ᓴᖅᑭᑕᐅᑲᐅᑎᒋᔭᕆᐊᓕᒃ
ᔫᓂ 16, 2026 – ᐃᖃᓗᐃᑦ, ᓄᓇᕗᑦ – ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᐊᖏᖅᓯᓚᐅᖅᐳᑦ ᐋᕿᒋᐊᖅᑕᐅᔪᓂᒃ ᓄᓇᕗᑦ ᑐᙵᕕᒃᑯᑦ ᐃᑲᔫᑎᒃᓴᓕᕆᔨᒃᑯᑦ NTF ᐃᓕᓐᓂᐊᕈᑎᒃᓴᖅᑖᕐᓂᕐᒧᑦ ᐊᑐᐊᒐᕐᒥᒃ ᑲᑎᒪᑎᓪᓗᒋᑦ ᑭᙵᕐᓂ, ᓄᓇᕗᒻᒥ, ᓯᑎᐱᕆ 24, 2025−ᒥ. ᐃᓚᒋᔭᐅᓪᓗᓂ ᑖᒃᑯᓄᖓ ᐊᓯᔾᔨᕐᓂᐅᔪᓄᑦ ᑮᓇᐅᔭᖅᑖᕐᕕᒃ ᓄᖃᖅᑎᑦᑎᓯᒪᓕᖅᐳᖅ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᒃᓴᖅᑖᕆᕙᒃᑕᒥᓂᒃ, ᖃᓪᓕᖅᓯᓯᒪᓂᖏᓐᓄᑦ ᐊᔾᔨᐸᓗᖏᓐᓂᒃ ᑮᓇᐅᔭᓂᒃ ᒫᓐᓇ ᐊᑐᐃᓐᓇᕈᖅᑎᑕᐅᔪᓂᒃ ᒪᑭᒋᐊᖅᑕ ᐃᓄᐃᑦ ᐱᓕᒻᒪᒃᓴᐃᓂᕐᒧᑦ ᑲᑐᔾᔨᖃᑎᒌᓄᑦ.
2016−ᒥ ᓄᓇᕗᑦ ᑐᙵᕕᒃᑯᑦ ᐃᑲᔫᑎᒃᓴᓕᕆᔨᒃᑯᑦ ᐱᑎᑕᐅᓚᐅᖅᐳᑦ $8,559,561−ᓂᒃ ᓇᓗᓇᐃᖅᑕᐅᓯᒪᔪᓂᒃ ᖃᑉᓯᐅᓂᕆᔭᖏᓐᓂᒃ ᑮᓇᐅᔭᖁᑎᒋᔭᐅᔪᓂᒃ ᐋᕿᒃᑕᐅᓯᒪᔪᓂᒃ ᐅᑯᑎᒎᓇᖅ, ᐊᓪᓚᐃᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓂᖏᓐᓄᑦ ᐊᖏᖃᑎᒌᒍᑎᒃᑯᑦ. ᑖᑉᑯᐊ ᑮᓇᐅᔭᑦ ᐃᑲᔫᑕᐅᓇᓱᓚᐅᖅᐳᑦ ᐃᓕᓐᓂᐊᕐᓂᓕᕆᓂᕐᒧᑦ, ᐅᖃᐅᓯᓕᕆᓂᕐᒧᑦ, ᐃᓕᖁᓯᕐᒧᑦ ᐊᒻᒪ ᐱᐅᓯᕆᔭᐅᕙᓚᐅᖅᑐᓄᑦ ᑐᙵᕕᓕᖕᓂᒃ ᐱᓕᕆᐊᒃᓴᓂᒃ ᒪᓕᒃᖢᑎᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᐊᖏᕈᑕᐅᓚᐅᖅᑐᒥᒃ ᑲᓇᑕᒥ ᐊᒻᒪ ᐃᓄᕕᐊᓗᐃᑦ ᐃᓕᓐᓂᐊᕐᓂᓕᕆᓂᕐᒧᑦ ᑐᙵᕕᖓᓄᑦ.
ᐊᕐᕌᒍᓂ ᖁᓕᓂ ᐊᓂᒍᖅᑐᓂᒃ, ᑮᓇᐅᔭᖅᑖᕐᕕᒃ ᑖᒃᑯᓂᖓ ᑮᓇᐅᔭᓂᒃ ᐊᑐᑦᑕᖅᓯᒪᕗᑦ ᐃᓕᓐᓂᐊᕈᑎᒃᓴᖅᑖᖅᑎᑦᓯᕙᒃᖢᑎᒃ ᐊᒻᒪ ᐱᓕᕆᐊᒃᓴᓂᒃ ᐃᑲᔫᑕᐅᖃᑦᑕᖅᓯᒪᔪᓂᒃ ᐃᓄᖕᓄᑦ ᓄᓇᕘᓕᒫᒥ. ᑭᓯᐊᓂ, ᐊᒥᐊᒃᑯᖏᑦ ᑮᓇᐅᔭᑦ ᓂᕆᐅᒋᔭᐅᕗᑦ ᓄᖑᓐᓂᐊᕋᓱᒋᔭᐅᑉᓗᑎᒃ 2026 ᕿᑎᖅᐸᓯᐊᓂ. ᑲᒪᒋᔭᐅᑦᑎᐊᖁᑉᓗᒍ ᑐᙵᕕᒃᑯᑦ ᐃᑲᔫᑎᒃᓴᖏᑦ ᐊᒻᒪ ᐃᑲᔪᖅᑐᐃᖏᓐᓇᕐᓗᑎᒃ ᓯᕗᓪᓕᐅᔾᔭᐅᔭᕆᐊᓕᖕᓄᑦ ᐱᓕᕆᐊᓄᑦ, ᑲᑎᒪᔩᑦ ᐃᓱᒪᓕᐅᕆᓚᐅᖅᐳᑦ ᓄᖅᑲᖅᑎᑦᓯᔪᒪᓪᓗᑎᒃ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᒃᓴᖅᑖᖅᐸᒃᑐᓂᒃ.
ᓯᓚᑦᑐᖅᓴᕐᕕᖕᒥ ᐃᓕᓐᓂᐊᒃᑲᓐᓂᕈᑎᒃᓴᑦ ᐊᑐᐃᓐᓇᐅᔪᖕᓃᕋᓗᐊᖅᑎᓪᓗᒋᑦ, ᑮᓇᐅᔭᖅᑖᕐᕕᒃ ᑲᔪᓰᓐᓇᕐᓂᐊᖅᐳᑦ ᒪᓂᒪᑎᑦᓯᕙᒡᓗᑎᒃ ᐊᔪᕈᖕᓃᖅᑕᐅᕙᒃᑐᓄᑦ ᐃᖃᓇᐃᔭᕐᓂᕐᒧᓪᓗ ᐱᕚᓪᓕᕈᑎᒃᓴᓄᑦ ᐃᓕᓐᓂᐊᕈᑎᒃᓴᓂᒃ ᐃᓚᖃᕐᓗᓂ ᐃᓕᖁᓯᑐᖃᕐᓄᑦ ᒪᒥᓴᕐᓂᕐᒧᓪᓗ ᐱᓕᕆᐊᖑᕙᒃᑐᓄᑦ.
ᑐᑭᓯᒋᐊᒐᒃᓴᑦ ᒪᑭᒋᐊᖅᑕ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑕᐅᔪᒃᓴᑦ ᐊᑐᐃᓐᓇᐅᔪᑦ ᐅᕙᓂ https://makigiaqta.com/wp-content/uploads/2026/04/PSE-Funding-Policy-2024-01-revised-2025-06.pdf
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ
ᐋᓂ ᑖᒻᓴᓐ
ᑐᑭᒧᐊᑦᑎᑦᓯᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
