ᓴᒃᑯᑕᐅᑲᐅᑎᒋᔭᕆᐊᓕᒃ
(ᐄᐳᕈᓪ 17, 2024 — ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑯ ᓂᕆᐅᒃᑲᓗᐊᖅᑎᓪᓗᒋᑦ ᐃᖅᑲᓇᐃᔭᖃᑎᖃᕐᓗᑎᑦ ᒐᕙᒪᑐᖃᒃᑯᓐᓂ ᐊᒥᓱᓂᑦ ᐱᓕᕆᐊᕐᓂᒃ ᑐᓴᖅᑎᑕᐅᖅᑲᐅᔪᓄᑦ ᐃᑦᐸᒃᓴᖅ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᖏᖕᓄᑦ ᑕᐃᔭᐅᔪᑦ ᓇᓕᒧᒌᑦᑎᑦᑎᓂᖅ ᑕᒪᐃᓐᓄᑦ ᑭᖑᕚᕆᔭᐅᔪᓄᑦ, ᑭᓯᐊᓂᓕ ᐊᕕᓯᒪᔪᒻᒪᕆᐅᕗᑦ ᓱᓕ ᑲᓇᑕᑉ ᑐᓴᖅᑎᖅᑲᐅᔭᖏᑦ ᐅᓪᓗᒥ ᐊᒻᒪᓗ ᓄᓇᕗᒻᒥᐅᑦ ᐃᓄᐃᑦ ᐱᔭᕆᐊᓕᖏᑦ ᐃᓅᓯᖏᑦ ᓇᓕᒧᓐᓂᖃᑦᑎᐊᖁᓪᓗᒋᑦ ᐊᒥᓱᑦ ᑲᓇᑕᒥᐅᑕᐅᔪᑦ ᖁᕕᐊᒋᓲᖏᖕᓂ ᐊᔾᔨᖃᓕᕐᓗᑎᑦ.
“25 ᐊᕐᕌᒎᓕᖅᑐᓂᑦ ᓄᓇᕗᑦ ᐱᙳᖅᑎᑕᐅᓚᐅᖅᓯᒪᑎᓪᓗᒍ, ᓄᓇᕗᒻᒥᐅᑕᐅᔪᖅ ᐃᓄᒃ ᐅᓪᓗᒥ ᐃᓅᓯᖓᑕ ᐱᐅᔫᓂᖓᑕ ᑕᑯᒐᒃᓴᒻᒪᕆᒃᑯᑦ ᐱᐅᙱᓐᓂᖅᓴᐅᓕᖅᑐᖅ ᑕᐃᒪᙵᓂᑦ 1999−ᖑᔪᒻᒪᓂᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᐃᒡᓗᑭᒃᓴᐃᓐᓇᐅᔭᖅᑐᑦ ᓱᓕ ᐱᐅᙱᓐᓂᖅᓴᐅᓕᖅᑐᑎᓪᓗ ᐃᒡᓗᖏᑦ, 75%−ᖑᔪᑦ ᓄᓇᕗᒻᒥᐅᑦ ᐃᓄᐃᑦ ᓂᕿᖃᑦᑎᐊᖅᐸᙱᑦᑐᑦ, ᐃᓄᒃᑐᑦ ᐅᖃᓪᓚᒍᓐᓇᕐᓂᖏᑦ ᐊᒥᓲᓂᖏᑦᑕ ᖃᑦᑏᓐᓇᐅᓂᖅᓴᐅᓕᖅᑐᑦ, ᐊᒻᒪᓗ ᓄᓇᕗᒻᒥᐅᑦ ᐃᓄᐃᑦ ᑐᖁᖃᑦᑕᓕᖅᑐᑦ ᐳᕙᒡᓗᖕᓂᕐᒥᒃ, ᑲᒪᒋᔭᒃᓴᐅᒐᓗᐊᖅᑐᓂ ᐊᒻᒪᓗ ᐊᐃᑦᑑᑕᐅᑦᑕᐃᓕᒪᒍᓐᓇᖅᑐᓂ ᐋᓐᓂᐊᖅ, ᓱᑲᓐᓂᖏᑦ ᐊᒥᓲᓛᖑᔪᑦ ᓇᒥᓕᒫᖅ ᓄᓇᕐᔪᐊᕐᒥ.”
ᐃᓕᓐᓂᐊᖅᓯᒪᑦᑎᐊᕈᑎᑦ ᓄᓇᕗᒻᒥᐅᑦ ᐃᓄᐃᑦ ᐊᑑᑎᓕᒻᒪᕆᐅᒐᔭᖅᑐᓂ ᐱᕙᓪᓕᐊᑎᑦᑎᓗᓂ ᐋᖅᑮᓗᑎᑦ ᐊᒥᓱᓂᑦ ᑕᒪᒃᑯᓂᖓ ᐱᔾᔪᑎᓂᑦ, ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓ ᑐᒃᓯᕋᖅᓯᒪᖃᑦᑕᓪᓚᑦᑖᖅᑎᓪᓗᒋᑦ ᐃᓕᓐᓂᐊᕐᓂᕐᒧᑦ ᑮᓇᐅᔭᓂᑦ, ᐅᖃᐅᑕᐅᓯᒪᙱᒻᒪᕆᑦᑐᑦ ᐃᓄᐃᑦ ᓯᓚᑦᑐᓴᕐᕕᒻᒥ ᑮᓇᐅᔭᖃᖅᑎᑦᑎᓂᖏᖕᓅᖓᔪᓂᑦ ᑮᓇᐅᔭᖅᑐᕈᑎᒃᓴᓂᑦ 2024-ᒨᖓᓂᐊᖅᑐᓂᑦ. ᐊᒥᓱᕈᖅᐸᓪᓕᐊᓯᒪᓪᓗᑎᑦ ᐱᓇᓱᐊᖅᑐᑦ ᐃᓄᐃᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᓂᖏᖕᓄᑦ ᑮᓇᐅᔭᖃᕐᕕᖓᓂᒃ, ᐊᒻᒪᓗ ᐊᒥᓱᑦ ᐱᓇᓱᐊᖅᐸᑦᑐᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ, ᓄᓇᕗᑦ ᐃᓄᐃᑦ ᐃᓕᓐᓂᐊᕆᐊᒃᑲᓐᓂᖃᑦᑕᖅᑎᓪᓗᒋᑦ, ᑮᓇᐅᔭᑦ ᐊᒥᓲᓂᖏᑦ ᖃᑦᑏᓐᓇᐅᓗᐊᖅᓯᒪᔪᑦ ᐊᕐᕌᒎᓕᖅᑐᓂᑦ ᐊᒥᓱᓂᑦ ᒐᕙᒪᑐᖃᒃᑯᓐᓃᙶᖅᑐᑦ ᒐᕙᒪᑐᖃᒃᑯᑦ ᐊᐃᑦᑐᐸᑦᑕᖏᑦ ᐃᓄᐃᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᓂᖏᖕᓄᑦ ᑮᓇᐅᔭᖃᕐᕕᖓᓄᑦ, ᐊᒻᒪᓗ ᑕᒪᓐᓇ ᐃᓚᑰᓗᐊᕐᓂᖏᑦ ᓂᕆᐅᒋᔭᐅᕗᑦ ᐃᓚᑯᕈᒃᑲᓐᓂᒻᒪᕆᓛᕐᓗᑎᑦ.
ᐊᕐᕌᒎᑦ ᐊᑯᕐᖓᖏᖕᓂ 2021-2022 ᐊᒻᒪᓗ 2022-2023 ᐊᒥᓱᑦ ᓄᓇᕗᒻᒥᐅᑦ ᐃᓄᐃᑦ ᐊᑐᖅᓯᒪᓕᖅᑐᑦ ᑮᓇᐅᔭᓂᑦ ᐃᓄᐃᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᓂᖏᖕᓄᑦ ᑮᓇᐅᔭᖃᕐᕕᖓᓂ ᐊᒥᓱᕈᕆᐊᖅᓯᒪᓕᖅᑐᑦ 65%−ᒪᕆᐅᔪᓂᑦ, ᒐᕙᒪᑐᖃᒃᑯᓐᓃᙶᖅᑐᑦ ᑕᐃᑲᓂᒃᓴᐃᓐᓇᖅ ᐊᕐᕌᒍᓄᑦ ᐊᒥᓱᕈᕆᐊᖅᓯᒪᑐᐃᓐᓇᖅᑐᑎᑦ 12%−ᑯᓗᑐᐃᓐᓇᕐᓂᒃ. ᑮᓇᐅᔭᒃᑲᓐᓂᖅᑕᖃᙱᑦᑎᓪᓗᒍ ᒐᕙᒪᑐᖃᒃᑯᓐᓂ, ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑭᓖᒋᐊᖃᖅᓯᒪᔪᑦ ᑮᓇᐅᔭᓂᑦ ᐊᒥᒐᖅᓯᔾᔪᑕᐅᓯᒪᔪᓂᑦ, ᓂᕆᐅᒋᔭᐅᓪᓗᑎᑦ ᐃᒪᓐᓇᐅᓂᐊᖅᑐᒋᔭᑦ $5 ᒥᓕᐊᓐ ᑮᓇᐅᔭᑦ ᐊᕐᕌᒍᑕᒫᑦ ᐅᑯᓄᖓ ᐊᕐᕌᒍᓄᑦ 2021 ᑎᑭᓪᓗᒍ 2017. ᑕᒪᓐᓇ ᓇᓕᒧᒌᓕᖅᑎᑦᑎᙱᒻᒪᑦ ᓯᕗᓂᒃᓴᖃᑦᑎᐊᖁᓪᓗᒋᑦ ᓄᓇᕗᒻᒥᐅᑦ ᐃᓄᐃᑦ ᐱᑦᑎᐊᕋᓱᐊᕐᓂᒃᑯᓪᓗ ᑕᑯᒃᓴᐅᑎᑦᑎᙱᑦᑐᖅ ᐊᑐᓕᖅᑎᑦᑎᒐᓱᐊᕈᑕᐅᓂᖓᓄᑦ ᐊᕕᑦᑐᖅᓯᒪᓂᖓ 23 ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓄᑦ, ᐃᓄᐃᑦ ᐃᖅᑲᓇᐃᔭᕆᐊᖃᖅᑎᓪᓗᒋᑦ ᐃᓄᓕᒫᑦ ᐊᒥᓲᓂᖏᑦ ᒪᓕᓪᓗᒋᑦ ᑭᒡᒐᖅᑐᖅᑕᐅᑦᑎᐊᕐᓗᑎᑦ ᒐᕙᒪᒃᑯᓐᓂ ᐱᓕᒻᒪᒃᓴᖅᑕᐅᓂᖏᑎᒍᑦ. ᐊᕕᑦᑐᖅᓯᒪᓂᖓ 23 ᑐᙵᕕᓕᐅᖅᓯᒪᖕᒪᑦ ᑕᒪᔅᓱᒥᖓ ᐱᓇᓱᐊᒐᕐᒥᒃ ᑎᑭᑎᑦᑎᓇᓱᓪᓗᑎᑦ, ᐱᖃᓯᐅᑎᓪᓗᒋᑦ ᐃᖅᑲᓇᐃᔭᓕᒻᒪᒃᓴᖅᑐᑦ ᐱᓕᒻᒪᒃᓴᖅᑕᐅᓗᑎᑦ ᐊᒻᒪᓗ ᑎᑎᕋᕆᐊᙵᖅᑕᐅᓂᖏᑦ ᒪᓕᑦᑕᐅᓗᑎᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᖕᓄᑦ ᐸᕐᓇᐅᑎᖏᑦ, ᑭᓯᐊᓂᓕ ᑕᐃᒪᐃᓕᖓᕗᖅ ᒪᑭᒋᐊᖅᑕ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᖕᓄᑦ ᑯᐊᐳᕇᓴᓐ, ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑭ ᓕᖓᖃᑦᑕᓕᖅᑐᑦ ᓇᓕᒧᓐᓂᖃᖅᑎᑦᑎᒍᑕᐅᙱᑦᑐᒥᒃ ᐃᓄᐃᑦ ᐃᓕᓐᓂᐊᕐᓂᖏᖕᓄᑦ ᐅᓪᓗᒥᐅᔪᖅ ᐃᖅᑲᓇᐃᔮᕆᔭᐅᓪᓗᓂ ᒐᕙᒪᒃᑯᓐᓄᑦ ᑎᑭᑕᐅᓇᓱᐊᖔᖅᑐᒥᒃ.
ᓄᓇᕗᒻᒥᐅᑦ ᐃᓄᐃᑦ ᓂᕿᖃᑦᑎᐊᖃᑦᑕᙱᑦᑐᑦ ᐊᒥᓲᓂᖅᓴᒻᒪᕆᐅᓪᓗᑎᑦ ᐊᓯᖏᑦ ᑲᓇᑕᒥᐅᓂᑦ. ᓄᓇᕗᑦ ᑐᙵᕕᒃ ᑎᒥᖓ ᑐᙵᓱᐊᑎᑦᑎᔫᒐᓗᐊᑦ ᑮᓇᐅᔭᓂᑦ ᐊᑐᕐᓂᖏᑦ ᐊᖑᓇᓱᒃᑏᑦ ᐃᑲᔪᖅᑐᖅᑕᐅᓂᖏᑦᑕ ᐊᐃᑦᑑᓯᐊᖏᓐᓂᒃ ᐊᒻᒪᓗ ᑲᓇᑕᒥ ᐃᓕᓐᓂᐊᕐᕖᑦ ᓂᕿᖃᖅᑎᑕᐅᓂᖏᖕᓄᑦ ᐱᓕᕆᐊᓄᑦ. ᑭᓯᐊᓂᓕ, ᑲᒪᒋᔭᕆᐊᖃᖅᑕᖏᑦ ᐊᒥᒐᖅᓯᔪᒻᒪᕆᐅᕗᑦ ᑮᓇᐅᔭᑦ ᐊᑐᖅᑕᐅᔭᕆᐊᓖᑦ ᐊᑐᓕᖅᑎᑕᐅᓗᓂ ᐃᓄᐃᑦ ᓄᓇᖓᖕᓂ ᓂᕿᖃᑦᑎᐊᕐᓂᒧᑦ ᖃᓄᖅᑑᕈᑎ ᐊᒻᒪᓗ ᑮᓇᐅᔭᑦ ᐊᑐᖅᑕᐅᒃᑲᓐᓂᕆᐊᓖᑦ ᑐᐊᕕᕐᓇᖅᑐᒃᑯᑦ ᐱᔭᐅᔭᕆᐊᖃᓪᓚᕆᑦᑐᑦ. ᓄᓇᕗᑦ ᑐᙵᕕᒃ ᑎᒥᖓ ᐅᑕᖅᑭᔪᑦ ᐃᓚᐅᖃᑕᐅᒐᔭᕐᓂᖏᖕᓂᒃ ᐋᖅᑭᒃᓱᖅᑕᐅᓂᖏᑦᑕ ᐊᒻᒪᓗ ᐊᑐᓕᖅᑎᑕᐅᓂᖏᑦᑕ ᐱᓕᕆᐊᑉ ᒪᓕᑦᑕᐅᓗᑎᑦ ᑐᑭᒧᐊᕈᑏᑦ ᐋᖅᑭᒃᑕᐅᓯᒪᔪᑦ ᐊᕕᑦᑐᖅᓯᒪᔪᖅ 23-ᒥ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᒥ.
ᒐᕙᒪᑐᖃᒃᑯᑦ ᐊᖏᖃᑦᑕᐃᓐᓇᖅᑐᑦ ᓇᓗᓇᐃᖅᓯᓪᓗᑎᑦ ᑲᒪᒋᔭᖃᕐᓂᐊᕐᓂᕐᒥᓂᒃ ᓄᓇᖃᖅᑳᖅᓯᒪᔪᑦ ᓄᓇᓖᑦ ᐊᐅᓚᒍᓐᓇᐅᑎᖏᑦ ᐱᖁᑎᕐᔪᐊᖃᙱᓐᓂᖏᑦ ᑕᐃᒪᐃᒍᓐᓃᖁᓪᓗᒋᑦ 2030 ᓇᓪᓕᖅᐸᑦ. ᑭᓯᐊᓂᓕ ᑭᖑᓪᓕᖅᐹᒃ ᒪᕐᕉᒃ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᒃᓴᖏᑦ ᐱᖃᓯᐅᔾᔨᓯᒪᓗᐊᕌᓗᙱᒻᒪᑕ ᓈᒻᒪᑦᑐᓂᑦ ᑮᓇᐅᔭᓂᑦ ᓄᓇᕗᑦ ᑎᑭᑕᐅᓇᓱᐊᖅᑐᒧᑦ ᖃᓂᓪᓕᓂᐅᓴᙱᒻᒪᕆᑦᑐᑎᑦ. ᓄᓇᕗᒻᒨᖅᑕᐅᓂᐊᖅᑐᖅ $370 ᒥᓕᐊᓐ ᑮᓇᐅᔭᑦ ᓄᓇᖃᖅᑳᖅᓯᒪᔪᑦ ᐃᒡᓗᓕᐅᖅᑕᐅᓂᖏᖕᓄᑦ ᐊᒻᒪᓗ ᓄᓇᓕᓐᓂ ᐱᖁᑎᕐᔪᐊᓄᑦ ᐱᓕᕆᐊᖓᓄᑦ ᑐᙵᓱᐊᑎᑕᐅᑦᑎᐊᕐᓂᐊᖅᑐᖅ ᑮᓇᐅᔭᖃᖅᑎᑕᐅᔾᔪᑎᖓ. ᑭᓯᐊᓂᓕ, ᒪᑭᒪᑎᑕᐅᒍᓐᓇᙱᒃᑯᓂ, ᓂᕆᐅᓇᙱᓪᓗᓂ, ᑮᓇᐅᔭᓪᓗ ᐊᑐᖅᑕᐅᓂᖓᓗ ᐱᕕᖃᕐᓂᖓ, ᓄᓇᕗᑉ ᐱᖁᑎᕐᔪᐊᖃᙱᓗᐊᒃᑲᓐᓂᒻᒪᕆᓐᓂᐊᖅᑐᖅ ᖁᓚᕐᓇᙱᑦᑐᓂ ᑕᒪᓐᓇ. ᓄᓇᕗᒻᒥᐅᑦ ᐃᓄᐃᑦ ᑲᔪᓯᓂᖃᖅᑐᑦ ᒪᑭᒪᑎᑦᑎᓪᓗᑎᑦ ᑭᓱᖃᙱᑦᑐᒥ ᐊᒻᒪᓗ ᐃᖅᑲᓇᐃᔮᓂᑦ ᓴᓂᕐᕙᐃᓗᑎᑦ ᑮᓇᐅᔭᓂᑦ ᓯᕗᓪᓕᐅᔾᔭᐅᖁᔭᐅᔪᓄᑦ ᐱᖁᑎᕐᔪᐊᓕᕆᕙᑦᑐᓄᑦ, ᐊᒻᒪᓗ ᓂᕆᐅᑉᐳᒍᑦ ᑕᑯᐃᓐᓇᕐᓂᐊᕋᑦᑕ ᐊᒥᓱᕈᕆᐊᖅᑕᐅᓗᓂᖏᖕᓂ ᑮᓇᐅᔭᑦ ᐊᑐᖅᑕᓛᖅᑐᓂᑦ ᓯᕗᓂᒃᓴᒥ ᒐᕙᒪᑐᖃᒃᑯᓐᓂ.
ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᑦᑐᑦ ᑲᑎᒪᔨᐊᓛᖏᑦ ᑕᑯᒃᓴᐅᑎᑦᑎᔪᑦ ᑲᑐᔾᔨᓪᓗᑎᑦ ᑲᒪᒋᔭᖃᐃᓐᓇᕐᓂᐊᕐᓂᖏᑦᑕ ᐊᔪᖅᓴᙱᓕᕐᓗᑎᑦ ᑕᒪᐃᓐᓂ ᐃᓄᐃᑦ, ᑕᐃᒪᐃᒃᑯᑎᑦ ᐃᑲᔪᕐᓂᖃᕋᔭᖅᑐᑦ ᑕᒪᐃᓐᓂ ᑲᓇᑕᒥᐅᑦ. ᐃᓄᐃᑦ ᓄᓇᖓᑦ ᐊᖏᕈᑎᒋᔭᐅᓯᒪᔪᓃᙶᓪᓚᕆᑦᑐᓂ ᐊᒻᒪᓗ ᐱᕙᓪᓕᐊᒍᑎᒋᔭᐅᓕᓚᐅᖅᓯᒪᔪᖅ ᐃᓄᐃᑦ ᓄᓇᖓᑦ ᐊᑐᐊᒐᖓᓄᑦ. ᑖᓐᓇ ᐊᑐᐊᒐᖅ ᑐᕌᖓᕗᖅ ᑕᒪᐃᓐᓄᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᖕᓂ ᐊᒻᒪᓗ ᑎᒥᖏᖕᓂ ᐃᓅᓯᕆᔭᐅᔪᑦ ᐱᕙᓪᓕᐊᓂᖏᑦ ᐊᒻᒪᓗ ᐃᓕᖅᑯᓯᖏᑦ ᓇᓕᒧᒌᓕᖅᑎᑕᐅᖁᓪᓗᒋᑦ ᐃᓄᐃᑦ ᑕᒪᒃᑯᐊᓗ ᐊᓯᖏᑦ ᑲᓇᑕᒥᐅᑦ. ᐃᓄᐃᑦ ᖃᐅᔨᒪᓂᖅᐹᖑᒻᒪᑕ ᑕᒪᒃᑯᓂᖓ ᐱᔾᔪᑎᓂᑦ ᐅᕙᑦᑎᓐᓂ ᐊᑦᑐᐃᓂᓕᓐᓂᒃ, ᐊᒻᒪᓗ ᐱᕙᓪᓕᐊᓂᖃᕐᓗᑕ ᑲᒪᒋᔭᖃᕆᐊᖃᖅᑐᒍᑦ ᐃᓱᒪᓕᐅᕈᓐᓇᐅᑎᖃᕐᓗᑎᑦ ᐱᔾᔪᑎᓄᑦ ᑐᕌᖓᔪᑦ ᐃᓄᖕᓄᑦ ᐊᒻᒪᓗ ᐃᓄᐃᑦ ᓄᓇᖓᖕᓄᑦ.
ᓄᓇᕗᑦ ᑐᙵᕕᒃ ᑎᒥᖓ ᐊᔭᐅᕇᓐᓇᕐᓂᐊᖅᐳᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑏᑦ ᐃᑲᔫᓯᐊᒃᓴᖏᖕᓄᑦ ᑮᓇᐅᔭᓂᑦ ᑭᙴᒪᒋᔭᐅᔪᑦ ᐊᑐᐃᓐᓇᐅᑎᑕᐅᓂᐊᕐᒪᑕ ᐊᒥᓱᕈᖅᐸᓪᓕᐊᑐᐃᓐᓇᖅᑐᑦ ᐃᓄᐃᑦ ᐃᓕᓐᓂᐊᖅᑏᑦ ᖁᑦᑎᓂᖅᐹᒥ ᐃᓕᓐᓂᐊᕇᖅᑎᓪᓗᒋᑦ ᐃᓕᓐᓂᐊᕋᓱᐊᖅᑕᒥᓄᑦ; ᐃᓕᓐᓂᐊᕐᕕᒻᒥ ᓂᕿᖃᖅᑎᑕᐅᓂᖏᖕᓄᑦ ᐱᓕᕆᐊᖓᑕ ᑮᓇᐅᔭᖃᖅᑎᑕᐅᖃᑦᑕᕐᓗᑎᑦ ᓄᓇᕗᒻᒥ; ᐃᑲᔪᖅᑐᐃᓂᖅᓴᐅᓕᕐᓗᑎᑦ ᒐᕙᒪᒃᑯᑦ ᐃᑲᔪᖅᑐᐃᓂᖓ ᐃᒡᓗᓕᐅᕐᓂᕐᒥᒃ ᐊᒻᒪᓗ ᐱᖁᑎᕐᔪᐊᓕᕆᓂᕐᒥᒃ ᓄᓇᕗᒻᒥ; ᐊᒻᒪᓗ ᐊᔾᔨᐅᙱᑦᑐᓂᑦ ᑐᙵᕕᓖᑦ ᐃᒡᓗᒃᓴᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐊᒻᒪᓗ ᑲᒪᒋᔭᖃᕐᓂᐊᕐᓂᕋᖁᓪᓗᒋᑦ ᐃᓄᖕᓄᑦ ᓯᕗᒃᑲᖅᑕᕈᑕᐅᓯᒪᔪᖅ ᐱᖁᑎᕐᔪᐊᑦ ᑭᙴᒪᒋᔭᐅᔪᑦ ᖃᐅᔨᓵᖓᓂᒃ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒋᐊᕐᕕᒃᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
