ᑐᓴᕋᑦᓴᓕᕆᔩᑦ

ᐃᓕᖅᑯᓯᒃᑯᑦ ᐊᒻᒪᓗ ᒪᒥᓴᖅᑐᓕᕆᓂᕐᒧᑦ ᐱᓕᕆᐊᒃᓴᖅ − ᑐᒃᓯᕋᐅᓯᐅᖁᔨᔾᔪᑎ

(ᒫᑦᓯ 30, 2021ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᖁᕕᐊᓱᑦᑐᖅ ᑐᓴᖅᑎᑦᓯᒋᐊᒃᓴᖅ ᑐᒃᓯᕋᐅᓯᐅᖁᔨᔾᔪᑎᒥᒃ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᓐᓄᑦ (NTF) ᐃᓕᖅᑯᓯᒃᑯᑦ ᐊᒻᒪᓗ ᒪᒥᓴᖅᑐᓕᕆᓂᕐᒧᑦ ᐱᓕᕆᐊᒃᓴᒧᑦ. ᐃᓄᐃᑦ ᑐᒃᓯᕋᐅᓯᐅᕈᓐᓇᖅᑐᑦ ᐱᓕᕆᐊᒧᑦ ᑮᓇᐅᔭᓕᑕᐅᒍᑎᓂᒃ ᐅᑯᓄᖓ 1) ᐱᓕᕆᐊᒃᓴᒃᑯᑦ ᑲᒪᔾᔪᑎᒃᓴᑦ ᐋᓐᓂᖅᑕᐅᓯᒪᓂᕐᓄᑦ ᐊᒻᒪᓗ ᑭᖑᕚᖑᔪᑦ ᐊᒃᑐᖅᑕᐅᓯᒪᓂᖏᓐᓄᑦ ᐃᓕᓐᓂᐊᕆᐊᖃᑦᑕᓚᐅᖅᑐᑦ 2) ᐱᖅᑯᓯᒃᑯᑦ ᓄᓇᓕᐊᖅᑎᑦᓯᖃᑦᑕᓂᕐᒧᑦ ᐱᓕᕆᐊᒃᓴᑦ 3) ᐃᓕᓴᐃᓂᖅ ᐃᓄᐃᑦ ᐊᑐᖅᓯᒪᔭᖏᓐᓂᒃ, ᐃᓕᖅᑯᓯᖓᓂᒃ, ᐅᖃᐅᓯᖏᓐᓂᒃ ᐱᖅᑯᓯᖏᓐᓂᓪᓗ.

 

ᑭᒃᑯᑐᐃᓐᓇᐃᑦ ᐊᒻᒪᓗ ᑲᑐᔾᔨᖃᑎᒌᑦ ᐃᓄᐃᑦ ᐊᑎᖃᑕᐅᔪᑦ ᓄᓇᕗᑦ ᐊᖏᕈᑎᖏᓐᓂ, ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᑲᑐᔾᔨᖃᑎᒌᑦ, ᐃᓕᓐᓂᐊᕐᕖᑦ, ᖃᓪᓗᓈᓂ ᐊᒻᒪᓗ ᐅᐸᕝᕖᑦ ᐊᒻᒪᓗ ᓄᑕᖅᑲᑦ ᒥᑭᓂᖏᓐᓂ ᐃᓕᓐᓂᐊᓵᓕᕖᑦ ᑐᒃᓯᕋᐅᓯᐅᕈᓐᓇᖅᑎᑕᐅᔪᑦ ᑎᑭᐅᑎᓯᒪᔪᓂᒃ ᐊᖏᓂᖅᐹᕆᔪᓐᓇᖅᑕᖓᓄᑦ $25,000 ᑐᕌᖓᔪᓂᒃ ᖁᓛᓂ ᑎᑎᕋᖅᓯᒪᔪᓄᑦ ᐱᓕᕆᐊᒃᓴᓄᑦ. ᓄᓇᕗᒻᒥᐅᑕᐅᓂᖅ ᐊᑐᕆᐊᑐᙱᑦᑐᖅ; ᑭᓯᐊᓂ ᐊᖏᖅᑕᐅᔪᑦ ᐱᓕᕆᐊᓄᑦ ᑐᕌᒐᖃᕆᐊᓖᑦ ᒥᑭᓂᖅᐹᖑᒍᓐᓇᖅᑐᒥᒃ 75% ᐃᓄᓐᓂᒃ ᐊᑎᖃᖃᑕᐅᔪᓂᒃ ᓄᓇᕗᑦ ᐊᖏᕈᑎᖏᓐᓂ.

 

ᑐᒃᓯᕋᐅᓯᐅᕐᕕᒃᓴᖅ ᒪᑐᐃᖓᓂᐊᖅᑐᖅ ᒫᑦᓯ 29, 2021-ᒥᓂᒃ ᐄᑉᕈ 30, 2021-ᒧᓄᑦ ᐱᕕᒃᓴᖃᑦᓯᐊᖁᓪᓗᒋᑦ ᑐᒃᓯᕋᐅᓯᐅᕈᓐᓇᖅᑎᑕᐅᔪᑦ ᐋᖅᑭᑦᓱᐃᓂᕐᒧᑦ ᐸᕐᓇᓂᕐᒧᓪᓗ ᐱᓕᕆᐊᒃᓴᒃᑯᑦ ᐊᐅᓚᑕᐅᓂᐊᖅᑐᓂᒃ ᐅᐱᕐᖔᖑᓂᖓᓂ ᐊᐅᔭᐅᓂᖓᓂᓗ

ᑮᓇᐅᔭᓕᑕᐅᒍᑏᑦ NTF ᐃᓕᖅᑯᓯᒃᑯᑦ ᐊᒻᒪᓗ ᒪᒥᓴᕐᓂᕐᒧᑦ ᐱᓕᕆᐊᒃᓴᓄᑦ ᐊᒥᐊᒃᑯᖏᓐᓃᙶᖅᑐᑦ ᐊᔾᔨᒌᑦᑐᒥᒃ ᐊᑭᓖᒍᑕᐅᓚᐅᖅᑐᓂᒃ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᓄᑦ ᐸᐸᑕᐅᔪᓂᒃ ᑮᓇᐅᔭᓂᒃ ᑐᙵᕕᒃᑯᓅᖅᑕᐅᓚᐅᖅᑐᓂᒃ ᑭᒡᒐᑐᐃᓪᓗᑎᒃ ᐃᓕᓐᓂᐊᕆᐊᖃᑦᑕᓚᐅᖅᑐᓯᒪᔪᓂᒃ.

ᑐᑭᓯᒋᐊᒃᑲᓂᕐᕕᒃᓴᖅ, ᐊᑐᐊᒐᕐᓂᒃ, ᐱᕝᕕᒃᓴᓕᐊᖑᓯᒪᔪᓂᒃ ᓴᖅᑭᐅᒪᔪᓄᑦ ᐊᒻᒪᓗ ᑐᒃᓯᕋᐅᑎᓂᒃ ᑕᑕᑎᕋᑦᓴᓂᒃ ᐅᕙᓂ: ᐃᓕᖅᑯᓯᓕᕆᓂᕐᒧᑦ ᐊᒻᒪᓗ ᒪᒥᓴᖅᑐᓕᕆᓂᕐᒧᑦ ᐱᓕᕆᐊᒃᓴᖅ

 

-30-

 

ᑐᑭᓯᒋᐊᒃᑲᓂᕐᕕᒃᓴᖅ:

 

ᓘᓯ ᒪᐃᓈᑦ

ᐱᓕᕆᐊᒃᓴᓕᕆᔨ

ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ

ᐅᖄᓚᐅᑖ: (867) 645-5400/ᐊᑭᖃᙱᑦᑐᖅ: 1-888-236-5400

www.tunngavik.com

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: