(ᒪᐃ 4, 2015 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑦ ᑳᑎ ᑕᐅᑐᙱ ᑐᓴᖅᑎᑎᖅᑲᐅᕗᑦ ᐅᓪᓗᒥ ᑖᒃᑯᐊ ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑎᓕᐅᕈᓐᓇᓚᐅᕐᒪᑕ ᑕᒪᕐᒥᒃ ᐊᑎᓕᐅᖃᑕᐅᓯᒪᔪᑦ ᓄᓇᑖᕈᑎᓄᑦ ᐊᖏᕈᑎᓂᒃ ᑕᐃᒪ ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᕈᔾᔨᓚᐅᕐᓯᒪᒻᒪᑕ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᑐᓕᕐᑎᑦᑎᕙᓪᓕᐊᓯᒪᙱᓐᓂᖏᓐᓄᑦ ᐊᔾᔨᒌᙱᑦᑐᓂᒃ ᐱᓂᐊᕐᓂᕋᕈᑕᐅᓯᒪᔪᓂᒃ 1993-ᒥ ᓄᓇᕘᒥ ᓄᓇᑖᕈᑎ ᐊᖏᖃᑎᒌᒍᑕᐅᑎᓪᓗᒋᑦ ᐱᓂᐊᕐᓂᕋᕈᑎᓕᐊᕆᔭᐅᓚᐅᕐᓯᒪᔪᓄᑦ. ᐊᒥᓱᑲᓪᓚᐃᑦ ᓄᓇᕘᒥ ᓄᓇᑖᕈᑏᑦ ᐊᖏᕈᑎᖏᓐᓃᒃᑐᑦ ᒪᓕᒃᑕᐅᓯᒪᙱᒻᒪᑕ 1993-ᒥᓂᑦ. ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑦ ᑕᒪᒃᑮᓐᓂᒃ ᐋᖅᑭᒍᑕᐅᖕᒪᑦ ᐃᖅᑲᖅᑐᐃᕕᒃᑰᑎᑦᑎᒍᑎᐅᓯᒪᔪᒧᑦ ᐊᒻᒪᓗ ᓯᕗᒧᒋᐊᒃᑲᓐᓂᕈᑕᐅᔪᓐᓇᕐᓂᐊᓕᖅᑐᓂ ᐊᒥᓱᑲᓪᓚᓐᓂᒃ ᐱᒻᒪᕆᐅᔪᓂᒃ ᐊᑐᓕᖅᑎᑕᐅᕙᓪᓕᐊᔭᕆᐊᖃᖅᑐᓂᒃ. ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑦ ᐊᑎᓕᔭᐅᓚᐅᕐᓯᒪᒻᒪᑦ ᑭᒡᒐᑐᖅᑎᖏᓐᓄᑦ ᓄᓇᕗᑦ ᑐᙵᕕᒃᑯᑦ, ᒐᕙᒪᒃᑯᖏᓐᓂᒃ ᑲᓇᑕᐅᑉ ᐊᒻᒪᓗ ᒐᕙᒪᒃᑯᖏᓐᓂᒃ ᓄᓇᕘᑉ ᒪᑦᓯ 5, 2015-ᖑᑎᓪᓗᒍ, ᐊᑎᓕᐅᖅᑕᐅᓚᐅᕐᐳᖅ ᐊᖏᔪᖅᑳᖓᓐᓄᑦ ᑕᐅᑐᙵᒧᑦ, ᐃᓄᓕᕆᔨᑐᖃᒃᑯᑦ ᒥᓂᔅᑕᖓᓐᓄᑦ ᐳᕐᓈᑦ ᕚᓪᑯᐊᑦᒧᑦ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᓯᕗᓕᖅᑎᖓᓐᓄᑦ ᐲᑕ ᑕᑉᑑᓇᒧᑦ ᐊᑎᐅᓕᕆᓂᕐᒧᑦ ᖁᕕᐊᓱᒍᑎᖃᖅᑎᓪᓗᒋᑦ ᐅᓪᓗᒥ ᐃᖃᓗᓐᓂ.
ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑦ ᐃᕐᖏᓐᓇᖅ ᐊᑐᓕᕐᓂᐊᖅᑐᓂ. ᐃᖅᑲᖅᑐᐃᕕᒃᑰᑎᑦᑎᒋᐊᕈᑎᐅᓚᐅᕐᓯᒪᔪᖅ ᑎᓯᑉᐱᕆ 2006-ᒥ ᓄᓇᕘᑉ ᐃᖅᑲᖅᑐᐃᕕᖓᑎᒍᑦ ᓄᖅᑲᖅᑎᑕᐅᓂᐊᓕᖅᑐᓂ.
ᒪᓕᓪᓗᒋᑦ ᒪᓕᒃᑕᐅᔭᕆᐊᓖᑦ ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑎᓃᒃᑐᑦ, ᓄᓇᕗᑦ ᑐᙵᕕᒃᑯᑦ ᐱᑎᑕᐅᓂᐊᖅᑐᑦ, ᐊᓯᖏᓐᓂᓪᓗ, ᑮᓇᐅᔭᓂᒃ ᐅᓄᕐᓂᖃᓪᓗᒋᑦ $255.5 ᒥᓕᐊᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ. ᓄᓇᕗᑦ ᑐᙵᕕᒃᑯᑦ ᓴᓂᖅᕙᐃᓂᐊᖅᐳᑦ ᑮᓇᐅᔭᓂᒃ ᐱᓕᒻᒪᓴᐃᓂᕐᒧᑦ ᐃᓄᐃᑦ ᐃᖅᑲᓇᐃᔮᕐᑕᕈᓐᓇᓕᖁᓪᓗᒋᑦ. ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᒪᒋᕗᑦ ᓄᑖᓂᒃ ᓴᓇᔪᓐᓇᕐᑐᓂᒃ ᖃᐅᔨᓴᕈᑎᖃᕈᒪᓪᓗᑎᒃ ᓄᓇᕘᒥ, ᑖᒃᑯᐊᓗ ᖃᐅᔨᓴᕈᑎᐅᓯᒪᔪᑦ ᐃᑲᔪᓐᓂᖃᒻᒪᕆᒃᑲᔭᕐᑐᑎᒃ ᑐᑭᓯᔭᐅᔭᕆᐊᓕᓐᓂᒃ ᖃᓄᖅ ᐱᐅᓂᖅᐹᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᕐᑎᑖᖅᐸᓪᓕᐊᔪᓐᓇᕐᒪᖔᕐᒥᒃ ᒪᓕᓪᓗᒋᑦ ᐃᓄᐃᑦ ᐃᓄᒋᐊᓐᓂᖏᑦ ᓄᓇᕘᒥ (ᖃᓂᒌᔮᓂ 85 ᐳᓴᙳᔪᓂᒃ).
ᐊᑐᕐᓗᒋᑦ ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑦ, ᓄᓇᕘᒥ ᓄᓇᑖᕈᑏᑦ ᐊᖏᕈᑎᖏᑦᑎᒍᑦ ᑎᑎᕋᖅᓯᒪᔪᖅ 38-ᒥ ᑭᖑᕝᕕᖅᑕᐅᓂᐊᖅᑐᓂ ᓄᑖᓂᒃ ᐊᖏᖃᑎᒌᖏᓕᕐᓂᕐᐸᑕ ᐋᖅᑭᖃᑎᒌᒍᑎᐅᔪᓐᓇᕐᑐᓂᒃ ᑲᑎᒪᖃᑎᒌᓐᓂᒃᑯᑦ, ᐋᔩᖃᑎᒌᓐᓂᒃᑯᑦ, ᓈᓚᒃᑎᖃᓐᓂᒃᑯᑦ ᐊᒻᒪ ᑭᖑᓪᓕᖅᐹᒥᒃ ᐱᕕᖃᖅᑎᑦᑎᓪᓗᓂ ᐃᓱᒪᓕᐅᕈᔾᔭᐅᔪᓐᓇᕐᓂᒥᒃ ᑖᒃᑯᐊ ᐊᓯᖏᑦ ᓄᓇᑖᕈᑎᓂᒃ ᐊᑎᓕᐅᖃᑕᐅᓯᒪᔪᑦ ᐊᖏᖅᓯᒪᙱᒃᑲᓗᐊᖅᐸᑕ, ᐊᖏᖅᓯᒪᔭᕆᐊᖃᓲᖑᕙᓚᐅᕈᓗᐊᕐᒪᑕᓕ.
ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᒪᒋᕗᑦ ᓄᓇᕗᖕᒧᑐᐊᖅ ᑐᕌᖓᓂᖃᖅᑐᒥᒃ ᓴᖅᑮᔪᒪᓪᓗᑎᒃ ᓄᓇᕘᒥᓄᓇᑖᕈᑎᓄᑦ ᐊᖏᕈᑎᓂ ᑎᑎᕋᖅᓯᒪᔪᖅ 24-ᒥ ᓴᓈᒃᓴᕐᑕᕈᑕᐅᓲᓄᑦ ᐊᑐᐊᒐᖅ ᐃᓂᖅᑕᐅᔪᒫᕐᑐᓂᒃ ᐅᑭᐅᓐᓂ ᒪᕐᕉᓐᓂ ᖃᐃᔫᓐᓂ.
“ᓄᓇᕗᑦ ᑐᙵᕕᒃᑯᑦ ᐋᔩᖃᑎᒌᒍᑎᑖᓚᐅᕐᐳᑦ ᐱᐅᔪᓂᒃ ᐃᓄᖕᓄᑦ ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑎᑎᒍᑦ. ᐊᒻᒪᓗᑦᑕᐅᖅ ᓄᓇᕗᑦ ᑐᙵᕕᒃᑯᑦ ᐊᑭᓖᔭᕆᐊᖃᒃᑲᓂᕋᔭᓚᐅᕐᑐᒃᓴᐅᔪᑦ, ᑭᖑᕙᕆᐊᖏᓐᓇᕐᓗᑎᓪᓗ ᐊᒻᒪ ᓇᓗᓇᕐᓂᕆᓚᐅᕐᑕᖓ ᐃᖅᑲᖅᑐᐃᕕᒃᑰᑎᑦᑎᓚᐅᕈᑎᒃ, ᐊᒻᒪᓗ ᐊᔪᐃᓐᓇᕆᐊᖅᑕᐅᑲᓐᓂᕐᕕᐅᔪᓐᓇᓚᐅᕐᓂᖏᑦ ᐃᖅᑲᖅᑐᐃᕕᒃᑯᑦ ᑖᒃᑯᐊᓕᒫᑦ ᐊᑐᕆᐊᖃᕈᓐᓃᓚᐅᖅᐸᐃᑦ. ᓄᓇᕗᑦ ᑐᙵᕕᒃᑯᑦ ᐃᒪᓐᓇᐃᑐᒃᑰᖁᔨᕗᖔᖅᓯᒪᕗᑦ ᑖᓐᓇ ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑦ ᓄᑖᒥᒃ ᐅᒃᑯᐃᕈᑎᐅᓗᓂ ᐱᓕᕆᖃᑎᖃᓐᓂᑎᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᒻᒪᓗ ᓄᓇᕘᑉ ᒐᕙᒪᒃᑯᖏᓐᓂᒃ, ᐊᒻᒪᓗ ᐃᓄᐃᑦ ᐊᑑᑎᖃᖅᑎᑦᑎᐊᖁᒥᓇᕐᐳᑦ ᐱᓂᐊᓐᓂᕋᕈᑕᐅᓯᒪᔪᓂᒃ ᓄᓇᕘᒥ ᓄᓇᑖᕈᑏᑦ ᐊᖏᕈᑎᖏᓐᓃᒃᑐᓂᒃ,” ᐅᖃᖅᑐᖅ ᐊᖏᔪᖅᑳᖅ ᑕᐅᑐᙱ.
“ᒐᕙᒪᕗᑦ ᐃᒃᐱᒋᔭᖃᓗᐊᖅᐳᑦ ᓱᓕ ᐃᖅᑲᓇᐃᔮᓂᒃ, ᐱᕙᓪᓕᐊᑎᑦᑎᕙᓪᓕᐊᓂᕐᒥᒃ ᐊᒻᒪᓗ ᐃᒻᒥᒃᑯᑦ ᒪᑭᒪᔪᓐᓇᓂᕐᒥᒃ ᑕᒪᐃᓐᓂᒃ ᑲᓇᑕᒥᐅᓂᒃ. ᐅᓪᓗᒥ ᐊᑎᓕᐅᕆᓂᕐᒧᑦ ᖁᕕᐊᓱᓐᓂᕗᑦ ᓇᓗᓇᖏᒍᑕᐅᕗᖅ ᒐᕙᒪᒋᔭᕗᑦ ᓯᕗᒧᒃᐸᓪᓕᐊᔪᒪᓂᖏᓐᓂᒃ ᐊᒻᒪ ᐃᖅᑲᓇᐃᔭᖃᑎᖃᕈᒪᓂᕐᒥᓂᒃ ᐊᑐᓕᕐᑎᑕᐅᕙᓕᐊᓂᖏᓐᓂᒃ ᓄᓇᕘᒥ ᓄᓇᑖᕈᑏᑦ ᐊᖏᕈᑎᖏᓐᓂᒃ ᑕᐃᒃᑯᑕᓪᓗ, ᐅᒃᑯᐃᕐᓯᓂᐊᕋᑦᑕ ᓄᑖᓂᒃ ᒪᑭᒪᒍᑕᐅᔪᓐᓇᕐᑐᓂᒃ ᐱᕕᒃᓴᖃᕐᕕᐅᔪᓐᓇᖅᑐᓂᒃ ᐊᒻᒪ ᓴᖅᑮᔪᓐᓇᕐᑐᓂᒃ ᐃᖅᑲᓇᐃᔮᒃᓴᓂᒃ ᓄᓇᕗᖕᒥᐅᓄᑦ,: ᐅᖅᑲᖅᑐᖅ ᒥᓂᔅᑕ ᕚᓪᑯᐊᑦ.
“ᖁᕕᐊᒃᐳᒍᑦ ᐋᖅᑭᖃᑎᒌᒍᑕᐅᔪᖅ ᐱᔭᕇᖅᑕᐅᔪᓐᓇᓚᐅᕐᒪᑦ, ᐊᒻᒪᓗ ᐃᖅᑲᓇᐃᔭᖃᑎᖃᕈᒪᓪᓗᑎᒃ ᓄᓇᕗᑦ ᑐᙵᕕᒃᑯᓐᓂᒃ ᓯᕗᒧᐊᒋᐊᕈᑎᒃᓴᓄᑦ ᐃᑲᔪᕐᓯᓂᖃᖅᑐᓂᒃ ᐱᓕᒻᒪᒃᓴᐃᓂᕐᒥᒃ ᐃᓄᖕᓂᒃ ᓄᓇᕘᑉ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᓂᒃ, ᑕᐃᒪᓐᓇ ᓇᓗᓇᐃᖅᑕᐅᓯᒪᒻᒪᑕ ᓄᓇᕘᒥᓄᓇᑖᕈᑏᑦ ᐊᖏᕈᑎᖏᓐᓂ ᑎᑎᕋᖅᓯᒪᔪᒥ 23-ᒥ,” ᐅᖅᑲᖅᑐᖅ ᓯᕗᓕᖅᑎ ᑕᑉᑑᓇ.
ᖃᐅᔨᒋᐊᒃᑲᓐᓂᕈᒪᒍᕕᑦ ᓇᓗᓇᐃᔭᕐᓯᒪᓂᖏᓐᓂᒃ ᐊᒻᒪ ᒪᓕᒃᑕᐅᔭᕆᐊᖃᖅᑎᑕᓂᒃ ᐋᖅᑭᖃᑎᒌᓐᓂᕐᒧᑦ ᐊᖏᖃᑎᒌᒍᑎᓂ ᓄᓇᕗᑦ ᑐᙵᕕᒃᑯᑦ ᖃᕆᑕᐅᔭᒃᑯᑦ ᑐᕌᕈᑎᖓᓃᑦᑐᑦ ᑕᑯᒋᐊᕈᓐᓇᖅᐸᑎᑦ ᐅᕗᖓ www.tunngavik.com
Final Settlement Agreement Signed (PDF)
Plain Language Settlement Agreement – English (PDF)
Plain Language Settlement Agreement – Inuktitut (PDF)
NTI President Speaking Notes – English (PDF)
NTI President Speaking Notes – Inuktitut (PDF)
-30-
ᑐᑭᓯᒋᐊᑲᓐᓂᕈᓐᓇᖅᐳᑎᑦ:
ᑮᐅᕆ ᒪᑲᓪᔅᑭ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
ᐅᖄᓚᐅᑖ: (867) 975-4914 ᐅᖄᓚᐅᑎᕋᓛᖓ: (867) 222-2893 ᐊᑭᓕᕆᐊᖃᙱᑦᑐᖅ: 1- 888-646-0006
www.tunngavik.com
ᐃᒪᓕ ᕼᐃᐅᓪᓱᑐᐊᒻ
ᐱᕙᓪᓕᐊᔪᓕᕆᔨᒃᑯᓅᖅᑐᒃᓴᓂᒃ ᑎᑎᕋᖅᑎ
ᑎᑎᕋᕐᕕᖓᓂ ᒥᓂᔅᑕᖓᑦᑕ ᐃᓄᓕᕆᔨᑐᖃᒃᑯᑦ
819-997-0002
ᑲᑐᕆᐊᓚ ᒪᑲᓚᐅᑦ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᒐᕙᒪᒃᑯᖏᑦ ᓄᓇᕘᑉ
867-975-6049
