(ᕕᕝᕗᐊᓕ 16, 2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᓄᕙᔾᔪᐊᕐᓇᖅ−19−ᒨᖓᔪᑦ ᐱᓕᕆᐊᑦ ᐊᓯᔾᔨᐸᓪᓕᐊᔪᑦ ᐊᑐᖅᑕᐅᖔᕐᓂᐊᓕᖅᓱᑎᒃ ᓄᑖᑦ ᐃᓱᕐᕆᐅᑏᑦ ᐊᒻᒪᓗ ᐊᑐᖅᑕᐅᒋᐊᓖᑦ.
ᓯᓚ ᓈᖕᒪᑉᐸᑦ, 6,300 ᖃᐅᔨᓴᕈᑏᑦ Artron ᓄᕙᔾᔪᐊᕐᓇᖅ-19 ᖃᐅᔨᑦᓴᐅᑎᒋᔾᔪᑕᐅᔪᓐᓇᖅᑐᑦ ᖃᐅᔨᓴᕈᑎᑦ ᑎᑭᓐᓂᐊᖅᑐᑦ ᑲᖏᕐᖠᓂᕐᒧᑦ ᐅᓪᓗᒥ. ᑖᒃᑯᐊ ᖃᐅᔨᓴᕈᑏᑦ ᑐᓂᐅᖅᑲᖅᑕᐅᓂᐊᖅᑐᑦ ᓄᓇᕗᒻᒥ ᐸᐃᕆᕕᖕᓄᑦ ᐃᑲᔫᑎᖁᓪᓗᒋᑦ ᓯᐊᒻᒪᖁᓇᒍ ᓄᕙᔾᔪᐊᕐᓇᖅ−19 ᓄᑕᖅᑲᑎᒍᑦ ᑲᑦᓱᖅᑕᐅᒍᓐᓇᑎᓐᓇᒋᑦ ᒫᓐᓇᐅᓂᖓᓂ ᐊᒻᒪᓗ ᐃᓂᒋᔭᐅᔫᔭᖃᑦᑕᖅᑐᓂᒃ ᐸᖅᑭᑦᓯᕕᓐᓂᒃ. ᑐᒡᓕᐊᓂ ᑎᑭᑎᑕᐅᓂᐊᖅᑐᑦ 4,300 ᖃᐅᔨᓴᕈᑏᑦ ᓂᕆᐅᒋᔭᐅᔪᑦ ᑕᕝᕙᓂ ᑕᖅᑭᑎᓐᓂ.
ᒫᓐᓇ ᓄᓇᕗᑦ ᒐᕙᒪᒃᑯᑦ ᐃᑲᔫᑎᖃᖃᑦᑕᓕᕐᒪᑕ ᓂᐅᕕᕐᕕᔭᓂᒃ ᐃᑲᔫᑎᓂᒃ ᓇᒧᖔᔭᕆᐊᖃᙱᑎᑕᐅᔪᓄᑦ, ᑐᙵᕕᒃᑯᑦ ᐋᖅᑭᑦᓯᓚᐅᖅᑐᑦ ᐋᖅᑭᒋᐊᕆᓂᕐᒥᒃ ᐱᓇᓱᐊᒐᑦᑎᓐᓂᒃ ᖃᐅᔨᑦᓴᐅᑎᒋᔾᔪᑕᐅᔪᓐᓇᖅᑐᓂᒃ ᖃᐅᔨᓴᕈᑎᓂᒃ ᐊᑐᐃᓐᓇᖃᖁᔨᓪᓗᑎᒃ ᓯᐊᒻᒪᔾᔭᐃᒃᑯᑕᐅᒃᑲᓂᕐᓂᐊᖅᑐᒥᒃ. ᐱᖓᑦᓯᕐᒥᓂᒃ, ᕕᕝᕗᐊᓕ 16, 2022, ᑐᙵᕕᒃᑯᑦ ᑲᒪᖃᑦᑕᔾᔮᒍᓐᓃᖅᑐᑦ ᑐᒃᓯᕋᐅᑎᓂᒃ ᓄᕙᔾᔪᐊᕐᓇᖅ-19 ᓇᒧᖔᔭᕆᐊᖃᖏᑎᑕᐅᔪᓄᑦ ᐃᑲᔫᑎᓂᒃ. ᑐᙵᕕᒃᑯᑦ ᑲᒪᒋᓂᐊᖅᑕᕋᓗᐊᖏᑦ ᑲᒪᒋᒻᒪᐃᑦᑕᓂ ᑐᒃᓯᕋᐅᑎᓂᒃ ᑐᓂᔭᐅᓚᐅᖅᑐᓂᒃ ᑐᖔᓂ ᐃᓱᐊᓂ ᐅᓪᓘᑉ.
ᑐᙵᕕᒃᑯᑦ ᐊᑐᖅᓯᒪᔪᑦ ᐅᖓᑖᓃᑦᑐᓂᒃ $3-ᒥᓕᔭᓐ ᓇᒧᖔᔭᕆᐊᖃᖏᑎᑕᐅᔪᓄᑦ ᐃᑲᔫᑎᓂᒃ ᓴᖅᑭᓚᐅᖅᓯᒪᒻᒪᓂᒃ ᓄᓇᕐᔪᐊᒥ ᖃᓂᒪᓐᓇᖅ, ᐃᓚᒋᔭᐅᓪᓗᑎᒃ $2,550,126 ᓄᓇᖃᖅᑳᖅᓯᒪᔪᓄᑦ ᓄᓇᓕᓐᓄᑦ ᐃᑲᔫᑎᒃᓴᑦ ᑮᓇᐅᔭᑦ ᐊᒻᒪᓗ $461,000 ᑲᓇᑕᒥ ᓂᕿᑎᒍᑦ ᐃᑲᔪᖅᑕᐅᕕᖕᓂᒃ ᑲᓇᑕᒥ, ᑐᓂᓯᓯᒪᓪᓗᑎᒃ ᐅᖓᑖᓄᑦ 6,000 ᓇᒧᖔᔭᕆᐊᖃᙱᑦᑐᓄᑦ ᐃᑲᔫᑎᓂᒃ ᓄᓇᕗᒻᒥ ᐃᓄᐃᑦ ᐊᖏᕐᕋᖏᓐᓄᑦ ᐃᓪᓗᒥᐅᖃᑎᒌᓄᑦ. ᓂᕿᑎᒍᑦ ᐃᑲᔫᑏᑦ ᐊᑐᐃᓐᓇᐅᖏᓐᓇᓂᐊᖅᑐᑦ ᐊᕕᑦᑐᖅᓯᒪᓂᐅᔪᑦ ᐃᓄᐃᑦ ᑲᑐᔾᔨᖃᑎᒌᖏᑎᒍᑦ ᓄᓇᕗᒻᒥ ᐃᓄᓐᓄᑦ.
ᑐᙵᕕᒃᑯᑦ ᐃᓕᓴᖅᓯᒍᒪᔪᑦ ᐃᓄᓐᓂᒃ ᒪᓕᖃᑦᑕᖅᓯᒪᔪᓂᒃ ᒐᕙᒪᒃᑯᓐᓂᒃ ᐋᓐᓂᐊᖅᑐᓕᕆᔨᒃᑯᑦ ᒪᓕᒃᑕᐅᖁᔭᖏᓐᓂᒃ, ᑲᑎᓗᐊᖃᑦᑕᖏᓐᓂᕐᒧᑦ ᐊᒻᒪᓗ ᑲᑦᓱᖅᑕᐅᓯᒪᓂᕐᒧᑦ. ᐃᕝᕕᑦ ᓇᖕᒥᓂᖅ ᐃᑯᓪᓚᑎᑦᓯᖃᑕᐅᓯᒪᔪᑎᑦ ᓯᐊᒻᒪᖁᓇᒍᑦ ᓄᕙᔾᔪᐊᕐᓇᖅ-19 ᓄᓇᕗᒻᒥ ᐊᒻᒪᓗ ᐱᖃᓐᓇᕆᔭᓐᓂᒃ ᐃᓚᓐᓂᓪᓗ ᐊᑦᑕᓇᐃᖅᓯᒪᑦᓯᓂᕐᒥᒃ.
-30-
ᑐᑭᓯᒋᐊᒃᑲᓂᕐᕕᒃᓴᑦ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᖃᙱᑦᑐᖅ: 1-888-646-0006
www.tunngavik.com
ᓘᓯ ᒪᐃᓈᑦ
ᑐᑭᒧᐊᒃᑎᑦᑎᔨᒧᑦ ᑭᖑᕝᕕᐅᑎᓯᒪᔪᖅ ᐃᓄᓐᓄᑦ ᐱᓕᕆᐊᒃᓴᓂᒃ ᐱᔨᑦᓯᕈᑎᓂᓪᓗ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 645-5400 ᐊᑭᖃᙱᑦᑐᖅ: 1-888-236-5400
www.tunngavik.com
