Kilamik Toniyakhak
(April 17-mi 2024-mi – Ikalokni, Nonavumi) Nonavut Tungavik Timeoyok (NTI) nahogitilogit havakatigiyagani kavamatokaet kavini havaohikni tohaktitaoyut ublomi kavamatokaet atoktakhaenik maniknik ukeomi taeyaoyok Ihoateakniganik Tamaeni Kigolikhani, aolagitok agiyomik honakaginiganik ukoa Kanataop tohaktitaet ikpakha ukoalo Nonavumi Inoet atogeakaktaenik inuteagotikhanik ayikotaenik amigaenikhat Kanatameot neamgiyagotaenik.
“25 ukeot anigoknigani hatkikniganit ukeoktaqtup,inuhikateaknik amigaenikhani Nonavumi Inoenakni ublomi nalonaektaoyok igataomaniganik 1999-mit,” okaktok NTI-koni Ikhivaotalikmit Aluki Kotierk-mit. “Atokhimaginaktok igatakpaleavlonilo iglukhakateaginiganik, 70%-goyut amigaetut Nonavumi Inoet nikikhakateagitut, Inoenaktut okagiktut ikiklivaleayut, Nonavumilo Inoet tokovaleayut TB-mit, monaktaolaktok atogeakagitoklo aneagut, amigaenigini agitkiyanik kitonilika nonakyoani hilakyoami.”
Ilihaotikhaet Nonavumi Inoet ihoakotaoneagaloakmata hivonikhami ihoakhiyagani amihut ukoa ihomagiyaoyut, NTI-kot naonaetomik tukhiqtut ilihaknikmi manikhakhanik, okaotaogitu Inoet Ilihakpaliknigini (IPSE) manikhakhanik Ukeomi Atoktukhanik Manikhi 2024-mi. Amigaekpaleaginaktut tukhiktut IPSE-nit, okoalo amigaekpaleayut tukhiktut NTI-koni Nonanilo Inoet Katimayeni (RIA-n), Nonavumi Inoenaknit ilihakhimageamikni, kageotikmata manikhakhanik pipkagaoyonik kavamatokanit IPSE-mi holiyotini malgukni ukeokni, ilagoenakaknigalo agiklivaleaginaktogiyaoyok.
Kavamatokat okakhimakataktut nalonaekhiyamikni atoktakhamiknik inigeagani Nonakakaktut hanayakhalikiyotaeni ilagoenainigit 2030-mi. Talva kigolek kavamatokanit ukeomi atoktakhaenik manikni ilakaginmata nakogoyaoyokhanik maniknik atokniginik Nonavut pivaleayagani iniktigakhak ona. Nonavut ihoaktomik avakhaota 370-mileatala Nonakakaktut Iglolikiyotikhaenik Nonagiyaoyomilo Hanayakhanik havat koyagiyaoneaktut pivaligotikhanik manikhanit. Kiheani, ayogeogotikagitkomik, nalonaeknignik, manikhat pivikhakakniklo, Nonavumi hanayakhani ilakoenaoniga agiklivaleaneaktok. Nonavumi Inoet ayogoegotinik pivaleayot inmiknik havakhotiklo ileogeayamikni manikhanik atokaktokhani hanayakhani, nahogiyogolo takoyaptikni atokhmaktokhanik akitokhimaktoniklo maniknik atoktitiyotinik hivonikhami kavamatokani ukeomik atoktakhaenik manikni.
Inoet Koelo Ikayoktigekniginik Kamiteoyok (ICPC) takupkaktitiyok tamaenit tonikhimayotimik hanayagani iligaeyaotikhaenik tamaeta Inoenaet, kigoagut nakogotaoneakmata tamaeni Kanatameotani. Ona togagateaktok kanoginiganik Inoet Nunangat-mi Okaotaoyomi piyotaovlonilo pivaleaniganik Inoet Nonangat-mi Pitkohikmik. Ona pitkohik togagayok tamaenut kavamatokani havakveoyonut timeoyonulo iniktigakhakaktonik inuyohikmi manikhakheogotini, ilitkohikmilo agomatiyotikhanik Inoenaknit ahenilo Kanatameotanit. Inoenaet kaoyimanikhaoyut ihomagiyaoyonik aktoknikaktonik uvaptiknik, piyageakaktogolo pivaligotikhanik havaohiknik ihomaleogotini piyotaoyonik aktoknikaktonik Inoenaknik Inoenakniklo Nunangat-mi.
NTI-kot akhugotikaenakneaktut ilihakpaligotikhanik manikhakhanik piyotaoyonik ihageagiyainik amigaekpaleayut Inoenaet ilihaktut ilihaotikaktot kigoani agayoknet ilihakveanit; ilihakvikmi nikikhalikiyotinik havami manikhakhat Nonavumi; akitogeaknigit kavamanit ikayutit iglolikiyotikhat hanayakhaniklo Nonavumi; atokhimakniganiklo ayikotakagitonik iglolikiyotikhanik manikhanik okageyaotimiklo Inoenaknit hivolikhogeagani hanayakhanik ihageagiyaoyonik ilitokhakniginik.
-30-
Tohagakhalikiyit Okakvikha
Kevin Kablutsiak
Hivolikhokti Tohaomayotinik
Nonavut Tungavik Timeoyomi
