ᐊᑐᓂᑦ ᑕᖅᑭᑕᒫᑦ, ᓄᓇᕗᑦ ᑐᓐᖓᕕᒃ ᑎᒥᖓᑦ ᓇᓗᓇᐃᖅᓯᖃᑦᑕᖅᓂᐊᖅᑐᑦ ᑭᒃᑰᓂᖏᓐᓂᒃ ᐃᖅᑲᓇᐃᔭᖅᑎᓂᒃ ᐊᒻᒪᓗ ᐱᓕᕆᐊᕗᑦ ᐊᑐᓕᖅᑎᑦᑎᕙᓪᓕᐊᓂᕐᒥᑦ ᐃᓂᓪᓚᐃᓂᕐᒥᑦ ᐅᑯᓂᖓ ᓄᓇᕗᒥ ᐊᖏᕈᑎᓂᒃ.
ᑕᖅᑭᐊᓂ ᔫᓐ, ᓇᓗᓇᐃᔭᐃᔪᒍᑦ ᑭᒃᑑᓂᖏᓐᓂᒃ ᓄᓇᕗᑦ ᑐᓐᖓᕕᒃ ᑎᒥᖓᓐᓂ ᐃᓄᒃᑎᑐᑦ ᑐᓵᔩᑦ/ᑐᑭᓕᐅᕆᔩᑦ ᐱᓕᕆᔪᑦ ᐅᑯᓇᓂ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂᑦ ᐱᓕᕆᕕᐊᓐᓂ. ᕕᕈᓕᑲ ᑐᕐᕙ (ᓴᐅᒥᖓᓂ),ᕇᐱᑲ ᒪᐃᒃ (ᕿᑎᐊᓂ)ᐊᒻᒪᓗ ᐃᓕᓴᐱ ᐃᑭᓪᓗᐊᖅ (ᑕᓕᖅᐱᖓᓂ)ᑐᑭᓕᐅᕆᔨᑦ ᐃᓄᒃᑎᑑᓕᕆᓂᕐᒥᑦ ᖃᓪᓗᓈᑎᑐᓪᓗ ᑕᒪᐃᓐᓂᒃ ᓄᓇᕗᑦ ᑐᖓᕕᒃ ᑎᒥᖓᑦ ᑎᑎᕋᖅᓯᒪᔭᖏᓐᓂᒃ, ᐃᓚᒋᓪᓗᒋᑦ ᐊᕐᕌᒍᑕᒫᖅᓯᐅᑎᖏᓐᓄᑦ ᐅᓂᒃᑳᓂᒃ, ᑲᑎᒪᔪᓂ ᐸᐃᑉᐹᖁᑎᖏᓐᓂᒃ, ᐊᑐᐊᒐᖁᑎᖏᓐᓂᒃ, ᐅᖃᓕᒫᒐᓂᒃ, ᐱᔫᒥᓵᕈᑎᓂᒃ, ᑐᓴᒐᒃᓴᓂᒃ ᐃᖐᓐᓇᖅ ᓴᖅᑭᑦᑐᓂᒃ ᐊᒻᒪᓗ ᐊᓂᕙᓪᓕᐊᔪᓂᒃ ᑎᑎᖅᑲᓂᒃ. ᐊᒻᒪᓗᑦᑕᐅᖅ ᑐᓵᔨᐅᕙᖕᒥᔪᑦ ᐊᒥᓱᐊᖅᑕᖅᖢᑎᒃ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᑲᑎᒪᓂᖏᓐᓂ ᐅᑭᐅᑕᒫᑦ. ᐊᒃᓱᐊᓗᒃ ᐱᓕᕆᕙᒃᑐᑦ! ᐊᒻᒪᓗ, ᐃᑲᔪᖃᑦᑕᕆᓪᓗᑎᒃ ᓴᖅᑭᑎᕆᕙᓪᓕᐊᓂᕐᒥᑦ ᓄᑖᓂᒃ ᐅᖃᐅᓯᖅᑕᓂᒃ, ᐅᑯᐊ ᐱᖓᓱᑦ ᐃᓚᐅᓂᖃᖅᐸᒃᑐᑦ ᓯᕗᓐᓂᐊᖅᑎᐅᓂᕐᒥᑦ ᐱᓕᕆᓂᒃᑯᑦ ᑕᒪᑦᓱᒧᖓᓗ ᐃᓄᒃᑎᑐᑦ ᐊᓯᔾᔨᖅᐸᓪᓕᐊᓂᖏᓐᓂᒃ ᑕᐃᒪᖔᓗᓂᑦ ᓄᓇᕗᒥ. ᑕᒪᓐᓇ ᐊᖏᔪᐊᓗᒃ ᐱᓕᕆᐊᖅ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦ ᖁᕕᐊᓲᑎᖃᒻᒪᕆᒃᑐᑦ ᐅᑭᐅᓄᑦ ᐅᓄᖅᑐᓂᑦ ᑐᓂᓯᒪᓂᖏᓐᓂᒃ ᓄᓇᕗᒧᑦ ᐊᒻᒪᓗ ᐅᑯᓄᖓ ᐃᓄᒃᑎᑐᑦ ᐅᖃᐅᓯᓄᑦ ᑐᕌᑐᓂᒃ.
.
