(ᔪᓚᐃ 22, 2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦ (ᑐᙵᕕᒃᑯᑦ) ᑎᒍᒻᒥᓯᒪᓕᕐᑐᖅ ᑐᑭᓕᒻᒥᑦ ᑕᕐᓂᖏᓐᓅᖓᔪᒧᑦ ᑭᖑᕚᕇᓄᑦ ᐱᓂᕐᓗᑦᑕᐅᓯᒪᒻᒪᕆᓐᓂᖏᓐᓄ. ᑕᖅᑲᐅᖓ ᒪᓂᒪᑎᑕᐅᔪᒥᑦ ᓴᓇᓐᖑᐊᒐᕐᒥᑦ, ᓴᓇᓐᖑᐊᖅᑎᒧᑦ ᔨᐊᓯ ᑐᓐᖏᓕᒻᒥᑦ.
“ᓂᕆᐅᓐᓂᖃᑦᓯᐊᖅᐳᖓ ᓴᓇᓐᖑᐊᒐᖅ ᐊᓚᒃᑲᐃᓂᖃᑦᓯᐊᖁᓪᓗᒍ ᐅᖃᖃᑎᒌᓐᓂᕐᒥᒃ ᓄᓇᕗᒻᒥᐅᑕᓄᑦ ᐃᓄᓗᑦᑖᑦ ᐱᔪᓐᓇᕐᓂᖃᕐᓂᖏᓐᓂᑦ, ᓴᐃᒻᒪᖃᑎᒌᓐᓂᕐᒥᒃ, ᖁᓚᓕᔪᐃᓐᓂᖏᓐᓂᓪᓗ ᐃᓄᐃᑦ ᐊᒻᒪᓗ ᓄᖅᑲᖓᑎᒐᑦᓴᐅᖏᑦᑐᒥᑦ ᓇᓪᓕᓐᓂᖅᑕᖃᕆᐊᖓ ᐊᖓᔪᖅᑳᕆᔭᐅᔫᑦ ᕿᑐᓐᖓᕐᒥᓄᑦ. ᖁᔭᒋᕙᕋ ᔨᐊᓯ ᑐᓴᐅᒪᒃᑲᓐᓂᖅᑎᑦᓯᒍᓐᓇᕐᓂᖓᓂᑦ ᓴᓇᓐᖑᐊᒐᖓ ᐊᖅᑯᑕᐅᑦᓯᐊᕐᓂᖓᓂᓪᓗ”, ᐅᖃᖅᐳᖅ ᓄᓇᕗᑦ ᑐᙵᕕᒃ ᐊᖓᔪᖅᑳᖓ ᐊᓗᑭ ᑰᑦᑎᐊᖅ.
“ᐊᐱᕆᕗᒍᑦ ᐃᑦᓯᕋᖅᔪᐊᕌᐱᒃ ᐳᓛᓐᓴᔅ (Francis) ᐊᑲᐅᓂᖅᓴᖅᑰᕆᐊᖅᑎᑦᓯᖁᓪᓗᒍ. ᐊᑖᑕ ᔪᕼᐋᓇᔅ ᕆᕕᐅᕆ (Father Johannes Rivoire) ᓴᐳᒻᒥᔭᐅᖏᓐᓇᕐᒪᑦ ᓚᐃᔭᓐ, ᕗᕋᓐᔅᒥᑦ (Lion, France) ᐃᑦᓯᕋᖅᔪᐊᕐᓄᑦ France−ᒥᑦ ᐊᒻᒪᓗ ᑲᓇᑕᒥ. ᕆᕕᐅᕆ ᐊᐅᓪᓚᖅᑎᑕᐅᒋᐊᖃᓪᓚᕆᒻᒪᑦ ᑲᓇᑕᒧᑦ ᐃᖅᑲᖅᑐᕋᑦᓴᐅᔾᔪᑎᒥᓄᑦ ᑭᐅᔭᕆᐊᖃᕐᓂᖓᓄᑦ,” ᐅᖃᖅᐳᖅ ᔭᐃᒥᓯ ᐃᑦᑐᓗᒃ, ᑐᒡᓕᐊ−ᐊᖓᔪᖅᑳᑉ ᓄᓇᕗᑦ ᑐᙵᕕᒃ ᑎᒥᖓᓄᑦ.
ᑐᙵᕕᒃᑯᑦ ᕿᓂᓪᓚᕆᑉᐳᑦ ᐊᐅᓚᖅᑎᑕᐅᔭᕆᐊᖃᓪᓚᕆᓐᓂᖓᓄᑦ ᐱᖁᔭᖅᑎᒍᑦ ᕆᕕᐅᕆ (Riviore), ᐃᑦᓯᕋᖅᔪᐊᕐᓄᑦ ᐊᔪᕿᖅᑐᐃᔨ, 2017-ᒥᓂᑦ. ᕆᕕᐅᕆ ᐸᐃᕆᔭᐅᕝᕕᒻᒦᑦᑐᖅ ᐃᑦᓯᕋᖅᔪᐊᕐᓅᖓᔪᓄᑦ ᐃᓱᓕᑦᓯᒪᔪᓄᑦ ᑎᒍᔭᐅᓯᒪᓚᐅᖅᑐᕕᓂᕐᓄᑦ ᐊᒻᒪᓗ ᐃᑦᓯᕋᖅᔪᐊᖅ ᐊᔪᕿᖅᑐᐃᔨᓄᑦ ᐸᓯᔭᐅᔾᔪᑎᖃᖅᓯᒪᓪᓚᕆᑦᑐᓄᑦ ᐱᓂᕐᓗᐃᓚᑦᑕᖅᓯᒪᓂᖏᓐᓄᑦ. ᐊᖏᕐᕋᖃᖅᑎᑕᐅᕗᕐᓗ ᑕᐃᑲᓂ ᓈᒻᒪᖏᑦᑐᓕᕝᕕᐅᖁᓇᒍ ᑕᖅᑳᓐᖓᑦ ᖃᓄᑐᐃᓐᓇᖅ ᐊᒻᒪᓗ ᓴᐳᒻᒥᔭᐅᖁᓪᓗᒋᓪᓗ ᑕᑯᓐᓇᖅᑕᐅᑦᓯᐊᕈᒪᓂᖏᓐᓄᑦ ᐃᑦᓯᕋᖅᔪᐊᑦ, ᐃᑦᓯᕋᖅᔪᐊᕐᓄᑦ ᑲᒪᔨᒻᒪᕆᔨᐅᔪᓄᓪᓗ ᕼᐊᑦᓴᓐ ᖃᖏᖅᓱᐊᓗᐊᓂᒥᐅᑕᕐᓄᑦ (Diocese of Churchill-Hudson’s Bay ᐊᒻᒪᓗ ᐃᑦᓯᕋᖅᔪᐊᖑᒻᒥᔪᑦ (Mary Immaculate-ᒥᐅᑕᕐᓄᑦ) ᑎᓕᔭᐅᓯᒪᓪᓗᑎᑦ ᐃᑦᓯᕋᖅᔪᐊᕐᓄᑦ.
ᑕᕐᓂᓐᖑᐊᓕᒃ ᑭᖑᕚᕇᓄᑦ ᐱᓂᕐᓗᑦᑕᐅᓯᒪᔪᓄᑦ ᖁᐱᕐᕈᓐᖑᐊᖓᔮᖅᓱᓂ ᑕᕐᓂᖃᖅᓱᓂ ᐆᒪᔪᕐᓘᓪᓗᓂᓗ ᑕᕐᓂᖓ ᑎᒍᔭᐅᓯᒪᓐᖑᐊᖅᑐᖅ ᐱᓂᕐᓗᑦᑕᐅᓯᒪᓂᕐᒧᑦ, ᐋᖅᑭᑦᑕᐅᒪᑦᓱᓂᓗ ᐊᔾᔭᖅᓯᓐᖑᐊᖅᑎᑦᓱᓂᐅᒃ ᑐᓄᒥᐅᑕᕆᓪᓗᓂᐅᒃ ᑖᓐᓇ. ᑖᓐᓇᓗ ᓴᓇᓐᖑᐊᒐᖅ ᔭᓯᐅᑉ ᐊᓚᒃᑲᐅᒪᑎᑦᓯᑦᓯᐊᖅᓱᓂᓗ ᐊᑦᑐᐊᓂᕆᓯᒪᔭᖓᓂᑦ ᐊᑖᑕᒥᓄᑦ ᒥᐊᕆᐊᔅ ᑐᖏᓕᒻᒧᑦ, ᐱᔾᔪᑕᐅᓪᓗᓂ ᓄᓕᐊᕐᓂᒃᑯᑦ ᐱᓂᕐᓗᑦᑕᐅᓯᒪᓂᖓᓄᑦ (Brother Lucien Parent−ᒧᑦ) ᑕᐃᑲᓂ Sir Joseph Bernier, ᐃᑦᓯᕋᖅᔪᐊᕐᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓂᕐᓄᑦ ᐊᐅᓚᑕᐅᓪᓗᓂ ᐃᑦᓯᕋᖅᔪᐊᕐᓄᑦ ᐃᓪᓗᓕᒑᖅᔪᒻᒥᑦ, ᐸᓯᔭᑦᓴᐅᓯᒪᓂᖓᓄᓪᓗ ᓄᓕᐊᕐᓂᒃᑯᑦ ᐱᓂᕐᓗᑦᑕᐅᓯᒪᓂᖓᓄᑦᑕᐅᖅ ᕆᕕᐅᕆᒧᑦ (Riviore). ᓴᓇᓐᖑᐊᒐᖅ ᐅᓂᒃᑳᓕᒃ ᔨᐊᓯᐅᑉ ᒪᒥᑉᐸᓪᓕᐊᓯᒪᓂᖓᓂᑦ ᑭᖑᕚᕆᓄᑦ ᐱᓂᕐᓗᑦᑕᐅᓯᒪᓂᖅ ᐊᑦᑐᐃᓂᖃᖅᓯᒪᓂᖓᓄᑦ.
ᑕᕐᓂᓐᖑᐊᓕᒃ ᑭᖑᕚᕇᓄᑦ ᐱᓂᕐᓗᑦᑕᐅᓯᒪᔪᓄᑦ ᐊᐅᓪᓚᖅᑎᑕᐅᓯᒪᓕᖅᑐᖅ ᐊᒻᒪᓗ ᑕᑯᔭᑦᓴᐅᒍᓐᓇᓛᖅᑐᖅ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᖅᕕᖓᓂᑦ.
ᔨᐊᓯ ᑐᓐᖏᓕᒃ ᓱᕐᓗ ᐃᓂᖅᑎᕆᔾᔪᑎᖃᕈᓐᓇᕐᓂᕐᒧᑦ ᐊᑐᖅᓱᓂ ᓴᓇᓐᖑᐊᖅᑎᒻᒪᕆᐅᕗᖅ ᐃᖃᓗᖕᒥᐅᑕᖅ, ᓄᓇᕗᒻᒥᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ:
ᒪᓚᐃᔭ ᒥᑭᔾᔪᒃ
ᑐᑭᒧᐊᑦᑎᑦᓯᔨ ᑐᓴᐅᒪᔾᔪᑎᓕᕆᔨᒃᑯᓐᓂᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑎᖓ: (867) 975-4900/ᐊᑭᖃᓐᖏᑦᑐᒧᑦ 1-888-646-0006
