(July 9mi, 2012 — Iqaluit, Nunavut) Nunavut Tunngavik Timinga Angayukaak Cathy Towtongie ublumi autkaktitait nutaamik takuyakhainik ikakyugiaganik tuhaktitjutikhait Nunavumiut, Kanatamiut ovalo nunakyuami tuhaktukhat mikhaanut aniaktitailigiyiit nanuit amigaitjutait Nunavumi.
Amigiatunik ukiunik, kablunaat kauyimayatukangit atukhimayait inikhimaitut kauyimayakhainik pinahuaktainut ikpinagutait hilat aalangugutainik nanunut amigaitjutait pipkainiaktait kataktitlugit amigaitjutainit Nunavumi. Katitikhimayut nutami Kavamatkut Nunavumi tingmiaktut ihivgiugutait takupkaiyut nanuit amigaitjutait naamaktut ovalo hivuliit kauyimayatukangit naunaiyautikhait ihuitut.
“NTIkut piniaktut havaklutik tuhaktitjutikhainik nunakyuamut. Ikpinaktut Nunavumiut, Kanatamiut ovalo nunakyuami tuhaktukhat nalungilutik ovalo naluhuilutik Inuit ukakhimayainik ukiugaalumi nakuutiaktut: nunamiitugut ovalo imainik tahapkoa nanuit ukiuk tamaat ovalo nalungitugut amigaitjutait amigailiktut ovalo ilangit ikhinakhiliktut inuukatinut ovalo aalanut umayunut,” ukaktuk Towtongie.
Towtongie ukaktuk NTIkut nutaat takuyakhait takuniaktuk nanuk ovalo nanuuyautaa hikumi titikat ataani titigakhimayut “Qanuinngittugut, We’re ok!” Piksaa ovalo ukautaa tuhaktiyumayut tuhaktukhanut nanuit amigaitjutait Nunavumi naamaktut, aniaktailigiyut ovalo tamaktitailigiyut munagiyaugamik umayukhiuktunit munagitiakhimayut kotait atugutainik.
“Nanuit piyumayait Inuit inuuvivininut, inuligainut ovalo hanatiligiyiit. Ikpinaktut nunakyuami nalungilutik hamna ovalo nalungilutik munagitiaktugut umayukhiuktaptinik.” ukaktuk Towtongie.
NTIkut ilaukatauyut tuniniaktait hamna tuhaktakhat nunakyuanut ilaukatauniaktut Katimakyuat Nunakyuami Niuviktiligiyit Tamaliktumik Umayut (CITES) katimatitlugit Thailandmi apiaangani ukiumi. Takuyakhait titigakut akyaktaakhimayut tamamik Nunavumiunut ovalo tunikhainiaktut kailiktumi tatkikhiutimi. Towtongie takupkaiyut hamna Nunavumi Ubluani aliahuktitlugit Iqalumi.
