ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᓴᖅᑮᔪᑦ ᓄᑖᒥᒃ ᓂᐱᑎᑖᒥᒃ

(ᔪᓚᐃ 9, 2012 — ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᓇᓗᓇᐃᖅᓯᒪᔪᒥᒃ ᓴᖅᑮᔪᖅ ᓄᑖᒥᒃ ᓂᐱᑎᑖᒥᒃ ᐃᑲᔫᑎᓂᐊᖅᑐᒥᒃ ᑐᓴᐅᒪᖁᓪᓗᒋᑦ ᓄᓇᕗᒻᒥᐅᑦ, ᖃᓪᓗᓈᓂ ᓄᓇᓖᑦ ᑲᓇᑕᒥ, ᐊᒻᒪᓗ ᓯᓚᕐᔪᐊᕐᒥᐅᑦ ᖃᐅᔨᖃᑦᑕᖅᑐᑦ ᖃᓄᐃᓐᖏᓯᐊᕐᓂᖓᓂᒃ ᓇᓄᖃᕐᓂᖓ ᓄᓇᕗᑦ.

ᐅᑭᐅᕋᓴᓐᓂᒃ, ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑦ ᐊᑐᖃᑦᑕᕐᓯᒪᒻᒪᑕ ᓈᒪᓐᖏᑦᑐᓂᒃ ᖃᐅᔨᓴᖅᑎᓄᑦ ᖃᐅᔨᓴᕈᑎᒥᓂᕐᓂᒃ ᐃᓱᒪᒋᔭᒥᓂᒃ ᐊᒃᑐᐃᓂᖃᕐᓂᐊᕐᓂᖓᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓ ᓇᓄᖏᓐᓄᑦ ᐃᓅᓴᓪᓕᕙᓪᓕᕈᑕᐅᓂᐊᕐᓂᖓᓂᒃ ᓄᓇᕗᒻᒥ. ᖃᐅᔨᓴᕈᑕᐅᕋᑖᓚᐅᖅᑐᑦ ᓄᓇᕗᑦ ᒐᕙᒪᒃᑯᖏᓐᓂᒃ ᖃᖓᑕᔫᒃᑯᑦ ᖃᐅᔨᓴᓚᐅᖅᑎᓪᓗᒋᑦ ᖃᐅᔨᓇᖅᑐᖅ ᓇᓄᖃᕐᓂᐅᔪᖅ ᖃᓄᐃᓐᖏᓯᐊᕐᓂᖓᓂᒃ ᐊᒻᒪᓗ ᓯᕗᓂᐊᒍᑦ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓃᖔᕐᓯᒪᔪᑦ ᐃᓱᒪᒋᔭᐅᔪᑦ ᓈᖕᒪᓈᕐᓯᒪᖃᑦᑕᕐᓯᒪᓐᖏᓐᓂᖏᓐᓂᒃ.

“ᑐᓐᖓᕕᒃᑯᑦ ᑐᓴᐅᒪᑎᑦᓯᒍᑎᒋᓂᐊᖅᑖᑦ ᑖᓐᓇ ᑐᓴᖅᑎᑦᓯᒍᑕᐅᓚᐅᖅᑐᖅ ᓯᓚᕐᔪᐊᒧᑦ. ᐱᖕᒪᕆᐅᒻᒪᑦ ᓄᓇᕗᒻᒥᐅᓄᑦ, ᑲᓇᑕᒥᐅᓕᒫᓄᑦ, ᐊᒻᒪᓗ ᓯᓚᕐᔪᐊᕐᒥᐅᓄᑦ ᖃᐅᔨᓯᒪᔪᓄᑦ ᖃᐅᔨᒪᖁᓪᓗᒋᑦ ᐊᒻᒪᓗ ᑐᑭᓯᒪᖁᓪᓗᒋᑦ ᐃᓄᐃᑦ ᐅᖃᐅᓯᕆᖃᑦᑕᕐᓯᒪᔭᑐᖃᖓ ᐅᑭᐅᕋᓵᓗᓐᓂᒃ ᓱᓕᓂᖓᓂᒃ: ᓄᓇᒃᑯᑦ ᐃᒪᒃᑯᑦ ᓅᓯᒪᖃᑦᑕᓂᑦᑎᒍᑦ ᖃᐅᔨᒪᔭᕗᑦ ᓇᓄᐃᑦ ᑕᒫᓂᒥᐅᑕᐅᖃᑎᒋᖃᑦᑕᕋᑦᑎᒍ ᐊᕐᕌᒍᓕᒫᖅ, ᐊᒻᒪᓗ ᖃᐅᔨᒪᓪᓗᑕ ᓇᓄᐃᑦ ᐅᓄᕐᓯᕙᓪᓕᕐᓯᒪᓂᖏᓐᓂᒃ, ᐊᒻᒪᓗ ᐃᓚᖓᒍᑦ ᐅᓗᕆᐊᓇᖅᑐᒦᒍᑕᐅᕙᓕᖅᑐᑦ ᐃᓄᖕᓄᑦ ᐊᒻᒪᓗ ᐊᓯᖏᓐᓄᑦ ᐆᒪᔪᖃᑎᖏᓐᓄᑦ,” ᐅᖃᖅᑐᖅ ᑕᐅᑐᓐᖏ.

ᑕᐅᑐᓐᖏ ᐅᖃᖅᑐᖅ ᑐᓐᖓᕕᒃᑯᑦ ᓄᑖᑦ ᓂᐱᑎᑖᑦ ᓴᖅᑭᖅᑕᖏᑦ ᐊᑎᖅᑕᕇᓐᖑᐊᒃ ᓯᑯᒦᑦᑑᒃ ᐅᖃᐅᓯᖅᑕᖃᖅᑐᑎᒃ ᖃᓄᐃᓐᖏᑐᒍᑦ, ᖃᓪᓗᓈᑎᑐᑦ ‘We’re ok!’ ᐊᔾᔨᓐᖑᐊᖅ ᐅᖃᐅᓯᖅᑕᖏᓪᓗ ᖃᐅᔨᑎᑦᓯᒍᑎᒃᓴᓕᐊᖑᓚᐅᖅᑐᑦ ᑐᓴᖃᑦᑕᖅᑐᓂᒃ ᓇᓄᐃᑦ ᓄᓇᕗᒻᒥ ᐃᓅᓴᓪᓕᕙᓪᓕᐊᖏᓐᓂᖏᓐᓂᒃ, ᖃᓄᐃᓐᖏᓐᓂᖏᓐᓂᒃ, ᐊᒻᒪᓗ ᓄᖑᐊᑎᑉᐸᓪᓕᐊᓂᐊᓐᖏᓐᓂᖏᓐᓂᒃ ᓇᓐᓄᑦᑐᖃᖃᑦᑕᕋᓗᐊᖅᑲᑦ ᐊᐅᓚᑦᓯᔾᔪᑎᓕᐅᖅᑕᐅᓯᒪᑦᓯᐊᑐᕐᔪᐊᕌᓘᒻᒪᑕ ᑰᑕᑎᒍᑦ ᐋᖅᑭᑦᓯᒪᔭᐅᓪᓗᓂ.

“ᓇᓄᐃᑦ ᐊᑐᖅᑕᕐᔪᐊᒻᒪᕆᐊᓘᒻᒪᑕ ᐃᓄᖕᓄᑦ ᐃᓕᖅᑯᓯᕐᒥᑎᒍᑦ, ᐃᓅᓯᕐᒥᓂ ᐊᒻᒪᓗ ᒪᑭᒪᔾᔪᑎᓄᑦ. ᐱᖕᒪᕆᐅᔪᖅ ᓯᓚᕐᔪᐊᕐᒥᐅᓄᑦ ᑕᒪᓐᓇ ᖃᐅᔨᒪᔭᐅᒋᐊᖃᕐᓂᖓ, ᐊᒻᒪᓗ ᑐᑭᓯᒪᓗᑎᒃ ᑲᒪᑦᓯᐊᓂᑦᑎᒍᑦ ᐊᐅᓚᑦᓯᑦᓯᐊᕋᑦᑕ ᓇᓐᓄᖃᑦᑕᓂᕐᒥᒃ,” ᑕᐅᑐᓐᖏ ᐅᖃᖅᑐᖅ.

ᑐᓐᖓᕕᒃᑯᓃᓐᖔᖅᑐᓄᑦ ᑐᓴᖅᑕᐅᑎᑦᓯᒍᑕᐅᓂᐊᖅᑐᖅ ᓯᓚᕐᔪᐊᕐᒥ ᓄᓇᓕᕐᔪᐊᖏᓐᓂᒃ ᑲᑎᒪᔭᖅᑐᖅᑐᓄᑦ ᑲᑎᒪᔨᕐᔪᐊᓄᑦ ᓯᓚᕐᔪᐊᒥ ᑕᐅᖅᓰᖃᑦᑕᐅᑎᓂᕐᒧᑦ ᐅᓗᕆᐊᓇᖅᑐᒦᑦᑐᓄᑦ ᐆᒪᔪᓄᑦ (ᓴᐃᑏᔅ) ᑲᑎᒪᓂᕆᓛᖅᑕᖓᓄᑦ ᑕᐃᓚᓐᒥ ᐊᕐᕌᒍ. ᓂᐱᑎᑖᑦ ᑎᑎᖅᑲᓂᐊᕐᕕᒃᑯᑦ ᐊᐅᓪᓚᖅᑎᑕᐅᓚᐅᖅᑐᑦ ᓄᓇᕗᒻᒥᐅᓕᒫᓄᑦ, ᐊᒻᒪᓗ ᑐᓂᐅᖅᑲᖅᑕᐅᔪᒫᕐᓂᐊᕐᒥᔪᑦ ᑕᖅᑭᐅᓂᐊᖅᑐᓂ. ᑕᐅᑐᓐᖏ ᓇᓗᓇᐃᕐᓯᒪᔪᒃᑯᑦ ᓴᖅᑭᓂᐊᖅᑕᖓ ᓄᓇᕗᑦ ᐅᓪᓗᖓᓂ ᓇᓪᓕᐅᓂᕐᓯᐅᕐᓂᖃᖅᑎᓪᓗᒋᑦ ᐃᖃᓗᖕᓂ.

We’re Ok! Bumper Sticker

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: