ᓄᓇᕗᑦ ᑐᙵᕕᒃ ᑎᒥᖓᑕ ᐅᖃᐅᓯᒃᓴᖏᑦ
ᓴᒃᑯᑕᐅᑲᐅᑎᒋᔭᕆᐊᓕᒃ
ᓄᓇᕗᑦ ᑐᙵᕕᒃ ᑎᒥᖓ ᐃᑲᔪᖅᑐᐃᕗᑦ ᓄᓇᑦᓯᐊᕗᑦ ᒐᕙᒪᖓᓂ ᐊᒻᒪᓗ ᓈᒻᒪᒃᓴᖅᑐᑎᑦ ᑲᓇᑕᑉ ᒐᕙᒪᖏᑦ ᐃᓱᒪᓕᐊᕆᓯᒪᔭᖓᓂᒃ ᓄᖅᑲᖅᑎᑕᐅᓂᐊᖅᑐᑎᑦ ᓄᓇᑐᖃᕗᑦ ᑲᑎᒪᔨᖏᑦ ᑕᐃᑲᓂ ᐱᖃᑕᐅᖃᑦᑕᕈᓐᓃᕐᓗᑎᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᑎᒍᒥᐊᖅᑏᑦ ᓇᒻᒥᓂᖅᓱᖅᑏᓪᓗ ᑲᑎᒪᔨᖏᓐᓂᒃ ᑲᑎᒪᑎᑕᐅᖃᑦᑕᕈᓐᓃᕐᓗᑎᑦ
(ᐃᖃᓗᐃᑦ, ᓄᓇᕗᑦ) ᓯᑏᕝᕙ 8, 2026 – ᓄᓇᕗᑦ ᑐᙵᕕᒃ ᑎᒥᖓ ᐃᑲᔪᖅᑐᐃᕗᑦ ᓄᓇᑦᓯᐊᕗᑦ ᒐᕙᒪᖏᓐᓂᒃ ᐊᒻᒪᓗ ᓈᒻᒪᒃᓴᖅᑐᑎᑦ ᑲᓇᑕᑉ ᒐᕙᒪᖓ ᐃᓱᒪᓕᐅᖅᑐᒥᓂᐅᑎᓪᓗᒋᑦ ᓄᖅᑲᖅᑎᑕᐅᓂᐊᕐᒪᑕᒎᖅ ᓄᓇᑐᖃᕗᑦ ᑲᑎᒪᔨᖏᑦ ᐃᓕᓴᕆᔭᐅᓂᖏᑕ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᑎᒍᒥᐊᖅᑏᑦ ᓇᒻᒥᓂᖅᓱᕋᓱᐊᖅᑏᓪᓗ ᑲᑎᒪᑎᑕᐅᖃᑦᑕᕈᓐᓃᕐᓗᑎᑦ
ᓄᓇᕗᑦ ᑐᙵᕕᒃ ᑎᒥᖓ ᐊᑯᓂᐊᓗᒃ ᐃᓱᒫᓘᑎᖃᖃᑕᐅᓯᒪᕗᑦ ᓄᓇᑦᓯᐊᕗᑦ ᒐᕙᒪᖏᑕ ᐅᖃᐅᓯᕆᖃᑦᑕᖅᓯᒪᔭᖏᓐᓂᒃ ᐊᒻᒪᓗ ᐊᓯᖏᑦ ᐃᓄᐃᑦ ᐱᔪᓐᓇᐅᑎᓂᒃ ᑎᒍᒥᐊᖅᑎᐅᖃᑕᐅᔪᑦ ᑲᓇᑕᑉ ᐃᓚᐅᑎᑦᑎᓂᖏᓐᓂᒃ ᓄᓇᑐᖃᕗᑦ ᑲᑎᒪᔨᖏᑦ ᐃᓕᓴᕆᔭᐅᓯᒪᓪᓗᑎᑦ ᑕᒪᓐᓇ ᐃᓱᒪᓕᐊᖑᓯᒪᔪᖅ ᐱᒻᒪᕆᐊᓗᒻᒥᒃ ᓱᖅᑯᐃᕐᓇᖅᓯᑎᑦᑎᒍᑕᐅᕗᖅ ᐊᒻᒪᓗ ᓇᓗᓇᐃᒃᑲᓐᓂᖅᑐᑎᑦ ᐅᖃᐅᓰᑦ ᐱᔾᔪᑎᖃᖅᑐᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᓇᒻᒥᓂᖅᓱᕐᓂᖏᓐᓂᒃ, ᐊᒻᒪᓗ ᒐᕙᒪᖃᕐᓂᖏᓐᓂᒃ ᑐᙵᕕᖃᕆᐊᖃᖅᑐᑦ ᓂᐱᖏᓐᓂᒃ ᐱᔪᓐᓇᐅᑎᖏᓐᓂᓪᓗ ᐃᓕᓴᕆᔭᐅᓯᒪᔪᑦ ᐃᓄᐃᑦ ᐱᔪᓐᓇᐅᑎᓂᒃ ᑎᒍᒥᐊᖅᑎᐅᔪᓂᒃ.
“ᓄᓇᕗᑦ ᑐᙵᕕᒃ ᑎᒥᖓ ᓄᓇᑦᓯᐊᕗᑦ ᒐᕙᒪᖏᑕ ᓈᒻᒪᒃᓴᕐᓂᖏᓐᓂᒃ ᐃᓱᒪᓕᐊᕐᒥᒃ ᑕᐃᒪᐃᑐᐃᓐᓇᕆᕗᑦ ᓈᒻᒪᒃᓴᖅᑐᑎᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᑦᑕᓄᐊᖅ ᐅᓗᖅᓯ. ᐃᓄᒻᒪᕇᑦ ᑭᓇᐅᓂᖏᑦ ᑐᙵᕕᖃᕐᒪᑕ ᐊᑐᖃᑦᑕᕐᓂᑯᑐᖄᓗᑦᑎᓐᓂᒃ ᑲᑐᑎᔭᑦᑎᓐᓂᒃ, ᐃᓕᖅᑯᓯᑦᑎᓐᓂᒃ, ᓄᓇᓕᑦᑎᓐᓂ, ᐊᒻᒪᓗ ᐃᓅᓯᕆᖃᑦᑕᕐᓂᑯᒥᓂᖅᑎᓐᓂᒃ. ᐃᓕᓴᕆᔭᐅᓂᖓ ᐊᒻᒪᓗ ᓴᐳᔾᔭᐅᓂᖏᑦ ᐃᓄᒻᒪᕇᑦ ᐱᔪᓐᓇᐅᑎᖏᑦ ᑐᑭᒧᐊᑦᑎᑕᐅᔭᕆᐊᖃᓪᓚᕆᑦᑐᑦ ᐃᓄᒻᒪᕆᖕᓄᑦ ᐊᒻᒪᓗ ᑲᑐᔾᔨᖃᑎᒌᓄᑦ ᑎᓕᔭᐅᓯᒪᔪᑦ ᑭᒡᒐᖅᑐᐃᓗᑎᑦ ᐃᓄᒻᒪᕇᑦ ᐱᔪᓐᓇᐅᑎᓂᒃ ᑎᒍᒥᐊᖅᑎᐅᔪᓂᒃ.”
ᓄᓇᕗᑦ ᑐᙵᕕᒃ ᑎᒥᖓ ᐃᓕᓴᖅᓯᓯᒪᕗᑦ ᓯᕗᓕᖅᑎᐅᓂᖏᓐᓂᒃ ᑕᑯᒃᓴᐅᑎᑦᑎᓯᒪᒻᒪᑕ ᓄᓇᑦᓯᐊᕗᑦ ᒐᕙᒪᖏᑦ ᐊᔭᐅᕇᓐᓇᐅᔭᖅᑐᑎᑦ ᓴᐳᒻᒥᐅᓯᖅᑕᐅᓯᒪᓗᑎᑦ ᐃᓄᐃᑦ ᐱᔪᓐᓇᐅᑎᖏᑦ ᐊᒻᒪᓗ ᐃᓱᒫᓘᑎᒥᓂᒃ ᐅᖃᐅᓯᖃᐃᓐᓇᐅᔭᖅᑐᑎᑦ ᐊᐅᓚᔾᔪᓯᐅᔪᖅ ᓇᓗᓇᖅᑎᑦᑎᒍᓐᓇᕐᓂᖓᓂᒃ ᐃᓄᒻᒪᕇᑦ ᑭᒃᑰᓂᖏᓐᓂᒃ ᐊᒻᒪᓗ ᑭᒡᒐᖅᑐᖅᑕᐅᓂᖏᓐᓂᒃ.
ᐃᓱᒪᓕᐊᖑᓯᒪᓂᖓ ᐱᖃᑕᐅᒍᓐᓃᖅᑎᑕᐅᓪᓗᑎᑦ ᓄᓇᑐᖃᕗᑦ ᑲᑎᒪᔨᖏᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᑎᒍᒥᐊᖅᑏᑦ ᓇᒻᒥᓂᖅᓱᕐᓂᖏᓐᓂᓗ ᑲᑎᒪᔨᖏᓐᓂᒃ ᐱᒻᒪᕆᐊᓘᕗᖅ ᓯᕗᒧᐊᒋᐊᕈᑕᐅᓪᓗᓂ ᓴᙵᑦᑎᑕᐅᖁᓪᓗᒍ ᐃᓄᒻᒪᕇᑦ ᓇᒻᒥᓂᖅᓱᕐᓂᖏᓐᓂᒃ ᐊᒻᒪᓗ ᖃᐅᔨᒪᑦᑎᐊᖅᑎᑦᑎᒍᑕᐅᓪᓗᓂ ᒐᕙᒪᑐᖃᒃᑯᑦ ᐃᓕᓴᖅᓯᓪᓗᑎᑦ ᐊᐅᓚᔾᔪᓯᖏᑦ ᐃᑉᐱᒍᓱᑦᑎᐊᕆᐊᖃᕐᒪᑕ ᐊᔾᔨᐅᙱᑦᑐᓂᒃ ᐱᔪᓐᓇᐅᑎᖃᕐᒪᑕ ᐃᓄᒻᒪᕇᑦ. ᑐᙵᕕᒋᔭᐅᔪᒥᒃ ᐃᓕᓴᕆᔭᐅᒃᑲᓐᓂᖅᑎᑦᑎᓪᓗᓂ ᐱᓕᕆᐊᑦ, ᑮᓇᐅᔭᑦ, ᐊᒻᒪᓗ ᐱᕕᖃᕈᑕᐅᔪᑦ ᐃᓄᒻᒪᕆᓐᓄᐊᖓᒐᓱᐊᖅᑐᑦ ᐃᑲᔫᑎᖃᓪᓚᑦᑖᕆᐊᖃᕐᒪᑕ ᑖᒃᑯᓄᖓ ᐃᓄᒻᒪᕇᑦ ᓄᓇᓕᖏᓐᓄᑦ ᐊᒻᒪᓗ ᑲᑐᔾᔨᖃᑎᖐᖏᖕᓄᑦ.
“ᖁᔭᒋᔭᕗᑦ ᐃᖅᑲᓇᐃᔮᕆᖃᑦᑕᖅᑕᖏᑦ ᐊᖓᔪᖅᑳᑉ ᔪᕼᐋᓇᔅ ᓚᒻᑉ ᐊᒻᒪᓗ ᓄᓇᑦᓯᐊᕗᑦ ᒐᕙᒪᒃᑯᑦ ᐅᔾᔨᖅᓱᓕᖅᑎᑦᑎᓯᒪᓂᖏᓐᓄᑦ ᑕᒪᔅᓱᒥᖓ ᐱᒻᒪᕆᐅᔪᒥᒃ ᐱᔾᔪᑎᒥᒃ.” ᐅᖃᒃᑲᓐᓂᖅᑐᓂ ᐅᓗᖅᓯ. “ᓂᕆᐅᑦᑎᐊᖅᐳᒍᑦ ᐃᖅᑲᓇᐃᔭᖃᑎᒌᓐᓇᕐᓂᐊᕋᑦᑎᒍᑦ ᓄᓇᑦᓯᐊᕗᒃᑯᑦ ᐊᒻᒪᓗ ᐃᓄᒻᒪᕇᑦ ᐱᓕᕆᖃᑎᒋᓲᕗᑦ ᑲᑐᔾᔨᖃᑎᒌᖑᔪᑦ ᐃᓄᐃᑦ ᓄᓇᖓᓂ ᓯᕗᒧᐊᑦᑎᑕᐅᖁᓪᓗᒋᑦ ᑲᑐᑎᔭᕗᑦ ᓯᕗᓪᓕᐅᑎᓪᓗᒋᑦ ᑲᒪᒋᓇᓱᐊᖅᑕᕗᑦ ᐊᒻᒪᓗ ᖃᐅᔨᒪᑦᑎᐊᖅᑎᖅᑎᓗᑕ ᐃᓄᒻᒪᕇᑦ ᐱᔪᓐᓇᐅᑎᖏᑦ, ᐊᒻᒪᓗ ᒐᕙᒪᖏᑕ ᐋᖅᑭᒃᓱᖅᓯᒪᓂᖏᑦ ᐃᑉᐱᒋᔭᐅᑦᑎᐊᕋᓗᐊᕐᒪᖔᑖ ᐊᒻᒪᓗ ᒪᓕᑦᑕᐅᑦᑎᐊᖃᑦᑕᕐᓗᑎᑦ.”
ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᐃᓐᓇᕐᓂᐊᕐᓂᕋᖅᓯᒪᕗᑦ ᐃᓄᒻᒪᕇᑦ ᐊᕕᑦᑐᖅᓯᒪᔪᓂ ᑲᑐᔾᔨᖃᑎᒌᓂ ᒐᕙᒪᒃᑯᓐᓂᓗ ᐃᓄᐃᑦ ᓄᓈᓐᓂ ᓴᐳᔾᔭᐅᖁᓪᓗᒋᑦ ᐃᓄᒻᒪᕇᑦ ᐱᔪᓐᓇᐅᑎᖏᑦ, ᓴᙵᑦᑎᑕᐅᓗᓂ ᐃᓄᐃᑦ ᓇᒻᒥᓂᖅᓱᕐᓂᖏᑦ, ᐊᒻᒪᓗ ᐃᑲᔪᖅᑐᖅᑕᐅᓗᓂ ᓯᕗᓂᒃᓴᖅ ᐃᓄᒻᒪᕇᑦ ᓂᐱᖏᑦ ᑐᑭᒧᐊᑦᑎᑦᑎᓂᖃᕐᓂᐊᕐᒪᑕ ᐃᓱᒪᓕᐊᕆᔭᐅᔪᓂᒃ ᐊᒃᑐᐃᓂᓕᓐᓂᒃ ᐃᓄᒻᒪᕇᑦ ᓄᓇᓕᖏᖕᓂ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐋᓂ ᑖᒻᓕᓐᓴᓐ
ᑐᑭᒧᐊᑦᑎᑦᑎᔨ, ᑐᓴᐅᒪᑎᑦᑎᔨᒃᑯᑦ
