ᓇᓪᓕᐅᓂᖅᓯᐅᕈᑕᐅᓗᓂ ᓄᓇᕗᑦ ᐅᓪᓗᖓ, ᐊᒻᒪᓗ ᒫᓐᓇᒫᒃ ᐊᖏᕈᑕᐅᓚᐅᖅᑐᖅ ᓴᐳᔾᔭᐅᓯᒪᖁᓪᓗᒋᑦ ᑲᓇᑕᒥ ᐃᓕᓴᕆᔭᐅᓯᒪᔪᑦ ᑰᑐᖃᐃᑦ ᓄᓇᕗᒻᒥ, ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᑐᓴᖅᑎᑦᓯᔪᖅ ᑕᖅᓴᖓᓄᑦ ᓵᓚᒃᓴᕋᓱᐊᕐᓂᐅᔪᒥᒃ ᒪᒃᑯᑦᑐᓄᑦ.
ᓵᓚᒃᓴᕋᓱᐊᕈᓐᓇᖅᑐᑦ ᓄᓇᕗᒻᒥ ᐃᓄᐃᑦ ᐅᑭᐅᓖᑦ 18−ᓂᒃ ᒥᑦᓯᑎᓐᓂᓗ, ᐊᑦᑐᐊᔭᐅᔪᓄᑦ ᓄᓇᓕᓐᓄ ᑭᒻᒥᕈᑦ, ᖁᕐᓗᖅᑐᖅ ᐊᒻᒪᓗ ᖃᒪᓂ’ᑐᐊᖅ, ᑖᒃᑯᐊ ᓯᑕᒪᓂᒃ ᐃᓕᓴᕆᔭᐅᓯᒪᔪᓂᒃ ᑰᑐᖃᖅᑕᓖᑦ.
“ᒪᓂᒪᑎᑕᕗᑦ ᓵᓚᒃᓴᕋᓱᐊᕐᓂᖅ ᒪᒃᑯᑦᑐᓄᑦ, ᐅᔾᔨᕆᔭᐅᓕᖅᐸᓪᓕᐊᖁᓪᓗᒍ ᐱᖕᒪᕆᐅᓂᖓ ᑰᑐᖃᖁᑎᑦᑎᓐᓄᑦ ᐊᐅᓚᓂᕆᔭᐅᔪᑦ ᓄᓇᕗᒻᒥ,” ᐅᖃᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ. “ᓄᓇᓕᑦᑎᒍ, ᐃᓄᐃᑦ ᖃᐅᔨᒪᓂᖅᐹᑦ ᖃᓄᖅ ᓱᕈᑦᑕᐅᑦᑕᐃᓕᒍᓐᓇᓂᖅᐸᐅᒻᒪᖔᑕ ᓴᐳᔾᔭᐅᓯᒪᓗᑎᓪᓗ ᐱᐅᔪᕐᔪᐊᓄᑦ ᑰᖁᑎᑦᑎᓐᓄᑦ ᐊᐅᓚᑦᓯᒍᑎᕗᑦ, ᐊᑐᖅᑕᐅᓪᓗᓂ ᐱᖅᑯᓯᒃᑯᑦ ᖃᐅᒪᓂᕆᔭᐅᔪᖅ, ᐊᑐᖅᑕᐅᖃᑦᑕᖅᓯᒪᓂᖓ ᐊᒻᒪᓗ ᐃᓕᖅᑯᓯᖓ. ᒪᒃᑯᑦᑐᕗᑦ ᑐᑭᓯᕙᓪᓕᐊᑉᐸᑕ ᓄᓇᑦᑎᓐᓂᒃ ᐃᒪᑦᑎᓂᓪᓗ, ᓂᕆᐅᖕᓂᖃᕐᓂᖅᓴᐅᓂᐊᖅᐳᒍᑦ ᓯᕗᓂᑦᑎᓐᓄᑦ.”
ᓄᓇᕗᑦ ᐅᓪᓗᖓᓂ 2019, ᑐᙵᕕᒃᑯᑦ, ᑲᓇᑕ ᒐᕙᒪᖓ ᐊᒻᒪᓗ ᓄᓇᕗᑦ ᐊᑎᓕᐅᖃᑎᒌᓚᐅᖅᑐᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᒃᓴᓄᑦ ᐊᖏᖃᑎᒌᒍᑎᓂᒃ ᑲᓇᑕᒥ ᐃᓕᓴᕆᔭᐅᓯᒪᔪᓄᑦ ᑰᑐᖃᕐᓄᑦ (IIBA). ᐊᖏᖃᑎᒌᒍᑎᓃᖃᑕᐅᔪᑦ ᐅᑯᐊ ᑰᑦ: ᑳᐳᒪᐃᓐ ᑰᒃ (ᖁᕐᓗᖅᑐᖅ), ᑲᐃᔮᓐ ᑰᒃ (ᓴᕐᕙᖅᑑᖅ), ᓲᐸ ᑰᒃ (ᑰᔾᔪᐊᖅ) ᐊᒻᒪᓗ ᑏᓛᓐ ᑰᒃ (ᐊᑭᓪᓕᓂᒃ).
ᓵᓚᒃᓴᕈᑕᐅᓂᐊᖅᑐᑦ ᑕᖅᓴᖓᑕ ᓴᓇᒻᒪᖓᓂᒃ ᑕᑯᑦᓴᐅᑎᑦᓯᔪᖅ ᐱᖕᒪᕆᐅᓂᖏᓐᓂᒃ ᓯᑕᒪᑦ ᐃᓕᓴᕆᔭᐅᓯᒪᔪᑦ ᑰᑕᖃᐃᑦ ᓄᓇᕗᒻᒥ ᓴᐳᔾᔭᐅᓯᒪᓂᐊᓕᖅᑐᓂᒃ ᐊᐅᓚᑕᐅᓗᑎᓪᓗ ᐃᓄᓐᓄᑦ ᐃᑲᔫᑎᒃᓴᐅᓗᓂ ᑲᓇᑕᒥᐅᓕᒫᓄᑦ. ᑕᖅᓴᖓ ᑕᕝᕗᙵᖓᓂᐊᖅᑐᖅ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᖃᑎᒌᒍᑎᓂᒃ ᑲᓇᑕᒥ ᐃᓕᓴᕆᔭᐅᓯᒪᔪᓄᑦ ᑰᑐᖃᕐᓄᑦ (IIBA) ᑐᓴᐅᒪᔾᔪᑎᓕᕆᔨᒃᑯᓐᓂ.
ᑐᓂᔭᐅᖃᑕᐅᓂᐊᖅᑐᖅ ᐅᐱᒋᔭᐅᓂᖓᓄᑦ ᑭᒡᒐᖅᑐᐃᓂᕐᒧᑦ IIBA, ᓵᓚᒃᓴᖅᑐᖅ ᑐᓂᔭᐅᓂᐊᖅᑐᖅ $1000.00. ᐱᖓᓱᑦ ᑭᖑᓕᖏᑦ ᐊᑐᓂᑦ ᓄᓇᓕᓐᓂ ᐱᔪᓐᓇᖅᑎᑕᐅᔪᓂ ᑐᓂᔭᐅᓂᐊᕐᒥᔪᑦ $500.00−ᓂᒃ.
ᓵᓚᒃᓴᕋᓱᐊᕐᓂᖅ ᒪᑐᐃᕐᓂᐊᖅᑐᖅ ᓄᓇᕗᑦ ᐅᓪᓗᖓᓂ, ᔪᓚᐃ 9 ᐊᒻᒪᓗ ᒪᑐᓗᓂ ᐊᐅᒡᒍᓯ 1, 2020.
ᓵᓚᒃᓴᕋᓱᐊᖃᑕᐅᒍᒪᔪᓄᑦ ᑐᑭᓯᒋᐊᒃᑲᓂᕐᕕᒃᓴᖅ, ᑕᑯᒋᐊᕐᓗᒍ tunngavik.com
-ᐃᓱᐊ-
ᑐᙵᕕᒃᑯᓐᓄᑦ ᖃᐅᔨᒋᐊᕐᕕᒃᓴᖅ:
ᒪᓚᐃᔭ ᒥᑭᔾᔪᒃ,
ᑐᑭᒧᐊᒃᑎᑦᑎᔨ, ᑐᓴᐅᒪᔾᔪᑎᓕᕆᓂᕐᒧᑦ ᐃᓕᓐᓂᐊᖅᑐᖅ
ᐅ: 867-975-4907
ᐊ: 1-888-646-0006
www.tunngavik.com
ᓵᓚᒃᓴᐅᑕᐅᓇᓱᐊᖅᑐᒧᑦ ᓇᓗᓇᐃᖅᑐᐃᔾᔪᑎ ᖃᓄᐃᓕᐅᖅᓯᒪᓂᐅᔪᓪᓗ:
- ᓵᓚᒃᓴᕋᓱᐊᕐᓂᖅ ᒪᑐᐃᖓᔪᖅ ᒪᒃᑯᑦᑐᓄᑦ ᐅᑭᐅᓕᓐᓄᑦ 18−ᓂᒃ ᒥᑦᓯᑎᓐᓂᓗ
- ᓵᓚᒃᓴᕋᓱᐊᖅᑐᑦ ᐊᒃᑐᐊᓂᖃᕆᐊᓖᑦ ᐃᓚᖓᓐᓂᒃ ᐅᑯᐊ ᐱᖓᓱᑦ ᓄᓇᓖᑦ: ᑭᒻᒥᕈᑦ (ᓲᐸ ᕆᕙ); ᖁᕐᓗᖅᑐᖅ (ᑳᐳᒪᐃᓐ ᐱᕙ); ᐊᒻᒪᓗ ᖃᒪᓂ’ᑦᑐᐊ (ᑲᐃᔮᓐ ᕆᕙ ᐊᒻᒪᓗ ᑏᓛᓐ ᕆᕙ)
- ᓵᓚᒃᓴᕋᓱᐊᕐᕕᒃᓴᖅ ᒪᕐᕈᐊᑎᕐᓗᓂ ᒪᒃᑯᑦᑐᖅ ᐊᑕᐅᓯᖅ
- ᑕᖅᓴᖓᓃᓪᓗᓂ ᐊᔾᔨᙳᐊᖅ, ᑎᑎᕋᖅᓯᒪᔪᒥᒃ ᐊᒻᒪᓗ ᖃᓄᐃᓕᖓᓂᐅᔪᓂᒃ ᓇᓗᓇᐃᒃᑯᑕᐅᓂᐊᖅᑐᒥᒃ ᑲᑐᔾᔨᖃᑎᒌᓄᑦ ᐊᒻᒪᓗ ᖃᓄᖅ ᑐᑭᖃᕐᒪᖔᖅ. ᓴᓚᒻᒪᖓ ᑎᑎᕋᐅᔭᖅᑕᐅᓯᒪᒍᓐᓇᖅᑐᖅ ᐊᒡᒐᒻᒧᑦ ᐅᕝᕙᓘᓐᓃᑦ ᖃᕆᓴᐅᔭᒃᑯᑦ.
- ᓵᓚᒃᓴᕈᑕᐅᓂᐊᖅᑐᖅ ᑕᖅᓴᖅ, ᐃᓂᖅᑕᐅᓂᖓᓂ ᐋᖅᑭᒋᐊᖅᑕᐅᓂᖓ ᐊᑐᖅᑕᐅᓗᓂ ᐊᒃᑐᖅᑕᐅᓂᕐᒧᑦ ᐃᑲᔫᓯᐊᕐᓂᒧᓪᓗ ᐊᖏᖃᑎᒌᒍᑎᒥ ᐊᒻᒪᓗ ᑖᒃᑯᓄᙵᖓᔪᓂ ᑎᑎᖅᑲᓂ. (IIBA).
- ᒪᓕᒐᑦᓴᑦ ᐊᐅᓚᑦᓯᔾᔪᑏᓪᓗ, ᐊᒻᒪᓗ ᖃᓄᖅ ᓵᓚᒃᓴᕋᓱᐊᖃᑕᐅᒍᓐᓇᕐᒪᖔᕐᐱᑦ ᖃᐅᔨᒍᒪᒍᕕᑦ, ᑕᑯᒋᐊᕈᒃ com
ᑲᒪᒋᔭᐅᓯᒪᓂᖓ (CHR IIBA)
ᐊᕐᕌᓂ ᓄᓇᕗᑦ ᐅᓪᓗᖓᓂ 2019, ᑐᙵᕕᒃᑯᑦ, ᑲᓇᑕ ᐊᒻᒪᓗ ᓄᓇᕗᑦ ᒐᕙᒪᖏᑦ ᐊᑎᓕᐅᓚᐅᖅᑐᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᓂᕐᒧᑦ ᐊᖏᖃᑎᒌᒍᑎᓂᒃ ᑲᓇᑕᒥ ᐃᓕᓴᕆᔭᐅᓯᒪᔪᓄᑦ ᑰᑐᖃᕐᓄᑦ (IIBA).
ᒪᒃᑯᑦᑐᑦ ᑭᓇᑐᐃᓐᓇᓘᓐᓃᑦ ᖃᐅᔨᒃᑲᓐᓂᕈᒪᔪᖅ IIBA ᒥᑦᓵᓄᑦ, ᐅᖃᓕᒫᕈᓐᓇᖅᑐᑦ ᐅᕙᓂ ᐱᕙᓪᓕᐊᔪᓂᒃ ᑐᓴᕋᑦᓴᓂᒃ.
https://www.tunngavik.com/wp-content/blogs.dir/1/files/2019/07/CHR-IIBA-NewsReleaseENG.pdf
