ᐃᒡᓗᕗᑦ ᑯᐊᐳᕇᓴᓐ ᑎᒃᑯᐊᖅᓯᕗᑦ ᐊᖓᔪᖅᑳᖅ ᐊᐅᓚᑦᓯᔨᒻᒪᕆᒻᒥᒃ ᔫ ᐊᓪᓚ ᑯᓄᒃ
ᐊᒻᒪᓗ ᐃᒃᓯᕙᐅᑕᕆᔭᐅᓕᖅᑐᖅ ᑲᑎᒪᔨᓄᑦ ᕋᐃᒪᓐ ᖁᖅᓲᑦ
(ᐋᒡᒌᓯ 25, 2026 – ᐃᖃᓗᐃᑦ, ᓄᓇᕗᑦ) – ᑲᑎᒪᔩᑦ ᐃᒡᓗᕗᑦ ᑯᐊᐳᕇᓴᓐ−ᒃᑯᓐᓄᑦ ᖁᕕᐊᓱᑦᑐᑦ ᑐᓴᖅᑎᑦᑎᔭᕆᐊᒃᓴᖅ ᑎᒃᑯᐊᖅᑕᐅᓂᖓᓂᒃ ᔫ ᐊᓪᓚ ᑯᓄᒃ ᑲᑐᔾᔨᖃᑎᒌᑉ ᓯᕗᓪᓕᖅᐹᑦᓯᐊᕐᒥ ᐊᖓᔪᖅᑳᕆᔭᐅᓂᐊᓕᖅᑐᓂ ᐊᐅᓚᑦᓯᔨᒻᒪᕆᐅᓗᓂ, ᐊᒻᒪᓗᑦᑕᐅᖅ ᕋᐃᒪᓐ ᖁᖅᓲᑦ ᐃᒃᓯᕙᐅᑕᕆᔭᐅᓂᐊᓕᖅᑐᓂ ᐃᒡᓗᕗᑦ ᑯᐊᐳᕇᓴᓐ ᑲᑎᒪᔨᖏᖕᓄᑦ.
ᑎᒃᑯᐊᖅᑕᐅᓂᖏᒃ ᐱᒻᒪᕆᐊᓗᒻᒥᒃ ᐱᕚᓪᓕᕈᑎᒋᔭᐅᕗᖅ ᐱᕙᓪᓕᐊᒍᑎᒋᔭᐅᓂᖓ ᐃᓕᓴᕆᔭᐅᓕᖅᑐᓂ ᐃᒡᓗᕗᑦ ᑯᐊᐳᕇᓴᓐ−ᒃᑯᑦ ᓄᓇᕗᒻᒥ ᐃᓄᖕᓄᑦ−ᓯᕗᒃᑲᖅᑖᖑᓪᓗᓂ ᐃᒡᓗᓕᕆᓂᕐᒧᑦ ᑲᑐᔾᔨᖃᑎᒌᖑᓪᓗᓂ ᐊᒻᒪᓗ ᖃᐅᔨᒃᑲᐃᒍᑕᐅᓪᓗᓂ ᑲᑐᔾᔨᖃᑎᒌᑉ ᐱᕙᓪᓕᐊᓂᖃᓕᕐᓂᖓᓂᒃ ᒐᕙᒪᓕᕆᔾᔪᓯᕐᒥᒃ ᐊᒻᒪᓗ ᖃᓄᖅᑑᖅᓯᒪᓂᒃᑯᑦ ᑐᙵᕕᓕᐅᖅᓯᒪᓪᓗᑎᑦ ᒪᑭᒪᔪᓐᓇᕋᓱᐊᓕᖅᑐᑦ, ᐱᓕᕆᖃᑎᖃᕐᓗᑎᑦ ᐊᒻᒪᓗ ᐱᓕᕆᐊᓕᐅᓕᖅᑐᑎᑦ ᐱᔭᐅᔭᕆᐊᓖᑦ ᑕᒪᒃᑯᐊ ᐊᒥᓱᕈᕆᐊᖁᓪᓗᒋᑦ ᐃᒡᓗᒃᓴᖃᕈᓐᓇᕐᓂᖏᑦ ᐃᓄᒻᒪᕇᑦ ᓄᓇᕗᓕᒫᕐᒥ.
ᐊᖓᔪᖅᑳᖑᓗᓂ ᐊᐅᓚᑦᓯᔨᒻᒪᕆᒃ, ᒥᔅᑕ ᑯᓄᒃ ᑲᒪᒋᔭᖃᕐᓂᐊᖅᑐᖅ ᐋᖅᑮᓗᓂ ᐃᒡᓗᕗᑦ−ᒃᑯᑦ ᐊᐅᓚᓂᖏᓐᓂᒃ, ᖃᓄᖅᑑᖅᓯᒪᔪᒃᑯᑦ ᐃᖅᑲᓇᐃᔭᖃᑎᖃᕆᐊᓯᕙᓪᓕᐊᓗᓂ, ᓯᕗᒧᐊᑦᑎᓪᓗᓂᒋᑦ ᑲᑐᔾᔨᖃᑎᒌᖑᔫᑉ ᓯᕗᓪᓕᐅᔾᔭᐅᖁᔭᖏᑦ ᑲᒪᒋᔭᖃᕐᓗᑎᑦ, ᐊᒻᒪᓗ ᓯᕗᒃᑲᖅᑕᖅᑎᐅᓗᓂ ᐱᕙᓪᓕᐊᒍᑎᒋᔭᐅᓂᖓᓂᒃ ᐊᒻᒪᓗ ᐊᑐᓕᖅᑎᑕᐅᓂᖓᓂᒃ ᐃᒡᓗᓕᕆᓂᕐᒧᑦ ᐱᓕᕆᐊᑦ ᐊᒻᒪᓗ ᖃᓄᐃᓕᐅᕈᑎᒋᔭᐅᓂᐊᖅᑐᑦ.
ᖁᕕᐊᓱᑦᑐᒻᒪᕆᐅᕗᖓ ᐃᓚᐅᖃᑕᐅᔭᕆᐊᒃᓴᖅ ᐃᒡᓗᕗᑦ ᑯᐊᐳᕇᓴᓐ−ᒃᑯᓐᓄᑦ ᐱᒻᒪᕆᐊᓘᑎᓪᓗᒍ ᒫᓐᓇᐅᔪᖅ ᐱᕙᓪᓕᐊᒍᑎᖃᓕᕐᓂᖓᓂᒃ.” ᐅᖃᖅᑐᓂ ᔫ ᐊᓪᓚ ᑯᓄᒃ, ᐊᖓᔪᖅᑳᖅ ᐊᐅᓚᑦᓯᔨᒻᒪᕆᒃ ᐃᒡᓗᕗᑦ ᑯᐊᐳᕇᓴᓐ−ᒃᑯᓐᓄᑦ. ᐊᑦᑕᓇᙱᑦᑐᒥᒃ, ᐊᑭᑐᓗᐊᙱᑦᑐᓂᒃ ᐃᓕᖅᑯᓯᕐᒨᖓᑦᓯᐊᖅᑐᓂᒃ ᐃᒡᓗᖃᕐᓂᖅ ᑐᙵᕕᓪᓚᕆᐅᕗᖅ ᓴᙱᔪᓂᒃ ᐃᓚᒌᑦᑐᖃᖃᑦᑕᕐᓂᐊᕐᒪᑦ, ᖃᓄᐃᙱᓐᓂᖅᓴᐅᓗᑎᑦ ᓄᓇᓖᑦ ᐊᒻᒪᓗ ᐱᕙᓪᓕᐊᔪᓕᕆᖃᑕᐅᔪᓐᓇᑦᑎᐊᕐᓂᖅᓴᐅᓗᑎᑦ. ᓂᕆᐅᑦᑎᐊᖅᐳᖓ ᐃᖅᑲᓇᐃᔭᖃᑎᒋᑦᑎᐊᕐᓂᐊᕋᒃᑭᑦ ᑲᑎᒪᔨᐅᔪᑦ, ᐃᓄᐃᑦ ᑲᑐᔾᔨᖃᑎᒌᖏᑦ, ᒐᕙᒪᖏᑦ, ᐃᒡᓗᓕᕆᕙᑦᑐᑦ ᐊᒻᒪᓗ ᓄᓇᓖᑦ ᓄᓇᕗᓕᒫᕐᒥ ᐊᑐᕋᒃᓴᓂᒃ ᒪᑭᒪᑎᒐᒃᓴᓂᓪᓗ ᐃᒡᓗᒃᓴᓕᐅᕐᓂᕐᒧᑦ ᐋᖅᑭᒍᑎᖃᖅᐸᓪᓕᐊᓕᖁᓪᓗᑕ ᑭᙴᒪᒋᔭᖏᑦ ᐊᒻᒪᓗ ᐱᓇᓱᐊᕈᒪᔭᖏᑦ ᓄᓇᕗᒻᒥᐅᑦ ᒪᓕᓪᓗᒋᑦ ᖃᓄᐃᓕᐅᕈᑎᖃᕈᓐᓇᖅᓯᓗᑕ.”
“ᓄᓇᕗᑦ ᐊᒃᓱᕐᔪᐊᒻᒪᕆᐊᓗᒃ ᐃᒡᓗᑭᒃᓴᓗᐊᕐᒪᑦ, ᐊᒻᒪᓗ ᐃᒡᓗᕗᑦ ᑯᐊᐳᕇᓴᓐ−ᒃᑯᑦ ᐋᖅᑭᒃᑕᐅᓯᒪᕗᑦ ᐃᑲᔪᕐᓂᐊᕐᒪᑕ ᑲᒪᒋᔭᖃᕐᓗᑎᑦ ᑕᒪᔅᓱᒧᖓ ᐊᒃᓱᕈᕐᓇᖅᑐᒃᑰᕈᑎᐅᔪᒥᒃ ᐃᓄᖕᓄᑦ−ᓯᕗᒃᑲᖅᑖᖑᔪᓂᒃ ᐱᓕᕆᐊᖃᖅᐸᓪᓕᐊᓂᒃᑯᑦ,” ᐅᖃᖅᖢᓂ ᕋᐃᒪᓐ ᖁᖅᓲᑦ, ᐃᒃᓯᕙᐅᑕᖅ ᑲᑎᒪᔨᓄᑦ. “ᔫᑉ ᐃᖅᑲᓇᐃᔮᕆᖃᑦᑕᕐᓂᑯᒥᓂᖏᑦ ᐱᕙᓪᓕᐊᑎᑦᑎᓗᓂ ᑎᒥᐅᔪᓂᒃ, ᓯᕗᓕᖅᑎᐅᖃᑦᑕᕐᓂᑯᒥᓂᖓᓗ ᐱᔭᕆᐊᑐᔪᓂᒃ ᑲᑐᔾᔨᖃᑎᒌᓂᒃ, ᐊᒻᒪᓗ ᐃᓄᓐᓂᒃ ᑲᑎᑎᑦᑎᓲᖑᓂᖓ ᑲᑐᔾᔭᐅᔪᓄᑦ ᐱᓇᓱᐊᒐᕆᔭᐅᔪᓄᑦ ᐱᕐᔪᐊᕌᓘᕗᖅ ᐃᒡᓗᕗᑦ−ᒃᑯᑦ ᐱᕈᖅᐸᓪᓕᐊᑎᓪᓗᒋᑦ. ᐊᐅᓚᑦᓯᔨᐅᓂᕐᒧᑦ ᑎᒃᑯᐊᖅᑕᐅᓂᖃᑐᐃᓐᓇᙱᑦᑐᖅ; ᓇᓗᓇᐃᒃᑯᓯᖅᑕᐅᕗᖅ ᐱᒋᐊᖅᐸᓪᓕᐊᓕᕐᓂᖓᓂᒃ ᓄᑖᕐᒥᒃ ᐊᑐᕐᓂᐊᖅᑕᒥᖕᓂᒃ ᐃᒡᓗᕗᑦ−ᒃᑯᑦ ᐊᒻᒪᓗ ᐃᖅᑲᓇᐃᔮᕆᔭᐅᔪᖅ ᐃᒡᓗᒃᓴᖃᕐᓂᖅᓴᐅᓕᕐᓗᑎᑦ ᓄᓇᕗᓕᒫᕐᒥ.”
ᐃᒃᓯᕙᐅᑕᕆᔭᐅᓪᓗᓂ ᐃᒡᓗᕗᑦ ᑯᐊᐳᕇᓴᓐ−ᒃᑯᑦ ᑲᑎᒪᔨᖏᖕᓄᑦ, ᕋᐃᒪᓐ ᖁᖅᓲᑦ ᐃᑲᔪᕐᓂᐊᖅᐳᖅ ᖃᐅᔨᒪᑦᑎᐊᕐᓗᓂ ᑲᑎᒪᔩᑦ ᐊᐅᓚᓂᖃᑦᓯᐊᕋᓗᐊᕐᒪᖔᑖ ᓯᕗᓕᖅᑎᐅᓗᓂ ᑲᑎᒪᓂᕐᓂᒃ, ᐅᖃᐅᓯᖃᖅᑎᑦᑎᒋᐊᓯᖃᑦᑕᕐᓗᓂ ᑲᑎᒪᔨᓂᒃ, ᐃᑲᔪᖅᑐᐃᒻᒥᓗᓂ ᓱᖅᑯᐃᕐᓇᖅᑐᑯᓗᓐᓂᒃ ᐃᓱᒪᓕᐅᖅᑐᖃᖃᑦᑕᕐᓂᐊᕐᒪᑦ, ᐊᒻᒪᓗ ᐱᓕᕆᑦᑎᐊᓲᖑᑎᑦᑎᖃᑦᑕᕐᓗᓂ ᑲᑎᒪᔩᑦ ᐃᓕᖅᑯᓯᕆᖃᑦᑕᕐᓂᐊᖅᑕᖓᓂᒃ.
“ᐃᓄᒻᒪᕆᐅᒐᒪ ᐃᓅᓚᐅᖅᓯᒪᓪᓗᖓ ᑐᐱᕐᒥ ᐊᐅᔭᒃᑯᑦ ᐊᒻᒪᓗ ᐃᒡᓗᕕᒐᕐᓃᖃᑦᑕᕐᓂᑰᓪᓗᖓ ᐅᑭᐅᒃᑯᑦ. ᐱᕈᖅᓴᔭᒥᓂᐅᓪᓗᖓᓗ ᐊᓈᓇᑦᓯᐊᒃᑯᑎᓐᓄᑦ, ᐊᒻᒪᓗ ᐃᓕᓐᓂᐊᖅᑎᑕᐅᓂᑰᓪᓗᖓ ᐃᓄᐃᑦ ᐱᖅᑯᓯᑐᖃᖓᒍᑦ ᐃᓅᓂᕐᒥᒃ. ᓄᓇᕗᒻᒦᓐᓂᑰᓪᓗᖓ ᐃᓅᓯᓕᒫᖅ ᐊᒻᒪᓗ ᐃᖅᑲᓇᐃᔮᕆᓗᐊᖃᑦᑕᕐᓂᑯᒃᑲ ᓄᓇᓕᓐᓂ ᐊᐅᓚᑦᓯᓂᖅ, ᐃᒡᓗᓕᕆᓂᖅ ᐊᒻᒪᓗ ᑲᑎᒪᔨᐅᓂᖅ, ᑕᐃᒪᐃᑦᑎᓪᓗᒍ ᑐᑭᓯᐅᒪᕗᖓ ᖃᓄᑎᒋ ᐱᒻᒪᕆᐊᓘᓂᖓᓂᒃ ᐃᒡᓗᓕᕆᓂᖅ ᓴᙱᔫᒍᓐᓇᓕᕐᓂᖏᓐᓂᒃ ᖃᓄᐃᑦᑕᐃᓕᙱᒍᓐᓇᐅᑕᐅᓪᓗᓂᓗ ᓄᓇᓕᑦᑎᓐᓄᑦ,” ᐅᖃᖅᑐᓂ ᕋᐃᒪᓐ ᖁᖅᓲᑦ. “ᐅᐱᒍᓱᑉᐳᖓ ᐃᒡᓗᕗᑦ−ᒃᑯᓐᓄᑦ ᐱᖃᑕᐅᔪᓐᓇᕋᒪ ᐊᒻᒪᓗ ᓂᕆᐅᑦᑐᖓ ᐃᑲᔪᕈᓐᓇᕐᓂᐊᕋᒪ ᐊᑐᕐᓗᒋᑦ ᐃᖅᑲᓇᐃᔮᕆᖃᑦᑕᕐᓂᑯᒥᓂᒃᑲ ᐃᖅᑲᓇᐃᔭᖃᑎᒌᑦᑎᓪᓗᑕ ᓴᓇᓗᑕ ᐃᒡᓗᒃᓴᒃᑲᓐᓂᒻᒪᕆᖕᓂᒃ ᐃᓄᒻᒪᕆᖕᓄᑦ ᓄᓇᕗᓕᒫᕐᒥ.”
ᑲᑎᒪᔩᑦ ᖁᔭᓕᓂᕋᖅᓯᒪᔪᑦ ᑕᒪᐃᓐᓂ ᐃᖅᑲᓇᐃᔮᖅᑖᕋᓱᐊᓚᐅᖅᑐᓄᑦ ᐃᖅᑲᓇᐃᔭᖅᑎᑖᕋᓱᐊᖅᑎᓪᓗᑕ ᐊᒻᒪᓗ ᓂᕆᐅᑦᓯᐊᖅᑐᑎᑦ ᐃᖅᑲᓇᐃᔭᖃᑎᖃᕐᓂᐊᕐᓂᖏᓐᓂᒃ ᒥᔅᑕ ᑯᓄᖕᒥᒃ, ᒥᔅᑕ ᖁᖅᓱᒻᒥᒃ ᐊᒻᒪᓗ ᐱᓕᕆᖃᑎᒋᔭᐅᓲᕐᓂᒃ ᓄᓇᕗᓕᒫᕐᒥ ᐃᒡᓗᕗᑦ−ᒃᑯᑦ ᐃᖅᑲᓇᐃᔮᖃᕐᓂᐊᓕᕐᒥᑎᓪᓗᒋᑦ ᐱᕙᓪᓕᐊᒍᑎᒋᓇᓱᒃᑕᖏᖕᓄᑦ.
ᐅᖃᐅᓯᐅᓯᒪᔪᑦ
“ᑎᒃᑯᐊᖅᑕᐅᓂᖓ ᓯᕗᓪᓕᖅᐹᖑᓪᓗᓂ ᐊᖓᔪᖅᑳᖅ ᐊᐅᓚᑦᓯᔨᒻᒪᕆᒃ ᐊᒻᒪᓗ ᐃᓚᔭᐅᓪᓗᓂ ᕋᐃᒪᓐ ᖁᖅᓲᑦ ᐃᒃᓯᕙᐅᑕᕆᔭᐅᓪᓗᓂ ᑲᑎᒪᔨᓄᑦ ᑭᒡᒐᖅᑐᐃᔪᑦ ᐱᒻᒪᕆᐊᓗᒻᒥᒃ ᓯᕗᒧᐊᓯᒋᐊᕐᓂᐊᓕᕐᒪᑕ ᐃᒡᓗᕗᑦ ᑯᐊᐳᕇᓴᓐ−ᒃᑯᑦ. ᐊᒥᓱᐊᓗᓐᓂᒃ ᐃᖅᑲᓇᐃᔮᒃᓴᖃᕋᑦᑕ ᓯᕗᓂᑦᑎᓐᓂ, ᑭᓯᐊᓂᓕ ᐱᕕᖃᖅᑐᒍᑦ ᐱᕙᓪᓕᐊᑎᓪᓗᒍ ᑲᑐᔾᔨᖃᑎᒌᖑᔪᖅ ᑐᙵᕕᖃᖅᑐᖅ ᐃᓄᐃᑦ ᓯᕗᓪᓕᐅᑎᖁᔭᕐᒥᓂᒃ ᐊᒻᒪᓗ ᑲᒪᒋᔭᖃᖅᑐᒥᒃ ᐊᐅᓚᑦᑎᓗᑎᑦ ᐊᑑᑎᓕᒻᒪᕆᐊᓗᒻᒥᒃ, ᐊᑯᓂᐅᔪᒧᑦ ᐃᒡᓗᓕᕆᓂᕐᒧᑦ ᐋᖅᑭᒍᑎᒃᓴᖃᕐᓂᐊᕐᓂᖏᓐᓂᒃ.” − ᐹᓪ ᐃᕐᖓᐅᑦ, ᐊᖓᔪᖅᑳᑉ ᑐᖏᓕᐊ, ᓄᓇᕗᑦ ᑐᙵᕕᒃ ᑎᒥᖓ
“ᐃᒡᓗᓕᐅᖅᑕᕗᑦ ᖃᓇᑐᐃᓐᓇᐅᙱᑦᑐᑦ, ᐊᖏᕐᕋᐅᕗᑦ ᓴᓇᔭᐅᓯᒪᔪᑦ ᐃᓄᒻᒪᕇᑦ ᐃᓚᒌᓄᑦ, ᑐᙵᕕᖃᐅᖅᖢᑎᑦ ᓄᓇᓕᑦᑎᓐᓂ, ᐃᓕᖅᑯᓯᑦᑎᓐᓂ, ᐊᒻᒪᓗ ᐃᓅᓯᕆᕙᑦᑕᑦᑎᓐᓂ. ᑕᒪᐃᓐᓂ ᐊᖏᕐᕋᖅ ᑭᒡᒐᖅᑐᐃᔪᖅ ᑲᒪᒋᔭᖃᐃᓐᓇᕐᓂᐊᕐᓂᕋᕐᓂᕗᑦ ᓴᓇᓗᑕ ᐊᑦᑕᓇᙱᑦᑐᓂᒃ, ᐊᑲᐅᓂᖅᓴᓂᒃ ᐃᓂᐅᔪᓂᒃ ᐃᓄᒻᒪᕇᑦ ᐃᓅᕕᒋᓂᐊᖅᑕᖏᓐᓂᒃ, ᐱᕈᖅᐸᓪᓕᐊᓗᑎᑦ ᐊᒻᒪᓗ ᓴᙱᔪᒥᒃ ᓯᕗᓂᒃᓴᓕᐅᕐᓗᑎᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᑦᑐᑦ ᒥᔅᑕ ᖁᖅᓲᒻᒥᒃ ᐊᒻᒪᓗ ᒥᔅᑕ ᐊᓪᓚ ᑯᓄᒻᒥᒃ ᐃᖅᑲᓇᐃᔭᖃᑎᖃᕐᒪᑎᒃ ᐃᒡᓗᕗᑦ ᑯᐊᐳᕇᓴᓐ−ᒃᑯᓂ ᐃᑲᔪᕐᓗᑎᑦ ᐱᓕᕆᐊᕆᔭᐅᓕᕐᓗᓂ ᑕᐅᑐᙳᐊᖅᓯᒪᔭᑦᑎᓐᓂᒃ ᐃᓄᖕᓄᑦ ᓯᕗᒃᑲᖅᑖᖑᔪᒥᒃ ᐃᒡᓗᓕᕆᔨᑕᖃᓕᕐᓗᓂ.” − ᐅᓛᔪᖅ ᐊᑭᓱᒃ, ᐊᖓᔪᖅᑳᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ.
“ᑭᒡᒐᖅᑐᖅᖢᒋᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ, ᖁᕕᐊᓲᑎᒋᕙᕗᑦ ᔫ ᐊᓪᓚ ᑯᓄᒃ ᑎᒃᑯᐊᖅᑕᐅᓂᖓᓄᑦ ᐊᖓᔪᖅᑳᖑᓪᓗᓂ ᐊᐅᓚᑦᓯᔨᒻᒪᕆᒃ ᐊᒻᒪᓗ ᕋᐃᒪᓐ ᖁᖅᓲᑦ ᑎᒃᑯᐊᖅᑕᐅᓂᖓᓂᒃ ᐃᒃᓯᕙᐅᑕᕆᔭᐅᓕᖅᖢᓂ ᐃᒡᓗᕗᑦ ᑯᐊᐳᕇᓴᓐ−ᒃᑯᓐᓄᑦ. ᑲᑎᖦᖢᒋᑦ ᐃᖅᑲᓇᐃᔮᕆᖃᑦᑕᕐᓂᑯᒥᓂᖏᒃ, ᓯᕗᓕᖅᑎᐅᓯᒪᓂᖏᒃ, ᐊᒻᒪᓗ ᑲᒪᒋᔭᖃᐃᓐᓇᖃᑦᑕᕐᓂᖏᑦ ᐃᓄᒻᒪᕇᑦ ᓄᓇᓕᖏᖕᓄᑦ ᐱᕐᔪᐊᕌᓘᓂᐊᖅᑐᑦ ᐃᒡᓗᕗᑦ ᐃᖅᑲᓇᐃᔮᖃᓕᖅᑎᓪᓗᒍ ᑲᒪᖏᔭᐅᓗᑎᑦ ᓄᓇᕗᒻᒥ ᐃᒡᓗᑭᒃᓴᕐᓂᐊᓘᕙᑦᑐᖅ. ᐃᓄᖕᓄᑦ−ᓯᕗᒃᑲᖅᑖᖑᔪᑦ ᐃᒡᓗᓕᕆᓂᕐᒧᑦ ᐋᖅᑭᒍᑎᓕᐅᕐᓂᖏᑦ ᐱᒻᒪᕆᐅᕗᑦ ᐊᔾᔨᐅᙱᑦᑐᒥᒃ ᑭᙴᒪᒋᔭᖏᑦ ᐃᓄᒻᒪᕇᑦ ᑲᒪᒋᔭᐅᖁᓪᓗᒋᑦ ᓄᓇᓕᑦᑎᓐᓂ, ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕆᐅᑦᑐᑎᑦ ᐃᖅᑲᓇᐃᔭᖃᑎᖃᑦᑎᐊᖃᑦᑕᕐᓂᐊᕐᓂᖏᓐᓂᒃ ᐃᒡᓗᕗᑦ−ᒃᑯᓐᓂ ᐃᑲᔪᖅᑐᐊᕆᔭᐅᓗᓂ ᐱᕙᓪᓕᐊᖑᑎᒋᔭᐅᓂᖓ ᐊᒻᒪᓗ ᐊᑯᓂᐅᔪᒧᑦ ᐊᐅᓚᑕᐅᓂᐊᕐᓂᖓ ᐃᒡᓗᓕᕆᓂᖅ ᐊᔾᔨᖃᕐᓗᑎᑦ ᐃᓄᒻᒪᕇᑦ ᓯᕗᓪᓕᐅᑎᖁᔭᖏᑦ ᐊᒻᒪᓗ ᓴᙵᑦᑎᕆᓗᓂ ᖃᓄᐃᑦᑕᐃᓕᓂᖏᖕᓂᒃ ᐃᓚᑦᑕ.” − ᑯᓄᒃ ᑕᑦᑐᐃᓂᖅ, ᐊᖓᔪᖅᑳᖅ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᑦ
“ᑎᒃᑯᐊᖅᑕᐅᓂᖓ ᔫ ᑯᓄᑉ ᐊᖓᔪᖅᑳᕆᔭᐅᓕᖅᖢᓂ ᐊᐅᓚᑦᓯᔨᒻᒪᕆᒃ ᐊᒻᒪᓗ ᐱᓗᐊᖅᑐᒍ ᕋᐃᒪᓐ ᖁᖅᓲᑦ ᐃᒃᓯᕙᐅᑕᖅᑖᕆᔭᐅᓪᓗᓂ ᑐᙵᓱᐊᑎᑦᑕᕗᑦ ᑐᓴᒐᒃᓴᐅᓪᓗᓂ ᕿᑎᕐᒥᐅᓄᑦ,” ᐅᖃᖅᑐᓂ ᑕᐃᕕᑎ ᓂᕕᖓᓗᒃ, ᐊᖓᔪᖅᑳᖑᑲᐃᓐᓇᖅᑐᖅ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ. “ᕋᐃᒪᓐ ᐅᖅᓱᖅᑑᕐᒦᙶᖅᑐᖅ ᐊᒻᒪᓗ ᖃᐅᔨᒪᓪᓗᓂ ᐃᒡᓗᓕᕆᓂᑉ ᐊᑐᖅᑕᐅᕙᓐᓂᖓᓂᒃ ᐊᕕᑦᑐᖅᓯᒪᓂᑦᑎᓐᓂ ᖃᐅᔨᖃᑦᑕᕐᒪᒍ. ᐃᒡᓗᑭᒃᓴᕐᓂᖅ ᐊᑦᑐᐃᓂᖃᓲᖅ ᑕᒪᐃᓐᓂ ᐃᓚᒌᑦᑐᓂ ᐊᕕᑦᑐᖅᓯᒪᓂᑦᑎᓐᓂ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᖐᖏᑦ ᐊᒻᒪᓗᑦᑕᐅᖅ ᕿᑎᕐᒥᐅᑦ ᑯᐊᐳᕇᓴᓐ−ᒃᑯᑦ ᐃᖅᑲᓇᐃᔭᖃᑎᒌᑦᑑᒃ ᑐᑭᓯᐅᒪᖃᑎᒌᓐᓂᕐᒧᑦ ᐊᖏᕈᑎᓕᐅᓛᖅᖢᑎᒃ ᐊᒻᒪᓗ ᐊᖏᕈᑎᓕᐅᕐᓗᑎᒃ ᐊᐅᓚᑕᐅᓂᖏᓐᓂᒃ ᐊᒻᒪᓗ ᓂᕆᐅᑦᓯᐊᖅᑐᑦ ᐃᖅᑲᓇᐃᔭᖃᑎᖏᔭᐅᑦᓯᐊᓛᕐᓂᖏᑦ ᐃᒡᓗᕗᑦ−ᒃᑯᑦ ᐋᖅᑭᒍᑎᓕᐅᕈᓐᓇᖁᓪᓗᑕ ᐊᑐᕋᒃᓴᓂᒃ, ᐃᓄᖕᓄᑦ−ᓯᕗᒃᑲᖅᑖᖑᔪᓂᒃ ᐊᔾᔨᖃᕐᓗᒋᑦ ᓄᓇᓕᑦᑕ ᑭᙴᒪᒋᔭᖏᖕᓂᒃ.” − ᑕᐃᕕᑎ ᓂᕕᖓᓗᒃ, ᐊᖓᔪᖅᑳᖑᑲᐃᓐᓇᖅᑐᖅ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ
ᐋᓂ ᑕᒻᓕᓐᓴᓐ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
ᖃᓄᐃᓕᐅᕈᑕᐅᖃᑦᑕᖅᓯᒪᓂᑯᑦ
ᔫ ᐊᓪᓚ ᑯᓄᒃ, ᐊᖓᔪᖅᑳᖅ ᐊᐅᓚᑦᓯᔨᒻᒪᕆᒃ
ᐅᖓᑖᓃᑦᑐᓂᒃ 40 ᐊᕐᕌᒎᓕᖅᑐᓂᒃ ᓯᕗᓕᖅᑎᐅᖃᑦᑕᕐᓂᑰᕗᖅ, ᒥᔅᑕ ᑯᓄᒃ ᐃᑉᐱᒋᔭᐅᑦᓯᐊᖅᑐᖅ ᐊᒥᓱᓄᑦ ᐃᓄᖕᓄᑦ ᐃᑲᔪᕐᓂᖃᖃᑦᑕᕐᓂᑰᓯᒪᓂᖓᓄᑦ ᐃᓄᐃᑦ ᑲᑐᔾᔨᖃᑎᒌᓂ, ᒐᕙᒪᒃᑯᓐᓂ, ᐊᒻᒪᓗ ᐃᓄᐃᑦ ᓯᓚᕐᔪᐊᕐᒥᐅᑦ ᓄᓇᖏᖕᓂ ᐊᐅᓚᑦᓯᔨᐅᖃᑦᑕᕐᓂᑯᖓᓄᑦ. ᓄᓇᕗᒻᒥ ᐊᖓᔪᖅᑳᖑᓛᖑᖃᑕᐅᓂᑯᖅ, ᐱᖃᓯᐅᑎᓪᓗᒍ ᐊᖓᔪᖅᑳᕆᔭᐅᓚᐅᖅᓯᒪᓪᓗᓂ ᐊᐅᓚᑦᓯᔨᒻᒪᕆᐅᓪᓗᓂ ᓄᓇᕗᑦ ᑐᙵᕕᒃ ᑎᒥᖓᓄᑦ, ᐊᖓᔪᖅᑳᖑᓂᑰᓪᓗᓂ ᓄᓇᕗᑦ ᓯᓚᑦᑐᖅᓴᕐᕕᖓᓄᑦ, ᒥᓂᔅᑕᑉ ᑐᖏᓕᕆᔭᐅᓚᐅᖅᓯᒪᓪᓗᓂ, ᐊᒻᒪᓗ ᒪᐃᔭᐃᓚᐅᖅᓯᒪᒋᓪᓗᓂ ᐃᖃᓗᓐᓂ. ᐃᖅᑲᓇᐃᔮᖓ ᑲᒪᒋᔭᖃᓗᐊᕐᓂᑯᖅ ᓯᕗᒧᐊᑦᑎᑕᐅᓪᓗᑎᑦ ᐃᓄᐃᑦ ᐱᔪᓐᓇᐅᑎᖏᑦ, ᓴᙵᑦᑎᑕᐅᓗᑎᑦ ᑎᒥᐅᔪᑦ, ᐊᒻᒪᓗ ᐃᑲᔪᖅᑐᐃᓪᓗᓂ ᐱᕙᓪᓕᐊᓂᕆᔭᖏᖕᓂᒃ ᑲᑎᒪᔨᐅᔪᑦ, ᐃᓕᓐᓂᐊᕐᓂᓕᕆᓂᕐᒥᒃ, ᐃᓕᖅᑯᓯᓕᕆᓂᕐᒥᒃ, ᐅᖃᐅᓯᓕᕆᓂᕐᒥᒃ, ᐊᒻᒪᓗ ᐱᕙᓪᓕᐊᔪᓕᕆᓂᕐᒥᒃ.
ᕋᐃᒪ ᖁᖅᓲᑦ, ᐃᒃᓯᕙᐅᑕᖅ ᑲᑎᒪᔨᓄᑦ
ᐃᒡᓗᕗᑦ ᑯᐊᐳᕇᓴᓐ ᖁᕕᐊᓱᑦᑐᑦ ᐃᓕᓴᖅᓯᔭᕆᐊᒃᓴᖅ ᕋᐃᒪᓐ ᖁᖅᓲᒻᒥᒃ ᐃᒃᓯᕙᐅᑕᕆᔭᐅᓕᖅᖢᓂ ᑲᑎᒪᔨᓄᑦ. ᐅᖅᓱᖅᑑᕐᒦᙶᕐᓂᑰᓪᓗᓂ, ᒥᔅᑕ ᖁᖅᓲᑦ ᐅᖓᑖᓂ 30 ᐊᕐᕌᒎᓕᖅᑐᓂᑦ ᓯᕗᓕᖅᑎᐅᖃᑦᑕᕐᓂᑰᕗᖅ ᐃᒡᓗᓕᕆᓂᕐᒥᒃ, ᑮᓇᐅᔭᓕᕆᓂᕐᒥᒃ, ᑲᑎᒪᔨᐅᓂᕐᒥᒃ ᐊᒻᒪᓗ ᓄᓇᓕᓐᓂ ᐱᕙᓪᓕᐊᔪᓕᕆᖃᑦᑕᕐᓂᑰᓪᓗᓂ. ᐊᖓᔪᖅᑳᖑᓪᓗᓂ ᐃᖅᑲᓇᐃᔮᖓᓂᒃ ᐃᖅᑲᓇᐃᔮᖃᕐᓂᑯ ᐅᖅᓱᖅᑑᖅ ᕼᐊᒻᓚᖓᓂ ᐊᒻᒪᓗ ᓄᓇᕗᑦ ᐃᒪᓕᕆᓂᕐᒧᑦ ᑲᑎᒪᔨᓂ, ᐊᒻᒪᓗ ᐊᒥᓱᓂᒃ ᓄᓇᓕᓐᓂ ᑲᑐᔾᔨᖃᑎᒌᓄᑦ ᑲᑎᒪᔨᐅᓯᒪᔪᖅ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᓄᑦ, ᐱᖃᓯᐅᑎᓪᓗᒍ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ. ᐃᑲᔪᕐᓂᑰᒋᕗᖅ 3000 (ᐃᒡᓗᓕᐅᖃᑎᒌᖕᓂᖅ), ᖃᐅᔨᒪᓂᖓ ᐊᒻᒪᓗ ᓯᕗᓕᖅᑎᐅᓂᖓ ᐱᒻᒪᕆᐊᓘᓂᐊᖅᐳᖅ ᐃᒡᓗᕗᑦ−ᒃᑯᑦ ᐱᕙᓪᓕᐊᓂᖃᖅᑎᓪᓗᒋᑦ ᐊᐅᓚᓂᖏᓐᓂᒃ ᐊᒻᒪᓗ ᐃᖅᑲᓇᐃᔮᖃᖅᑎᓪᓗᒋᑦ ᑲᒪᖏᔭᐅᓗᓂ ᐃᒡᓗᑖᕆᐊᖃᖅᑐᑦ ᓄᓇᕗᓕᒫᕐᒥ.
ᐃᒡᓗᕗᑦ ᑯᐊᐳᕇᓴᓐ ᒥᒃᓵᓄᑦ
ᐃᒡᓗᕗᑦ ᑯᐊᐳᕇᓴᓐ ᐋᖅᑭᑦᑕᐅᓚᐅᖅᓯᒪᔪᖅ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᖕᓄᑦ ᐃᑲᔪᖁᓪᓗᒋᑦ ᑲᒪᒋᔭᐅᓗᓂ ᐃᒡᓗᑭᒃᓴᕐᓂᐊᓘᕙᑦᑐᖅ ᖃᓄᖅᑑᕐᓂᒃᑯᑦ, ᒪᑭᒪᑎᑕᐅᔪᓐᓇᖅᑐᒃᑯᑦ ᐊᒻᒪᓗ ᐃᓄᖕᓄᑦ−ᓯᕗᒃᑲᖅᑖᖑᔪᑎᒍᑦ ᑲᒪᒋᔭᖃᕆᐊᖅᑐᑎᑦ ᐊᒥᓲᓂᖅᓴᐅᓕᖅᑎᑦᑎᓪᓗᑎᑦ ᐊᑭᑐᓗᐊᙱᑦᑐᒥᒃ ᐊᑐᖅᑐᐊᕆᐊᓯᖃᑦᑕᖅᑐᖃᖁᓪᓗᒍ ᐃᒡᓗᓂᒃ, ᐊᑭᓕᖅᓱᖅᑕᐅᕙᑦᑐᑦ ᐃᒡᓗᓄᑦ ᒪᓕᑦᑐᒋᑦ ᐊᑐᖅᑐᐊᖅᑐᖃᖃᑦᑕᖁᓪᓗᒍ ᐊᒻᒪᓗ ᓇᖕᒥᓂᖅᑖᕈᓐᓇᖅᓯᔪᖃᖃᑦᑕᕐᓗᓂ ᐃᒡᓗᓂᒃ. ᑲᑐᔾᔨᖃᑎᒌᖑᔪᖅ ᐃᖅᑲᓇᐃᔭᖃᑎᖃᖃᑦᑕᕐᓂᐊᖅᑐᖅ ᐃᓄᐃᑦ ᑲᑐᔾᔨᖃᑎᒌᓂ, ᒐᕙᒪᒃᑯᓐᓂ, ᓄᓇᓕᓐᓂ ᐊᒻᒪᓗ ᓇᒻᒥᓂᖁᑎᖃᐅᖅᑐᓂᒃ ᐱᕙᓪᓕᐊᔪᖃᕐᓂᐊᕐᒪᑦ ᐃᒡᓗᑖᕐᓂᕐᒧᑦ ᐋᖅᑭᒍᑎᓕᐅᕐᓗᑎᑦ ᓄᓇᕗᑉ ᐊᔾᔨᐅᙱᑦᑐᒥᒃ ᑭᙴᒪᒋᔭᖏᖕᓂᒃ ᐊᑐᐃᓐᓇᖅᑕᖃᖃᑦᑕᕐᓂᐊᕐᒪᑦ.
