ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᖁᕕᐊᓲᑎᖃᕐᐳᑦ ᑲᑎᒪᔨᕋᓛᑦ ᑲᔪᓯᑎᑦᓯᖏᓐᓂᖓᓂᒃ ᐱᖁᔭᒃᓴᖅ 37 ᐊᒻᒪᓗ ᓯᕗᒧᐊᒃᐸᓪᓕᐊᒍᒪᓂᕐᒥᓄᑦ ᑐᒃᓯᕋᐅᑎᖓᓂᒃ

(ᒪᐃ 5, 2017 – ᐃᖃᓗᐃᑦ, ᓄᓇᕗᑦ)     ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᓪᓗᒥ ᑐᓐᖓᓴᐃᖅᑲᐅᔪᖅ ᑲᑎᒪᔨᕋᓛᑦ ᒪᓕᒐᑦᓴᓐᖑᖁᔭᐅᓯᒪᔪᒧᑦ ᐱᖁᔭᒃᓴᖅ 37 ᓴᒃᑯᑕᐅᓂᖓᓂᒃ.

 

“ᑐᓐᖓᕕᒃᑯᑦ ᓇᑯᕐᓴᖅᑐᑦ ᑲᑎᒪᔨᕋᓛᑦ ᑲᔪᓯᖁᔨᓐᖏᓐᓂᖏᓐᓂᒃ ᐱᖁᔭᒃᓴᖅ 37 ᒪᓕᒐᓐᖑᖅᑎᑕᐅᓇᓱᐊᕐᓂᖓ. ᖃᓱᔫᒥᒍᑎᖓ ᐃᓕᓴᕐᓯᓚᐅᕐᓂᖏᓐᓂᒃ ᐃᓄᒃᑎᑐᑦ ᐅᖃᐅᓯᖅ ᐊᑐᖅᑕᐅᒍᓐᓃᐸᓪᓕᐊᑐᐃᓐᓇᕐᓂᖓ ᑐᐊᕕᕐᓇᕐᒪᑦ. ᓄᓇᕗᑦ ᒥᓂᔅᑕᐅᑏᑦ ᑲᑎᒪᔨᖏᑦ ᐊᖏᖃᑎᖃᕈᓇᕋᓗᐊᕐᐳᑦ ᑲᑎᒪᔨᕋᓛᓄᑦ ᑲᔪᓯᑎᑕᐅᒍᒪᔪᒥᒃ ᐱᕙᓪᓕᐊᓂᐊᓕᕋᑦᑕ ᐱᓕᕆᐊᕆᕙᓪᓕᐊᓗᒍ ᐋᖅᑭᒋᐊᖃᓪᓚᑖᕐᓂᖓ,” ᐅᖃᖅᑐᖅ ᑰᑦᑎᖅ.

 

ᑐᓐᖓᕕᒃᑯᑦ ᐊᒻᒪᓗ ᑕᒪᕐᒥᒃ ᐱᖓᓱᑦ ᐊᕕᑦᑐᕐᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᕋᓛᓄᑦ ᐊᒻᒪᓗ ᓯᕗᓕᖅᑎ ᐲᑕ ᑕᑉᑑᓇᒧᑦ ᓴᒃᑯᐃᔭᐅᖁᔨᓯᒪᒻᒪᑕ ᐱᖁᔭᒃᓴᖅ 37 GN, ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᐊᓯᖏᑦ ᐱᓕᕆᖃᑕᐅᕙᑦᑐᑦ ᐱᕕᒃᓴᖃᖅᑎᑕᐅᒋᐊᖁᓪᓗᒋᑦ ᐋᖅᑭᑦᓱᐃᓗᑎᒃ ᐱᐅᓂᕐᐹᒥᒃ ᐃᓄᒃᑎᑑᕐᓂᖅ ᐅᖃᐅᓯᖅ ᐃᓕᓐᓂᐊᖅᑕᐅᒍᑎᒃᓴᖓᓂᒃ. ᓯᕗᓪᓕᕐᐹᖅ ᓯᕗᓪᓕᐅᔾᔭᐅᒋᐊᓕᓐᓂ ᐋᖅᑭᑦᓱᐃᓂᖅ ᐃᑲᔫᑎᓕᖕᓂᒃ ᑮᓇᐅᔭᓕᑕᐅᓯᒪᑦᓯᐊᖅᑐᓂᓪᓗ ᐃᓄᐃᑦ ᐃᖅᑲᓇᐃᔭᕐᓂᕐᒧᑦ ᐸᕐᓇᐅᑎᖏᑦ ᐃᓕᓐᓂᐊᕐᓂᓕᕆᔨᒃᑯᑎᒍᑦ ᐱᓕᖕᒪᒃᓴᖅᑕᐅᓗᑎᒃ ᐊᒻᒪᓗ ᐃᖅᑲᓇᐃᔭᖅᑎᑖᕐᓂᕐᒥᒃ ᐃᓄᓐᓂᒃ ᐃᓕᓴᐃᔨᓂᒃ, ᐃᓕᓐᓂᐊᕕᖕᓂ ᐊᖓᔪᖅᑳᓂᒃ ᐊᒻᒪᓗ ᐊᖏᔪᖅᑲᐅᑎᓃᑦᑐᓂᒃ ᐱᕕᒃᓴᖃᕈᓐᓇᖁᓪᓗᒍ ᐃᑲᔫᑎᓕᖕᒥᒃ ᐃᓄᒃᑎᑑᕐᓂᕐᒥᒃ ᐅᖃᐅᓯᕐᒥᒃ ᐃᓕᓴᐃᓂᖅ ᐊᒻᒪᓗ ᑎᑭᐅᑎᓗᑎᒃ ᐃᓄᓐᓂᒃ ᐃᖅᑲᓇᐃᔭᖅᑎᖃᕐᓂᕐᒧᑦ ᐸᕐᓇᑕᐅᓯᒪᔪᒥᒃ 85%, ᐊᖏᕈᑕᐅᓯᒪᓂᖓᒍᑦ ᐃᓛᒃᑯᑦ 23 ᓄᓇᕗᒻᒥ ᐊᖏᕈᑎᓂ.

 

ᑐᓐᖓᕕᒃᑯᑦ ᑐᒃᓯᕋᓕᖅᑭᑦᑖᓯᒪᒻᒪᑕ ᑲᑐᔾᔨᓂᒃᑯᑦ, ᐋᖅᑭᑦᓲᑎᒃᓴᐅᓂᐊᖅᑐᓂᒃ NTI-GN ᐱᓕᖕᒪᒃᓴᐅᑕᐅᓂᐊᖅᑐᓂᒃ ᐃᓕᓴᐃᔨᐅᓂᕐᒧᑦ ᐊᒻᒪᓗ ᐃᖅᑲᓇᐃᔭᖅᑐᓕᕆᓂᖅ ᑲᔪᓯᑎᑕᐅᓵᓕᒍᑎᒃᓴᖓᓂᒃ ᐊᐅᓚᑦᓯᒍᑎᒃᓴᓕᐊᖑᓯᒪᔪᖅ ᐃᓄᐃᑦ ᐃᖅᑲᓇᐃᔭᕐᓂᕐᒧᑦ ᐸᕐᓇᐅᑎᖏᑦ. ᐱᓇᓱᐊᕋᑦᓴᓕᐊᖑᓯᒪᔪᖅ ᑲᒪᖃᑕᐅᒍᓐᓇᖁᓪᓗᒋᑦ ᑐᑭᒧᐊᒍᑎᒃᓴᓂᓪᓗ ᓄᓇᓕᖕᓂᒃ ᖃᓄᖅ ᐱᓕᖕᒪᒃᓴᕐᓂᖅ ᐊᒻᒪᓗ ᐃᖅᑲᓇᐃᔭᖅᑎᑖᕐᓂᖅ ᐃᓄᐃᑦ ᐃᓕᓐᓂᐊᕐᕕᖓᓂ ᐱᓕᕆᔨᒋᔭᐅᓂᐊᖅᑐᓂᒃ ᐊᐅᓚᑕᐅᒋᐊᖃᕐᒪᖔᖅ ᐊᒻᒪᓗ ᐊᑐᖅᑕᐅᖏᓐᓇᓕᕐᓗᓂ. ᑐᓐᖓᕕᒃᑯᑦ ᐊᐱᕆᓯᒪᔪᑦ GN−ᑯᓐᓂᒃ ᓴᖅᑮᖁᓪᓗᒋᑦ ᑕᑯᑦᓴᐅᑎᑦᓯᓗᑎᒃ ᐊᖏᕈᑎᒋᓯᒪᔭᒥᒍᑦ ᑐᓂᓯᒪᓂᕐᒥᓂᒃ ᑮᓇᐅᔭᖅᑑᑎᒃᓴᖃᖅᑎᑦᓯᓂᕐᒥᒃ ᓴᓂᕐᕙᐃᓯᒪᓂᒃᑯᑦ, ᐋᖅᑭᑦᓱᐃᓯᓐᓈᕐᓗᑎᒃ $50 ᒥᓕᔭᓐ ᐃᓛᒃᑯᑦ 23 ᑲᔪᓯᑎᑦᓯᓂᕐᒧᑦ ᑮᓇᐅᔭᓕᑕᐅᒍᑎᒋᓚᐅᖅᑕᖓᓂᒃ ᐊᑐᕋᑦᓴᒥᒃ ᑖᑦᓱᒧᖓ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: