ᓴᒃᑯᑕᐅᑲᐅᑎᒋᔭᕆᐊᓕᒃ
(ᐋᒡᒌᓯ 27, 2025 – ᑭᓐᖓᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᓄᓇᕗᑦ ᑐᙵᕕᒃ ᑎᒥᖓ ᑐᙵᓱᐊᑎᑦᑎᔪᑦ ᑲᔪᓯᑎᑕᐅᓂᖓᓂᒃ ᐱᖁᔭᒃᓴᖅ C-5, ᐊᑕᐅᓯᖅ ᑲᓇᑕᒥ ᐱᕙᓪᓕᐊᔪᓕᕆᓂᖅ ᐱᖁᔭᖅ, ᐊᒻᒪᓗ ᐋᖅᑮᓯᒪᔪᑦ ᓱᖅᑯᐃᓐᓇᖅᑎᐊᖅᑐᑯᓗᓐᓂᒃ ᖃᓄᐃᓕᐅᕈᑎᒋᔭᐅᔭᕆᐊᓕᖕᓂᒃ ᖃᐅᔨᒪᓇᑦᑎᐊᖁᓪᓗᒍ ᐱᖁᔭᖅ ᐱᓪᓚᑦᑖᓂᒃ ᓴᖅᑮᑎᑦᑎᓂᐊᕐᒪᑦ ᓄᓇᕗᒻᒥ ᐃᑉᐱᒋᔭᐅᑦᑎᐊᖅᓯᓐᓈᕐᓗᑎᑦ ᐃᓄᒻᒪᕇᑦ ᐱᔪᓐᓇᐅᑎᖏᑦ ᐊᒻᒪᓗ ᐅᓪᓗᒥᐅᔪᖅ ᓄᓇᑖᕐᓂᕐᒧᑦ ᐊᖏᕈᑎᓕᐊᕆᔭᐅᓯᒪᔪᑦ. ᐱᖁᔭᒃᓴᖅ C-5 ᒪᓕᒐᓕᐅᕐᕕᕐᔪᐊᕐᒥ ᐊᖏᖅᑕᐅᓚᐅᖅᓯᒪᔪᖅ ᔫᓂ 26, 2025−ᖑᑎᓪᓗᒍ, ᐊᑐᓕᖅᑎᑦᑎᓂᓕᒃ ᑕᒪᒃᑮᓐᓂᒃ ᐊᑭᖃᙱᑦᑐᒃᑯᑦ ᑕᐅᖅᓰᖃᑦᑕᕐᓂᕐᒥᒃ ᐊᒻᒪᓗ ᓴᓇᔨᐅᔪᑦ ᓇᒧᑐᐃᓐᓈᕈᓐᓇᕐᓂᖏᑦ ᑲᓇᑕ ᐱᖁᔭᕐᒥᒃ ᐊᒻᒪᓗ ᑲᓇᑕᓕᐅᕐᓂᕐᒧᑦ ᐱᖁᔭᕐᒥᒃ.
ᒪᓕᑦᑐᒍ ᓄᑖᖅ ᑐᙵᕕᖓ, ᒐᕙᒪᑐᖃᒃᑯᑦ ᑲᑎᖅᓱᐃᕗᑦ ᑎᑎᖅᑐᖅᓯᒪᔪᓂᒃ ᑲᓇᑕᓕᐅᖅᑐᑦ ᐱᓕᕆᐊᖏᖕᓂᒃ ᐊᒻᒪᓗ ᑲᒪᒋᔭᖃᕐᓂᐊᕐᓂᕋᖅᓯᒪᔪᑦ ᐊᑕᐅᑦᑎᒨᖅᓯᒪᔪᒥᒃ ᕿᒥᕐᕈᓇᓐᓂᐅᔪᑉ ᐊᐅᓚᓂᖓᓂᒃ ᐃᑲᔪᖅᑐᖅᑕᐅᓪᓗᓂ ᐊᖏᔪᓄᑦ ᐱᓕᕆᐊᓕᕆᔨᒃᑯᑦ ᐊᓪᓚᒡᕕᐊᓄᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᖕᓄᑦ. ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔮᖃᕐᓂᐊᖅᑐᑦ ᖃᐅᔨᒪᓇᑦᑎᐊᖅᑎᑦᑎᓗᑎᑦ ᐊᑐᓂ ᐱᕙᓪᓕᐊᒍᑎᒋᔭᐅᓂᖏᑦ ᐊᑐᓕᖅᑎᑦᑎᓂᐅᔪᓂ ᓄᓇᕗᒻᒥ ᐋᖅᑭᒃᓱᖅᑕᐅᓯᒪᑦᑎᐊᖅᓯᒪᒐᓗᐊᕐᒪᖔᕐᒥᒃ ᑲᒪᒋᔭᐅᓗᑎᓪᓗ ᐱᓕᕆᖃᑎᒋᔭᐅᓗᑎᑦ ᐃᓄᒻᒪᕇᑦ ᐊᒻᒪᓗ ᒪᓕᓪᓗᒋᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎ.
ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᓄᓇᕗᑦ ᒐᕙᒪᖏᑦ, ᒫᑦᓯᒥ 2025, ᐊᖏᖃᑎᒌᓚᐅᖅᓯᒪᔫᒃ ᑎᑎᖅᑐᖅᓯᒪᔪᓂᒃ ᓯᕗᓪᓕᐅᔾᔭᐅᖁᔭᕐᒥᓂᒃ ᐱᓕᕆᐊᕐᓂᒃ ᐊᒻᒪᓗ ᑕᒪᒃᑮᒃ ᑲᑎᒪᑎᑦᑎᓂᖃᓚᐅᖅᓯᒪᓪᓗᑎᑦ ᐅᑭᐅᖅᑕᖅᑐᖅ ᓇᖕᒥᓂᖁᑎᒋᔭᐅᓂᕋᕐᓂᖓᓄᑦ ᐊᒻᒪᓗ ᐊᑦᑕᕐᓇᖅᑐᒨᖅᑕᐃᓕᒪᑎᑕᐅᓂᖓᓄᑦ ᑲᑎᒪᕕᔾᔪᐊᖅᑎᑦᑎᓪᓗᑎᒃ ᑲᑎᒻᒪᖁᓪᓗᒋᑦ ᐱᓕᕆᖃᑎᒌᓲᖑᔪᑦ. ᓄᓇᕗᑦ ᑐᙵᕕᒃ ᑎᒥᖓ ᓯᕗᒧᐊᑦᑎᑦᑎᔪᑦ ᑕᒪᔅᓱᒥᖓ ᐃᖅᑲᓇᐃᔮᕐᒥᒃ ᑖᒃᑯᑎᒎᓇᖅ ᐃᓄᒻᒪᕇᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᑦᑐᑦ ᑲᑎᒪᔨᕋᓛᖏᑎᒍᑦ, ᑲᑎᒪᖃᑎᖃᓚᐅᖅᓯᒪᔪᑦ ᑲᓇᑕᑉ ᓯᕗᓕᖅᑎᕐᔪᐊᖓᓂᒃ ᐃᓅᕕᒻᒥ ᔪᓚᐃ 24, 2025−ᖑᑎᓪᓗᒍ, ᐅᖃᐅᓯᖃᖅᑐᑎᑦ ᐊᑐᓕᖅᑎᑕᐅᓂᖓ ᑲᓇᑕᓕᐅᕐᓂᖅ ᐱᖁᔭᖓᓂᒃ ᐃᓄᐃᑦ ᓄᓇᖓᖕᓂ.
“ᐃᓄᒻᒪᕇᑦ ᑕᒪᒃᑯᓂᖓ ᐊᖏᔫᑎᓂᒃ ᐱᓕᕆᐊᕐᓂᒃ ᑲᒪᒋᔭᐅᖁᔨᖃᑦᑕᕐᓂᑰᕗᑦ ᐊᒥᓱᓄᑦ ᐊᕐᕌᒍᓄᑦ. ᑲᑎᒪᔩᑦ ᖁᕕᐊᓱᒻᒪᕆᑦᑐᑦ ᓯᕗᒧᐊᑦᑎᑕᐅᓂᐊᓕᕐᓂᖏᖕᓂᒃ ᓱᑲᓐᓂᖅᓴᒃᑯᑦ ᐱᖁᑎᕐᔪᐊᓕᐅᕐᓂᖅ ᓄᓇᕗᒻᒥ ᐃᖅᑲᓇᐃᔮᓂᒃ ᓴᖅᑮᓗᑎᑦ ᐊᒻᒪᓗ ᓇᖕᒥᓂᖁᑎᒋᔭᐅᔪᓂᒃ, ᐊᒻᒪᓗ ᐊᑭᑭᓐᓂᖅᓴᐅᓕᖁᓪᓗᒋᑦ ᐃᓅᓂᕐᒧᑦ ᐃᓄᒻᒪᕆᖕᓄᑦ,” ᐅᖃᖅᖢᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ.
“ᓱᖅᑯᐃᓇᑦᑎᐊᖅᑐᑯᓗᖕᓂᒃ ᖃᓄᐃᓕᐅᖁᔨᓯᒪᓪᓗᑕ, ᐊᑑᑎᖃᑦᑎᐊᕋᔭᖅᑐᒃᑯᑦ ᑮᓇᐅᔭᓂᒃ ᐊᑐᖅᑐᖃᕐᓗᓂ,
ᐊᒻᒪᓗ ᐱᓪᓚᑦᑖᖅᑎᒍᑦ ᐱᓕᕆᖃᑎᒌᖕᓂᒃᑯᑦ ᓱᑲᓐᓂᖅᓴᒃᑯᑦ ᑲᓇᑕ ᓴᓇᔭᐅᓂᖓᓄᑦ ᐱᓕᕆᐊᕐᓂᒃ ᑲᒪᔪᖃᕈᓐᓇᕐᒪᑦ ᓄᓇᕗᒻᒥ ᓴᙵᑦᑎᑦᑎᓂᖃᕋᔭᖅᑐᒥᒃ ᐃᓄᒻᒪᕇᑦ ᓇᖕᒥᓂᖅᓱᕐᓂᖏᑦ ᓴᙵᑦᑎᑕᐅᓗᑎᑦ ᐃᓄᒻᒪᕇᑦ ᓄᓇᓕᖏᑦ.”
ᓄᓇᕗᑦ ᑐᙵᕕᒃ ᑎᒥᖓᑕ ᐱᓇᓱᐊᒐᕆᑲᐅᑎᒋᔭᖏᑦ ᐋᖅᑭᒃᓱᐃᖃᑎᖃᕐᓗᑎᑦ ᓯᕗᓂᐊᒍᑦ ᐱᓕᕆᐊᖑᒐᔭᖅᑐᑦ ᑲᓇᑕᒧᑦ ᐱᓕᕆᐊᕆᔭᐅᔪᒪᓯᓐᓈᖅᖢᑎᑦ ᓄᓇᕗᒻᒥ, ᐱᖃᓯᐅᑎᓪᓗᒋᑦ ᑭᕙᓪᓕᕐᒥ ᐃᒪᒃᑯᑦ ᐃᑭᐊᖅᑭᔾᔪᑎᓕᐅᕐᓂᖅ, ᐃᖃᓗᓐᓂ ᑰᒻᒥ ᐊᑐᕐᓗᓂ ᐆᒻᒪᖅᑯᑎᓕᐅᕐᓂᕐᒧᑦ ᐱᓕᕆᐊᖅ, ᕿᑭᖅᑕᕐᔪᐊᕐᒥ ᐃᑎᔪᒥᒃ ᐃᒪᕐᒥ ᑐᓚᒃᑕᕐᕕᒻᒥ ᐊᒻᒪᓗ ᖁᕐᓗᖅᑐᐊᕐᔪᑉ ᐊᖅᑯᑎᓕᐅᖅᑕᐅᓂᖓ ᑐᓚᒃᑕᕐᕕᓕᐅᖅᑕᐅᓂᖓᓗ, ᐊᒻᒪᓗ ᐃᓄᒻᒪᕇᑦ ᓇᖕᒥᓂᖅᑖᕐᓗᑎᑦ ᐊᖅᑯᑎᐅᒐᔭᖅᑐᓂᒃ ᐊᒻᒪᓗ ᑮᓇᐅᔭᖃᖅᑎᑕᐅᓂᖏᖕᓂᒃ ᐱᓕᕆᐊᖃᕈᓐᓇᕐᓗᑎᑦ ᑕᒪᒃᑯᓂᖓ ᐃᑲᔫᑏᑦ ᓄᓇᕗᒻᒦᓐᓂᐊᕐᒪᑕ.
– 30 –
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒋᐊᕐᕕᒃᓴᖅ:
ᐃᕙᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
