ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᖁᔭᓕᔪᑦ ᐃᖅᑲᖅᑐᐃᕕᒃ ᓇᓗᓇᐃᖅᑕᖓᓂᒃ ᐃᓚᓕᐅᔾᔭᐅᓯᒪᖁᓪᓗᒍ ᑭᕙᓪᓕᖅ ᕼᐊᓪ ᐃᓕᓐᓂᐊᕆᐊᖃᑦᑕᓚᐅᖅᑐᓄᑦ ᑮᓇᐅᔭᓕᑕᐅᔾᔪᑎᒃᓴᓂᒃ

(ᔪᓚᐃ 31, 2018 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᓄᑦ (ᑐᓐᖓᕕᒃ) ᐊᖓᔪᖅᑳᖅ ᐊᓗᑭ ᑰᑦᑎᖅ ᐅᓪᓗᒥ ᐅᖃᖅᑲᐅᔪᖅ ᑐᓐᖓᕕᒃᑯᑦ ᖁᔭᓕᒋᐊᖏᑦ ᓄᓇᕗᑦ ᐃᖅᑲᖅᑐᐃᕕᖓᓂ ᐅᓐᓂᓗᓐᓂᕐᒧᑦ ᐃᖅᑲᖅᑐᐃᔨ ᐃᓚᓕᐅᔾᔨᓯᒪᖁᔨᓂᕐᒧᑦ ᓇᓗᓇᐃᕐᓯᓂᖓᓂᒃ ᐃᓕᓐᓂᐊᕆᐊᖃᑦᑕᓚᐅᖅᑐᑦ ᐊᖏᕐᕋᒥᓂᒃ ᓅᑕᐅᓪᓗᑎᒃ ᑮᓇᐅᔭᓕᑕᐅᒍᑎᖏᓐᓄᑦ ᐊᖏᖃᑎᒌᒍᑎᓄᑦ.

 

ᑖᓐᓇ ᐊᑯᓂᐊᓗᒃ ᑲᒪᒋᔭᐅᔪᖅ ᐊᐃᕙᔾᔪᑕᐅᓪᓗᓂ ᑲᓇᑕ ᒐᕙᒪᒃᑯᖏᓐᓄᑦ 2007−ᒥᓂᒃ. ᑐᓐᖓᕕᒃᑯᑦ, ᓯᒥᐊᓐ ᒥᑭᓐᖑᐊᒥᒃ ᐃᖅᑲᓇᐃᔭᖃᑎᖃᖅᑐᑎᒃ, ᐃᓕᓐᓂᐊᖅᑎᐅᓚᐅᕐᓯᒪᔪᖅ, 2013ᒥᑦ ᐊᐃᕙᔾᔪᑎᖃᕈᒪᓪᓗᓂ ᑭᕙᓪᓕᖅ ᕼᐊᓪ ᐱᓇᓱᐊᕐᕕᐅᖁᔭᐅᓪᓗᓂ ᑕᐃᒫᑦᓴᐃᓐᓇᖅ ᐅᑮᕕᒃ ᐃᓕᓐᓂᐊᕆᐊᕐᓯᒪᔪᓄᑦ ᐊᖏᕐᕋᐅᓚᐅᖅᑐᑐᑦ ᐊᒻᒪᓗ ᐊᑲᐃᑦᓱ ᕼᐊᓪ.

 

ᓄᓇᕗᑦ ᐃᖅᑲᖅᑐᐃᕕᖓᑕ ᐅᓐᓂᓗᓐᓂᕐᒧᑦ ᐃᖅᑲᖅᑐᐃᔨᖓᑕ ᓇᓗᓇᐃᕐᓯᓂᖓ ᐃᑲᔪᕐᓱᓚᐅᖅᑐᖅ ᓄᓇᕗᒻᒥ ᐃᖅᑲᖅᑐᐃᔨᒃᑯᑦ 2016 ᐃᓱᒪᓕᐅᕈᑎᒋᓚᐅᖅᑕᖓᓂᒃ ᐃᓚᓕᐅᔾᔭᐅᓯᒪᖁᓪᓗᒍ ᑭᕙᓪᓕᖅ ᕼᐊᓪ. ᑲᓇᑕ ᒐᕙᒪᒃᑯᖏᑦ ᐅᓐᓂᓗᑉᕕᒃᑰᕈᔾᔨᓕᖅᑐᑎᒃ 2016-ᒥ ᐃᓱᒪᓕᐅᕈᑕᐅᓚᐅᖅᑐᒥᒃ.

 

ᐅᓐᓂᓗᑉᕕᒃ ᐃᖅᑲᖅᑐᐃᕕᒃᑯᑦ ᐃᓱᒪᓕᐅᕈᑖ ᑐᑭᓕᒃ ᐃᓕᓐᓂᐊᕆᐊᖃᑦᑕᓚᐅᖅᑐᑦ ᑭᕙᓪᓕᖅ ᕼᐊᓪᒧᑦ ᑮᓇᐅᔭᓕᑕᐅᒍᓐᓇᕐᓯᓂᐊᓕᖅᑐᑦ ᓇᓕᒧᖏᓐᓂᒃ ᐃᓕᓐᓂᐊᕆᐊᖃᑦᑕᖅᑐᒥᓂᕐᓄ ᐊᖏᖃᑎᒌᒍᑎᒃᑯᑦ ᑮᓇᐅᔭᓕᑕᐅᒍᑕᐅᓚᐅᖅᑐᓂᒃ.

 

“ᑭᕙᓪᓕᖅ ᕼᐊᓪ ᐃᓕᓐᓂᐊᖅᑎᐅᓚᐅᖅᑐᑦ ᐊᔾᔨᖏᓐᓂᒃ ᔭᒐᐃᓂᖃᓚᐅᖅᑐᑦ ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ, ᑲᑉᐱᐊᓱᐊᓇᖅᑐᒃᑯᑦ ᐊᑉᕗᑎᑎᑕᐅᖃᑦᑕᕐᓯᒪᓪᓗᑎᒃ ᐃᓚᒥᖕᓂᒃ, ᐊᒻᒪᓗ ᐅᖃᕋᑦᓴᐅᖏᒻᒪᕆᑦᑐᒥᒃ ᓱᕈᑦᑎᖅᑕᐅᖃᑦᑕᕐᓯᒪᓪᓗᑎᒃ ᐃᓚᖓᒍᑦ. ᐊᑏᑐᖅ ᑖᓐᓇ ᐃᓱᒪᓕᐅᕈᑕᐅᓚᐅᖅᑐᖅ ᒪᑐᒍᑕᐅᓂᐊᓕᖅᑯᖅ ᐊᒻᒪᓗ ᑎᒍᓯᔾᔪᑕᐅᖔᕐᓗᓂ ᓴᐃᒻᒪᖃᑎᒌᓐᓂᕐᒥᒃ ᐅᓄᖅᑐᓄᑦ ᑭᕙᓪᓕᕐᒥ ᐃᓕᓐᓂᐊᓚᐅᕐᓯᒪᔪᒥᓂᕐᓄᑦ ᐅᑕᖅᑭᓯᒪᔪᓄᑦ ᐃᓱᒪᓕᐅᕈᑕᐅᓇᓱᐊᓚᐅᖅᑐᒧᑦ 2007-ᒥᓂᒃ,” ᐅᖃᓚᐅᖅᑐᖅ ᑰᑦᑎᖅ.

 

ᑐᓐᖓᕕᒃᑯᑦ ᐃᖅᑲᓇᐃᔭᖃᑎᖃᕐᓂᐊᖅᑐᑦ ᒐᕙᒪᒃᑯᓐᓂᒃ ᑐᐊᕕᖅᑎᑕᐅᓗᓂ ᐊᒻᒪᓗ ᐊᑭᓖᒍᑎᒃᓴᓂᒃ ᑭᕙᓪᓕᖅ ᕼᐊᓪᒥ ᐃᓕᓐᓂᐊᕆᐊᖃᑦᑕᓚᐅᖅᑐᓄᑦ ᑐᓂᔭᐅᖁᓪᓗᒋᑦ ᑮᓇᐅᔭᓕᑕᐅᒍᑎᒃᓴᖏᑦ.

 

ᑭᐅᕋᓐ ᕙᓚᐅᕋᑎ

ᑭ/ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ

ᓄᓇᕗᑦ ᑐᓐᖓᕕᒃ ᑎᒥᖓ

ᐅᖄᓚᐅᑖ: (867) 975-4941 ᐊᑭᖃᓐᖏᑦᑐᖅ 1-888-646-0006

www.tunngavik.com