(ᐅᑦᑑᐱᕆ 19, 2022, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ (NTI) ᐊᖏᔪᖅᑳᖓ ᐊᓗᑭ ᑰᑦᑎᖅ ᐅᐱᒍᓱᒃᐳᖅ ᐊᓃᑕ ᐅᓕᒪᐅᒻᒦ ᐊᕐᕕᐊᓂᑦ ᐊᒻᒪ ᓯᐅᒪ ᐃᐅᓪ ᓴᓪᓕᕐᒥ ᑐᓂᔭᐅᖕᒪᑎᒃ ᔫᓯ ᐊᒪᐅᔭᖅ ᑯᓱᒐᖅ ᐃᖅᑲᐅᒪᔾᔪᑎᒧᑦ ᐃᓕᓐᓂᐊᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ 2022−ᒥ.
ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ ᑐᓂᔭᐅᔪᑦ $5,000.00 ᐊᕐᕌᒍᑕᒫᑦ ᒪᕐᕉᓐᓄᒃ (2) ᒫᓐᓇᐅᔪᒥᑦ ᐃᓕᓐᓂᐊᖅᑎᓂᑦ ᓇᓗᓇᐃᖅᓯᓯᒪᓂᖃᖅᑐᑦ ᔫᓯ ᑯᓱᒐᐅᑉ ᐱᔪᒪᓂᕆᓯᒪᔭᖓ ᐊᒻᒪ ᑲᔪᖏᖅᓯᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᑦ, ᐅᖃᐅᓯᕐᓄᑦ ᐊᒻᒪ ᓯᕗᒧᒋᐊᖅᑎᑕᐅᓂᖏᓐᓄᑦ ᐃᓄᐃᑦ ᐱᔪᓐᓇᐅᑎᖏᑦ.
ᐊᓃᑕ ᐊᒻᒪ ᓯᐅᒪ ᑕᒪᒃᑭᒃ ᐃᓕᓐᓂᐊᖅᑑᒃ ᓄᓇᕗᒻᒥ ᐃᓕᓴᐃᔨᔅᓴᐅᓂᕐᒧᑦ ᓄᓇᓕᖏᓐᓃᑦᑐᑎ ᐃᓕᓐᓂᐊᕋᔅᓴᐅᑎᑕᐅᔪᑦ ᓄᓇᕗᑦ ᐅᑭᐅᑕᖅᑐᒥ ᓯᓚᑦᑐᓴᕐᕕᒻᒧᑦ ᐱᓕᕆᖃᑎᖃᖅᑐᑎᑦ ᒥᒧᐊᕆᐅ ᓯᓚᑦᑐᓴᕐᕕᒃᔪᐊᖅ ᓂᐅᕙᐅᓐᓛᓐ.
“ᓂᕆᐅᑦᑐᖓ ᖃᐅᔨᒪᓪᓗᒋᑦ ᑖᒃᑯᐊ ᒪᒃᑯᑦᑑᒃ ᐃᓅᒃ ᐊᓃᑕ ᐊᒻᒪ ᓯᐅᒪ ᐃᒻᒥᓂᒃ ᐃᓱᒪᓕᐅᖅᑐᑎ ᐃᑲᔪᕐᓗᑎ ᓯᕗᒧᑦᑎᑦᑎᒋᐊᕐᓗᑎ ᐅᕙᒍᑦ ᐃᓄᐃᑦ ᐱᖅᑯᓯᖏᓐᓂ ᐊᒻᒪ ᐅᖃᐅᓯᖏᓐᓂ.” ᐅᖃᖅᑐᖅ ᐊᖏᔪᖅᑳᖅ ᑰᑦᑎᖅ. “ᑕᒪᒃᑭᒃ ᑐᓂᓯᓯᒪᔪᑦ ᑎᑎᕋᖅᓯᒪᔭᖏᓐᓂ ᐃᓄᒃᑎᑐᑦ ᐊᒻᒪ ᐅᖃᐅᓯᖃᖅᑐᑎᑦ ᐱᔪᒪᓂᕆᔭᖏᓐᓄᑦ ᐃᓕᓴᐃᔨᕈᕈᒪᓪᓗᑎᒃ ᓄᓇᕗᒻᒥ. ᖃᐅᔨᒪᔪᑦ ᐊᔅᓱᕈᕈᑕᐅᔪᓂᑦ ᓵᙵᔭᑦᑎᓐᓂ ᑐᓂᓗᒋᑦ ᐅᖃᐅᓯᑦᑎᐊᕚᓗᑉᐳᑦ ᕿᑐᙵᑎᓐᓄᑦ, ᐊᒻᒪ ᐊᓃᑕ ᐊᒻᒪ ᓯᐅᒪ ᐃᑲᔪᕈᒪᓂᖃᖅᑑᒃ ᐅᑎᕆᐊᖅᑎᑕᐅᓗᓂ ᐊᑦᑎᓪᓕᕙᓪᓕᐊᓂᖓ ᐃᓄᒃᑐᑦ ᐃᓕᓴᐃᔨᕈᕈᑎ ᐃᓕᓐᓂᐊᕕᑦᑎᓐᓂᑦ.”
ᓄᓇᕗᑦ ᑐᙵᕕᒃ ᑎᒥᖓᑦ ᖁᔭᓐᓇᒦᖅᑕᐃᓐᓇᕆᔪᒪᔭᖏᑦ ᐃᓕᓐᓂᐊᖅᑎᓕᒫᑦ ᐱᕕᔅᓴᖃᓚᐅᖅᑐᑦ ᐊᒻᒪ ᐱᓇᓱᐊᕐᓂᖃᖅᑐᑎ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ. ᑭᖑᓪᓕᕐᒥ ᐃᓱᒪᓕᕝᕕᔅᓴᖓ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ ᔪᓚᐃ 9, 2023.
-30-
ᖃᐅᔨᒋᐊᕐᕕᒋᓗᒍ:
ᑭᐊᕙᓐ ᑲᑉᓗᑦᓯᐊᖅ
ᑐᑭᒧᐊᖅᑎᑦᑎᔨ, ᑐᓴᐅᒪᔾᔪᑎᓕᕆᓂᕐᒧᑦ, ᓄᓇᕗᑦ ᑐᙵᕕᒃ ᑎᒥᖓᑦ
ᐅᖄᓚᐅᑎᖓ: (867) 975-4900 / ᐊᑭᖃᙱᑦᑐᖅ: 1-888-646-0006
