ᓄᓇᕗᑦ ᑐᓐᖓᕕᒃ ᑎᒥᖓᑕ ᓂᕈᐊᖅᑐᓕᕆᔨᒻᒪᕆᖓ ᐋᑕᒥ ᐃᑦᑐᐊᑦᓯᐊᖅ ᑐᓴᖅᑎᓯᖅᑲᐅᔪᖅ ᑐᓐᖓᕕᒃᑯᓐᓄᑦ ᓂᕈᐊᒐᑦᓴᓕᐅᕐᓇᖅ ᓂᕈᐊᕐᓂᐅᓂᐊᖅᑐᒧᑦ ᐊᖏᔪᖅᑳᒥᒃ ᒪᑐᓂᕆᖅᑲᐅᔭᖓᓂᒃ ᐅᓪᓗᒥ ᓯᕿᓐᖑᔭᖅ 5-ᒨᖅᑎᓪᓗᒍ (ᖃᐅᔨᓴᐅᑦ ᑕᓪᓕᒪᓅᖅᑎᓪᓗᒍ) ᐅᓐᓄᓴᒃᑯᑦ ᓄᓇᓕᑦᑎᒍᑦ.

ᒥᑭᔾᔪᒃ ᐋᑲᕙᒃ, ᓚᐅᕆ ᐊᐅᓪᓚᓗᒃ, ᓴᕕᑲᑖᖅ ᕗᐊᑦ, ᐹᓪ ᖃᓗᔾᔭᖅ, ᕕᓂ ᖃᕆᑕᖅ, ᔨᐅᕆ ᑯᒪᒃᓯᐅᑎᒃᓴᖅ, ᑕᐃᕕᑦ ᑯᓄᒃ, ᒋᕗᕆᐅᓪ ᓂᕐᓗᖓᔪᖅ, ᐱᕐᓇᑎ ᓂᕕᐊᑦᓯᐊᒃ, ᒪᓃᑦᑐᖅ ᑖᒻᓴᓐ, ᐊᒻᒪᓗ ᑳᑎ ᑕᐅᑐᓐᖏ ᑐᓂᓯᓯᒪᔪᑦ ᓂᕈᐊᒐᑦᓴᓐᖑᕈᑎᒥᓂᒃ ᓂᕈᐊᕐᓂᕐᒧᑦ ᐊᖏᔪᖅᑳᑦᓴᒥᒃ. ᓂᕈᐊᒐᑦᓴᑦ ᐱᕕᒃᓴᓖᑦ ᓅᕙᐃᒻᕙ 5, 2012-ᒧᓄᑦ, ᓯᕿᓐᖑᔭᖅ 5-ᒧᓄᑦ ᐅᓐᓄᒃᓴᒃᑯᑦ ᓄᓇᓖᑦ ᖃᐅᔨᓴᐅᑎᖏᑎᒍᑦ ᓂᕈᐊᒐᑦᓴᐅᓂᕐᒥᓂᒃ ᐲᖅᑕᐅᒍᒪᒍᑎᒃ.

ᑕᐅᑐᓐᖏ ᒫᓐᓇ ᓄᖅᑲᖓᓚᐅᐱᓪᓚᑦᑐᖅ ᑐᓐᖓᕕᒃᑯᓐᓂᒃ ᒪᓕᓪᓗᒋᑦ ᑐᓐᖓᕕᒃᑯᑦ ᓂᕈᐊᕐᓂᕐᒧᑦ ᒪᓕᒐᑦᓴᖁᑎᖏᑦ. ᑐᓐᖓᕕᒃᑯᓐᓂ ᐊᖏᔪᖅᑳᑉ−ᑐᒡᓕᐊ ᔭᐃᒥᓯ ᐃᑦᑐᓗᒃ ᒫᓐᓇ ᑐᓐᖓᕕᒃᑯᓐᓂ ᐊᖏᔪᖅᑳᒧᑦ ᑭᖑᕝᕕᐅᑎᓯᒪᓂᐊᖅᑐᖅ ᓂᕈᐊᖅᑐᓕᕆᓐᓇᕐᓂᖓᓂ.

ᑏᓰᒻᕙ 10, 2012 ᓂᕈᐊᕐᓂᐊᖅᑐᑦ. ᓂᕈᐊᕈᓐᓇᖅᑐᑦ ᓂᕈᐊᕐᓇᐅᑉ ᓯᕗᓂᐊᒍᑦ ᓂᕈᐊᕐᐸᒌᕈᓐᓇᓛᕐᒥᔪᑦ ᑏᓰᒻᕙ 3, 2012, ᐊᒻᒪᓗ ᐊᓯᒥᓐᓄᑦ ᓂᕈᐊᖅᑎᑕᐅᔪᒪᔪᑦ ᓂᕈᐊᖅᑎᑕᐅᒍᓐᓇᓂᐊᕐᒥᔪᑦ (proxy).

ᓂᕈᐊᒐᑦᓴᑦ ᐊᒻᒪᓗ ᓂᕈᐊᖅᑏᑦ ᑲᓇᑕᒥᐅᑕᐅᔭᕆᐊᓖᑦ, ᐅᑭᐅᖅᑖᕐᓯᒪᓗᑎᒃ 16-ᓂᒃ, ᐊᒻᒪᓗ ᐊᑎᖃᖃᑕᐅᓗᑎᒃ ᐅᕝᕙᓘᓐᓃᑦ ᐊᑎᖃᖃᑕᐅᔪᓐᓇᕐᓗᑎᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ.