ᑐᓴᕋᑦᓴᓕᕆᔩᑦ

ᑕᐃᒎᓰᒃ ᐊᓯᔾᔨᖅᑕᐅᓂᖏᒃ ᐊᑐᖅᑕᐅᖃᑦᑕᕐᓂᖏᒃ ᓄᓇᕗᒻᒥ ᐊᖏᕈᑏᑦ ᐊᒻᒪᓗ ᐃᓄᐃᑦ

ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᕆᑲᐃᓐᓇᖅᑕᖓ ᔭᐃᒥᓯ ᐃᑦᑐᓗᒃ ᐅᓪᓗᒥ ᑐᓴᖅᑎᑦᓯᔪᖅ ᑐᓐᖓᕕᒃᑯᑦ ᑕᐃᒎᓯᕐᒥᒃ ᐊᑐᖃᑦᑕᕐᓂᐊᓕᕐᓂᖓᓂᒃ ᓄᓇᕗᒻᒥ ᐊᖏᕈᑏᑦ ᐅᖃᐅᓯᖃᓕᕋᐃᒍᑎᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᑐᓴᐅᒪᔾᔪᑎᓃᖃᑦᑕᖅᑐᓕᒫᖑᓂᐊᖅᑐᓂ. ᐊᓯᔾᔨᕈᑕᐅᔪᖅ ᐊᖏᕈᑕᐅᓚᐅᖅᑐᖅ ᑐᓐᖓᕕᒃᑯᑦ ᑲᑎᒪᔨᖏᓐᓄᑦ, ᐊᒻᒪᓗ ᐃᓚᒋᔭᐅᔪᓄᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓂᖓᓂ ᑲᖏᕐᖠᓂᕐᒥ ᑕᖅᑭᕆᓚᐅᖅᑕᑎᓐᓂ.

ᐊᑕᖏᖅᑎᓪᓗᒍ ᑕᐃᒎᓯᖓ 1993 ᐊᖏᕈᑏᑦ ᐊᖏᕈᑏᑦ ᐃᓄᓐᓄᑦ ᓄᓇᕗᒥ ᓄᓇᑖᖅᑐᓄᑦ ᐊᒻᒪ ᑯᐃᓐ ᑭᒡᒐᖅᑐᖅᑎᖏᓐᓄᑦ ᑲᓇᑕᒥ. ᑕᐃᒎᓯᖓ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᑎᑎᕋᖅᑕᐅᓯᒪᓐᖏᑦᑑᒐᓗᐊᖅ ᐊᖏᕈᑎᓂ. ᐃᓛᒃ, ᓄᓇᕗᒻᒥ ᐊᖏᕈᑏᑦ ᑎᑎᕋᕐᓯᒪᓂᖏᓐᓂ ᐊᒥᓲᒻᒪᑕ ᐱᖕᒪᕆᐅᔪᑦ ᐊᖏᕈᑕᐅᓯᒪᔪᑦ ᐱᓕᕆᐊᒃᓴᓕᐊᖑᓯᒪᔪᑦ ᐃᓚᖏᑦ ᐊᓯᐊᒎᖓᒻᒪᑕ ᓇᖕᒥᓂᖃᕐᓂᖅ ᐊᒻᒪᓗ ᐊᐅᓚᑦᓯᓂᖅ ᓄᓇᓂᒃ, ᐃᓚᒋᔭᐅᓪᓗᓂ ᐃᓛᒃᑯᑦ 4 (ᐱᓐᖑᖅᑎᑕᐅᓂᖓ ᓄᓇᕗᑦ ᐊᒻᒪᓗ ᓄᓇᕗᑦ ᒐᕙᒪᖓ), ᐃᓛᒃᑯᑦ 23 (ᐃᓄᐃᑦ ᐃᖅᑲᓇᐃᔮᖃᕐᓂᖏᑦ ᒐᕙᒪᒃᑯᑦ ᐃᓗᐊᓂ), ᐃᓛᒃᑯᑦ 24 (ᒐᕙᒪᒃᑯᑦ ᑳᓐᑐᓛᒃᓯᖃᑦᑕᕐᓂᖏᑦ), ᐊᒻᒪᓗ ᐃᓛᒃᑯᑦ 32 (ᐃᓄᐃᑦ ᐃᓚᒋᔭᐅᓂᖏᑦ ᐃᓅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᑦ ᐊᑐᐊᒐᓕᐅᕐᓂᕐᒥᒃ).

ᐃᓚᖃᖅᑐᓂ, ᑎᑎᕋᖅᑕᐅᖃᑕᐅᓯᒪᔪᑦ ᓄᓇᕗᒻᒥ ᐊᖏᕈᑎᓂ ᑕᐃᔭᐅᖔᖃᑦᑕᕐᓂᐊᓕᖅᑐᑦ ᐃᓄᑦ ᑕᐃᔭᐅᓐᖏᖔᕐᓗᑎᒃ ᐊᑎᖃᖃᑕᐅᔪᓂᒃ. ᑕᐃᒎᓯᖅ ᐊᑎᖃᖃᑕᐅᔪᖅ ᐊᑐᖅᑕᐅᔪᖅ ᓄᓇᕗᒻᒥ ᐊᖏᕈᑎᓂ ᑖᒃᑯᓄᓐᖓᖓᔪᓂ ᓄᓇᕗᒻᒥ ᐸᐸᑦᑎᔨᓄᑦ ᓇᓗᓇᐃᕐᓯᒍᑕᐅᓗᓂ ᑮᓇᐅᔭᖅᑖᑐᒃᓴᒫᑦ ᐸᐸᑦᑎᔨᒃᑯᓐᓂᒃ. ᑕᐃᒎᓯᖅ ᐊᑎᖃᖃᑕᐅᔪᑦ ᐊᑐᖅᑕᐅᖃᑦᑕᕐᓯᒪᔪᖅ ᓇᓗᓇᐃᕐᓯᒍᑕᐅᓪᓗᓂ ᐃᓄᓐᓂᒃ ᑖᒃᑯᓄᓐᖓᖓᔪᓄᑦ ᑎᑎᕋᖅᑕᐅᖃᑕᐅᓯᒪᔪᓄᑦ ᓄᓇᕗᒻᒥ ᐊᖏᕈᑎᓂ. ᓯᕗᓂᑦᑎᓐᓂ, ᑐᓐᖓᕕᒃᑯᑦ ᐊᑐᖃᑦᑕᕐᓂᐊᓕᖅᑐᑦ ᑕᐃᒎᓯᕐᒥᒃ ᐃᓄᐃᑦ, ᓄᓇᕗᒻᒥ ᐃᓄᐃᑦ ᐅᕝᕙᓘᓐᓃᑦ ᐃᓄᒃ (ᐃᓄᐃᑦ) ᑎᑎᕋᖅᑕᐅᖃᑕᐅᓯᒪᔪᑦ ᓄᓇᕗᒻᒥ ᐊᖏᕈᑎᓂ ᑖᒃᑯᓄᓐᖓᖓᑦᓯᐊᓂᕐᓴᐅᖁᓪᓗᒍ ᐊᐅᓚᑦᓯᔪᓐᓇᕐᓂᖏᓐᓂᒃ ᐱᔪᓐᓇᐅᑎᖏᓐᓂᓪᓗ ᐃᓄᐃᑦ ᓄᓇᕗᒻᒥ ᐊᖏᕈᑎᓂ, ᐊᒻᒪᓗ ᑲᓇᑕᒥ ᐊᒻᒪᓗ ᓯᓚᕐᔪᐊᒥ ᒪᓕᒐᖏᓐᓂ.

“ᓄᓇᕗᒻᒥ ᐊᖏᕈᑏᑦ ᓴᖅᑮᕐᓯᒪᔪᖅ ᒪᕐᕉᓐᓄᑦ ᓇᓕᒧᒌᓐᓄᑦ ᐱᓇᓱᐊᖃᑎᒌᑦᑑᒃ ᓴᓂᕐᕙᐃᓯᒪᔫᒃ ᐋᖅᑭᑦᑕᐅᒌᕐᓯᒪᓐᖏᑦᑑᓐᓄᑦ ᒪᓕᒐᕐᓅᖓᔪᓂᒃ ᐱᔪᓐᓇᐅᑎᖏᓐᓄᑦ ᓄᓇᕗᒻᒥ ᑕᐅᖅᓰᒍᑕᐅᔪᒥᒃ ᑲᓇᑕᐅᑉ ᑐᓐᖓᕕᔾᔪᐊᖓᓂ ᓴᐳᔾᔭᐅᓯᒪᓂᖏᓐᓄᑦ ᐊᖏᕈᑕᐅᓯᒪᔪᓂ. ᐃᓄᐃᑦ ᐃᑲᔪᖅᑕᐅᓂᕐᒥᒃ ᐅᑕᖅᑭᔨᑐᐃᓐᓇᐅᖏᒻᒪᑕ ᐃᑲᔫᓯᐊᓂᒃ. ᐃᓚᒋᔭᒻᒪᕆᐅᒐᑦᑕ ᐊᐅᓚᑦᓯᖃᑕᐅᓂᕐᒥᒃ ᐃᓱᒪᓕᐅᕈᑕᐅᒋᐊᓕᓐᓂᒃ ᐋᔩᕋᕐᓂᐅᔪᒧᑦ, ᓴᓇᒻᒪᓕᕆᓂᕐᒥᒃ ᐊᒻᒪᓗ ᑲᔪᓯᑎᑦᓯᓂᕐᒥᒃ ᓄᓇᕗᒻᒥ ᐊᖏᕈᑎᓂᒃ,” ᐅᖃᓚᐅᖅᑐᖅ ᐃᑦᑐᓗᒃ. “ᑎᒍᒥᐊᕋᑦᑕ ᐊᖏᔪᒻᒪᕆᓐᓂᒃ ᐊᔾᔨᒌᓐᖏᑦᑐᓂᒃ ᐱᔪᓐᓇᐅᑎᓂᒃ ᓄᓇᕗᒻᒥ ᐊᖏᕈᑎᓂ ᐊᒻᒪᓗ ᐊᑐᖃᑦᑕᖅᑕᕗᑦ ᑖᒃᑯᐊ ᐱᔪᓐᓇᐅᑏᑦ ᐊᐅᓚᑦᓯᓂᕐᒥᒃ ᐊᔾᔨᒌᓐᖏᑦᑐᓂᒃ ᐅᓄᖅᑐᓂᒃ ᓄᓇᒋᔭᑦᑎᓐᓂ.”

ᐋᖅᑭᑦᓯᒪᑦᓯᐊᖁᓪᓗᒋᑦ ᐊᔾᔨᒌᑦᑐᒥᒃ ᐊᑐᖁᓪᓗᒋᑦ, ᑐᓐᖓᕕᒃᑯᑦ ᐊᐱᕆᔪᑦ ᑕᒪᐃᓐᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᓄᓇᕗᑦ ᐊᒻᒪᓗ ᑲᓇᑕ ᒐᕙᒪᒃᑯᖏᓐᓂᒃ, ᐱᕙᓪᓕᐊᔪᓕᕆᔨᓂᒃ ᐊᒻᒪᓗ ᐊᓯᖏᓐᓂᒃ ᐱᓇᓱᐊᖃᑦᑕᐅᖃᑦᑕᖅᑐᓂᒃ ᐊᑐᖔᖁᓪᓗᒋᑦ ᐱᖕᒪᕆᐅᔫᓐᓂᒃ ᑖᒃᑯᓂᖓ ᐊᓯᔾᔨᕈᑕᐅᔫᓐᓂᒃ ᐅᖃᐅᓯᖅᑕᐅᔫᓐᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: