᐅᓪᓚᕐᒃ ᕙᓚᐅᕋᑎ
ᑐᑭᒧᐊᒃᑎᑦᑎᔨ ᑐᒡᓕᐊ ᑐᓴᐅᒪᔾᔪᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: 867-975-4900 ᐊᑭᖃᙱᑦᑐᖅ: 1-888-646-0006
