ᑐᓴᕋᑦᓴᓕᕆᔩᑦ

ᐃᓄᐃᑦ ᐃᓕᓐᓂᐊᕈᑎᐅᔪᓐᓇᕐᑐᓂᒃ ᐅᖃᓪᓚᑦᑎᖃᓐᓂᐊᕐᐳᑦ ᐃᓄᐃᑦ ᑎᓚᕖᓴᒃᑯᑦ ᐃᓄᒃᑐᑦ ᐅᖃᐅᓯᖅ ᐊᑑᑎᖃᖅᑎᑕᐅᓂᕐᓴᐅᖁᓪᓗᒍ

(ᔪᓚᐃ 9, 2020 – ᐃᖃᓗᐃᑦ, ᓄᓇᕗᑦ) – ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃᑯᑦ) ᐊᒻᒪᓗ ᐃᓄᐃᑦ ᑎᓕᕕᓴᓕᕆᔩᑦ ᓴᖅᑮᓂᐊᕐᐳᑦ ᐃᓄᒃᑎᑐᑦ ᑎᓚᕖᓴᒃᑯᑦ ᑐᓴᕐᑕᐅᒃᑲᑦᑕᐅᒍᑕᐅᓛᕐᑐᖅ ᓄᓇᕘᑉ ᐅᓪᓗᖓ ᖁᕕᐊᓱᒍᑕᐅᑎᓪᓗᒍ.

“ᑕᒪᑦᑎᒍᑦ ᐊᑑᑎᖃᖅᑎᑕᐅᓂᕐᓴᐅᖁᒐᑦᑎᒍ ᐃᓄᒃᑐᑦ ᐅᖃᐅᓯᖅ ᑕᒪᐃᓐᓂ ᐃᓅᓯᑦᑎᓐᓂ ᓄᓇᕗᖕᒥ ᐃᓄᖏᑦᑎᒍᑦ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓᑦ ᑐᙵᕕᒃᕐᑯᒃᑦ. “ᖁᔭᒋᓗᐊᖅᐸᒃᑲᑦ ᐃᓄᐃᑦ ᑎᓚᕖᓴᒃᑯᑦ ᑕᑯᓐᓇᖑᐊᕈᓐᓇᕐᓯᒪᒻᒪᑕ ᐃᓄᐃᑦ ᐃᓕᖅᑯᓯᖏᑦ ᐊᒻᒪ ᐅᖃᐅᓯᖏᑦ ᐊᖏᕋᑎᓐᓂ ᑕᑯᓐᓇᕈᓐᓇᕐᓂᐊᕋᑦᑎᒍᑦ ᐊᒻᒪ ᐃᓄᐃᑦ ᐱᔪᓐᓇᖁᓪᓗᒋᑦ ᑐᑭᓯᒃᑲᓐᓂᕈᑎᒃᓴᓂᒃ ᐃᓄᒋᐊᓐᓂᓴᐃᓪᓗ ᓄᓇᕗᖕᒥ ᐃᓄᒃᑐᑦ ᐅᖃᓪᓚᓲᖑᒻᒪᑕ.”

ᑐᙵᕕᒃᑯᑦ ᑮᓇᐅᔭᖃᖅᑎᑦᑎᓂᐊᕐᐳᑦ $2.4 ᒥᓕᐊᖑᓗᐊᖅᑐᓂᒃ, ᐅᑭᐅᓂ ᐱᖓᓱᓂ ᓈᓇᓱᐊᕐᓂᐊᕐᑐᓂ, ᐊᑑᑎᖃᖅᑎᑕᐅᒃᑲᓐᓂᖁᓪᓗᒍ ᐃᓄᒃᑐᑦ ᐅᖃᐅᓯᖅ, ᐃᓄᐃᑦ ᐃᓕᖅᑯᓯᖏᑦ ᐊᒻᒪ ᑭᒃᑰᓂᑦᑎᓐᓄᑦ ᐊᒻᒪᓗ ᑐᑭᓯᐅᒪᒍᑎᓂᒃ ᐃᓄᒃᑑᖅᑐᓂᒃ ᐱᔪᓐᓇᖁᓪᓗᒋᑦ, ᐃᓄᒋᐊᓐᓂᕐᓴᐅᖕᒪᑕ ᐃᓄᒃᑐᑦ ᐅᖃᓪᓚᓲᑦ ᓄᓇᕗᖕᒥ. ᒫᓐᓇᐅᔪᒥ, ᑕᑯᓐᓇᕋᒃᓴᕐᑕᖃᓗᐊᕐᐸᙱᒻᒪᑦ ᐃᓄᒃᑑᖅᑐᓂᒃ ᑎᓚᕖᓴᒃᑯᑦ ᓄᓇᕗᖕᒥ ᓇᓕᒧᒋᔾᔪᒥᓕᕈᑕᐅᓂᐊᕐᒪᑦ ᖃᓪᓗᓈᑦ ᐃᓕᖅᑯᓯᖏᓐᓂᒃ ᐊᒻᒪ ᐅᖃᐅᓯᖏᓐᓂᒃ. ᐃᒻᒥᑰᓪᓗᓂ ᑕᑯᒃᓴᐅᑎᑦᑎᔨᐅᓂᖏᑦ ᐃᓄᐃᑦ ᑎᓚᕖᓴᒃᑯᑦ ᐃᑲᔪᕐᓂᖃᓐᓂᐊᕐᑐᑦ ᐃᓕᓐᓂᐊᕈᑎᑎᒍᑦ, ᑕᑯᓐᓇᕈᒥᓇᕐᑐᑦ ᐊᒻᒪᓗ ᑕᑯᓐᓇᕈᓐᓇᓂᐊᕐᒪᑕ ᐃᓄᐃᑦ ᐃᓄᒃᑑᖅᑐᓂᒃ.

“ᑲᑎᒪᔨᖏᑦ ᐃᓄᐃᑦ ᑎᓚᕖᓴᒃᑯᑦ ᖁᔭᓕᔪᒪᕗᑦ ᐊᒥᓱᓂᒃ ᐊᑭᓕᕐᓱᕐᑕᐅᓇᑎᒃ ᐃᖅᑲᓇᐃᔭᕐᐸᒃᑐᓄᑦ ᐊᒻᒪ ᐱᓕᕆᖃᑎᒋᔭᐅᔪᓄᑦ ᓄᓇᕘᓕᒫᕐᒥ ᐃᑲᔪᕐᓯᓯᒪᔪᑦ ᐅᕙᑦᑎᓐᓂᒃ ᐅᑭᐅᓂᒃ ᐊᓂᒍᖅᑐᓂᒃ, ᐊᒻᒪ ᖃᐅᔨᒪᓂᕐᒥᓂᒃ ᐅᖃᐅᓯᓕᕆᓂᕐᒥᒃ, ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪ ᑕᑯᓐᓇᕋᒃᓴᓕᕆᓂᕐᒥᒃ ᐊᑑᑎᖃᕐᑎᑦᑎᓯᒪᓂᖏᓐᓄᒃ ᑖᓐᓇ ᐱᒻᒪᕆᐅᔪᖅ ᓴᖅᑭᕈᓐᓇᕐᓯᒪᒍᑎᒋᕚ,” ᐅᖃᖅᑐᖅ ᐊᓖᖠᐊ ᐊᕐᓇᖅᑯᖅ−ᐳᕆᐊᓪ, ᐊᖓᔪᖅᑳᖓᑦ ᐃᓄᐃᑦ ᑎᓚᕖᓴᒃᑯᑦ ᑕᑯᓐᓇᕋᒃᓴᓕᕆᔨᒃᑯᑦ.
ᐊᕐᕌᒎᑉ ᓯᕗᓪᓕᕐᐹᖓᓂ, ᐃᓄᐃᑦ ᑎᓚᕖᓴᒃᑯᑦ ᐃᓛᓐᓂᓚᐅᓱᖓᒃᑯᑦ ᑕᑯᒃᓴᐅᑎᑦᑎᕙᓐᓂᐊᕐᓗᑎᒃ, ᐊᒻᒪ ᑕᑯᒃᓴᐅᑎᑦᑎᓂᕐᓴᐅᒋᐊᒃᑲᓂᕐᑎᑎᒋᐊᕈᒫᕐᓗᑎᒃ 2021-ᒥ. ᐊᑏ ᑕᑯᒋᐊᒃᑭᒃ ᐃᓄᐃᑦ ᑎᓚᕖᓴᒃᑯᑦ ᖃᕆᓴᐅᔭᕋᓛᒃᑯᑦ ᑕᑯᒃᓴᐅᕕᖏᑦ, ᐅᕝᕙᓗ ᐅᕗᖓ inuit.tv ᐅᓪᓗᒥᓕᑕᕐᓂᒃ ᖃᐅᔨᒪᓂᐊᕋᕕᑦ.

– Ends –

ᐅᖃᕐᕕᐅᔪᓐᓇᕐᑐᖅ:

ᒪᓚᐃᔭ ᒥᑭᔾᔪᒃ,
ᑐᑭᒧᐊᒃᑎᑦᑎᑦᑎᔨᕈᖅᓴᔪᖅ, ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ
ᐅᖄᓚᐅᑖ: 867-975-4907

Tunngavik.com

ᐊᓖᖠᐊ ᐊᕐᓇᖅᑯᖅ−ᐳᕆᐊᓪ,
ᐊᖓᔪᖅᑳᖓᑦ ᐃᓄᐃᑦ ᑎᓚᕖᓴᒃᑯᑦ ᑕᑯᓐᓇᕋᒃᓴᓕᕆᔪᑦ

inuit.tv

ᐃᒪᓐᓇᐃᓯᒪᕗᖅ

ᓄᓇᕗᑦ ᑐᙵᕕᒃ ᑎᒥᖓᓂᒃ ᐱᔾᔪᑎᓕᒃ (ᑐᙵᕕᒃᑯᑦ)
ᑐᙵᕕᒃᑯᑦ ᐊᐅᓚᑦᓯᔨᐅᕗᑦ ᐊᒻᒪ ᑲᒪᒋᔭᖃᖅᑐᑎᒃ ᐃᓄᐃᑦ ᑲᒪᒋᔭᕆᐊᓕᖏᓐᓂᒃ ᒪᓕᒃᑐᒋᑦ ᓇᓗᓇᐃᖅᑕᐅᓯᒪᓂᖏᑦ ᓄᓇᕗᑦ ᐊᖏᕈᑎᖏᓐᓂ ᐊᒻᒪ ᐅᔾᔨᕐᑐᖅᐸᒃᑐᑦ ᒐᕙᒪᑐᖃᒃᑯᑦ ᐊᒻᒪ ᓄᓇᕘᑉ ᒐᕙᓚᒃᑯᖏᓐᓂᒃ ᒪᓕᒋᐊᓕᖏᓐᓂᒃ ᒪᓕᒃᑲᓗᐊᕐᒪᖔᑖ.

ᐱᔾᔪᑎᓕᒃ ᐃᓄᐃᑦ ᑕᓕᕖᓴᒃᑯᓐᓂᒃ
ᐃᓄᐃᑦ ᑎᓚᕖᓴᒃᑯᑦ ᑎᓕᔭᐅᔾᔪᑎᒋᓯᒪᔭᖏᑦ ᐃᒻᒥᑰᕐᓗᑎᒃ ᐃᓄᐃᑦ ᑎᓚᕖᓴᒃᑯᑦ ᑕᑯᒃᓴᐅᑎᑦᑎᕙᓐᓂᐊᕐᓗᑎᒃ ᑐᓴᐅᒪᑎᑦᑎᒍᑕᐅᓗᓂ, ᐃᓕᓐᓂᐊᑎᑦᑎᒍᑕᐅᓪᓗᓂ, ᑕᑯᕋᓐᓇᑎᑦᑎᒍᑕᐅᓗᓂ ᐊᒻᒪᓗ ᑲᒪᖃᑎᖃᓪᓗᑎᒃ ᓄᓇᕗᖕᒥᐅᓂᒃ. ᐃᓄᐃᑦ ᑕᓕᕖᓴᒃᑯᑦ ᓴᖅᑭᔮᕐᑎᑦᑎᓂᐊᕐᐳᑦ, ᐳᐃᒍᖅᑕᐅᑦᑕᐅᓕᒪᑎᑦᑎᓗᑎᒃ ᐊᒻᒪ ᐱᕚᓪᓕᕐᑕᐅᓗᓂ ᐃᓄᒃᑐᑦ ᐅᖃᐅᓯᖅ ᑕᑯᒃᓴᐅᑎᑦᑎᓗᑎᒃ ᐃᓄᐃᑦ ᑭᒃᑰᓂᖏᓐᓂᒃ ᐊᒻᒪ ᐃᓕᖅᑯᓯᖏᓐᓂᒃ.

ᓄᓇᕗᖕᒥᐅᑦ ᐃᓄᐃᑦ ᓄᓇᕘᓕᒫᕐᒥ ᐊᒻᒪ ᑲᓇᑕᓕᒫᕐᒥ ᑕᑯᓐᓇᕈᓐᓇᖃᑦᑕᓂᐊᕐᐳᑦ ᐃᓄᒃᑑᖅᑐᓂᒃ.

ᑎᓚᕖᓴᒃᑯᑦ ᑕᑯᓐᓇᕐᑕᐅᔪᓐᓇᓂᐊᕐᑐᑦ, ᐊᓪᓛᑦ ᓱᕈᓯᓛᓄᑦ, ᐃᓱᒪᒋᔭᐅᓯᒪᒻᒪᑦ ᐃᑲᔪᕐᓯᓂᕆᒐᔭᕐᑕᖓᓂᒃ ᑎᑎᕋᕈᓐᓇᕐᓯᓂᕐᒧᑦ ᐊᒻᒪ ᐅᖃᓕᒫᕈᓐᓇᕐᓯᕙᓪᓕᐊᓂᕐᒧᑦ.

ᖃᐅᔨᓴᕐᑕᐅᓚᐅᕐᓯᒪᔪᑦ ᑕᑯᕋᓐᓇᕈᓐᓇᕐᑐᑦ 2016-ᒥ (ᖃᐅᔨᓴᕐᑕᐅᑲᑦᑕᐅᓪᓗᓂ TVNEBS) ᖃᓄᑎᒋ ᐃᑲᔪᕐᓯᑕᐅᖕᒪᖔᑖ ᓄᓇᕗᖕᒥᐅᓄᑦ ᓴᖅᑮᔪᖃᓐᓂᕐᐸᑦ ᐃᓕᓴᒍᑕᐅᔪᓐᓇᕐᑐᓂᒃ ᑎᓚᕖᓴᒃᑯᑦ ᑕᑯᒃᓴᐅᑎᑦᑎᓂᕐᒥᒃ ᖃᐅᔨᔭᐅᔪᒻᒪᑦ ᐃᑲᔪᕐᓯᑕᒻᒪᕆᐅᓂᖓᓂᒃ ᐊᑑᑎᓕᖕᓂᒃ ᑕᑯᓐᓇᕋᒃᓴᓂᒃ ᒫᓐᓇᐅᔪᒥ ᑕᑯᓐᓈᕋᒃᓴᐅᔪᓐᓇᖏᑦᑐᓂᒃ ᓄᓇᕗᖕᒥ.

ᓈᓚᐅᑎᒃᑯᑦ ᐃᓚᖓᒍᑦ ᐃᓄᒃᑑᖅᑐᓂᒃ ᑐᓴᕋᓐᓇᕋᒃᓴᕐᑕᖃᕋᓗᐊᕐᑎᓪᓗᒍ ᐊᒻᒪ ᑐᑭᓯᐅᒪᒍᓂᒃ, ᐃᓄᐃᑦ ᑎᓚᕖᓴᒃᑯᑦ ᑕᑯᒃᓴᐅᑎᑦᑎᔪᓐᓇᕐᒪᑕ ᐊᒻᒪ ᑐᓴᕐᓴᐅᑎᐊᕐᑐᓂᒃ ᑕᒪᐃᓐᓄᑦ ᐅᑭᐅᖃᑎᒌᙱᑦᑐᓄᑦ ᐊᒻᒪ ᐃᓕᓴᒍᑕᐅᔭᕆᐊᓕᖕᓂᒃ ᑕᑯᒃᓴᐅᑎᑦᑎᔪᓐᓇᕐᓗᑎᒃ.

ᑐᙵᕕᒃᑯᑦ ᑮᓇᐅᔭᖃᖅᑎᑦᑎᓂᖏᑦ
ᑐᙵᕕᒃᑯᑦ ᑮᓇᐅᔭᖃᖅᑎᑦᑎᓂᕐᐳᑦ $2,469,578-ᓂᒃ ᐅᑭᐅᓄᑦ ᐱᖓᓱᓄᑦ ᐊᑭᓕᕆᐊᓕᖕᓄᑦ ᐊᑭᓕᐅᑕᐅᕙᓐᓂᐊᕐᑐᓂᒃ ᐊᒻᒪ ᑕᑯᓐᓇᕋᒃᓴᓕᐅᕐᓂᕐᒧᑦ. ᑮᓇᐅᔭᖃᖅᑎᑦᑎᒍᑎᖏᑦ ᑐᙵᕕᒃᑯᑦ ᑮᓇᐅᔭᑖᕆᕙᒃᑕᖏᓐᓂᒃ ᐅᔭᕋᑦᑕᕆᐊᓂᒃ.

ᐅᔭᕋᑦᑕᕆᐊᓂᒃ ᑮᓇᐅᔭᓄᑦ ᐃᓯᖅᑐᓄᑦ ᐊᑐᐊᒐᖏᑦ, ᓈᖕᒪᒋᔭᐅᔪᔪᑦ ᑐᙵᕕᒃᑯᑦ ᑲᑎᒪᔨᖏᓐᓄᑦ ᓄᕕᑉᐱᕆ 2011-ᒥ, ᓇᓗᓇᐃᖅᓯᓯᒪᒻᒪᑕ ᑲᑐᔾᔭᐅᓗᓂ ᐊᒻᒪ ᓄᖑᓗᐊᖅᑕᐃᓕᒪᑎᑕᐅᓗᑎᒃ ᐊᑑᑎᖃᖅᑎᑕᐅᔪᓐᓇᕐᓂᖏᑦ ᑮᓇᐅᔭᕐᑎᒍᑦ ᐃᑲᔪᕐᓯᒍᑕᐅᔪᑦ ᐱᔭᐅᔪᑦ ᐅᔭᕋᑦᑕᕆᐊᕐᕕᖃᖅᑐᓂᒃ ᓄᓇᕗᖕᒥ ᓄᓇᑖᕐᕕᐅᓯᒪᔪᓂᑦ. ᐅᔭᕋᑦᑕᕆᐊᓂᑦ ᑮᓇᐅᔭᕐᑖᕆᔭᐅᕙᒃᑐᑦ ᐊᒡᒍᖅᑕᐅᕙᒃᑐᖅ ᐊᕝᕙᖏᑦ ᐊᐅᓚᑦᑎᔾᔪᑎᓄᑦ ᑮᓇᐅᔭᖃᕈᑎᑦ ᐊᒻᒪ ᓇᑉᐸᖓ ᑐᖅᑯᖅᑕᐅᓯᒪᔪᓄᑦ ᑮᓇᐅᔭᖃᕈᑎᓄᑦ. ᐊᐅᓚᑦᑎᔾᔪᑎᓄᒃ ᑮᓇᐅᔭᖃᕈᑎᑦ ᐊᕐᕋᒍᑕᒫᑦ ᐊᒡᒍᖅᑕᐅᓪᓗᓂ ᑐᓂᔭᐅᓲᖅ ᑐᙵᕕᒃᑯᓐᓄᑦ ᐊᒻᒪ ᐱᖓᓱᐃᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐃᓄᐃᑦ ᑎᓚᕖᓴ ᑮᓇᐅᔭᓕᐅᕐᐸᓪᓕᐊᑎᑦᑎᓂᐊᕐᐳᑦ ᓄᓇᕘᑉ ᑮᓇᐅᔾᔭᓵᒃᓴᓄᑦ ᐃᒪᓐᓇᐃᓪᓗᑎᒃ ᐱᓕᒻᒪᒃᓴᐃᓗᑎᒃ, ᖃᐅᔨᒪᓂᓕᖕᓂᒃ ᐃᖅᑲᓇᐃᔮᒃᓴᓂᒃ ᐊᒻᒪᓗ ᐊᑭᑐᔪᓂᒃ ᐊᖃᕐᕆᔾᔪᑎᓂᒃ.

Download (PDF, 151KB)