ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ, ᓄᓇᕗᒻᒥ ᓂᕐᔪᑎᓕᕆᔨᒃᑯᑦ ᐊᐅᓚᑦᑎᔨᖏᑦ ᑲᑎᒪᔩᑦ, ᒐᕙᒪᑦ ᓄᓇᕗᑦ ᐊᒻᒪᓗ ᒐᕙᒪᑦ ᑲᓇᑕ ᐊᖏᖅᓯᒪᔪᑦ ᐃᖃᓪᓕᐊᓕᕆᓂᕐᒧᑦ ᐊᑐᐊᒐᓄᑦ ᓄᓇᕗᒻᒥ ᓇᔪᕐᕕᖏᓐᓄᑦ

(July 9, 2018 – ᐃᖃᓗᐃᑦ, ᓄᓇᕗᑦ) ᖁᕕᐊᓱᖃᑎᒌᓪᓗᑕ 25 ᐅᑭᐅᓄᑦ ᐊᑎᓕᐅᕐᓂᕐᒧᑦ ᓄᓇᕗᑖᖅᓯᒪᓂᕐᒧᑦ ᐊᖏᕈᑎᐊᓄᑦ, ᒐᕙᒪᑦ ᑲᓇᑕᒃᑯᑦ, ᓄᓇᕗᑦ ᑐᙵᕕᒃᑯᑦ ᓄᓇᕗᒻᒥ ᓂᕐᔪᑎᓕᕆᔨᒃᑯᑦ ᐊᐅᓚᑦᑎᔩᑦ ᑲᑎᒪᔨᖏᑦ ᐊᒻᒪᓗ ᒐᕙᒪᑦ ᓄᓇᕗᑦ ᓴᖅᑭᑎᑦᑎᓯᒪᔪᑦ ᐃᑲᔪᖅᑎᒌᖕᓂᕐᒧᑦ ᐅᓂᒃᑳᒐᔅᓴᓕᐊᓂᒃ ᐱᕙᓪᓕᐊᓂᕐᒧᑦ ᐃᖃᓪᓕᐊᓕᕆᓂᕐᒧᑦ ᐊᑐᐊᒐᓂᑦ ᓄᓇᕗᒻᒥ ᓇᔪᕐᕕᐅᔪᒥ (NSA) ᐃᑲᔪᖅᑎᒌᖕᓂᕐᒧᑦ ᐅᓂᑳᒐᔅᓴᓕᐊᑦ ᐃᖃᓪᓕᐊᓂᕐᒧᑦ ᒪᓕᒐᐃᑦ ᓄᓇᕗᒻᒥ ᓇᔪᕐᕕᐅᔪᓄᑦ ᐱᓕᕆᐊᕆᔭᐅᔪᑦ ᐱᒻᒪᕆᐅᔪᒥᑦ ᒫᓐᓇᓵᖅ ᑕᖅᑭᖏᓐᓂ ᐱᒻᒪᒃᓴᓕᕆᓂᕐᒧᑦ ᓄᓇᕗᑖᖅᓯᒪᓂᕐᒧᑦ ᐊᖏᕈᑎᐊᓄᑦ ᓯᕗᓂᔅᓴᒧᑦ ᐊᑐᐊᒐᓄᑦ ᓄᓇᒋᔭᐅᔪᒧᑦ ᐃᖃᓪᓕᐊᕐᓂᕐᒧᑦ ᐊᑐᕐᓗᒍ ᐃᖃᓪᓕᐊᓕᕆᓂᕐᒧᑦ ᒪᓕᒐᖏᓐᓂ.

ᕿᒥᕐᕈᐊᖃᑕᐅᓂᐊᖅᑐᑦ ᐱᕚᓪᓕᕐᓂᕐᒧᑦ ᓄᑖᓄᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ, ᐊᒻᒪᓗ ᓴᖅᑭᑎᑦᑎᓂᐊᖅᑐᑦ ᓄᑖᖑᓂᖅᓴᐅᔪᓂᒃ ᐊᑐᐊᒐᓂᒃ ᓇᓗᓇᐃᖅᓯᓗᑎᒃ ᐊᑲᐅᓈᕐᓂᕐᒧᑦ ᐃᖃᓪᓕᐊᕐᓂᕐᒧᑦ ᓄᓇᕗᒻᒥ.

ᐅᓂᒃᑳᒐᔅᓴᓕᐊᑦ ᐃᓚᖃᖅᑐᑦ ᐱᔪᒪᓂᕐᒧᑦ ᓇᓗᓇᐃᖅᓯᖃᑦᑕᕐᓗᑎᒃ ᐃᓄᓐᓄᑦ, ᓄᓇᕗᒥᐅᓄᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐃᑲᔪᖅᑎᒌᒃᑐᓄᑦ ᐊᖑᓇᓱᖃᑦᑕᖅᑐᓂᒃ ᐊᑐᕐᓗᒍ NSA ᑐᔅᓯᕋᖅᑕᐅᓯᒪᔪᓄᑦ ᐊᑐᐊᒐᓂᒃ ᐊᒻᒪᓗ ᒪᓕᒐᓂᒃ ᒐᕙᒪᓕᕆᓂᕐᒧᑦ ᐃᖃᓪᓕᐊᕐᓂᕐᒧᑦ. ᐊᑐᐊᒐᐃᑦ ᐱᕙᓪᓕᐊᑕᐅᓂᐊᖅᑐᑦ ᐃᓱᒪᒋᔭᐅᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᐊᒻᒪᓗ ᓇᓗᓇᐃᖅᓯᑦᑎᐊᕐᓗᑎᒃ ᐃᖃᓪᓕᐊᓂᖅ ᐊᐅᓚᑕᐅᓂᖏᑦ ᐃᑲᔫᑕᐅᓂᐊᕐᓗᑎᒃ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐃᓅᑦᑎᐊᕐᓂᕐᒧᑦ ᐃᓄᓐᓄᑦ ᐊᒻᒪᓗ ᓄᓇᕗᒻᒥ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ.

ᓴᖅᑭᑎᑕᐅᖅᑳᖅᑎᓐᓇᑎᒃ ᐅᓂᒃᑳᒐᔅᓴᓕᐊᑦ ᐃᖃᓪᓕᐊᓂᕐᒧᑦ ᐊᑐᐊᒐᖏᑦ ᓄᓇᕗᒻᒥ ᓇᔪᕐᕕᐅᔪᑦ Canada Gazette, Part I, ᐃᓱᒪᒋᔭᐅᔪᑦ 2019−ᒥ.

ᐅᖃᐅᓯᒃᓴᖅ

“ᓂᕆᐅᒃᑐᒍᑦ ᑲᔪᓯᓗᑕ ᐃᖅᑲᓇᐃᔭᖃᑎᒌᖕᓂᕐᒧᑦ ᓄᓇᕗᑦ ᑐᙵᕕᒃᑯᓪᓗ, ᓄᓇᕗᒻᒥ ᓂᕐᔪᑎᓕᕆᔨᒃᑯᑦ ᐊᐅᓚᑦᑎᔨᖏᑦ ᑲᑎᒪᔩᑦ, ᐊᒻᒪᓗ ᒐᕙᒪᑦ ᓄᓇᓄᑦ ᐱᕙᓪᓕᐊᓗᑕ ᑐᑭᓯᐊᓇᑦᑎᐊᖅᑐᓂᒃ ᐊᑐᐊᒐᓂᒃ ᐃᑲᔫᑎᖃᕐᓂᐊᖅᑐᑦ ᓴᙱᔪᒥᑦ, ᐊᑲᐅᓈᖅᑐᒃᑯᑦ ᐃᖃᓪᓕᐊᓕᕆᓂᕐᒧᑦ ᓄᓇᒋᔭᐅᔪᒥ. ᐱᔪᒪᑦᑎᐊᖅᑐᒍᑦ ᐃᖅᑲᓇᐃᔭᕐᓗᑕ ᐃᑲᔪᖅᑎᒋᔭᕗᓪᓗ ᐊᒻᒪᓗ ᐅᑭᐅᖅᑕᖅᑐᒥ ᓄᓇᓕᓐᓄᑦ ᓇᓗᓇᐃᖅᓯᓗᑕ ᐊᑐᐊᒐᐃᑦ ᐃᓕᑕᕆᔭᐅᓂᖏᑕ ᐊᒻᒪᓗ ᐃᑉᐱᒋᑦᑎᐊᕐᓂᕐᒧᑦ ᐱᔪᓐᓇᐅᑎᔅᓴᓄᑦ ᐃᓄᓐᓄᑦ, ᐊᒻᒪᓗ ᐱᓯᒪᑦᑎᓗᒋᑦ ᑐᙵᕝᕕᐅᔪᑦ ᓄᓇᕗᒻᒥ ᐊᖏᕈᑕᐅᓯᒪᔪᖏᓐᓂ, ᖃᖓᓂᑕᖅ ᒪᓕᒐᓕᐊᙳᖅᓯᒪᔪᑦ ᐊᑎᓕᐅᖅᑕᐅᔪᑦ 25 ᐅᑭᐅᑦ ᖄᖏᖅᓯᒪᓕᖅᑐᑦ ᐅᓪᓗᒥ.”

 

ᐅᐱᓐᓇᖅᑐᖅ ᑕᒥᓂᒃ ᓕᑉᓚᒃ, ᒥᓂᔅᑕ ᐃᒪᓕᕆᓂᕐᒧᑦ ᐊᒻᒪᓗ ᑲᓇᑕᒥ ᓯᔾᔭᖅᐸᓯᒥ ᐅᓇᑕᖅᑐᔅᓴᐃᑦ

 

“ᓴᖅᑭᑕᐅᓂᖏᑦ ᓄᓇᕗᖕᒥ ᐃᖃᓗᓕᕆᓂᕐᒧᑦ ᐱᖁᔭᑦ ᐱᒻᒪᕆᐅᕗᑦ ᐊᔾᔨᒌᙱᑦᑐᓂᒃ ᒪᑭᒪᒍᑎᓄᑦ ᓄᓇᕗᖕᒥ. ᖁᕕᐊᒃᐳᖓ ᐱᓕᕆᖃᑎᕗᑦ ᐃᓕᓴᕐᓯᓯᒪᒻᒪᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᒃᐱᒋᔭᖃᕐᒪᑕ ᐃᖃᓗᓕᕆᓂᕐᒧᑦ ᑲᒪᑦᑎᐊᕈᑎᓂᒃ. ᑖᓐᓇ ᐱᒻᒪᕆᐅᓪᓗᓂ ᐱᓕᕆᐊᖑᒻᒪ ᐱᕙᓪᓕᐊᒍᑎᓄᑦ ᓄᓇᕗᖕᒥ ᐊᒻᒪᓗ ᓯᕗᒧᒋᐊᒃᑲᓐᓂᕈᑕᐅᓂᐊᕐᒪᑦ ᐃᓅᓯᑦᑎᓐᓄᑦ ᐊᒻᒪ ᒪᑭᒪᔾᔪᑎᑦᑎᓐᓄᑦ.”

ᐅᖃᖅᑐᖅ ᐊᓗᑭ ᑰᑦᑎᖅ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ

 

“ᐊᒃᓱᒻᒪᕆᐊᓗᒃ ᖁᕕᐊᒃᓯᒪᕗᒍᑦ ᐱᓂᐊᕐᓂᕋᕈᑎᒋᓯᒪᔭᖏᓐᓂᒃ ᑕᒪᐃᑕ ᐊᑎᓕᐅᖃᑕᐅᓯᒪᔪᑦ ᐱᕚᓪᓕᕈᑕᐅᓯᒪᒻᒪᑕ ᖃᑦᑎᑯᓗᖕᓂᒃ ᑕᖅᑭᓂᒃ ᐊᓂᒍᖅᑐᓂᒃ ᐋᖅᑭᓱᐃᓂᐊᕐᓗᑎᒃ ᐊᑐᐊᒐᓂᒃ ᑕᑎᒋᔭᐅᓂᐊᕐᑐᓂᒃ ᐊᑐᓕᖅᑎᑕᐅᕙᓪᓕᐊᓂᖏᓐᓄᑦ ᓄᓇᕗᑦ ᐊᖏᕈᑎᖏᑦ ᓯᕗᓂᑦᑎᓐᓂ ᐱᖁᔭᐅᓂᐊᕐᑐᑦ ᐃᖃᓗᓕᕆᓂᕐᒧᑦ ᓄᓇᕗᖕᒥ ᓄᓇᑖᕐᕕᐅᓯᒪᔪᓂ ᐊᑐᕐᓗᒋᑦ ᐃᒪᕐᒥᐅᑕᓕᕆᔨᒃᑯᑦ ᒪᓕᒐᖏᑦ. ᕿᓚᓈᕐᐳᒍᑦ ᐱᓕᕆᖃᓂᒋᓐᓇᕐᓂᐊᕋᑦᑎᒍ ᓄᓇᕗᑦ ᑐᙵᕕᒃ ᑎᒥᖓ, ᒐᕙᒪᒃᑯᖏᑦ ᓄᓇᕗᑦ ᐊᒻᒪᓗ ᐱᓕᕆᕕᖓᖅᑦ ᐃᒪᕐᒥᐅᑕᓕᕆᔨᒃᑯᑦ ᑲᓇᑕᒥ ᓴᖅᑮᖃᑎᒋᓂᐊᕋᑦᑎᒍ ᐊᑐᐊᒐᓂᒃ ᐃᓕᓴᕐᓯᓯᒪᔪᓂᒃ ᐊᒻᒪ ᑲᒪᒋᔭᖃᑦᑎᐊᕐᑐᓂᒃ ᐱᔪᓐᓇᐅᑎᖏᓐᓂᒃ ᐃᓄᐃᑦ, ᐊᒻᒪᓗ ᐱᓕᕆᖃᑕᐅᓂᕆᕙᒃᑕᖏᑦ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᐃᑦ ᐊᕕᒃᑐᕐᓯᒪᓂᖏᑎᒍᑦ ᐆᒪᔪᓕᕆᔨᕐᔪᐊᒃᑯᑦ ᑲᑐᔾᔨᖃᑎᒌᖏᑦ, ᑕᐃᒪᓐᓇ ᓇᓗᓇᐃᖅᑕᐅᓯᒪᒻᒪᑕ ᓄᓇᕗᑦ ᐊᖏᕈᑎᖏᓐᓂ.

ᓄᓇᕗᖕᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᑎᓕᔭᐅᓯᒪᔾᔪᑎᖏᑦ ᐃᒪᐃᓕᖓᒻᒪᑕ ᐱᐅᕐᓱᐊᑕᐅᓂᐊᕐᓗᑎᒃ ᐆᒪᔪᑦ ᓂᕐᔪᑎᑦ (ᐊᒻᒪ ᓂᕐᔪᑎᑦ ᓇᔪᕐᐸᒃᑕᖏᑦ) ᑕᐅᕗᖓᒃᑲᓐᓂ ᐃᑲᔪᓐᓂᖃᖁᓪᓗᒋᑦ ᑕᒪᐃᓐᓂᒃ ᓄᓇᕗᖕᒥᐅᓂ ᐃᒃᐱᒋᔭᖃᑦᑎᐊᓯᓐᓈᕐᓗᑎᒃ ᐃᓄᐃᑦ ᐊᖑᓇᓱᒍᓐᓇᓂᕐᒧᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᓯᕗᓪᓕᕐᐹᐅᑎᑕᖏᓐᓂᒃ. ᑖᓐᓇ ᑎᓕᔭᐅᓯᒪᔾᔪᑎᐅᔪᑦ ᖃᐅᔨᒪᔾᔪᑎᒋᒐᑦᑎᒍ ᕿᓚᓈᕐᐳᒍᑦ ᐊᑐᐊᒐᓕᐅᖃᑎᒋᓛᕐᑕᑎᓐᓂᒃ ᑲᒪᒋᔭᐅᑦᑎᐊᕈᑎᒃᓴᖏᓐᓂᒃ ᓄᓇᕗᖕᒥ ᓄᓇᑖᕐᕕᐅᓯᒪᔪᓂ ᐃᖃᓗᓕᕆᓂᕐᒧᑦ ᒪᓕᓐᓂᖃᑦᑎᐊᕐᑐᓂᒃ ᐊᑑᑎᖃᑦᑎᐊᕐᑐᓂᓪᓗ ᐆᒪᔪᓂᒃ ᑲᒪᒋᔭᖃᑦᑎᐊᓂᕐᒧᑦ ᑕᐃᒪᓐᓇ ᑎᑎᕋᖅᑕᐅᓯᒪᒻᒪᑕ ᓄᓇᕗᑦ ᐊᖏᕈᑎᖏᓐᓂ.”

ᑖᓐᓂᐊᓪ ᓲᓴᒃ, ᐃᒃᓯᕙᐅᑕᖓᑦ, ᓄᓇᕗᖕᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ.

 

“ᓄᓇᕗᑦ ᒐᕙᒪᒃᑯᖏᑦ ᐱᓂᐊᕐᓂᕋᕈᑎᖃᖅᓯᒪᕗᑦ ᐱᓕᕆᖃᑎᖃᕈᒪᓪᓗᑎᒃ ᑲᒪᒋᔭᐅᑦᑎᐊᕐᓗᑎᒃ ᐊᑐᓕᖅᑎᑕᐅᖁᓪᓗᒋᑦ ᓄᓇᕗᖕᒥ ᐃᖃᓗᓕᕆᓂᕐᒧᑦ ᐱᖁᔭᑦ. ᖁᔭᒋᕙᕗᑦ ᐱᓕᕆᖃᑎᕗᑦ ᐱᓕᕆᓯᒪᓂᖏᓐᓄᑦ ᑕᒪᑦᓱᒥᖓ ᐱᒻᒪᕆᐅᔪᒥᒃ ᑲᒪᒋᔭᐅᒋᐊᖅᓯᒪᔪᒥᒃ, ᐊᒻᒪᓗ ᕿᓚᓈᖅᐳᒍᑦ ᐱᓕᕆᖃᑎᒌᖏᓐᓇᓂᐊᕐᓂᑎᓐᓂᒃ ᒪᓕᓪᓗᒋᑦ ᑕᒪᐃᑕ ᓄᓇᕗᖕᒥ ᐊᖏᕈᑏᑦ.”

ᒥᓂᔅᑕᖓᑦ ᐊᕙᑎᓕᕆᔨᒃᑯᑦ ᔩᓂ ᐃᕼᐊᓗᐊᖅ

ᓇᓗᓇᐃᔭᐃᓂᖅ

  • ᓄᓇᕗᑖᖅᓯᒪᓂᕐᒧᑦ ᐊᖏᕈᑎ ᐊᑎᓕᐅᖅᑕᐅᓚᐅᖅᑐᖅ ᒪᐃ 25, 1993−ᖑᑎᓪᓗᒍ, ᐃᖃᓗᓐᓂ, ᐊᐅᓚᑦᑎᔩᑦ ᑐᙵᕕᒃᑯᑦ ᐃᓚᒌᒃᓴᒃᑯᑦ ᓄᓇᕗᒻᒥ (ᒫᓐᓇᐅᔪᖅ ᓄᓇᕗᑦ ᑐᙵᕕᒃ), ᒐᕙᒪᑦ ᑲᓇᑕ, ᐊᒻᒪᓗ ᒐᕙᒪᑦ ᓄᓇᑦᑎᐊᒃᑯᑦ.

·          ᓄᓇᕗᑖᖅᓯᒪᓂᕐᒧᑦ ᐊᖏᕈᑎ ᑐᙵᕕᒋᔭᖓ ᓴᖅᑭᑎᑦᑎᓂᕐᒧᑦ ᓄᓇᒋᔭᐅᔪᒧᑦ ᓄᓇᕗᒻᒥ, ᓂᕈᐊᖅᑕᐅᓯᒪᔪᒃᑯᑦ ᒐᕙᒪᓂ ᐱᔨᑦᑎᕋᕐᓗᑎᒃ ᐱᔭᐅᔪᒪᔪᑦ ᓄᓇᕗᒥᐅᓕᒫᓄᑦ.

·          ᓄᓇᕗᑖᖅᓯᒪᓂᕐᒧᑦ ᐊᖏᕈᑎ ᐊᖏᓂᖅᐹᖅ ᓄᓇᖃᖅᑳᖅᓯᒪᔪᓄᑦ ᓄᓇᑖᖅᓯᒪᓂᕐᒧᑦ ᓇᔪᕐᕕᐅᔪᑦ ᑲᓇᑕᓕᒫᒥ ᖃᖓᓂᑕᐅᔪᒃᑯᑦ.

ᐃᓚᒋᔭᐅᔪᑦ

·          ᖃᕋᓴᐅᔭᒃᑯᑦ ᐃᑲᔪᖅᑎᒌᓐᓂᒃᑯᑦ ᐅᓂᒃᑳᒐᔅᓴᓕᐊᑦ

ᐃᓚᒋᔭᐅᔪᑦ ᖃᕋᓴᐅᔭᒃᑯᑦ

 

-30-

ᑐᑭᓯᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ:

 

ᑭᐅᕋᓐ ᕙᓚᐅᕈᑎ

ᑐᓴᐅᒪᔾᔪᑎᓕᕆᓂᕐᒧᑦ ᐊᖓᔪᖅᖄᖑᑲᐃᓐᓇᖅᑐᖅ

ᓄᓇᕗᑦ ᑐᓐᖓᕕᒃᑯᓐᓄᑦ

ᐅᖄᓚᐅᑖ: (867) 975-4900 ᐅᖄᓚᐅᑦ ᐊᑭᖃᓐᖏᑦᑐᖅ: 1-888-646-0006

www.tunngavik.com

 

Download (DOCX, 23KB)

Download (DOCX, 20KB)

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: