ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃ ᐃᑲᔫᑎᒃᓴᓕᕆᔨᒃᑯᑦ ᒪᑐᐃᕐᓯᑲᓐᓂᖅᑐᑦ ᑐᒃᓯᕋᐅᓯᐅᕐᓇᒥᒃ ᐃᓕᓐᓂᐊᖅᑎᓄᑦ

ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ

ᓄᓇᕗᑦ ᑐᓐᖓᕕᒃ ᐃᑲᔫᑎᒃᓴᓕᕆᔨᒃᑯᑦ ᒪᑐᐃᕐᓯᑲᓐᓂᖅᑐᑦ ᑐᒃᓯᕋᐅᓯᐅᕐᓇᒥᒃ ᐃᓕᓐᓂᐊᖅᑎᓄᑦ

(ᓅᕙᐃᒻᕙ 4, 2019 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓴᐅᒪᑦᓯᐊᖁᔨᔪᖅ ᓄᓇᕗᑦ ᑐᓐᖓᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓄᑦ ᑐᒃᓯᕋᐅᑏᑦ ᒪᑐᐃᖓᑎᑕᐅᒃᑲᓂᕐᓂᐊᕐᒪᑕ ᓅᕙᐃᒻᕙ 30, 2019-ᒧᓄᑦ.

“ᖃᐅᔨᒪᓇᓱᐊᕐᓂᒃᑯᑦ ᐅᓄᕐᒪᑕ ᐃᓄᐃᑦ ᐃᓕᓐᓂᐊᖅᑏᑦ ᐃᓕᓐᓂᐊᑲᓐᓂᕕᓐᓂ ᐃᓕᓐᓂᐊᖅᑕᒥᓂᒃ ᐃᓱᓕᑦᓯᓇᓱᐊᖅᑐᑦ ᐊᒻᒪᓗ ᐃᑲᔪᕈᓐᓇᕋᑦᑎᒍ ᓄᓇᕗᑦ ᑐᓐᖓᕕᒃ ᐃᑲᔫᑎᒃᓴᓕᕆᔨᒃᑯᑎᒍ,” ᐅᖃᓚᐅᖅᑐᖅ ᐊᖓᔪᖅᑳᖅ ᑰᑦᑎᖅ.

ᐃᑲᔪᖅᑕᐅᔪᓐᓇᖅᑐᑦ ᐃᓕᓐᓂᐊᖅᑏᑦ ᑐᒃᓯᕋᐅᓯᐅᕈᒪᔪᑦ ᐱᕕᒃᓴᐃᕈᑎᓚᐅᖅᑐᑦ ᐊᕐᕌᒍᑦᑕ ᐱᒋᐊᓕᓵᕐᓂᖓᓂ ᑐᒃᓯᕋᐅᓯᐅᕈᓐᓇᖅᑐᑦ ᐅᑯᓇᓐᖓᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ:

a) $1,000 ᐊᑕᐅᓯᖅ ᑐᓂᔭᐅᓗᓂ, 133 ᐃᓕᓐᓂᐊᖅᑏᑦ ᑐᓂᔭᐅᒍᓐᓇᖅᑐᑦ, ᐃᓕᓴᕆᔭᐅᓯᒪᔪᒥ ᐃᓕᓐᓂᐊᑲᓐᓂᕕᒻᒥ ᐃᓕᓐᓂᐊᖅᑐᑦ ᓴᓇᔭᕆᐅᕐᓴᓂᕐᒥᒃ/ᐃᖅᑲᓇᐃᔭᕆᐅᕐᓴᓂᕐᒥᒃ ᓯᑕᒪᓂᒃ ᐱᓇᓱᐊᕈᓯᕐᓂᒃ ᐊᑯᓂᐅᓂᕐᓴᓘᓐᓃᑦ ᐃᓕᓐᓂᐊᓂᐊᖅᑐᑦ (ᐃᓚᒋᔭᐅᓪᓗᑎᒃ ᓴᓇᔭᕆᐅᕐᓴᓂᕐᒥᒃ ᐃᓕᓐᓂᐊᓂᕐᒧᑦ ᐸᕐᓇᑦᑐᑦ, G.R.E.A.T, ᐊᓯᖏᓪᓗ) ᐊᓐᖑᑎᑎᑦᓯᒋᐊᖅᑐᐃᓘᓐᓃᑦ ᐃᓕᓐᓂᐊᒐᕐᒥᓂᒃ (ᓲᕐᓗ, A.B.E, P.A.S.S., ᐃᓕᓐᓂᐊᕈᑎᒋᓛᖅᑕᒥᓄᑦ ᐃᓯᕈᑎᒃᓴᓕᐅᖅᑐᑦ, ᐊᓯᖏᓪᓗ)
b) $2,500 ᐃᓕᓐᓂᐊᑲᓐᓂᕕᓐᓂ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ, 172 ᐃᓕᓐᓂᐊᖅᑏᑦ ᑐᓂᔭᐅᒍᓐᓇᖅᑐᑦ, ᐊᑎᓕᐅᖅᑕᐅᓯᒪᔪᑦ ᐃᓕᓴᕆᔭᐅᓯᒪᔪᓂ ᓯᓚᑦᑐᓴᕐᕕᓐᓂ ᐃᓕᓐᓂᐊᕕᔾᔪᐊᓂᓘᓐᓃᑦ ᒪᕐᕉᓐᓂᒃ ᐊᕐᕌᒎᓐᓂᒃ ᐊᑯᓂᐅᓂᕐᓴᓘᓐᓃᑦ ᐃᓕᓐᓂᐊᒐᓖᑦ ᐃᓕᓴᕆᔭᐅᔾᔪᑎᒻᒪᕆᑦᑖᕋᓱᐊᖅᑐᑎᒃ ᐅᑉᕙᓘᓐᓃᑦ ᐸᕐᓇᓂᕐᒧᑦ ᐃᓕᓐᓂᐊᖅᑐᑦ ᐃᓕᓴᕆᔭᐅᔾᔪᑎᒻᒪᕆᑦᑖᕋᓱᐊᕐᓂᕐᒧᑦ ᐃᓕᓐᓂᐊᕈᑎᒋᓇᔭᖅᑕᒥᓂᒃ.

ᑐᑭᓯᒋᐊᒃᑲᓂᕐᕕᒃᓴᖅ, ᑕᑯᒋᐊᕋᑦᓴᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓄᑦ ᐊᑐᐊᒐᑦ ᐅᕙᓂ www.tunngavik.com. ᐅᖃᓕᒫᓚᐅᕐᓗᒍ ᑐᑭᓯᑦᓯᐊᕋᓱᐊᕐᓗᒍ ᑐᒃᓯᕋᐅᓯᐅᕐᓂᕐᒧᑦ ᑕᑕᑎᒐᑦᓴᖅ ᐊᒻᒪᓗ ᐊᑐᐊᕐᓯᔾᔪᑎ ᐊᒻᒪᓗ ᐃᓚᓕᐅᑎᓯᒪᒋᐊᓕᓕᒫᑦ ᐃᓚᓕᐅᑎᓯᒪᔭᐃᓐᓇᕆᓗᒋᑦ ᑐᓴᐅᒪᔾᔪᑕᐅᒋᐊᓖᑦ, ᐃᓚᒋᔭᐅᓗᓂ ᓄᓇᕗᒻᒥ ᐃᓄᐃᑦ ᐊᑎᖃᖃᑕᐅᔪᑦ ᓈᓴᐅᑖ, ᓇᓗᓇᐃᒃᑯᑕᖅ ᓱᖅᑯᐃᒪᒍᑎᒃᓴᖅ ᐊᒻᒪᓗ ᓱᖅᑯᐃᒪᒍᑎᒃᓴᖅ ᐃᓕᓐᓂᐊᕆᐊᖃᑦᑕᕆᐊᑦᓴᕕᑦ.

ᐱᓕᕆᐊᒧᑦ ᑐᓴᐅᒪᑎᑦᓯᒍᑎ ᐊᒻᒪᓗ ᑐᒃᓯᕋᐅᑏᑦ ᑕᑕᑎᕆᐊᓖᑦ ᐱᔭᑦᓴᐅᒻᒥᔪᑦ ᓄᓇᓕᓐᓂ ᑐᖅᑲᑕᕐᕕᓯᓐᓂᒃ (ᓄᓇᕗᒻᒥ ᓄᓇᓕᓕᒫᓂ) ᐊᒻᒪᓗ ᑐᓐᖓᕕᒃᑯᑦ ᐊᓪᓚᑉᕕᖏᑕ ᓇᓕᑐᐃᓐᓇᖏᓐᓂᒃ ᐃᖃᓗᑦᑑᑦᑎᐊ, ᑲᖏᕐᖠᓂᖅ ᐅᑉᕙᓘᓐᓃᑦ ᐃᖃᓗᐃᑦ. ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓄᑦ ᑐᒃᓯᕋᐅᑏᑦ ᐊᐅᓪᓚᖅᑎᑕᐅᒍᓐᓇᖅᑐᑦ ᑎᑎᖅᑲᓂᐊᕐᕕᒃᑯᑦ, ᐃᕐᖐᓐᓈᕈᑎᒃᑯᑦ, ᓱᒃᑲᔪᒃᑯᑦ ᐅᑉᕙᓘᓐᓃᑦ ᑐᓂᔭᖅᑐᕐᓗᒋᑦ ᓇᖕᒥᓂᖅ ᑖᒃᑯᓄᖓ ᓇᓗᓇᐃᖅᑕᐅᓯᒪᔪᓄᑦ ᑐᓂᔭᖅᑐᕐᓗᒋᑦ ᑐᖔᓂ ᓅᕙᐃᒻᕙ 30 @ ᓯᕿᓐᖑᔭᖅ/ ᖃᐅᔨᓴᐅᑦ 5-ᒧᓄᑦ ᐅᓐᓄᓴᒃᑯᑦ CT ᖃᐅᔨᓴᐅᑖᒍᑦ.

ᐊᐅᔭᖓᓂ 2019 ᓴᖅᑭᐅᒪᑎᑕᐅᓚᐅᖅᑎᓪᓗᒍ ᑐᒃᓯᕋᐅᓯᐅᕐᕕᒃᓴᖅ, 143 ᐃᓕᓐᓂᐊᑲᓐᓂᖅᑐᑦ ᐃᑲᔪᖅᑕᐅᓚᐅᖅᑐᑦ ᑐᓂᔭᐅᓪᓗᑎᒃ ᓄᓇᕗᑦ ᑐᓐᖓᕕᒃ ᐃᑲᔫᑎᒃᓴᓕᕆᔨᒃᑯᓐᓂᒃ (NTF) ᐃᓄᓐᓄᑦ ᐃᓕᓐᓂᐊᖅᑎᓄᑦ ᐊᑎᖃᖃᑕᐅᔪᓄᑦ ᓄᓇᕗᒻᒥ ᐊᖏᕈᑎᓂ ᐃᑲᔫᑎᒃᓴᓂᒃ ᐃᓕᓐᓂᐊᒐᖏᓐᓄᑦ. NTF ᓴᖅᑭᖅᑕᐅᓚᐅᖅᑐᑦ ᑐᓐᖓᕕᒃᑯᓐᓂᒃ ᐊᐅᓚᑦᓯᖁᓪᓗᒋᑦ ᐊᒥᐊᒃᑯᓂᒃ ᑮᓇᐅᔭᓕᑕᐅᒍᑕᐅᓚᐅᖅᑐᓂᒃ ᐃᓕᓐᓂᐊᕆᐊᖃᑦᑕᓚᐅᖅᑐᓄᑦ ᐃᓕᓐᓂᐊᕆᐊᖃᑦᑕᓚᐅᖅᑐᑦ ᑮᓇᐅᔭᓕᑕᐅᒍᑎᖏᓐᓄᑦ ᐊᖏᖃᑎᒌᒍᑎᒃᑯᑦ.

ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:

ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ: 1-888-646-0006

www.tunngavik.com

ᓗᐃᔅ ᓱᓗᒃ−ᓛᒃ
ᐱᓕᕆᐊᒃᓴᓕᕆᔨ
ᓄᓇᕗᑦ ᑐᓐᖓᕕᒃ ᐃᑲᔫᑎᒃᓴᓕᕆᔨᒃᑯᑦ
ᑎᑎᖅᑲᖃᐅᑖ 280 ᑲᖏᕐᖠᓂᖅ, ᓄᓇᕗᑦ X0C 0G0
ᐅᖃᓚᐅᑖ: (867)-645-5400 ᐊᑭᖃᓐᖏᑦᑐᖅ: 1-888-236-5400
ᓱᒃᑲᔪᒃᑯᑦ: (867-645-5414

Download (PDF, 152KB)

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: