ᓴᒃᑯᑕᐅᑲᐅᑎᒋᔭᕆᐊᓕᒃ
(ᔫᓂ 27, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᐊᖏᕈᑎᖃᑦᑎᐊᖅᑐᑦ ᑲᕆᒪ ᒪᓐᔨᑉ 36 ᑕᖅᑭᓄᑦ ᑎᒍᔭᐅᒪᓂᕆᓂᐊᖅᑕᖓᓂᒃ, ᑎᒍᔭᐅᒪᓗᓂ ᒐᕙᒪᑐᖃᒃᑯᑦ ᐃᑲᔪᖅᑕᐃᕝᕕᖓᓂ, ᐃᓅᓂᕋᐃᔪᒥᓂᐅᓂᖓᓄᑦ ᐱᕋᔭᒃᑐᓂ ᐃᓱᒪᓕᐅᖅᑐᒥᓂᐅᓪᓗᓂ ᐃᖅᑲᖅᑐᐃᔨ ᒥᐊ ᒪᓄᑦᓯᐅ ᐅᓪᓗᒥ ᓄᓇᕗᑦ ᐃᖅᑲᖅᑐᐃᕕᖓᓂ.
“ᐃᖅᑲᖅᑐᐃᔨᒃᑯᑦ ᓴᙱᔪᒥᒃ ᖃᐅᔨᒪᑎᑦᑎᒍᒪᒻᒪᑕ ᑲᕆᒪ ᒪᓐᔨᑉ ᐃᖅᑲᖅᑐᐃᔨᒧᑦ ᐃᓱᒪᓕᐊᖑᓂᖓᑎᒍᑦ ᐅᓪᓗᒥ, ᓄᓇᖃᖅᑳᑑᓂᕋᖅᑐᑦ ᓴᒡᓗᓪᓗᑎᑦ ᐱᕐᔪᐊᕋᓘᒻᒪᑦ ᐱᕐᔪᐊᕌᓗᒻᒥᓪᓗ ᖃᓄᐃᓕᔭᐅᔭᕆᐊᖃᖅᑐᑎᑦ,” ᐅᖃᖅᑐᓂ ᐊᓗᑭ ᑰᑦᑎᖅ. “ᐃᖅᑲᖅᑐᐃᔨ ᒪᓄᑦᓯᐅ ᐊᑐᖅᑕᐅᖃᑦᑕᕐᓂᐊᖅᑐᒥᒃ ᖃᓄᐃᓕᒋᐊᖅᓯᔪᒥᓂᐅᕗᖅ ᐃᓱᒪᓕᐊᒥᓂᖓᑎᒍᑦ ᐅᓪᓗᒥ, ᓱᖅᑯᐃᓇᖅᑐᒥᒃ ᐱᕋᔭᒍᒪᒐᔭᖅᑐᑦ ᓄᓇᖃᖅᑳᕐᓂᕋᖅᑐᑎᑦ ᐊᓴᔭᑐᐃᓐᓇᕐᓂᐊᙱᒻᒪᑕ. ᐅᖃᖅᑐᓂ ᐱᕋᔭᒃᑕᒥᓂᓪᓚᕆᐅᕗᓪᓕ ᐃᓄᐃᑦ ᓄᓇᕗᒻᒥᐅᑦ, ᓄᓇᕗᑦ ᑐᙵᕕᒃ ᑎᒥᖓ ᑭᒡᒐᖅᑐᐃᔨᐅᓪᓗᓂ ᑲᑐᔾᔨᖃᑎᒌᖑᔪᖅ. ᓄᓇᕗᑦ ᑐᙵᕕᒃ ᑎᒥᖓ ᐊᖏᕈᑎᖃᒃᑲᓐᓂᕈᓐᓇᙱᓚᑦ ᑕᒪᔅᓱᒥᖓ, ᐊᒻᒪᓗ ᓂᕆᐅᑉᐳᒍᑦ ᑕᒪᓐᓇ ᐃᖅᑲᖅᑐᐃᔨᒧᑦ ᐃᓱᒪᓕᐊᒥᓂᐅᔪᖅ ᓴᙱᔪᒃᑯᑦ ᓄᖅᑲᖓᒍᑎᒋᔭᐅᓂᐊᕋᒥ ᓯᕗᓂᒃᓴᒥ ᓄᓇᖃᖅᑳᖅᑑᓂᕋᖅᑐᑦ ᐱᕋᔭᓪᓗᑎᑦ.”
ᑖᓐᓇ ᓯᕗᓪᓕᖅᐹᖑᕗᖅ ᐊᑎᓕᐅᖅᑐᒥᓂᐅᔪᖅ ᐃᓅᓂᕋᐃᓪᓗᓂ ᐱᕋᔭᒃᑐᓂ ᓄᓇᕗᒻᒥ. ᓯᕗᓪᓕᖅᐹᖑᓪᓗᓂᓗ ᐱᕋᔭᒃᑐᒥᓂᖅ ᑎᒍᔭᐅᒪᓂᐊᕐᓂᖓᓂᒃ ᐱᕋᔭᒃᑐᒥᓂᐅᓂᖓᓄᑦ ᓄᓇᕗᒻᒥ. ᐱᖓᓱᓄᑦ ᐊᕐᕌᒍᓄᑦ ᐊᑯᓂᐅᑎᒋᔪᖅ ᖄᖓᒍᒃᑲᓐᓂᖅ, ᑲᕆᒪ ᒪᓐᔨ ᐊᑭᓖᒋᐊᖃᓕᖅᑎᑕᒥᓂᐅᕗᖅ ᐊᒥᐊᒃᑯᖏᑦ ᑲᑭᕙᒃ ᑲᑐᔾᔨᖃᑎᒌᖏᖕᓄᑦ ᐃᒪᓐᓇᓂᒃ $28,254.05.
ᑲᕆᒪ ᒪᓐᔨᑉ ᐱᕋᔭᓐᓂᑯᒥᓂᖓ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᑐᓕᖅᑎᑦᑎᓂᖃᖅᓯᒪᔫᒐᓗᐊᖅ ᖄᖓᒍᒃᑲᓐᓂᖅ ᓴᐳᒻᒥᐅᓯᒍᑎᓂᑦ ᐊᑎᓕᐅᖅᑐᖃᖅᑎᓪᓗᒍ ᐊᐅᓚᓂᖓᓂᒃ ᒪᓕᑦᑐᒍ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓂᒃ, ᓇᓗᖅᑯᑎᙱᑦᑎᐊᑎᐳᒍᑦ ᓄᓇᓕᒻᒥ ᐊᑎᓕᐅᖅᑐᓄᑦ ᑲᑎᒪᔨᕋᓛᑦ ᖃᐅᔨᒪᓂᖏᑦ ᓇᒻᒥᓂᖅ ᓄᓇᓕᖏᖕᓂ, ᐃᓚᒌᑦᑎᐊᖅᑐᑯᓘᖃᑦᑕᕐᓂᖏᖕᓄᑦ ᐃᓄᐃᑦ ᓄᓇᓕᖏᑦ ᐃᓅᓂᕋᕋᓱᐊᕋᔭᖅᑐᑦ ᓯᕗᓂᒃᓴᒥ ᓄᖅᑲᖓᑎᑕᐅᒐᔭᖃᕐᒪᑕ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
