ᓴᒃᑯᑕᐅᑲᐅᑎᒋᔭᕆᐊᓕᒃ
(ᔪᓚᐃ 23, 2024, ᐃᖃᓄᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ (NTI) ᐊᖓᔪᖅᑳᖓ ᐊᓗᑭ ᑰᑦᑎᖅ ᖁᕕᐊᓱᑦᑐᖅ ᑐᓴᖅᑎᑦᑎᔭᕆᐊᒃᓴᖅ ᐱᓇᓱᐊᕈᓐᓇᖅᓯᒻᒪᑕ ᐃᓄᐃᑦ ᐃᓕᓐᓂᐊᕐᓂᕐᒧᑦ ᑮᓇᐅᔭᓂᑦ ᐃᑲᔫᑎᒃᓴᓂᑦ ᓄᓇᕗᑦ ᑐᙵᕕᒃ ᑎᒥᖓᑕ ᐃᑲᔫᑎᒃᓴᓕᕆᔨᒃᑯᑦ ᐃᓕᓐᓂᐊᖅᑎᓄᑦ ᑮᓇᐅᔭᓂᑦ ᐃᑲᔫᓯᐊᖅᑖᖁᓪᓗᒍᑦ ᑕᒪᒃᑯᐊ ᐱᓇᓲᑏᑦ ᐱᔭᐅᔪᓐᓇᕐᓂᐊᕐᒪᑕ ᑐᙵᕕᒃᑯᓐᓄᑦ ᔪᓚᐃ 23, 2024, ᑎᑭᓪᓗᒍ ᐋᒡᒌᓯ 31st, 2024, ᓯᕿᙳᔭᖅ 5:00 ᐅᓐᓄᓴᒃᑯᑦ ᐃᖃᓗᐃᑦ ᓯᕿᙳᔭᖓ ᒪᓕᓪᓗᒍ ᐃᓱᓕᕝᕕᖃᕐᓂᐊᖅᑐᓂ.
ᓄᓇᕗᑦ ᑐᙵᕕᒃ ᑎᒥᖓᑕ ᐃᑲᔫᑎᒃᓴᓕᕆᔨᒃᑯᑦ ᒪᕐᕉᓐᓂᒃ ᐃᓕᓐᓂᐊᖅᑐᓄᑦ ᑮᓇᐅᔭᕐᓂᑦ ᐃᑲᔫᓯᐊᒃᓴᓂᑦ ᐱᓕᕆᐊᖃᕐᒪᑦ:
1. ᐊᔪᕈᓐᓃᖅᓴᕐᓂᕐᒧᑦ ᐊᒻᒪᓗ ᐃᖅᑲᓇᐃᔮᕐᓄᑦ ᓯᕗᒧᐊᒃᑲᓐᓂᕋᓱᐊᖅᑐᓄᑦ: $1,500 ᐊᑕᐅᓯᐊᕐᓗᓂ ᐃᓕᓐᓂᐊᖅᑎᑦ ᐱᔪᓐᓇᖅᑐᖅ ᐃᓕᓐᓂᐊᕆᐊᖅᓯᒪᒍᓂ ᐃᓕᓴᕆᔭᐅᓯᒪᔪᒥᒃ ᐃᓕᓐᓂᐊᕋᒃᓴᒥᒃ ᑐᕌᖓᔪᑦ ᓴᓇᔪᓕᕆᓂᕐᒧᑦ/ᐃᖅᑲᓇᐃᔮᕐᒧᑦ ᐊᔪᕈᓐᓃᖅᓴᒃᑲᓐᓂᕐᓂᕐᒧᑦ ᑎᓴᒪᑦ ᐱᓇᓱᐊᕈᓰᑦ ᐊᑯᓂᐅᑎᒋᔪᒧᑦ ᐊᑯᓂᐅᓂᖃᕐᓗᒍ ᐊᑯᓂᐅᓂᖅᓴᕐᓘᓐᓃᑦ (ᐱᖃᓯᐅᑎᔪᑦ ᓴᓇᔪᓕᕆᔨᐅᒋᐅᖅᓴᓂᕐᒧᑦ ᐃᓕᓐᓂᐊᖅᑐᑦ, ᐃᓄᖕᓄᑦ ᐃᑲᔪᖅᑕᐅᔭᕆᐊᓕᖕᓄᑦ ᐃᖅᑲᓇᐃᔭᖅᑏᑦ ᐱᓕᕆᐊᖓᓄᑦ (PSW) ᐊᓯᖏᓪᓗ), ᐊᒻᒪᓗ ᖁᑦᑎᓐᓂᖅᓴᒧᑦ ᐃᓕᓐᓂᐊᕐᓂᕐᒥᒃ (A.B.E., P.A.S.S., ᓯᓚᑦᑐᓴᕐᕕᒻᒥ ᐃᓕᓐᓂᐊᕆᐅᖅᓴᓂᕐᒧᑦ ᐊᕐᕌᒍ, ᐊᓯᖏᓪᓗ).
2. ᓯᓚᑦᑐᖅᓴᕐᕕᒻᒥ ᐃᓕᓐᓂᐊᕐᓂᕐᒧᑦ: $2,500 ᐊᑕᐅᓯᕐᒧᑦ ᐃᓕᓐᓂᐊᖅᑎᒧᑦ, ᐊᑎᓕᐅᖅᓯᒪᓗᓂ ᐃᓕᓴᕆᔭᐅᓯᒪᔪᒥᒃ ᓯᓚᑦᑐᖅᓴᕐᕕᒻᒥ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᕐᔪᐊᕐᒥ ᐃᓕᓐᓂᐊᕐᕕᖓᓂ ᒪᕐᕉᓐᓄᒃ ᐊᕐᕌᒎᓐᓄᒃ ᐅᖓᑖᓄᓪᓘᓐᓃᑦ ᐊᑯᓂᐅᓂᖃᖅᑐᒥᒃ ᓇᓗᓇᐃᒃᑯᑕᖅᑖᕐᓇᖅᑐᒥᒃ ᐃᓕᓐᓂᐊᕐᓗᓂ ᐅᕝᕙᓘᓐᓃᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᓂᕐᒧᑦ ᐅᐸᓗᖓᐃᔭᕐᓂᕐᒥᒃ ᓇᓗᓇᐃᒃᑯᑕᖅᑖᓛᑐᐃᓐᓇᕐᓗᓂ ᐃᓕᓐᓂᐊᕇᕈᓂ ᓯᓚᑦᑐᖅᓴᕐᕕᒻᒥ ᓯᓚᑦᑐᖅᓴᕐᕕᕐᔪᐊᕐᒥᓘᓐᓂᑦ.
ᓈᑎᕆᐊᓖᑦ ᐱᓇᓲᑏᑦ ᐊᑐᐃᓐᓇᐅᒪᔪᑦ ᐅᕙᓂ www.tunngavik.com ᐊᒻᒪᓗ ᐊᐅᓪᓚᖅᑎᑕᐅᔪᓐᓇᖅᑐᑦ ᑎᑎᖅᑲᓂᐊᕐᕕᒃᑯᑎᒍᑦ, ᖃᕋᓴᐅᔭᒃᑯᑦ, ᐃᓄᒃᑎᒍᓪᓘᓐᓃᑦ ᐋᑕᐅᓗᑎᑦ, ᐅᕝᕙᓘᓐᓃᑦ ᓄᓇᓕᓐᓂ ᑐᓴᐅᒪᑎᑦᑎᔪᓕᕆᔨᒧᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
