ᓴᒃᑯᑕᐅᑲᐅᑎᒋᔭᕆᐊᓕᒃ
(ᓅᕖᕝᕙ 20, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᖅ ᔨᐅᓚᒥ ᑑᕐᖔᓗᒃ ᐅᐱᒍᓱᑉᐳᖅ ᔮᓐ ᒪᐃᓐᒥᒃ ᓂᕈᐊᖅᑕᐅᕋᑖᕐᓂᖓᓄᑦ ᓄᓇᕗᒥ ᓯᕗᓕᖅᑎᖓᓄᑦ ᑖᒃᑯᓄᖓᓗ ᐃᓚᒋᔭᐅᔪᑦ ᓂᕈᐊᖅᑕᐅᔪᑦ ᐱᔨᑦᑎᕐᓂᐊᖅᑐᓪᓗ ᓯᕗᓕᖅᑏᑦ ᑲᑎᒪᔨᖏᑦ.
“ᖃᐅᔨᒪᓯᒪᔭᕋ ᓄᓇᕗᒻᒥ ᓯᕗᓕᖅᑎ ᒪᐃᓐ, ᐃᓅᖃᑎᒌᓐᓂᒃᑯᑦ ᐃᖅᑲᓇᐃᔭᖃᑎᒋᓐᓂᒃᑯᓪᓗ, ᐅᑭᐅᓄᑦ ᐊᒥᓱᑦᓄ, ᐃᑉᐱᒋᑦᑎᐊᖅᐸᕋᓗ ᐱᓕᕆᖃᑎᒋᓪᓗᒍ ᑐᑭᓯᐊᓂᖓᓄᓪᓗ ᐃᓄᑦᑎᑐᑦ ᐱᒻᒪᕆᐅᓂᖓᓂᒃ,” ᐅᖃᖅᑐᖅ ᐊᖏᔪᖅᑳᖅ ᑑᕐᖔᓗᒃ. “ᑕᕝᕙᓂᒃᓴᐃᓐᓇᖅ, ᐃᑉᐱᒋᒃᓯᐊᖅᑐᒋᓪᓗ ᐃᓱᒪᓕᐅᕐᖓᑕ ᓂᕈᐊᖅᑐᑎᒃ ᐃᓚᒋᔭᐅᔪᑦ ᒪᓕᒐᓕᐅᕐᕕᔾᔪᐊᕐᒥ, ᐅᒡᒍᐊᕋᓗᐊᖅᐳᒍᑦ ᓄᓇᕗᑦ ᐃᓄᒻᒥᒃ ᓯᕗᓕᖅᑎᖃᕈᓐᓃᕐᓂᖓᓂᒃ ᖁᑦᑎᓂᖅᐹᒥᒃ ᐃᓱᒪᓕᐅᖅᑎᐅᓂᐊᖅᑐᓂᒃ ᑕᕝᕙ ᑲᓇᑕᒥ ᐱᖃᓯᐅᑎᓪᓗᒍᓗ ᑲᓇᑕᐅᑉ ᐊᖏᔪᖅᑳᒻᒪᕆᖓᓂᒃ, ᓯᕗᓕᖅᑏᑦ ᒥᓂᔅᑕᐃᑦ ᑲᑎᒪᓂᖏᓐᓂᑦ ᐅᕝᕙᓘᓐᓃᑦ ᑲᓇᑕᒥ ᑲᑐᔾᔨᖃᑎᒌᑦ ᑲᑎᒪᔨᖏᓐᓂᑦ. ᐱᕕᑖᖅᐳᒍᑦ ᖃᓄᖅᑑᕈᑎᖃᕈᓐᓇᖅᓯᒐᑦᑕ ᓴᙵᑦᑎᖅᐹᕐᓕᕐᓗᒍᓗ ᐱᓕᕆᖃᑎᒌᓐᓂᕗᑦ ᑲᔪᓯᑎᑕᐅᖁᓪᓗᒍ ᐃᓄᐃᑦ ᐃᓚᐅᑎᑕᐅᓂᖏᓐᓂᑦ ᐃᓱᒪᓕᐅᕐᓂᕐᒥᒃ ᐃᓅᓯᑦᑎᓐᓂᑦ ᓯᕗᓂᒃᓴᑎᓐᓂᓪᓗ.”
ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᑕ ᐊᑖᓂᑦ ᐃᓄᓐᓂᒃ ᒪᑭᑉᐸᓪᓕᐊᑎᑦᑎᓂᖅ ᑎᓴᒪᓄᑦ ᐅᑭᐅᓄᑦ ᖃᓄᖅᑑᕈᑎᓄᑦ ᓯᕗᓪᓕᐅᔾᔭᐅᓂᐊᖅᑐᑦ, ᐃᓄᑦᑎᑐᑦ ᐃᓕᓴᕆᔭᐅᒻᒪᑦ ᑐᙵᕕᒋᔭᐅᓪᓗᓂ ᐃᓄᐃᑦ ᑭᓇᐅᓂᖏᓐᓂᒃ, ᓯᕗᓕᕐᓂᖅ, ᓇᒻᒥᓂᖃᖃᑕᐅᓂᕐᓗ. ᓄᓇᕗᑦ ᑐᙵᕕᒃᑯᑦ ᑲᔪᓯᕗᑦ ᑲᔪᖏᖅᓴᐃᓪᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ ᑲᔪᓯᑎᑕᐅᒐᓗᐊᕐᒪᖔᑦ ᐃᓄᐃᑦ ᓄᑕᕋᐃᑦ ᐃᓕᓐᓂᐊᕐᓂᐊᕐᒪᑕ ᐃᓄᑦᑎᑐᑦ ᐱᒋᐊᕐᓗᒍ ᓱᕈᓯᓛᓕᕆᓂᕐᒥᒃ ᑎᑭᓪᓗᒍ ᐃᓕᓐᓂᐊᕐᕕᖕᒥ ᐱᔭᕇᕐᓂᕐᒥᒃ, ᐱᓕᕆᕝᕕᐅᔪᓪᓗ ᓯᕗᓕᖅᑎᐅᔪᓪᓗ ᐱᓕᕆᐊᖏᑦ ᑭᒃᑯᑐᐃᓐᓇᕐᓄᑦ ᐱᔨᑦᑎᕐᓂᐅᔪᑦ ᑕᑯᒃᓴᐅᑎᑦᑎᖁᓪᓗᒋᑦ ᐃᓄᐃᑦ ᐅᖃᐅᓯᖓᓐᓂᒃ ᐃᓕᖅᑯᓯᖓᓂᓪᓗ. ᓄᓇᕗᒥ ᓯᕗᓕᖅᑎ ᒪᐃᓐ ᐅᖃᖅᑲᐅᒻᒪᑦ ᓇᒻᒥᓂᖅ ᐃᑲᔫᑎᖃᖅᓯᒪᓂᖓᓂᒃ ᐃᓄᑦᑎᑐᑦ ᐃᓕᓐᓂᐊᕐᕕᖕᒥ.
ᓯᕗᓪᓕᐅᑎᓗᐊᖁᔭᐅᔪᖅ ᓄᓇᕗᑦ ᑐᙵᕕᒃ ᑎᒥᖓᓄᑦ ᑕᒪᐃᓐᓂ ᐊᑐᓕᖅᑎᑕᐅᓗᓂ ᐊᕕᑦᑐᖅᓯᒪᓂᖓ 23 ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᒥ, ᑭᒡᒐᖅᑐᐃᔨᖃᕆᐊᓖᑦ ᐃᓄᓐᓂᒃ ᐃᖅᑲᓇᐃᔭᖅᑎᖏᑦ ᓄᓇᕗᑦ ᒐᕙᒪᖓᓂ ᒪᓕᓪᓗᒋᑦ ᐊᒥᓲᓂᖏᑦ ᐃᓄᐃᑦ ᐱᔨᑦᑎᖅᑕᐅᓲᑦ ᐃᖅᑲᓇᐃᔭᖅᑎᒋᔭᐅᓗᑎᑦ ᑕᒪᐃᓐᓂ ᖁᑦᑎᓐᓂᓕᓕᒫᓖᑦ. ᓯᕗᒧᐊᑦᑎᓪᓗᒍ ᐊᕕᑦᑐᖅᓯᒪᓂᖓ 23 ᐱᕐᔪᐊᕌᓘᒻᒪᑦ ᖃᐅᔨᒪᓇᑦᑎᐊᖅᑎᑦᑎᒍᑕᐅᓪᓗᓂ ᐃᓄᐃᑦ ᓯᕗᓕᖅᑎᐅᓂᐊᕐᒪᑕ, ᐅᖃᐅᓯᖅ ᐊᑐᖅᑕᐅᖃᑦᑕᕐᓗᓂ, ᐊᒻᒪᓗ ᐃᓕᖅᑯᓯᖅ ᑕᑯᒃᓴᐅᑎᑕᐅᓗᓂ ᐊᒻᒪᓗ ᐊᔭᐅᕆᓂᖃᖃᑦᑕᕐᓗᓂ ᐱᔨᑦᑎᕋᖅᑐᓂᒃ ᐃᓄᓕᒫᕐᓂᒃ ᐊᒻᒪᓗ ᑕᒪᐃᓐᓂ ᐃᓱᒪᓕᐅᕐᓂᖃᖅᐸᑦᑐᓂᒃ ᐃᖅᑲᓇᐃᔮᓕᓐᓂᒃ.
ᐊᑐᓕᖅᑎᑕᐅᓚᐅᖅᑐᖅ ᑲᑐᔾᔨᖃᑎᒌᓐᓂᖅ ᐊᖏᖃᑎᒌᓐᓂᒃᑯᑦ ᒪᓕᑦᑕᐅᕙᓪᓕᐊᔪᖅ, ᐱᓕᕆᖃᑎᖃᕐᓗᑎᒃ ᓄᓇᕗᑦ ᑐᙵᕕᒃᑯᓐᓂᑦ ᓄᓇᕗᑦ ᒐᕙᒪᒃᑯᓐᓂᓪᓗ ᓴᙵᑦᑎᑦᑎᑲᓐᓂᖅᓯᒪᕗᖅ ᐊᕐᕌᒍᓂᑦ ᒫᓐᓇᐅᔪᒃᑯᑦ ᐊᓂᒍᖅᓯᒪᔪᑦ. ᓄᓇᕗᑦ ᑐᙵᕕᒃᑯᑦ ᑐᒃᓯᕋᖅᐳᑦ ᓄᑖᒥᒃ ᒐᕙᒪᑦᑎᓐᓂᒃ ᐃᑉᐱᒍᓱᑦᓯᐊᖁᓪᓗᒋᑦ ᑖᒃᓱᒥᖓ ᑐᓂᕐᕈᑎᒋᓯᒪᓂᖏᓐᓂᒃ ᑲᑎᒪᖃᑎᒋᓗᒋᑦ ᐱᔪᓐᓇᖅᓯᑐᐊᕈᑎᒃ ᐅᖃᖃᑎᒌᖁᓪᓗᒋᑦ ᑲᑐᔾᔨᖃᑎᒌᓐᓂᕆᔭᖏᑦ ᓯᕗᓪᓕᐅᑎᑕᐅᔪᑦ ᐃᓄᐃᑦ ᐃᓅᓯᖃᑦᓯᐊᖁᓪᓗᒋᑦ, ᑲᒪᒋᔭᖃᕐᓗᓂ ᐃᓪᓗᓕᕆᓂᕐᒥᒃ ᐱᖁᑎᕐᔪᐊᓂᓪᓗ ᐱᔭᕆᐊᖃᓪᓚᕆᑦᑐᓂᒃ, ᓂᕆᔭᒃᓴᖃᑦᓯᐊᓂᕐᒥᒃ, ᐃᓱᒪᒃᑯᑦ ᖃᓂᒪᖃᕐᓇᖏᑦᑐᓕᕆᓂᕐᒥᒃ, ᐃᓄᑦᑎᑐᑦ ᐆᒻᒪᕆᐊᖅᑎᑦᑎᑲᓐᓂᓂᕐᒥᒃ, ᐃᓗᐃᑦᑑᓗᒍ ᐊᑐᓕᖅᑎᑕᐅᓂᖓᓂᑦ ᓄᓇᕗᒥ ᐊᖏᕈᑎᖓᒍᑦ.
“ᓄᓇᕗᑦ ᑐᙵᕕᒃᑯᑦ ᐊᑐᐃᓐᓇᐅᕗᑦ ᐱᓕᕆᖃᑎᖃᑦᓯᐊᓂᐊᕐᒪᑎᒃ ᐋᖅᑭᑦᑎᐊᖅᓯᒪᓗᑎᓪᓗ ᓯᕗᓕᖅᑎ ᒪᐃᓐᒥᒃ ᐊᐅᓚᑦᑎᔩᓪᓗ ᑲᑎᒪᔨᖏᓐᓂᒃ,” ᐅᖃᖅᑐᖅ ᐊᖏᔪᖅᑳᖅ ᑐᖏᓕᖓᑦ ᐹᓪ ᐃᕐᖓᐅᑦ. “ᐊᑕᐅᑦᑎᒃᑯᑦ, ᓄᓇᕗᓕᐅᕈᓐᓇᕋᑦᑕ ᑕᒪᓐᓇ ᐃᓄᐃᑦ ᐅᖃᐅᓯᖓᑦ, ᓯᕗᓕᖅᑎᐅᓂᖏᑦ, ᐊᒻᒪᓗ ᐱᔪᓐᓇᐅᑎᖏᑦ ᑕᑯᒃᓴᐅᑎᑕᐅᒻᒪᑕ ᓇᓂᓕᒫᖅ ᒐᕙᒪᐅᑉ ᐃᓗᐊᓂ, ᓄᑕᕋᕗᑦ ᐃᕐᖑᑕᕗᓪᓗ ᐱᕈᖅᓴᖁᓪᓗᒋᑦ ᐊᕙᓗᔭᐅᓯᒪᓗᑎᒃ ᐃᓄᑦᑐᑦ ᓴᙱᓂᖓᓄᑦ.”
-30-
ᐱᕙᓪᓕᐊᔪᓕᕆᓂᕐᒧᑦ ᖃᐅᔨᒋᐊᕐᕕᒃᓴᖅ:
ᐃᕙᓗᐊᕐᔪᑦ ᒥᐅᕆᑦ
ᑐᑭᒧᐊᑦᑎᑦᓯᔨ ᑐᓴᐅᒪᖃᑎᒌᓐᓂᕐᒧᑦ
ᓄᓇᕗᑦ ᑐᙵᕕᒃᑯᓐᓂᑦ
