ᓴᒃᑯᑕᐅᑲᐅᑎᒋᔭᕆᐊᓕᒃ

 (ᐊᒃᑑᕝᕙ 10, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᐅᓪᓗᒥ ᐃᑲᔪᖅᑐᐃᓂᕋᐃᖅᑲᐅᕗᑦ ᑲᔪᓯᑎᑕᐅᓂᖓᓂᒃ ᐱᖁᔭᒃᓴᖅ C-77, ᐅᓪᓗᒥ ᓯᕗᓪᓕᖅᐹᒥᒃ ᐅᖃᓕᒫᖅᑕᐅᖅᑲᐅᓪᓗᓂ ᒪᓕᒐᓕᐅᕐᕕᕐᔪᐊᕐᒥ.

ᐱᖁᔭᒃᓴᖅ ᐋᖅᑮᓂᐊᖅᑐᖅ ᓄᑖᕐᒥᒃ ᑭᒡᒐᖅᑐᐃᔨᒥᒃ ᒪᓕᒐᓕᐅᕐᕕᕐᔪᐊᕐᒥ − ᑲᒥᓯᓇ ᐅᓪᓗᒥᐅᔪᖅ ᓄᓇᑖᕐᓂᕐᒧᑦ ᐊᖏᕈᑏᑦ ᐊᑐᓕᖅᑎᑕᐅᓂᖏᖕᓂᒃ. ᑲᒥᓯᓇᐅᑉ ᐱᓕᕆᐊᒃᓴᕆᓂᐊᖅᑖ ᖃᐅᔨᓴᕐᓗᓂ ᖃᓄᖅ ᒪᓕᑦᑕᐅᔭᕆᐊᓖᑦ ᐅᓪᓗᒥᐅᔪᑦ ᓄᓇᑖᕐᓂᕐᒧᑦ ᐊᖏᕈᑏᑦ ᒪᓕᑦᑕᐅᒐᓗᐊᕐᒪᖔᕐᒥᒃ − ᒪᓕᑦᑕᐅᙱᒻᒪᖔᕐᒥᓘᓐᓃᑦ, ᑕᐃᒪᐃᒃᑲᓗᐊᕈᑎᑦ − ᐊᒻᒪᓗ ᐅᓂᒃᑳᓕᐅᖃᑦᑕᕐᓂᐊᖅᑐᑦ ᒪᓕᒐᓕᐅᕐᕕᕐᔪᐊᕐᒧᑦ ᖃᐅᔨᓯᒪᔭᖏᑦ ᐅᖃᐅᓯᕆᓗᓂᒋᑦ. ᒐᕙᒪᒃᑯᑦ ᑭᐅᔭᕆᐊᖃᖃᑦᑕᕐᓂᐊᖅᑐᑦ ᑕᒪᒃᑯᓄᖓ ᖃᐅᔨᓯᒪᔭᕐᒥᓄᑦ ᐊᒻᒪᓗ ᐱᕚᓪᓕᑦᑎᐊᕐᓂᖅᓴᐅᒐᓱᐊᓕᕐᓗᑎᑦ ᖃᓄᐃᓕᐅᕐᓂᕆᕙᑦᑕᖏᖕᓂᒃ.

“ᐊᑐᓕᖅᑎᑦᑎᓂᖅ ᓄᓇᕗᑦ ᐊᖏᕈᑎᖓᓂᒃ ᐱᕐᔪᐊᕌᓘᕗᖅ ᐊᖅᑯᑕᐅᓪᓗᓂ ᖃᐅᔨᒪᑦᑎᐊᖅᑎᑦᑎᒍᑕᐅᓂᐊᕐᓂᖓᓂᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᑦ ᒐᕙᒪᑐᖃᒃᑯᓐᓂ ᐊᒻᒪᓗ ᓄᓇᕗᒻᒥᐅᑕᐅᔪᑦ ᐃᓄᒻᒪᕆᖏᖕᓂᒃ,” ᐅᖃᖅᖢᓂ ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖓᓄᑦ. “ᐊᕐᕌᒎᓯᒪᓕᖅᑐᓄᑦ ᐊᐃᕙᐅᑎᔭᕆᐊᖃᖅᓯᒪᕗᒍᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎ ᐊᑐᓕᖅᑎᑕᐅᒐᓗᐊᕐᒪᖔᖅ ᐱᓇᓱᐊᒐᖃᕈᑎᒋᒋᐊᙵᓚᐅᖅᓯᒪᔭᖏᑦ ᒪᓕᑦᑐᒋᑦ. ᐊᒥᓱᓄᑦ ᐊᕐᕌᒍᓄᑦ ᐋᔩᕋᕈᑎᒋᓯᒪᔭᕗᑦ ᐊᒻᒪᓗ ᐊᑯᓂᐅᔪᒧᑦ ᐃᖅᑲᖅᑐᐃᕕᒻᒨᖅᑎᑦᑎᓯᒪᓪᓗᑕ ᐃᓚᑯᓘᒐᓗᐊᖏᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎ ᐊᑐᓕᖅᑎᑕᐅᒐᓗᐊᕐᒪᖔᕐᒥᒃ,” ᐃᓚᓯᓪᓗᓂ.

ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᖅᓯᒪᔪᑦ ᓄᓇᖃᖅᑳᖅᓯᒪᔪᑦ ᐅᓪᓗᒥᐅᔪᖅ ᐊᖏᕈᑎᓕᐅᖅᓯᒪᔪᓂᒃ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐋᖅᑮᖁᓪᓗᒋᑦ ᐃᓛᒃᑰᖓᔪᒥᒃ ᑎᒥᐅᔪᒥᒃ ᐅᓂᒃᑳᓕᐅᖃᑦᑕᕋᔭᖅᑐᒥᒃ ᑲᓇᑕᒥ ᒪᓕᒐᓕᐅᕐᕕᕐᔪᐊᖓᓄᑦ ᐊᒻᒪᓗ ᐱᓕᕆᐊᒃᓴᓂᒃᑎᑕᐅᓯᒪᓪᓗᑎᑦ ᖃᓄᐃᓕᐅᕐᓂᖃᖃᑦᑕᕐᓂᐊᕋᒥᒃ ᐃᓛᒃᑰᖓᔪᖅ, ᐱᓕᕆᔨᒻᒪᕆᒃ ᕿᒥᕐᕈᓇᓪᓗᓂ ᐅᓪᓗᒥᐅᔪᖅ ᓄᓇᑖᕐᓂᕐᒧᑦ ᐊᖏᕈᑎᒋᓯᒪᔭᑦᑎᓐᓂᒃ.

“ᑎᒥᑖᕋᓱᐊᖅᓯᒪᕗᒍᑦ ᐱᓕᕆᕝᕕᒻᒥᒃ ᐋᖅᑭᒃᑕᐅᓗᓂ ᑕᐃᒪᙵᓂᒃ 2003-ᒥᓂᑦ,” ᐊᖓᔪᖅᑳᖅ ᑰᑦᑎᖅ ᐃᓚᓕᐅᔾᔨᓪᓗᓂ. “ᐱᒻᒪᕆᐅᕗᖅ ᑕᒪᓐᓇ ᐱᕚᓪᓕᖅᓯᒪᔭᖓ ᑲᓇᑕᒥ ᓯᕗᓕᖅᑎᕐᔪᐊᑉ ᒥᓂᔅᑕ ᑐᕉᑐ ᐊᒻᒪᓗ ᒥᓂᔅᑕ ᐊᓇᓐᑕᓴᖓᕇ ᓯᕗᒧᐊᒃᓯᑎᑦᑎᓕᑕᐃᓐᓇᕐᓂᖏᖕᓂᒃ ᓴᖅᑭᖅᑎᑦᑎᓗᑎᒃ ᐊᑐᖅᑕᐅᔭᕆᐊᖃᓪᓚᕆᑦᑐᒥᒃ ᐱᖁᔭᕐᒥᒃ ᒪᓕᒐᓕᐅᕐᕕᕐᔪᐊᕐᒥ, ᓂᕆᐅᑉᐳᒍᑦ ᐊᓯᖏᑦ ᓂᕈᐊᖅᑕᐅᓯᒪᔪᑦ ᑎᒥᐅᔪᑦ ᐃᑲᔪᖅᑐᐃᒐᔭᕐᓂᖏᖕᓂᒃ ᐱᖁᔭᕐᔪᐊᕐᒥᒃ ᐊᒻᒪᓗ ᖃᐅᔨᒪᑦᑎᐊᖅᑎᑦᑎᓗᑎᑦ ᓱᑲᑦᑐᒃᑯᑦ ᐊᑐᕆᐊᓯᑎᑦᑎᒐᔭᕐᓂᖏᖕᓂᒃ. ᑕᒪᓐᓇ ᐱᒻᒪᕆᐅᕗᖅ ᐊᖅᑯᑎ ᐊᖏᖃᑎᒌᒐᓱᐊᓕᕐᓂᕐᒧᑦ ᐃᓱᒪᒋᔪᓐᓇᐃᕐᕕᖃᕐᓗᑕ.”

-30-

ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᑎᓚᐃᓚ ᕌᔅ
ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᔨᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ