(ᐊᒃᑐᕙ26, 2020 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᓇᓪᓕᒍᓱᒃᐳᑦ ᕿᒪᑦᑕᖏᓐᓂᒃ ᑕᐃᕙᑦ ᐊᓪᓘᒃᑲᖅ ᐊᖏᔪᑦᑎᐅᑉ.

ᑐᖏᓕᕆᔭᐅᓪᓗᓂ ᐊᐃᕙᔩᑦ ᐃᓱᒪᑕᖓᓐᓄᑦ ᑕᐃᔭᐅᓕᓛᑐᐃᓐᓇᕐᑐᒥᒃ ᓄᓇᕗᑦ ᐊᖏᕈᑎᖏᓐᓂᒃ, ᒥᔅᑕ. ᐊᒡᓘᒃᑲᖅ ᐊᖏᔪᕐᑎᖅ ᓴᐳᔾᔨᔨᐅᖃᑦᑕᓚᐅᕐᐳᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ 1970-ᖏᓐᓂᑦ. ᐊᒃᓱᒻᒪᕆᐊᓗᒃ ᐃᑲᔪᓐᓂᖃᖅᓯᒪᔪᖅ ᐃᓚᖓ 5 (ᐆᒪᔪᓕᕆᓂᖅ) ᓄᓇᕗᑦ ᐊᖏᕈᑎᖏᓐᓂ, ᐊᒻᒪ ᐱᓕᕆᓐᓇᓚᐅᕐᑐᖅ ᓂᕈᐊᖅᑕᐅᓯᒪᓪᓗᓂ ᐆᒪᔪᓕᕆᓂᕐᒥᒃ, ᐃᖃᓗᓕᕆᓂᕐᒥᒃ ᐊᒻᒪ ᐊᖑᓇᓱᒃᑐᓕᕆᓂᕐᒥᒃ ᐱᔾᔪᑎᓕᖕᓂᒃ.

“ᑕᐃᕙᑦ ᖃᐅᔨᒪᑦᑎᐊᓚᐅᕐᑐᖅ ᐃᓄᐃᑦ ᐱᔪᒪᔭᖏᓐᓂᒃ ᐊᐃᕙᔨᐅᓪᓗᓂ ᓄᓇᕗᑦ ᐊᖏᕈᑎᖏᓐᓂᒃ, ᓄᓇᒥᒃ ᐊᒻᒪ ᓂᕐᔪᑎᓂᒃ ᖃᐅᔨᒪᓂᖓ ᐊᑑᑎᖃᖅᓯᒪᒻᒪᕆᒃᑐᖅ ᐊᐃᕙᑎᓪᓗᒋᑦ ᐊᒻᒪ ᐱᓕᕆᐊᕆᓪᓗᓂᐅᒃ. ᓯᕗᓪᓕᐅᔾᔨᕙᓚᐅᕐᑐᖅ ᒪᓕᒃᑐᓂ ᐃᓅᖃᑎᒌᒃᑎᐊᓂᒃᑯᑦ ᐃᖅᑲᓇᐃᔭᖃᑎᒌᓐᓂᕐᒥᒃ ᐊᒻᒪ ᐅᔾᔨᑐᐃᓐᓇᓚᐅᕐᑐᖅ ᑭᒃᑯᓕᒫᑦ ᐃᓚᐃᓐᓇᓱᖅᑕᐅᖏᒃᑲᓗᐊᕐᒪᖔᑖ ᐊᒻᒪ ᓇᓕᒧᒌᑎᑦᑐᓂᒋᑦ, ᐊᒃᓱᒻᒪᕆᐊᓗᒃ ᑕᕝᕘᓇ ᖁᔭᒋᓚᐅᕐᑕᕗᑦ” ᐃᖅᑲᐅᒪᔭᒥᓂᒃ ᐅᖃᖅᑐᖅ ᔭᐃᒥᓯ ᐃᑦᑐᓗᒃ, ᑐᖏᓕᖓ ᐊᖓᔪᖅᑳᖓᑦᑕ ᑐᙵᕕᒃᑯᑦ.

2012−ᖑᑎᓪᓗᒍ, ᒥᔅᑕ. ᐊᒡᓘᒃᑲᖅ ᐊᖏᔪᑦᑎᖅ ᐃᓕᓴᕆᔭᐅᓚᐅᕐᓯᒪᔪᖅ ᐱᒻᒪᕆᐅᓪᓗᓂ ᑲᓇᑕᒥᐅᑕᐅᓂᖓᓄᑦ ᑯᐃᑉ ᐃᓕᓴᐱ ll 60−ᒋᓕᕐᑕᖓᓂ ᑯᐃᖑᓂᖓᓄᑦ ᓇᓗᓇᐃᕈᑕᐅᔪᒥᒃ ᓂᕕᖔᑖᖅᑖᖅᑐᓂ ᐃᓕᓴᕆᔭᐅᔾᔪᑎᒥᒃ.

ᑕᐃᕙᑦ ᐊᒡᓘᒃᑲᖅ ᐊᖏᔪᑦᑎᖅ, ᐊᕐᕕᐊᕐᒥᐅᑕᐅᓚᐅᕐᑐᖅ, ᓯᕗᓪᓕᖅᐹᖑᓪᓗᓂ ᐊᖓᔪᖅᑳᕆᔭᐅᓯᒪᕗᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑎᒥᙳᖅᑎᑕᐅᑎᓪᓗᒋᑦ 1975-ᒥ. ᑭᖑᓂᐊᒍᑦ ᑲᑎᒪᔨᐅᖃᑕᐅᓕᔪᒻᒥᔪᖅ ᓄᓇᕗᖕᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ, ᐃᓄᐃᑦ ᐱᖁᑎᖏᓐᓂᒃ ᐸᐸᑦᑎᔨᒃᑯᓐᓄᒃ ᐊᒻᒪ ᐊᕐᕕᐊᓂ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ.

ᒥᔅᑕ. ᐊᒡᓘᒃᑲᖅ ᐃᒃᐱᒋᔭᖃᑦᑎᐊᑐᒻᒪᕆᐅᓚᐅᕐᑐᖅ ᐃᓅᖃᑎᒥᓂᒃ ᐊᒻᒪ ᓄᓇᒥᓐᓂᒃ. ᖃᐅᔨᒪᔭᐅᓚᐅᕐᑐᖅ ᐅᕙᒍᖃᑦᑎᐊᓂᕐᒥᒃ, ᐱᕈᐃᓯᒪᔪᖅ 7-ᓂᒃ ᓄᑕᕋᕐᒥᓂᒃ ᓄᓕᐊᖓᓗ ᑐᐊᑎ.

ᑐᙵᕕᒃᑯᑦ ᕿᒃᓵᖃᑕᐅᕗᑦ ᐃᓅᔪᓐᓃᓚᐅᕐᑎᓪᓗᒍ ᓯᕗᓕᕐᑎᐅᓯᒪᔪᖅ ᐃᓅᓯᓕᒫᕐᒥᓂ ᐱᔨᑦᑎᕐᑐᓂᒃ ᐅᒃᐱᕆᔭᖃᑦᑎᐊᕐᑐᓂᓗ ᐃᓄᖕᓂᒃ, ᓄᓇᒥᒃ, ᑐᒃᓯᐊᕐᕕᖕᓂᒃ ᐊᒻᒪ ᐃᓚᒥᓂᒃ (ᐅᕙᒍᕆᔭᕐᒥᓂᒃ).