(ᔪᓚᐃ 15, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᕿᓂᖅᑐᑦ ᐃᓚᐅᖃᑕᐅᔪᒪᓂᕋᕋᔭᖅᑐᓂᑦ ᐃᓄᓐᓂᒃ ᐃᓕᓴᐃᔨᓂᑦ ᑲᑎᒪᕕᔾᔪᐊᖃᑕᐅᒐᔭᕐᓗᑎᑦ ᑲᓇᑕᒥ ᑲᑎᒪᕕᔾᔪᐊᕐᓂᖏᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᓕᕆᔭᐅᓂᖏᖕᓄᑦ, ᓄᕖᕝᕙ 20-24, 2024-ᒥ ᕕᓂᐱᒡ, ᒫᓂᑑᕙᒥ.
ᐃᓄᐃᑦ ᑐᑦᑕᕐᕕᒋᔭᐅᓗᑎᑦ ᐱᓕᕆᐊᖃᕈᑎᒋᔭᐅᓂᖅᓴᐅᓗᑎᑦ, ᐃᓕᓐᓂᐊᕐᓂᓕᕆᓂᖅ ᑐᙵᕕᒋᔭᐅᓗᓂ ᑲᒪᒋᔭᐅᓂᐊᕐᓂᕋᖅᓯᒪᕗᖅ ᓄᓇᕗᒻᒥ. ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᑕ ᐱᔾᔪᑎᖓ ᐃᓕᓴᖅᓯᓇᓱᒃᓯᒪᕗᖅ ᐊᒻᒪᓗ ᓇᓗᓇᐃᖅᑕᐅᓗᓂ ᐃᓄᐃᑦ ᓇᒻᒥᓂᖅᓱᕐᓗᑎᑦ, ᐱᖃᓯᐅᑎᓗᒋᑦ ᐱᔪᓐᓇᐅᑎᖏᑦ ᐃᓅᓯᖃᕈᓐᓇᕐᓗᑕ ᐊᑐᕐᓗᑕ ᐅᖃᐅᓯᑦᑎᓐᓂ ᐊᒻᒪᓗ ᐃᓕᖅᑯᓯᑦᑎᓐᓂ. ᐃᓕᓐᓂᐊᕐᓂᓕᕆᓂᖃᕈᑦᑕ ᐃᓄᒃᑐᑦ ᐃᓄᐃᑦ ᐃᓅᓯᖏᑎᒍᑦ ᑐᑦᑕᕐᕕᖃᖅᑐᒥᒃ ᐃᓕᓐᓂᐊᕐᓂᕐᒥᒃ ᐊᒻᒪᓗ ᖃᐅᔨᒪᓂᕐᒥᒃ ᐱᒻᒪᕆᐅᕗᖅ ᑕᒪᓐᓇ ᑎᑭᑕᐅᓇᓱᐊᖅᑐᖅ ᐱᕚᓪᓕᕈᑎᒋᔭᐅᓕᖁᓪᓗᒍ.
ᓄᓇᕗᑦ ᑐᙵᕕᒃ ᑎᒥᖓ ᐃᓕᓴᖅᓯᓯᒪᕗᑦ ᐱᒻᒪᕆᐊᓗᒻᒥᒃ ᐱᓕᕆᐊᖃᖃᑦᑕᕐᓂᖏᑦ ᐃᓄᐃᑦ ᐃᓕᓴᐃᔨᖏᑦ ᓄᓇᕗᑦ ᐃᓕᓐᓂᐊᕐᓂᓕᕆᓂᖓᓂᒃ, ᐊᒻᒪᓗ ᐊᔾᔨᐅᙱᑦᑐᓂᑦ ᐊᒃᓱᕈᕈᑎᖃᖃᑦᑕᕐᓂᖏᖕᓂᒃ. ᓄᓇᕗᑦ ᑐᙵᕕᒃ ᑎᒥᖓ ᐃᓄᐃᑦ ᐃᓕᓴᐃᔩᑦ ᖃᐅᔨᓵᖑᓂᖏᖕᓂᒃ ᑐᑭᓯᒋᐊᕐᕕᖃᓚᐅᖅᓯᒪᕗᑦ 2022-ᖑᑎᓪᓗᒍ ᐊᒻᒪᓗ 93%-ᖑᔪᑦ ᑭᐅᔪᑦ ᐅᖃᖅᑐᒥᓂᐅᓪᓗᑎᑦ ᐱᕕᖃᕐᓂᖅᓴᐅᖃᑦᑕᕈᒪᒻᒪᑕᒎᖅ ᐃᓄᐃᑦ ᐃᓕᓴᐃᔩᑦ ᐃᖅᑲᓇᐃᔭᖃᑎᒌᑦᑎᐊᕐᓂᖅᓴᐅᖃᑦᑕᕐᓗᑎᑦ.
ᐃᓕᒌᔾᔫᒥᓕᖁᓪᓗᑕ ᐊᒻᒪᓗ ᐃᖅᑲᓇᐃᔭᖃᑎᖃᕋᒃᓴᖃᑦᑎᐊᕐᓗᑕ, ᐊᒻᒪᓗᑦᑕᐅᖅ ᐃᑲᔪᖅᑐᐃᔾᔪᓯᖅᑕᖃᓕᕐᓗᓂ ᐊᒻᒪᓗ ᐃᓕᓐᓂᐊᖏᓐᓇᕐᓗᑎᑦ ᐃᓄᐃᑦ ᐃᓕᓴᐃᔨᖏᑦ, ᓄᓇᕗᑦ ᑐᙵᕕᒃ ᑎᒥᖓ ᐊᐅᓪᓚᖅᑎᑦᑎᔪᒪᕗᑦ ᐃᓄᓐᓂᒃ ᐃᓕᓴᐃᔨᓂᑦ ᑲᑎᒪᕕᔾᔪᐊᕆᐊᖅᑐᖃᑕᐅᓗᑎᑦ ᑲᓇᑕᒥ ᑲᑎᒪᕕᔾᔪᐊᕐᓂᖏᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᓕᕆᔭᐅᓂᖏᓐᓂᒃ. ᑕᒪᓐᓇ ᐱᕕᖃᕈᑎᒋᔭᐅᔪᖅ ᐃᓕᓴᐃᔨᓂᒃ ᐊᒻᒪᓗ ᐱᓕᕆᖃᑎᒋᔭᐅᕙᑦᑐᓂᒃ ᑲᑐᔾᔨᔪᓐᓇᕈᑎᒋᔭᐅᓂᐊᖅᑐᖅ ᐅᖃᕈᒪᔭᕐᒥᓂᒃ ᐅᖃᕈᓐᓇᕐᓗᑎᑦ ᐊᒻᒪᓗ ᐃᖅᑲᓇᐃᔭᖃᑎᒌᓪᓗᑎᑦ ᐊᒥᓲᓂᖅᓴᐅᓕᖁᓪᓗᒋᑦ ᐃᓕᓐᓂᐊᕇᖅᑐᑦ ᒥᑭᔫᑕᐅᓂᖅᐹᓂᑦ−ᖁᑦᑎᓂᖅᐹᓄᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑏᑦ.
“ᖁᔭᓕᔪᒍᑦ ᐊᒻᒪᓗ ᐱᒻᒪᕆᒋᓪᓗᒋᑦ ᓴᐱᓕᔪᐃᑦᑑᓪᓗᑎᑦ ᐃᖅᑲᓇᐃᔭᖅᐸᑦᑐᑦ ᑕᒪᐃᓐᓂ ᐃᓄᐃᑦ ᐊᔾᔨᒌᙱᑦᑐᕈᓘᔮᓗᓐᓂᒃ ᐱᓕᕆᐊᒃᓴᖃᖅᑐᑦ ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒥᒃ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᐃᓄᐃᑦ ᐃᓕᓴᐃᔩᑦ ᐊᒥᓱᓂᑦ ᐊᔾᔨᐅᙱᑦᑐᓂᑦ ᐊᒃᓱᕈᕈᑎᖃᓲᑦ ᐊᓯᖏᑦ ᐃᓕᓴᐃᔩᑦ ᑲᒪᒋᒋᐊᖃᖅᐸᙱᒻᒪᕆᑦᑕᖏᖕᓂᒃ. ᑲᑕᓐᓇᓪᓚᕆᒍᓐᓇᕐᒪᑦ ᑕᒪᓐᓇ. ᐃᓄᐃᑦ ᐱᕕᖃᖅᑎᑕᐅᔭᕆᐊᓖᑦ ᐃᖅᑲᓇᐃᔭᖃᑎᖃᕐᓗᑎᑦ ᐊᒻᒪᓗ ᐊᓯᒥᓂᒃ ᑕᐅᑐᓪᓗᓂ ᓈᓚᓪᓗᑎᓪᓘᓐᓃᑦ ᐱᓕᕆᐊᖃᕈᒪᓕᕐᓗᑎᑦ. ᐃᓄᐃᑦ ᐃᓕᓴᐃᔩᑦ ᐃᑲᔪᖅᑐᖅᑕᐅᔭᕆᐊᓖᑦ ᐃᓕᓐᓂᐊᖅᑎᑦᑎᓗᑎᑦ ᐃᓄᒃᑐᑦ, ᐃᓄᐃᑦ ᑕᐅᑐᙳᐊᖅᓯᒪᔭᖓ ᒪᕐᕉᓐᓂᒃ ᐅᖃᓰᓐᓂᒃ ᐊᑐᕐᓗᑎᑦ ᐃᓕᓐᓂᐊᖅᑎᑦᑎᔪᖃᖃᑦᑕᕐᓗᓂ ᐱᕚᓪᓕᖅᑎᑕᐅᔪᒪᓚᐅᖅᓯᒪᓂᖓ ᐊᑐᖅᑕᐅᔪᓐᓇᖅᓯᓕᖁᓪᓗᒍ ᐊᒻᒪᓗ ᓇᒻᒥᓂᖅ ᐃᓱᒪᓕᐅᕈᓐᓇᖅᓯᓗᑎᑦ ᓄᓇᕗᒻᒥ.”
ᓄᓇᕗᑦ ᑐᙵᕕᒃ ᑎᒥᖓ ᐃᑲᔪᖅᑐᐃᓂᐊᖅᑐᑦ ᑕᓪᓕᒪᓂᑦ ᑎᑭᓪᓗᒍ ᐃᓄᓐᓂᒃ, ᐊᑕᐅᓯᖅ ᐅᓪᓗᒥᐅᔪᖅ ᐃᓕᓴᐃᔨᐅᓗᓂ ᐊᑐᓂ ᐊᕕᑦᑐᖅᓯᒪᔪᓃᙶᖅᑐᑦ ᓄᓇᕗᒻᒥ ᐊᒻᒪᓗ ᒪᕐᕉᒃ ᐅᓪᓗᒥᐅᔪᖅ ᐃᓕᓐᓂᐊᖅᑏᒃ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᕐᓗᑎᑦ, ᑲᑎᒪᕕᔾᔪᐊᕆᐊᖅᑐᕐᓗᑎᑦ ᑲᓇᑕᒥ ᑲᑎᒪᕕᔾᔪᐊᕐᓂᖏᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᓕᕆᔭᐅᓂᖏᑦᑕ. ᑕᒪᐃᓐᓂ ᐊᑭᖏᑦ ᐱᖃᓯᐅᑎᓪᓗᒋᑦ ᐊᐅᓪᓚᕈᑎᖏᑦ, ᑐᔪᕐᒥᔾᔪᑎᖏᑦ, ᐊᒻᒪᓗ ᖃᐅᑕᒫᖅᓯᐅᑎᖏᑦ ᓂᕆᔾᔪᑏᑦ ᐊᑭᓕᖅᑕᐅᒐᔭᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓄᑦ, ᑮᓇᐅᔭᖅᑎᒍᑦ ᐃᑲᔪᖅᑐᖅᑕᐅᓪᓗᑎᑦ ᒐᕙᒪᑐᖃᒃᑯᓐᓂ ᑲᓇᑕᒥ ᐱᖅᑯᓯᓕᕆᓂᕐᒧᑦ ᐊᖅᑯᓯᐅᕐᓂᕐᒧᑦ ᐊᖏᕈᑎᖓᑎᒍᑦ.
5:00 ᐅᓐᓄᓴᒃᑯᑦ ᐃᖃᓗᐃᑦ ᓯᕿᙳᔭᖓ ᒪᓕᓪᓗᒍ ᓯᑎᐱᕆ 6, 2024 ᐊᓂᒍᓚᐅᙱᓐᓂᖓᓂ, ᐅᖓᑖᓅᙱᓪᓗᒍ ᑕᒪᓐᓇ ᐃᓱᓕᕝᕕᖓ ᐅᓪᓗᖅ.ᑲᑎᒪᕕᔾᔪᐊᖃᑕᐅᒋᐊᖅᑐᕈᒪᓂᕋᐃᒍᑎ ᑎᑎᕋᖅᓯᒪᓂᖏᑦ:
• ᑐᓂᔭᐅᔪᓐᓇᖅᑐᑦ ᐃᓄᒃᑑᖓᓗᒋᑦ ᖃᓪᓗᓈᑎᑐᓪᓘᓐᓃᑦ;
• ᐅᖓᑖᓅᕆᐊᖃᙱᑦᑐᑦ 1 ᒪᑉᐱᒐᖅ – 2 ᒪᑉᐱᒑᒃ;
• ᐊᐱᖅᑯᑎ ᑭᐅᔭᐅᓗᓂ “ᖃᓄᖅ ᐃᓄᒃᑐᑦ ᐃᓕᓐᓂᐊᕐᓂᖅ ᐃᓕᖕᓄᑦ ᑐᑭᖃᕐᒪᑦ?”; ᐊᒻᒪᓗ
• ᑐᑭᓯᒋᐊᕈᑎᖃᕆᐊᓕᒃ ᐃᓄᑉ ᐅᓪᓗᒥᐅᔪᖅ ᑭᖑᓂᐊᓂᓗ ᐱᓕᕆᐊᖃᖃᑦᑕᕐᓂᑯᖓ ᐃᓕᓐᓂᐊᕐᓂᓕᕆᓂᕐᒥᒃ.
ᐃᑲᔪᖅᑕᐅᔪᒪᓐᓂᕈᕕᑦ ᑐᓂᓯᓗᑎᑦ ᑲᑎᒪᕕᔾᔪᐊᖃᑕᐅᒋᐊᖅᑐᕈᕆᒪᓂᕋᐃᒍᑎᑉ ᑎᑎᕋᖅᓯᒪᓂᖏᓐᓂᒃ, ᐅᕝᕙᓘᓐᓃᑦ ᐊᐱᖅᑯᑎᖃᕈᕕᑦ, ᖃᐅᔨᒃᑲᕈᓐᓇᖅᑕᐃᑦ ᓄᓇᕗᑦ ᑐᙵᕕᒃ ᑎᒥᖓᑕ ᐃᓄᒃᑐᑦ ᐃᓕᓐᓂᐊᕐᓂᓕᕆᓂᕐᒧᑦ ᐃᑲᔪᖅᑐᐃᔩᑦ ᐊᐅᓚᑦᑎᔨᖓ, ᐲᑕ ᐅᑦᑐᕿ ᐅᕗᖓ ᐅᖄᓚᓗᑎᑦ 867-975-7582 ᐅᕝᕙᓘᓐᓃᑦ ᐊᑭᖃᙱᑦᑐᒧᑦ ᐅᕗᖓ 1-888-646-0006.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
