(May 4, 2015 – Iqaluit, Nunavut) Nunavut Tunngavikkut Timingat (NTI) Angayuqqaangat Cathy Towtongie uplumi uqaqtuq taimaa angirutitaaqhimayut tamangnit ilauyunit NTI-kut apiqhuiyikkuuqtitainut akihaqtuqhugit Kuin Kivgaqtiit (Kavamatuqait Kanatami) aullaqtittihimainnamik piniaqhimayuriyainik talvani 1993-mi Nunavunmi Nunataarutit Angirutinit (NLCA). Qaffiuyut ihuinaarutit NLCA-nut kinguvaqhimayut 1993-mut. Angirutit taapkua ihuaqhaitjutauplutik apiqhuiyikkuuqtunik hivumuuqtitpalliaplutiklu nakuuyumik qaffinut aullaqtitaghanut. Angirutit taapkua titiraliqtauhimayut atannguyanit kivgaqtuiyut NTI-kunnit, Kavamatuqanit Kanatami Kavamatkunillu Nunavunmi (GN) March 5-mi, 2015-mi, atiliqtaupluni Angayuqqaamit Towtongie-mit, Nunaqaqqaaqhimayut Ikayuqtit Ministaat Bernard Valcourt Kavamatkullu Nunavunmi Hivuliqtia Peter Taptuna atiliqtuigamik uplumi Iqalungni.
Angirutit atuqtaunariqniaqtut qilaminnuaq. Apiqhuiyikkuuqtitaunahuat December 2006-mi talvani Nunavut Apiqhuiyiqyuanganit nutqaqtitaunahuat.
Titiraqhimayutut talvani angirutinit, NTI-kut tuniyaunahuat, ahiagut hunanik, naallugit maningnik $255.5-milian-taalanik ikayuutighat Kavamatuqanit Kanatami. NTI-kut atuqniaqturiyait anginiqhait maniit ilihaqtittilutik Inungnik havaaghanut. Kavamatuqait Kanatami qauyihainiaqturiyut havaktunik Nunavunmi, naunaiqhitivighat qanuq ihuatqiyauniaqtuq kavamanut havaktiqarumaplutik Inuinnarnik Nunavunmi (85%-nik).
Ataagut angirutit, NLCA-nit titiraqhimayuq Ilanga 38 himmauhiqtaunahuaq nutaanik pigiaqtitauhimayunik havauhirnik hivuani unipkaarutilugit, angirutitaarahuaqlutik, ihuaqhainahuaqlutik pipkaivaghunilu taimaa, kingulliqpaangutilugit, ilauyunik ihuaqhainahuaqtughanik angiqtaulraaqhimaittumik ahinit ilauyunit, hivuani taimaitkaluaqmat.
Kavamatuqait Kanatami angiqhimayullu aullaqtittiyaami Nunavunmiunut-kihiinnanut NLCA-nik titiraqhimayutut Ilanga 24 kaantulaaktittiniqmut maligaghait iniqtauyughat malruk ukiuq atuqtillugit.
“NTI-kut angirutihiuqpaktut hapkua nakuuyut piyumaplugit Inungnut. Atauttikkullu, NTI-kut akiliqtaghanik pittailivaktut, kinguvaqtittiyunik naunaqtuniklu apiqhuiyikkuuqtunit, akihaqtuqniaqhimayuniklu. NTI-kut naahurittiaqtut taimaa hapkua iniriyumayaigut angmautiniaqtut nutaanik havaqatigiikvighanik Kavamatuqallu Kanatami GN-kullu, taapkualu Inuinnait atuqpallianiarait piniaqhimayait NLCA-nit,” uqaqtuq Angayuqqaaq Towtongie.
“Kavamavut ihumagivagait huli havaaghat, angiklivaalliqtut manighiuttiarniqmiklu tamangnut Kanatamiunut. Uplumi atiliqhiplutik ilitturinnaqpiaqtuq taimaa Kavamavut hivumut ingilravalliayumayut havaqatigiplugit ikayuqtivut aullaqtittivalliaplugu taamna Nunavunmi Nunataarnikkut Angirutit talvuuna, angmaqtirivangniaqtugut atuqtaghat nutaat havaaghaliuqluta Nunavunmiunnut,” uqaqtuq Minista Valcourt.
“Quviahuqpiaqtugut angirutit iniqtaugamik, iniqhiniaqhimaplutiklu havaqatigilugit NTI-kut atuqtittivallialugit aullaqtitaghat ikayuqhimmaaqlugit ilihaqhutik Inuinnait Kavamatkut Ikayuqtiit, titiraqhimayutut talvani Ilanga 23 NLCA-nit,” uqaqtuq Hivuliqti Peter Taptuna.
Naunaittiarumaguffi uqauhinik pitquyauhimayuniklu angirutinit NTI-kut qaritauyakkuurutait takulugit talvani www.tunngavik.com
Final Settlement Agreement Signed (PDF)
Plain Language Settlement Agreement – English (PDF)
Plain Language Settlement Agreement – Inuktitut (PDF)
NTI President Speaking Notes – English (PDF)
NTI President Speaking Notes – Inuktitut (PDF)
-30-
Naunaittiarumaguffi hivayaqlugu:
Kerry McCluskey
Aulapkaiyiryuaq Tuhaqtittiyinit
Nunavut Tunngavikkut Timingat
Hivayaut: (867) 975-4914 Akiittukkut: 1-888-646-0006
Emily Hillstrom
Tuhaqtittiyit Titiraqtia
Titiraqviat Ministap Nunaqaqqaaqhimayunik Ukiuqtaqtumiullu Ikayuqtia
819-997-0002
Catriona Macleod
Aulapkaiyiryuaq Tuhaqtittiyinit
Kavamatkut Nunavunmi
867-975-6049
