(ᒫᑦᓯ 26, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᒻᒪᓗ ᐃᓐᕼᐋᐱᑦ ᒦᑎᐊ
ᐊᖏᕈᑎᖃᖅᓯᒪᔫᒃ ᓇᓗᓇᐃᖅᓯᒍᑎᒥᓂᒃ ᐃᓄᐃᑦ ᐃᓚᒌᑦ ᐊᑐᐃᓐᓇᖃᕐᓂᐊᓕᕐᓂᖏᓐᓂᒃ ᐃᓄᒃᑑᖅᑐᓂᒃ ᐅᖃᓕᒫᒐᕐᓂᒃ ᐊᒻᒪᓗ ᐃᓕᓐᓂᐊᕈᑎᓄᑦ ᐊᑐᕋᑦᓴᓂᒃ ᐃᑲᔫᑎᒃᓴᓂᒃ ᐃᓄᒃᑐᑦ ᐅᖃᐅᓯᕐᒥᒃ ᐃᓕᓐᓂᐊᕈᑎᒃᓴᓂᒃ ᐊᖏᕐᕋᒥ. ᐃᑲᔪᖅᑕᐅᓪᓗᑎᒃ ᓄᓇᖃᖅᑳᖅᓯᒪᔪᓄᑦ ᓄᓇᓕᓐᓄᑦ ᐃᑲᔫᑎᒃᓴᓂᒃ ᑮᓇᐅᔭᓂᒃ ᑲᓇᑕ ᒐᕙᒪᒃᑯᖏᓐᓂᒃ, ᑐᙵᕕᒃᑯᑦ, ᐱᓇᓱᐊᖃᑎᖃᖅᑐᑎᒃ ᐃᓐᕼᐋᐱᑦ ᒦᑎᐊᒃᑯᓐᓂᒃ, ᖁᕕᐊᓱᑦᑐᑦ ᑐᓂᐅᖅᑲᐃᓂᐊᕐᓂᕐᒥᒃ ᐊᖏᕐᕋᒥ ᐃᓄᒃᑐᑦ ᑎᑎᖅᑭᕆᔾᔪᑎᒃᓴᓂᒃ ᐃᓄᐃᑦ ᓄᑕᖅᑲᖏᓐᓄᑦ ᓄᓇᕗᒻᒥ.
ᐃᓄᒃᑐᑦ ᑎᑎᖅᑭᕆᔾᔪᑎᓃᖃᑕᐅᓂᐊᖅᑐᑦ ᐅᖃᓕᒫᒐᑦ ᐊᔾᔨᙳᐊᓖᑦ, ᕿᒥᕐᕈᐊᒐᑦ, ᐅᖃᓕᒫᒐᐸᐅᔭᑦ, ᐱᖅᑯᓯᕐᒥᒃ ᐅᓂᒃᑳᑦ, ᕿᓪᓕᖅᑐᑦ ᑕᕐᕆᔮᑦᓴᑦ, ᕿᓪᓕᖅᑐᑦ ᑐᓴᕋᑦᓈᒐᑦ, ᐊᒻᒪᓗ ᑎᑎᖅᑭᕆᓂᕐᒧᑦ ᐱᓕᕆᐊᒃᓴᑦ. ᓄᓇᕗᑦ ᐃᓕᓴᐃᔨᖏᑦ ᐃᓕᓐᓂᐊᖅᑏᑦ ᐃᓕᓐᓂᐊᕆᐊᓕᓵᖅᑐᑦ ᐊᒻᒪᓗ ᐃᓕᓐᓂᐊᕐᓂᓖᑦ 1 ᑐᓂᔭᐅᓂᐊᖅᑐᑦ ᐊᒻᒪᓗ ᑐᓂᐅᖅᑲᖅᑕᐅᓗᑎᒃ ᑎᑎᖅᑭᕆᔾᔪᑏᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᕕᐊᕈᓯᕐᒥᓂ.
“ᑐᙵᕕᒃᑯᑦ ᐅᐱᒍᓱᑉᐳᑦ ᐃᑲᔪᖅᓱᐃᓂᕐᒥᓂᒃ ᐃᓄᒃᑐᑦ ᐅᖃᐅᓯᖅ ᐅᑎᖅᑎᑕᐅᕙᓪᓕᐊᓂᖓᓄᑦ, ᐃᓕᓐᓂᐊᓂᕐᒧᑦ ᖃᐅᔨᔭᐅᕙᓪᓕᐊᑎᑦᓯᓂᕐᒧᓪᓗ. ᑐᓂᔭᐅᓂᖏᑎᒍᑦ ᒪᒃᑯᑦᑐᑦ ᐃᓕᓐᓂᐊᖅᑏᑦ ᓄᑕᖅᑲᑦ ᐃᓕᑉᐸᓪᓕᐊᒍᑎᒃᓴᖏᓐᓂᒃ ᐅᖃᐅᓯᑦᑎᓐᓂᒃ, ᐱᕕᒃᓴᖃᖅᑎᑕᕗᑦ ᑲᔪᓯᑦᓯᐊᕈᑎᒃᓴᖏᓐᓂᒃ ᐃᓄᒃᑐᑦ ᐅᖃᐅᓯᕐᒧᑦ”, ᐅᖃᖅᑐᖅ ᑰᑦᑎᖅ.
“ᐊᑐᐊᒐᖅᑕᖃᓚᐅᕐᒪᑦ ᓄᖑᑎᑦᓯᓇᓱᐊᖅᑐᓂᒃ ᐃᓄᒃᑎᑐᑦ ᐅᖃᐅᓯᕐᒥᒃ. ᐊᑏ ᐅᖃᐅᓯᕗᑦ ᐆᒪᑏᓐᓇᓚᐅᕐᓚᕗᑦ ᐅᑯᑎᒎᓇ, ᐅᖃᓕᒪᖃᑦᑕᓂᒃᑯᑦ, ᐅᖃᓕᒫᖃᑦᑕᓂᒃᑯᑦ ᐊᒻᒪᓗ ᑎᑎᕋᖃᑦᑕᓂᒃᑯᑦ. ᐊᑏ ᐱᓕᕆᐊᒃᓴᕗᑦ ᐱᓕᕆᐊᕆᓚᕗᑦ.” − ᓗᐃᔅ ᕙᓚᐅᕋᑎ, ᐃᓐᕼᐋᐱᑦ ᒦᑎᐊ
ᑲᔪᖏᖅᓴᖅᑕᕗᑦ ᐊᖓᔪᖅᑳᕆᔭᐅᔪᑦ ᕿᑐᕐᖓᓖᑦ ᐸᖅᑭᑦᓯᔩᓪᓗ ᖃᐅᔨᓇᓱᐊᖁᓪᓗᒋᑦ ᐊᖏᕐᕋᒥ−ᐃᓕᓐᓂᐊᓂᕐᒧᑦ ᐃᑲᔪᖅᑕᐅᔾᔪᑎᒃᓴᑲᓐᓂᕐᓂᒃ, ᐅᖃᓕᒫᒐᕐᓂᒃ, ᐊᒻᒪᓗ ᐊᐅᓚᔫᓕᐅᒐᕐᓂᒃ ᑕᑯᔭᒃᓴᓂᒃ ᖃᕆᓴᐅᔭᒃᑯᑦ ᐃᓄᒃᑐᑦ ᐅᖃᐅᓯᕐᒧᑦ ᐃᑲᔫᑎᒃᓴᑦ (https://nti-inhabit.com). ᐊᑐᕋᑦᓴᑦ ᑎᒍᓯᕙᓪᓕᐊᑲᓐᓂᕈᑎᒃᓴᐅᔪᑦ ᐅᖃᖃᑎᖃᖃᑦᑕᓂᕐᒥᒃ ᐊᒻᒪᓗ ᒪᑭᒋᐊᒃᑲᓐᓂᕈᑎᒃᓴᖓᓂᒃ ᐃᓄᒃᑐᑦ ᐊᖏᕐᕋᒥ ᐊᒻᒪᓗ ᐃᓕᓐᓂᐊᕕᒻᒥ ᐊᑦᓱᒻᒪᕆᐊᓗᒃ ᐱᖕᒪᕆᐊᓘᕗᑦ ᐃᓘᓐᓈᒍᑦ ᖃᓄᐃᙱᑦᓯᐊᑲᓐᓂᕈᑎᒃᓴᖏᓐᓄᑦ ᐃᓄᐃᑦ ᓄᑕᖅᑲᑦ.
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐅᕆᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨᒧᑦ ᑐᓴᐅᒪᔾᔪᑎᓕᕆᔨᒃᑯᓐᓂ ᑐᖏᓕᖓ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
ᐱᐊ ᕙᓛᒪᓐᑦ
ᑐᓴᐅᒪᔾᔪᑎᓕᕆᔨᒃᑯᓐᓂ ᑲᒪᔨᒻᒪᕆᒃ
ᐃᓐᕼᐋᐱᑦ ᒦᑎᐊ
ᐅᖄᓚᐅᑖ: (647) 345-3541
