(ᖃᒪᓂ’ᑐᐊᖅ, ᓄᓇᕗᑦ – ᐋᒡᒌᓯ 27, 2026) – ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᓚᐅᖅᑎᓪᓗᒋᑦ ᖃᒪᓂ’ᑐᐊᕐᒥ ᑕᒫᓂ ᐱᓇᓱᐊᕈᓯᕐᒥᒃ, ᐅᖃᐅᓯᖃᓗᐊᓚᐅᖅᑐᑦ ᐱᔾᔪᑎᓂᒃ ᐊᒃᑐᐃᓂᖃᒻᒪᕆᓲᓂᒃ ᐃᓄᒻᒪᕇᑦ ᐃᓚᒌᑦᑐᓄᑦ, ᐅᖃᐅᓯᖃᖃᑦᑕᓚᐅᖅᑐᑎᑦ ᐃᓕᓐᓂᐊᕐᕕᓂ ᓂᕿᖃᖅᑎᑦᑎᖃᑦᑕᕐᓂᕐᒧᑦ ᐱᓕᕆᐊᕐᓂᒃ, ᓄᑕᖅᑲᑦ ᖃᓄᐃᑦᑕᐃᓕᒪᑎᑕᐅᓂᖏᑦ, ᐃᓄᒃᑐᑦ ᐃᓕᓐᓂᐊᕐᓂᓕᕆᓂᕐᒥᒃ, ᐊᒻᒪᓗ ᐃᓄᐃᑦ ᐊᒥᓲᓂᖏᑦ ᓈᒻᒪᒋᐊᖃᕐᓂᖏᑦ ᐃᖅᑲᓇᐃᔭᖅᑐᑦ ᒪᓕᑦᑐᒋᑦ ᐃᓄᒻᒪᕇᑦ ᖃᑦᑎᐅᓂᖏᑦ ᑭᒡᒐᖅᑐᕆᐊᖃᖅᑕᓂ ᑭᒃᑯᑐᐃᓐᓇᕐᓂᒃ ᐱᔨᑦᑎᕋᓲᕐᓂᒃ ᐱᓕᕆᕝᕕᖕᓂ.
ᐃᓱᒪᓕᐅᕈᑕᐅᓪᓗᐊᓚᐅᖅᑐᖅ ᑲᑎᒪᓂᕐᒥ ᓴᓂᕐᕙᐃᓪᓗᑎᑦ $4.14 ᒥᓕᐊᓐᓂᒃ ᑮᓇᐅᔭᓂᒃ ᒐᕙᒪᑐᖃᒃᑯᑦ ᑲᓇᑕᒥ ᐃᓕᓐᓂᐊᕐᕖᑦ ᓂᕿᖃᖃᖅᑎᑦᑎᖃᑦᑕᕐᓂᖏᖕᓄᑦ ᐱᓕᕆᐊᖓ ᑮᓇᐅᔭᖃᖅᑎᑦᓯᓂᐊᖅᖢᑎᑦ 2026-27 ᐃᓕᓐᓂᐊᕐᓇᑉ ᐊᕐᕌᒍᐊᓄᑦ. ᓄᓇᕗᒻᒥ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑕ ᑲᑐᔾᔨᖃᑎᒌᖓᑎᒎᖅᖢᑎᑦ ᐊᒻᒪᓗ ᓴᓂᕐᕚᕆᔭᐅᓪᓗᑎᑦ ᒪᓕᑦᑐᒋᑦ ᐃᓕᓐᓂᐊᖅᑏᑦ ᐊᒥᓲᓂᖏᑦ ᐊᑎᓕᐅᖅᓯᒪᔪᑦ ᐃᓕᓐᓂᐊᕐᕕᓄᑦ, ᑮᓇᐅᔭᑦ ᐃᑲᔪᕐᓂᐊᖅᑐᑦ ᐃᓕᓐᓂᐊᕐᕕᓂ ᓂᕿᑦᓯᐊᕙᖃᖅᑎᑦᑎᖃᑦᑕᐃᓐᓇᕐᓗᑎᑦ ᐊᒻᒪᓗ ᑕᒧᐊᒃᓴᖃᖅᑎᑦᑎᖃᑦᑕᕐᓗᑎᑦ ᐃᓕᓐᓂᐊᖅᑎᓄᑦ ᓄᓇᕗᓕᒫᕐᒥ. ᑮᓇᐅᔭᑦ ᐊᑐᖅᑕᐅᔪᑦ ᓴᖅᑭᖅᓯᒪᕗᑦ ᐃᓕᓐᓂᐊᕐᕕᒻᒥ ᓂᕿᖃᖅᑎᑦᑎᖃᑦᑕᕐᓂᕐᒧᑦ ᐱᓕᕆᐊᑦ ᐊᖏᓪᓕᕙᓪᓕᐊᑐᐃᓐᓇᓕᖅᑎᓪᓗᒍ ᐱᔭᕆᐊᓖᑦ, ᐃᑲᔪᖅᖢᑕ ᐱᐅᓯᑎᒋᐊᕐᓗᒋ ᓂᕿᖃᑦᓯᐊᖃᑦᑕᕐᓂᖅ, ᐃᓕᓐᓂᐊᖅᑏᑦ ᖃᓄᐃᑦᑕᐃᓕᒪᓂᖏᑦ, ᐊᒻᒪᓗ ᐃᓕᓐᓂᐊᕇᑦᓯᐊᖃᑦᑕᖁᓪᓗᒋᑦ ᐃᓕᓐᓂᐊᖅᑏᑦ.
“ᐃᓄᒻᒪᕆᐅᓪᓗᑕ, ᐅᑉᐱᕈᓱᒃᑕᑦᑕ ᐃᓅᖃᑎᑦᑎᒻᓂ ᐸᖅᑭᖃᑦᑕᕆᐊᖃᕐᓂᕐᒥᒃ, ᐱᓗᐊᖅᑐᒥᒃ ᓄᑕᖅᑲᑦᑎᒻᓂᒃ. ᐃᓕᓐᓂᐊᕐᕕᖕᓂ ᓂᕿᖃᖅᑎᑦᑎᓂᕐᒧᑦ ᐱᓕᕆᐊᖅ ᓂᕿᖃᖅᑎᑦᑎᑐᐃᓐᓇᖅᐸᙱᓚᑦ, ᐃᓕᓐᓂᐊᖅᑎᓂᒃ ᐃᑲᔪᖅᑐᐃᓂᖃᕈᑕᐅᕗᖅ ᐃᓕᓐᓂᐊᖁᑉᓗᒋᑦ, ᐱᕈᑦᓯᐊᖃᑦᑕᖁᑉᓗᒋᑦ, ᐊᒻᒪᓗ ᐆᒻᒪᕆᑦᑐᑯᓘᖃᑦᑕᕐᓗᑎᑦ. ᖁᕕᐊᓱᒃᐳᒍᑦ ᐃᑲᔪᖅᑐᐃᒐᑦᑕ ᑮᓇᐅᔭᓂᒃ ᑐᓂᓯᖃᑦᑕᐃᓐᓇᕐᓂᐊᕐᓂᑦᑎᓐᓂᒃ ᐃᓕᓐᓂᐊᕐᕖᑦ ᓂᕿᖃᖅᑎᑦᑎᓂᖏᖕᓄᑦ ᑮᓇᐅᔭᓂᒃ, ᐃᓚᒌᑦᑐᑦ ᓄᓇᓖᓪᓗ ᐱᔭᕆᐊᖃᓪᓚᕆᓕᖅᑐᓂᒋᑦ.” − ᐊᑦᑕᓄᐊᖅ ᐅᓗᖅᓯ, ᐊᖓᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖓᓄᑦ.
ᑲᑎᒪᔩᑦ ᐅᖃᐅᓯᖃᓚᐅᕐᒥᔪᑦ ᐊᒃᓱᕈᕐᓇᖅᑐᒃᑰᓲᖑᓂᖏᓐᓂᒃ ᐃᓄᒻᒪᕇᑦ ᓄᑕᖅᑲᖏᑦ ᐃᓚᒌᑦᑐᓪᓗ ᐊᒻᒪᓗ ᐱᕕᖃᕐᓂᖏᑦ ᓴᙵᑦᑎᓪᓗᒍ ᐃᓄᐃᑦ ᓇᖕᒥᓂᖅᓱᕈᓐᓇᕐᓂᖏᑦ ᑲᒪᒋᔭᖃᕆᐊᓯᓗᑎᑦ ᓄᑕᖅᑲᑦ ᐊᒻᒪᓗ ᐃᓚᒌᑦ ᐱᔨᑦᓯᖅᑕᐅᓂᖏᖕᓂᒃ ᓄᓇᕗᒻᒥ ᐊᒻᒪᓗ ᑲᓇᑕᓕᒫᕐᒥ. ᑲᑎᒪᔩᑦ ᓈᓚᓚᐅᖅᑐᑦ ᐊᑯᓂᐊᓗᒃ ᐊᒃᑐᐃᓂᖃᕈᓐᓇᕐᓂᖏᓐᓂᒃ ᐃᓚᒌᑦᑐᑦ ᐊᕕᑦᑐᒥᓂᐅᑎᓪᓗᒋᑦ, ᐸᕝᕕᓴᒃᑕᐅᓪᓗᑎᑦ ᐃᓕᖅᑯᓯᑎᒍᑦ ᐃᓚᒌᓐᓂᕆᓲᖏᑦ ᐊᒻᒪᓗ ᓄᓇᖅᑲᑎᒌᑦᑐᑦ, ᐊᒻᒪᓗ ᓴᙱᓂᖅᓴᒃᑯᑦ ᐃᓚᐅᖃᑕᐅᔭᕆᐊᖃᓕᕐᓂᖏᑦ ᐃᓄᒻᒪᕇᑦ ᐃᓱᒪᓕᐅᖅᑐᖃᖅᑎᓪᓗᒍ ᐊᒃᑐᐃᓂᖃᐅᖅᑐᓂᒃ ᐃᓄᒻᒪᕇᑦ ᓄᑕᖅᑲᖏᓐᓂᒃ. ᐅᖃᖃᑎᒌᓐᓂᖃᓚᐅᖅᑎᓪᓗᒋᑦ ᑕᒪᒃᑯᓂᖓ, ᑲᑎᒪᔩᑦ ᑎᓕᓯᓚᐅᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓂᒃ ᖃᐅᔨᓴᐃᓐᓇᕐᓗᑎᑦ ᓴᙵᑦᑎᑕᐅᓗᓂ ᐃᑲᔪᖅᑐᐃᓂᕆᔪᓐᓇᖅᑕᖏᑦ, ᐊᔭᐅᕆᖃᑦᑕᕐᓂᖅ, ᐊᒻᒪᓗ ᐅᐊᑦᑎᔭᐅᓗᑎᑦ ᓇᐅᑦᓯᖅᑐᐊᕆᔭᐅᓗᑎᑦ ᐃᓄᒻᒪᕇᑦ ᓄᑕᖅᑲᑦ ᐊᒻᒪᓗ ᐃᓚᒌᑦᑐᑦ. ᑕᒪᒃᑯᐊ ᐃᖅᑲᓇᐃᔮᕆᔭᐅᔭᕆᐊᓖᑦ ᖃᐅᔨᓵᕆᔭᐅᓗᑎᑦ ᐱᕕᖃᕈᑎᖏᑦ ᑲᒪᒋᔭᐅᔪᓐᓇᖅᑐᑦ ᒪᓕᖦᖢᒍ ᐱᖁᔭᒃᓴᖅ C-92, ᐱᖁᔭᖅ ᐱᔾᔪᑎᓖᑦ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᓄᑕᖅᑲᑦ, ᒪᒃᑯᑦᑐᑦ, ᐊᒻᒪᓗ ᐃᓚᒌᑦ, ᐱᖃᓯᐅᑎᓪᓗᒍ ᓄᓇᕗᑦ ᑐᙵᕕᒃ ᑎᒥᖓ ᐊᑎᓕᐅᕐᓗᓂ ᓄᓇᖃᖅᑳᖅᓯᒪᔫᓗᑎᑦ ᐊᐅᓚᑦᓯᔨᐅᓗᓂ ᑎᒥᐅᔪᖅ. ᑕᐃᒪᓐᓇ ᐱᕙᓪᓕᐊᓂᖃᕈᑦᑕ ᐱᐅᓯᕚᓪᓕᕐᓂᖅᓴᐅᒐᔭᖅᑐᖅ ᑐᑭᓯᒋᐊᕈᑎᓂᒃ ᑲᑐᔾᔨᖃᑦᑕᕐᓗᑕ, ᑐᑦᑕᕐᕕᒻᒨᖅᑕᐅᔪᓐᓇᖅᓯᓗᑎᑦ ᐊᑕᐅᓯᕐᒧᑦ ᑐᓴᖅᑎᑦᑎᒍᑏᑦ, ᐊᒻᒪᓗ ᐃᑲᔪᖅᑐᐃᓂᖅᓴᐅᓗᑕ ᐅᐸᓗᖓᐃᑦᑎᐊᖅᓯᒪᓂᖅᓴᒥᒃ ᐊᔭᐅᕆᖃᑦᑕᕐᓂᐊᕋᑦᑕ ᑭᒡᒐᖅᑐᕐᓗᒋᑦ ᐃᓄᒻᒪᕇᑦ ᓄᑕᖅᑲᑦ ᐊᒻᒪᓗ ᐃᓚᒌᑦᑐᑦ. ᓄᓇᕗᑦ ᑐᙵᕕᒃ ᑎᒥᖓ ᐋᖅᑮᓯᒪᒋᕗᖅ ᐱᓕᕆᐊᖃᐃᓐᓇᕐᓂᐊᖅᑐᒥᒃ ᐃᖅᑲᓇᐃᔭᖅᑎᒥᒃ ᒪᓕᒐᓕᕆᓂᕐᒧᑦ ᐊᒻᒪᓗ ᓄᑕᖅᑲᑦ ᖃᓄᐃᑦᑕᐃᓕᒪᓂᖏᖕᓄᑦ ᐃᖅᑲᓇᐃᔭᖅᑎᒥᒃ ᑕᒪᔅᓱᒥᖓ ᐃᖅᑲᓇᐃᔮᕆᔭᐅᔭᕆᐊᓕᒻᒥᒃ ᑲᒪᖃᑦᑕᕐᓂᐊᖅᑐᖅ.
“ᐱᖁᔭᖅᑎᒍᑦ ᑲᒪᔭᕆᐊᖃᕋᑦᑕ ᓴᐳᑎᓗᒋᑦ ᑕᐃᒃᑯᐊ ᐊᒃᑐᖅᑕᐅᑲᒻᒪᒃᓴᕋᐃᑦᑑᒍᓐᓇᖅᑐᑦ, ᓄᑕᖅᑲᕗᑦ. ᓄᑕᖅᑲᐅᓪᓗᓂ ᐋᓐᓂᕐᓇᓗᐊᖅᑐᒻᒪᕆᐅᕗᖅ ᐊᖅᓵᖅᑕᐅᓗᓂ ᓄᓇᓕᒻᒥ ᐊᒻᒪᓗ ᑲᓇᑕᑉ ᓂᒋᐊᓅᕈᔾᔭᐅᓗᓂ. ᐱᑦᑎᐊᖅᓯᒪᔪᓂᒃ ᑭᒡᓕᓯᓂᐊᖅᑕᐅᓯᒪᔪᓂᒃ ᐱᓯᒪᑦᑎᒍᑦᑕ, ᐱᖃᓯᐅᑎᓪᓗᒋᑦ ᓱᑯᑦᑎᐊᓄᐊᖅᑕᐅᓯᒪᖕᒪᖔᑕ ᓄᑕᖅᑲᑦ, ᐃᑲᔪᕈᓐᓇᖅᑐᑦ ᑕᒪᒃᑯᐊ ᑐᑭᓯᐅᒪᓗᑕ ᑭᒃᑯᓐᓄᑦ ᓴᐳᔾᔭᐅᒻᒪᖔᑕ ᐊᒻᒪᓗ ᓇᓗᓇᐃᖅᓯᓗᑕ ᖃᓄᖅ ᐱᐅᓯᕚᓪᓕᒃᑲᓐᓂᕈᓐᓇᕐᒪᖔᖅ ᐃᓕᓐᓂᐊᕇᕐᓂᖏᑦ ᓄᑕᖅᑲᑦ ᐊᖅᓵᖅᑕᐅᓯᒪᔪᑦ ᐃᓄᓕᕆᔨᒃᑯᑎᒍᑦ, ᑕᒪᒃᑮᓐᓂᒃ ᓄᓇᕗᒻᒥ ᐊᒻᒪᓗ ᓄᓇᓕᐸᐅᔭᐅᔪᓂᑦ. ᐃᖅᑲᓇᐃᔮᕆᓐᓇᕐᓗᒍ ᑕᒪᓐᓇ ᓄᑕᖅᑲᑦᑎᓐᓄᑦ ᐱᓕᕆᑐᐃᓐᓇᕈᒪᙱᑕᕗᑦ, ᑲᒪᒋᓪᓚᕆᒋᐊᖃᖅᑕᕗᑦ.” − ᐹᓪ ᐃᕐᖓᐅᑦ, ᐊᖓᔪᖅᑳᑉ ᑐᖏᓕᐊ, ᓄᓇᕗᑦ ᑐᙵᕕᒃ ᑎᒥᖓᓄᑦ.
ᑲᑎᒪᔩᑦ ᐊᒥᓱᓂᒃ ᑎᒃᑯᐊᖅᓯᓚᐅᕆᕗᑦ ᑲᑎᒪᔨᐅᔪᓄᑦ. ᑲᑎᒪᔩᑦ ᐊᖏᖅᓯᓚᐅᖅᑐᑦ ᓂᕈᐊᕋᒃᓴᐅᑎᑕᐅᓂᖓ ᐃᓕᓴᐱ ᑰᑉᓚᓐ ᐱᖓᓱᓄᑦ ᐊᕐᕌᒍᓄᑦ ᐊᑯᓂᐅᑎᒋᔪᖅ ᑲᑎᒪᔨᐅᓂᐊᕐᓗᓂ ᓄᓇᕗᒻᒥ ᐃᒥᓕᕆᔨᒃᑯᑦ ᑲᑎᒪᔨᖏᓐᓄᑦ ᓴᒃᑯᐃᓚᐅᖅᑎᓪᓗᑕ ᑲᑎᒪᔨᐅᔪᒪᒐᔭᖅᑐᓂᒃ ᖃᐅᔨᒃᑲᖅᑕᐅᔪᒪᓪᓗᑕ ᓄᓇᕗᒻᒥᐅᓂᒃ ᐃᓄᒻᒪᕆᖏᖕᓂᒃ ᐊᒻᒪᓗ ᕿᒥᕐᕈᓇᒃᑕᐅᓚᐅᖅᑎᓪᓗᒍ ᑲᑎᒪᔨᐅᔪᓐᓇᕋᔭᖅᑐᑦ ᐊᔪᙱᑦᑐᒡᒍᑎᖏᑦ. ᑕᐃᒫᒃᓴᐃᓐᓇᕐᓗ ᐊᔾᔨᐸᓗᖓᓂᒃ ᑎᑎᕋᕐᕕᐅᔪᒪᓚᐅᖅᓯᒪᒋᕗᒍᑦ ᑲᑎᒪᔨᐅᔪᒪᒐᔭᖅᑐᒥᒃ ᐊᒻᒪᓗ ᕿᒥᕐᕈᓇᒃᑕᐅᓂᕐᒧᑦ ᑲᒪᒋᔭᐅᓪᓗᑎᑦ ᐊᔪᙱᑎᒋᒻᒪᖔᑕ, ᑲᑎᒪᔨᐅᔪᑦ ᓂᕈᐊᕋᒃᓴᓕᐅᓚᐅᖅᑐᑦ ᐱᑐᓚ ᐸᓂᒍᓂᐊᖅ−ᐊᓇᐅᑕᖅ ᐱᖓᓱᓄᑦ ᐊᕐᕌᒍᓄᑦ ᐊᑯᓂᐅᑎᒋᔪᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᖕᓄᑦ ᑲᑎᒪᔨᐅᓂᐊᓕᕐᓗᓂ. ᐊᒻᒪᓗᒃᑲᓐᓂᖅ, ᑲᑎᒪᔩᑦ ᑎᒃᑯᐊᖅᓯᓚᐅᕆᕗᑦ ᕕᒃᑐ ᑐᑐ−ᒥᒃ ᓂᕈᐊᖅᑐᓕᕆᔨᐅᓂᐊᕐᓗᓂ 2026-ᒥ ᓄᓇᕗᑦ ᑐᙵᕕᒃ ᑎᒥᖓ ᐊᖓᔪᖅᑳᑉ ᑐᖏᓕᐊᓄᑦ ᓂᕈᐊᖅᑐᖃᓛᖅᑎᓪᓗᒍ. ᑕᒪᔅᓱᒥᖓ ᐱᓕᕆᐊᒃᓴᖃᖅᑎᓪᓗᒍ, ᐅᐊᑦᑎᒐᔭᖅᑐᖅ ᐊᐅᓚᑕᐅᓂᖓᓂᒃ ᓂᕈᐊᕐᓂᑉ ᐊᒻᒪᓗ ᐃᑲᔪᕐᓗᓂ ᖃᐅᔨᒪᓇᑦᑎᐊᕐᓂᐊᕐᒪᑦ ᐊᐅᓚᔾᔪᓯᐅᔪᖅ ᓂᕈᐊᕐᓂᖅ ᓇᓕᒧᒌᑦᑐᒃᑰᕐᓂᐊᕋᓗᐊᕐᒪᖔᕐᒥᒃ, ᓴᖅᑭᔮᖅᑐᒃᑰᕐᓗᓂ, ᐊᒻᒪᓗ ᓵᑕᐅᓯᒪᔪᓐᓇᕐᓗᑎᑦ.
ᑲᑎᒪᔩᑦ ᑐᓴᕆᐊᖅᑎᑕᐅᓚᐅᕆᕗᑦ ᐱᕙᓪᓕᐊᒍᑎᒋᔭᐅᓕᕐᓂᖓᓂᒃ ᓯᕗᓂᒃᓴᒥ ᐃᓄᒃᑐᑦ ᐃᓕᓐᓂᐊᕐᕕᒃᓴᐅᓛᖅᑐᖅ (ᐃᓕᓐᓂᐊᕐᕕᒃᓴᐅᓛᖅᑐᑦ). ᑲᑎᒪᔩᑦ ᐅᖃᖅᓯᒪᕗᑦ ᐊᐅᓚᔾᔪᓯᐅᓂᐊᖅᑐᖅ ᐃᓱᒪᓕᐅᕈᑕᐅᓗᓂ ᐃᓕᓐᓂᐊᕐᕖᑦ ᓱᑯᑦᑎᐊᓃᒃᑲᔭᕐᒪᖔᑕ ᐃᑲᔪᖅᑐᐊᕆᔭᐅᖁᓪᓗᒍ ᐱᕙᓪᓕᐊᒍᑎᒋᔭᐅᓂᖓ ᐱᑦᑎᐊᖅᓯᒪᓂᖅᓴᓂᒃ ᐊᕕᑦᑐᖅᓯᒪᔪᓂ ᐊᑭᒋᒐᔭᖅᑕᖏᓐᓂᒃ ᐱᔭᕆᐊᓖᑦ. ᓱᑯᑦᑎᐊᓃᒃᑲᔭᕐᓂᖏᑦ ᐃᓕᓐᓂᐊᕐᕖᑦ ᐃᓱᒪᓕᐊᖑᓂᖓ ᑐᑭᓯᒋᐊᖅᑎᑦᑎᓂᖅᓴᐅᒐᔭᖅᑐᑦ ᐊᒥᓱᓄᑦ ᐱᔾᔪᑎᓄᑦ, ᓲᕐᓗᒃ ᓄᓇᓕᓐᓂ ᒪᑭᒪᑎᑦᑎᔪᓐᓇᕐᓂᖓ ᐃᓄᒃᑐᑦ ᐅᖃᓪᓚᒍᓐᓇᖅᑐᓂᒃ ᐱᑕᖃᕐᓂᖓᓂᒃ, ᓄᓇᓕᓐᓂ ᐅᖃᕈᓐᓇᕐᓂᖏᑦ ᐃᓄᒃᑐᑦ, ᐊᑐᐃᓐᓇᐅᒪᔪᑦ ᐱᖁᑎᕐᔪᐊᑦ, ᐊᒻᒪᓗ ᓄᓇᓕᑉ ᐱᓕᕆᐊᖃᕈᒪᓂᖓ ᐊᒻᒪᓗ ᓯᕗᓕᖅᑎᐅᒍᒪᓇᔭᕐᓂᖓ. ᓯᕗᒧᐊᑦᑎᑕᐅᖁᓪᓗᒍ ᑕᒪᓐᓇ ᐃᖅᑲᓇᐃᔮᖅ, ᑲᑎᒪᔩᑦ ᑎᓕᓯᓚᐅᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓂᒃ ᐋᖅᑮᓗᑎᑦ ᑲᑎᒪᔨᕋᓛᕐᓂᒃ ᑲᑎᒪᔨᐅᓗᑎᑦ ᐊᑕᐅᓯᖅ ᐃᓄᒻᒪᕆᒃ ᑭᒡᒐᖅᑐᐃᔪᑦ ᐊᑐᓂ ᐊᕕᑦᑐᖅᓯᒪᔪᓂ. ᑲᑎᒪᔨᐊᓛᑦ ᐃᖅᑲᓇᐃᔭᖃᑎᖃᕐᓂᐊᖅᑐᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐃᑲᔪᕐᓂᐊᕐᒪᑕ ᑐᑭᑖᖅᑎᑦᑎᓗᑎᑦ ᓂᕈᐊᖅᓯᓂᕐᒧᑦ ᒪᓕᑦᑕᐅᔭᕆᐊᖃᕋᔭᖅᑐᓂᒃ ᐊᒻᒪᓗ ᑐᑭᒧᐊᑦᑎᑕᐅᓗᓂ ᐊᐅᓚᔾᔪᓯᐅᓂᐊᖅᑐᖅ ᐃᓱᒪᓕᐅᖅᑐᖃᕋᓱᐊᕐᓂᖓᓂᒃ ᓯᕗᓂᒃᓴᒥ ᐃᓕᓐᓂᐊᕐᕖᑦ ᓱᑯᑦᑎᐊᓃᓛᕐᒪᖔᑖ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒃᑲᐃᔪᓐᓇᖅᑐᑦ
ᐋᓂ ᑕᒻᓕᓐᓴᓐ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
