(July 22, 2022 – Iqaluit, Nunavut) Nunavut Tunngavik Timingat (NTI) pihimaliktot uminga Tungakmik hapkua Kangagalok Kitungagiit Uiitayakutikakhimayot ihomagivlogit, una hannaoyakhimayok, hannahimaya uma hannaoyaktiuyup Jesse Tungilik.
“tatva nigiogitiaktaga una hannaoyaak pivalikutigiyaotkovlugo okaotigivaliayangita hamani Nunavumi Inuit piyunaotaitnik, pitiakpalikutikhanik, tatvalo hakkuginingitnik hapkua Inuinait tatvalo nakligiikatigiiknik avatingnot angayokangoyot tatvalo notagaitlo. Koanakpiaktok una Jesse tuhaktitihimangmat onipkagiyaminik tatvunga hannaoyaktaminik,” okalaktok una NTI-kut Angayokangat Aluki Kotierk.
“Tughikvigihimaliktavut una Pallakpakjuak Francis ataniktokovlugo. Una Father Johannes Rivoire pitailiyaongmat tavani tagiop akkiani Lyon, France-mi Pallat Angatjuviatniit France-mi Kanata-milo. Una Rivoire otiktitaoyagiakaktok Kanatamut ihoinakutigihimayaminik taimani Apighoivikut nallaktaoyagialiogaloakmat,” okalaktok James Eetoolook, Toglia Angakyokanguyop NTI-kuni.
NTI-kut toghikatakhimaliktot otiktitaotkovlugo una Rivoire, una Pallakpak, tatvanganin 2017-min. Rivoire nayogagilikta una munnaghiviat hapkua pallait hapkua nuttitaohimayot tatvunga iitiktaohimaalgaghotik tatvalo hapkua pallait ihoinaakutikakloakhimayot. Tatvani nayogakaktok okamilotaoyomannani inukniit tatkanga tatvalo naguugiyaotkunagit hapkua Pallakpait, hapkualo Angatjuviit tatvani Churchill-mi Tagioyakjuamilo tatvalo una Angatjuviat Mary Immaculate, atanigiyait hapkua Pallakpait.
Una Tungaak hapkua Katangutigiit Uiitayakatikakhimayot hannauyaktaohimayok kopilgoktot tungak kapiahotikaktok uminga tungaakmiit uiitayakutikaktomit, innunguakaktok kullingani. Onipkagiyaoyok uma Jesseiup ayungnaotanik pitiakatigiyomagaloagamiok appani, Marius Tungilik taimaihimayok nulliaktaohimagami taimanigalok uminga Paallaohimayup Brother Lucien Parent tatvani Sir Joseph Bernier, una Pallakpait Ilihakviat illihaktitihimangmata hapkua Paallait tatvani Igluligaakjukmi, tatvalo unniklotaohimangmat nulliakhuni anniktitihimayok una Rivoire tatvani Naujaat-ni. Una hannaoyaak pitjutaohimayok uma Jesse-iup mammiyaotigihimayanik haffuminga katangutigiit uiitayakutigihimayaitnik.
Una Tungaak Kangagalok Kitungagiit Uiitayakutikakhimayot ihomagivlogit hannaoyaak akjakaoliktok tatvalo takkuyaokatainagialik tatvani Nunatta Sunakkutaangit Takkuyakakvikmi.
Una Jesse Tungilik allatkinik hannaoyaaktioyok nunakaktok Iqaluitni, Nunavut.
-30-
Tuhakpaligomanigovit tuhakviginagialik una:
Malaya Mikijuk
Atanioyok Tohaktitilikiyiitni
Nunavut Tunngavik Timingat
Hivayaotal: (867) 975-4900/Akkikangitok Hivayaota: 1-888-646-0006
