ᓴᒃᑯᑕᐅᑲᐅᑎᒋᔭᕆᐊᓕᒃ
(ᐋᒡᒌᓯ 30, 2024 – ᒥᑦᑎᒪᑕᓕᒃ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᓚᐅᖅᑐᑦ ᒥᑦᑎᒪᑕᓕᖕᒥ ᑕᒫᓂ ᐱᓇᓱᐊᕈᓯᕐᒥ ᐱᕙᓪᓕᐊᑎᑦᑎᓂᖃᕆᐊᓯᒃᑲᓐᓂᖅᑐᑎᑦ ᓄᓇᕗᑦ ᑐᙵᕕᒃ ᑎᒥᖓᑕ ᖃᓄᖅᑑᕈᑎᖓᓂᒃ ᐊᒻᒪᓗ ᓯᕗᓪᓕᐅᔾᔭᐅᖁᔭᖏᑦ ᐱᓕᕆᕝᕕᖓᑕ ᐸᕐᓇᐅᑎᖏᖕᓂᒃ ᑲᒪᓪᓗᑎᑦ, ᐊᒻᒪᓗ ᐱᖁᔨᕗᖔᕈᑎᓂᑦ ᑲᔪᓯᑎᑦᑎᓪᓗᑎᑦ ᑮᓇᐅᔭᓂᑦ ᐊᑐᕐᓂᐊᖅᑐᑎᑦ ᐱᖁᑎᕐᔪᐊᓄᑦ, ᐃᒡᓗᓕᕆᓂᕐᒧᑦ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖅᑕᐃᓕᒪᑎᑦᑎᓂᕐᒧᑦ, ᐊᒻᒪᓗ ᐊᖏᖅᓯᓚᐅᖅᑐᑎᑦ ᐅᖃᐅᓯᕐᖓᖅ ᑐᙵᕕᖓᓂᒃ.
ᐸᕐᓇᐅᑎᓕᐅᕈᓐᓇᖁᓪᓗᒋᑦ ᐊᒻᒪᓗ ᐱᔭᕇᖅᓯᓗᑎᑦ ᐱᖁᑎᕐᔪᐊᓂᒃ ᐱᓕᕆᐊᒃᓴᓂᑦ ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑲᔪᓯᑎᑦᑎᓚᐅᖅᑐᑦ ᐱᖁᔨᕗᖔᕈᑎᒥᒃ ᓴᓂᕐᕙᐃᓗᑎᑦ $100 ᒥᓕᐊᓐᓂᒃ ᑮᓇᐅᔭᓂᑦ ᑲᓇᑕᒥ ᒐᕙᒪᒃᑯᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᖕᓄᑦ ᐱᖁᑎᕐᔪᐊᑦ ᑮᓇᐅᔭᖃᕐᕕᓂᖓᒃ (ICIF). ᑕᐃᒪᐃᓐᓂᖓᓄᑦ ᑮᓇᐅᔭᓂᑦ ᐊᑐᖅᑐᑎᑦ ᐱᓕᕆᐊᖃᕐᓂᐊᕐᓗᑎᑦ ᓴᙵᑦᑎᑕᐅᓚᐅᖅᑐᑦ ᐊᑐᐊᒐᑦ ᐊᒻᒪᓗ ᐱᓕᕆᐊᖃᕐᓂᖏᖕᓄᑦ, ᖄᖓᒍᒃᑲᓐᓂᖅ ᐃᒪᓐᓇᐅᔪᑦ $11.6 ᒥᓕᐊᓐ ᑮᓇᐅᔭᑦ ᕿᑐᕐᖏᐅᕈᑎᖏᓪᓗ ᑕᒪᒃᑯᓄᖓ ᑮᓇᐅᔭᐅᓂᐊᖅᑐᓄᑦ ᓴᓂᕐᕙᖅᑕᐅᓚᐅᕆᕗᑦ ᑖᒃᑯᓄᖓ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ.
ᑲᑎᒪᔩᑦ ᐊᖏᖅᓯᓚᐅᖅᑐᑦ ᐃᒪᓐᓇᓂᑦ $11.2 ᒥᓕᐊᓐᓂᒃ ᑮᓇᐅᔭᓂᑦ ᐊᑐᖅᑕᐅᒐᔭᖅᑐᑦ ᑮᓇᐅᔭᑦ ᐸᕐᓇᐅᑎᖏᑦ ᑲᓇᑕᒥ ᐃᓄᐃᑦ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᖃᓄᖅᑑᕈᑎᖓᓄᑦ. ᐸᕐᓇᐅᑎ ᐃᑲᔪᖅᑐᐃᔪᑦ ᖃᓄᐃᑦᑕᐃᓕᔪᓂᑦ ᓄᓇᓕᖕᓂᑦ, ᐱᓕᕆᐊᖃᕈᒪᓕᖅᑎᑦᑎᔪᑦ ᐱᐅᔪᒃᑯᑦ ᐃᓄᖕᓂᒃ ᒪᒃᑯᑦᑐᓂᑦ, ᐃᑲᔪᖅᑐᐃᔾᔪᑎᒻᒪᕆᖏᖕᓂᓪᓗ ᐊᑐᐃᓐᓇᐅᒪᓕᖅᑎᑦᑎᓂᓖᑦ ᓄᑕᖅᑲᓄᑦ ᖁᓄᔪᕐᓂᐊᖅᑕᐅᓚᐅᖅᓯᒪᔪᓄᑦ, ᑎᑎᕋᖅᓯᒍᓐᓇᖅᑐᓪᓗ ᐃᓄᐃᑦ ᐱᖅᑯᓯᑐᖃᖅᑎᒍᑦ ᖃᐅᔨᒪᓂᖏᖕᓂᒃ ᐃᓱᒪᒃᑯᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐊᒻᒪᓗ 2SLGBTQ+, ᐊᒻᒪᓗ ᐃᑲᔪᖅᑐᐃᔾᔪᑎᖃᖅᑎᑦᑎᔪᑦ ᐱᓇᓱᐊᒐᖏᑦ ᖃᓄᐃᑦᑑᒻᒪᖔᑕ ᐃᑲᔪᖅᑐᐃᔾᔪᑏᑦ ᓇᓗᓇᐃᔭᖅᑕᐅᓯᒪᓪᓗᑎᑦ ᐱᓗᐊᖅᑐᒋᑦ ᐊᒥᓲᓗᐊᖅᑐᑦ ᐃᓅᓯᕐᒥᓂᒃ ᑭᐱᓯᖃᑦᑐᖅᑐᑦ ᓄᓇᕗᒻᒥ.
ᑲᑎᒪᔩᑦ ᐊᖏᖅᓯᓚᐅᕐᒥᔪᑦ ᐱᖁᔨᕗᖔᕈᑎᒥᒃ ᑮᓇᐅᔭᖃᖅᑎᑕᐅᖁᓪᓗᒍ ᓴᓇᔭᐅᓂᖏᑦ ᐱᖓᓱᑦ ᐊᖏᕐᕋᒥ ᐋᓐᓂᖅᑎᖅᑕᐅᕙᑦᑐᑦ ᕿᒫᕕᓐᓂ ᖃᒪᓂ’ᑐᐊᕐᒥ, ᐅᖅᓱᖅᑑᖅ ᐊᒻᒪᓗ ᐸᖕᓂᖅᑑᕐᒥ. ᑕᒪᓐᓇ ᑲᒪᒋᔭᖃᕐᓂᐊᕐᓂᕋᖅᓯᒪᓂᖏᖕᓄᑦ ᐱᔭᕇᖅᑕᐅᔪᓐᓇᓕᓛᖅᑐᑦ ᕿᒫᕖᑦ ᑐᓴᖅᑎᑕᐅᓚᐅᖅᓯᒪᓪᓗᓂ ᑕᒪᓐᓇ ᒫᑦᓯ 2021−ᖑᑎᓪᓗᒍ. ᑕᐃᒪᙵᓂᑦ, ᓄᓇᕗᑦ ᑐᙵᕕᒃ ᑎᒥᖓ, ᓄᓇᓕᐅᔪᓪᓗ, ᐱᔭᕇᖅᓯᓯᒪᓕᖅᑐᑦ ᑎᑎᖅᑐᒐᐅᔭᖅᑕᐅᓯᒪᓂᖓᓂᒃ ᐊᒻᒪᓗ ᑮᓇᐅᔭᒃᓴᓂᑦ ᐱᔪᓐᓇᖅᓯᓯᒪᓕᖅᑐᑎᑦ ᑲᓇᑕᒥ ᐊᑐᖅᑐᐊᖅᑐᓕᕆᔨᒻᒪᕇᑦ ᐊᒻᒪᓗ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᙵᖓ ᓄᓇᖃᖅᑳᖅᓯᒪᔪᓄᑦ ᕿᒫᕕᒃᓴᑦ ᐊᒻᒪᓗ ᐊᖏᕐᕋᖅᑖᓛᑐᐃᓐᓇᖅᑐᓄᑦ ᓇᔪᕐᕕᒃᓴᑦ ᐃᒡᓗᖃᖅᑎᑦᑎᒍᑏᑦ ᐱᓕᕆᐊᕆᔭᐅᔪᑦ.
ᓄᓇᕐᔪᐊᕐᒥ ᖁᓖᑦ ᐊᕐᕌᒎᔪᓄᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐃᓕᓴᕆᔭᐅᓯᒪᓂᖓᓄᓪᓕ, ᓄᓇᕗᑦ ᑐᙵᕕᒃ ᑎᒥᖓ ᑲᑎᒪᓂᖃᖅᑎᑦᑎᓚᐅᖅᓯᒪᔪᑦ ᖁᕐᓗᖅᑑᕐᒥ ᓄᕖᕝᕙ 2023−ᖑᑎᓪᓗᒍ ᑕᒪᒃᑮᒃ ᐸᕐᓇᐅᑎᓕᐅᖁᔭᐅᓪᓗᑎᑦ ᐃᓄᒃᑐᑦ ᐊᑐᓕᖅᑭᑦᑎᑕᐅᓂᖓ, ᑕᓱᖅᑕᐅᓂᖓ ᐊᒻᒪᓗ ᐋᖅᑭᐅᒪᐃᓐᓇᖅᑎᑕᐅᓂᖓ. ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᕿᒥᕐᕈᓇᓚᐅᕆᕗᑦ ᐸᕐᓇᐅᑎᒥᒃ, ᐅᖃᐅᓯᕐᖓᑦ ᑐᙵᕕᖓᓂᒃ, ᐃᓄᐃᑦ ᑲᑐᔾᔨᖃᑎᒌᖏᑦ ᐱᓇᓱᐊᒐᖃᑦᑎᐊᕐᓂᖅᓴᐅᓕᕋᔭᕐᒪᑕ ᐃᓕᓐᓂᐊᕐᓂᓕᕆᓂᕐᒥᒃ, ᐅᖃᐅᓯᕐᒥᒃ ᐊᔪᕈᓐᓃᖅᓴᕐᓂᖅ, ᓄᓇᓕᓐᓂ ᐱᓕᕆᐊᑦ, ᐅᖃᐅᓯᖅ ᑎᑎᕋᖅᑕᐅᓯᒪᓂᖓᓂᒃ, ᐱᕙᓪᓕᐊᔪᓕᕆᓂᖅ ᐊᒻᒪᓗ ᓴᓇᙳᐊᖅᑐᓕᕆᓂᕐᒥᒃ.
ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᒪᒋᔭᖃᕐᓂᐊᕐᓂᕋᖅᓯᒪᕗᑦ ᐱᐅᓯᑎᑕᐅᒋᐊᕐᔫᒥᓗᓂ ᓴᖅᑭᔮᖅᑎᑕᐅᖃᑦᑕᕐᓗᑎᑦ ᐊᒻᒪᓗ ᐊᑑᑎᖃᑦᑎᐊᖃᑦᑕᕐᓗᑎᑦ ᑮᓇᐅᔭᓕᕆᓂᕐᒧᑦ ᑐᑭᓯᒋᐊᕈᑎᖏᑦ ᐃᓄᖕᓄᑦ. ᑕᒻᒪᖅᓯᒪᔪᕐᓂᐊᖅᑕᓚᐅᖅᑎᓪᓗᒋᑦ ᑮᓇᐅᔭᖅᑎᒍᑦ ᑎᑎᖅᑲᖏᓐᓂᒃ, ᓯᓚᑖᓃᑦᑐᖅ ᑕᒻᒪᖅᓯᒪᔪᕐᓂᐊᖅᑎ ᓴᒃᑯᐃᓚᐅᖅᓯᒪᕗᖅ ᓴᓗᒪᔪᒥᒃ, ᐋᖅᑭᒋᐊᖅᓯᒪᙱᑦᑐᒥᒃ ᑕᒻᒪᖅᓯᒪᔪᕐᓂᐊᕐᓂᕐᒧᑦ ᐃᓱᒪᒋᔭᕐᒥᓂᒃ ᐊᒻᒪᓗ ᑕᐅᑐᓐᓂᑯᒥᓂᖏᖕᓂᒃ ᐅᖃᖅᓯᒪᓪᓗᑎᑦ ᐱᐅᓯᕚᓪᓕᕆᐊᖃᕐᓂᕐᒥᓂᒃ ᑮᓇᐅᔭᖅᑎᒍᑦ ᐅᓂᒃᑳᖏᑕ ᓴᒃᑯᑕᐅᕙᑦᑐᓂᑦ. ᓄᓇᕗᑦ ᑐᙵᕕᒃ ᑎᒥᖓ ᐱᕈᖅᐸᓪᓕᐊᖏᓐᓇᖅᑎᓪᓗᒍ, ᑮᓇᐅᔭᖅᑎᒍᑦ ᐊᐅᓚᔾᔪᓯᖏᑦ ᐊᒻᒪᓗ ᑲᑐᔾᔨᖃᑎᒌᑉ ᐊᐅᓚᑦᑎᒍᓯᖏᑦ ᐊᐅᓚᓂᖃᑦᑎᐊᖅᓯᒪᕗᑦ ᑲᖐᓇᕈᓐᓃᖅᑎᑦᑎᓂᖃᖅᓯᒪᓪᓗᑎᑦ ᓱᓕᔪᒃᑯᑦ ᑲᒪᒋᔭᖃᕈᓐᓇᑦᑎᐊᕐᓂᖏᑦ ᐅᓂᒃᑲᐅᑕᐅᔪᑦ ᑐᑭᓯᒋᐊᕈᑏᑦ.
ᑭᓱᑐᐃᓐᓇᐃᑦ ᐊᑭᑦᑐᐸᓪᓕᐊᔪᐊᓘᓂᖏᖕᓄᓪᓕ ᓱᓕ ᐊᔭᐅᕆᓯᒪᓪᓚᕆᒃᓯᒪᕗᖅ ᓱᓕ ᐊᐅᓚᑦᑎᒍᓪᓗᐊᑕᓂᒃ, ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐅᒡᒍᐊᕐᓂᕋᓚᐅᖅᑐᑦ ᑮᓇᐅᔭᑦ ᓄᓇᕗᒻᒥ ᐸᐸᑦᑎᔨᒃᑯᓐᓂ ᖃᑦᑏᓐᓇᕈᕆᐊᖅᓯᒪᓕᖅᑐᑦ ᐃᒪᓐᓇᓂᒃ $28 ᒥᓕᐊᓐ ᑮᓇᐅᔭᓂᑦ − ᑭᒡᒐᖅᑐᐃᔪᑦ 39% ᖃᑦᑏᓐᓇᕈᕆᐊᖅᓯᒪᓕᕐᓂᖏᑦ ᑮᓇᐅᔭᑦ ᐃᓯᖅᐸᓪᓕᐊᔪᓂᑦ 2023-2024 ᑮᓇᐅᔭᓕᕆᓐᓇᑉ ᐊᕐᕌᒍᐊᓄᑦ.
ᐊᓯᖏᑦ ᐱᔾᔪᑏᑦ ᐅᖃᐅᑕᐅᔪᑦ ᑲᑎᒪᓂᖏᖕᓂ ᐱᖃᓯᐅᑎᓚᐅᕐᒥᔪᑦ ᓈᓚᒃᑐᑎᑦ ᖃᓄᐃᓕᐅᖅᓯᒪᓕᕐᓂᖏᖕᓂᒃ ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᖃᐅᔨᓵᖅ, ᓴᖅᑭᖅᑎᑕᐅᓚᐅᖅᓯᒪᔪᖅ ᐊᐅᔭᕋᑖᖅ ᒥᑦᑎᒪᑕᓕᖕᒥ, ᐊᒻᒪᓗᑦᑕᐅᖅ ᑲᓇᑕᑉ ᐊᖓᔪᖅᑳᖓᓂᒃ ᐃᓄᐃᑦ ᑭᒃᑯᑐᐃᓐᓇᐃᑦ ᐋᓐᓂᐊᖅᑕᐃᓕᒪᑎᑕᐅᓂᖏᖕᓄᑦ ᓘᒃᑖᖅ, ᑖᒃᑕ ᑐᕇᓴ ᑖᒻ ᓂᐅᕐᕈᖃᑦᑕᕐᓂᕆᓚᐅᖅᓯᒪᔭᖓ ᓄᓇᕗᒻᒥ ᓄᓇᓕᖏᖕᓄᑦ ᐊᑦᑐᖅᑕᐅᓯᒪᔪᑦ ᐊᐃᑦᑐᐃᔪᐊᓘᖃᑦᑕᖅᑐᑎᑦ ᐳᕙᒡᓗᖕᓂᕐᒥᒃ, ᐱᖃᓯᐅᑎᓪᓗᒍ ᒥᑦᑎᒪᑕᓕᒃ.
ᕿᑎᖅᑰᖑᑎᓪᓗᒍ ᐅᓐᓄᖓᖕᓂ, ᑲᑎᒪᔩᑦ ᑕᑯᔭᖅᑐᓚᐅᖅᑐᑦ ᐊᕐᓇᐃᑦ ᕿᒫᕕᖓᓂᒃ, ᒪᑐᐃᖓᓯᒪᓕᖅᑐᖅ ᐊᒻᒪᓗ ᐊᐅᓚᓂᖃᖅᓯᒪᓕᖅᑐᓂ ᓄᕖᕝᕙ 2023−ᒥᓂᑦ. ᒥᑦᑎᒪᑕᓕᖕᒥ ᕿᒫᕕᒃ ᒪᑐᐃᖅᑕᐅᓛᕆᐊᒃᓴᖅ ᑐᓴᖅᑎᑕᐅᓚᐅᖅᓯᒪᕗᖅ ᓄᓇᕗᑦ ᑐᙵᕕᒃ ᑎᒥᖓᓄᑦ ᒫᑦᓯ 2021-ᖑᑎᓪᓗᒍ. ᓄᓇᓕᒃ ᓂᕈᐊᖅᓯᒪᔪᑦ ᓴᓇᒋᐊᕈᒪᓪᓗᑎᑦ ᐃᒡᓘᔭᕇᖅᑐᒥᒃ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓ ᑮᓇᐅᔭᓂᑦ ᐊᑐᖅᓯᒪᓕᖅᑐᑦ ᐃᒪᓐᓇᓂᑦ $2.6 ᒥᓕᐊᓐ ᑮᓇᐅᔭᓂᑦ ᓴᓇᒋᐊᖅᑕᐅᖁᓪᓗᒍ. ᑲᑎᒪᔩᑦ ᐃᓕᓐᓂᐊᓚᐅᕆᕗᑦ ᐸᖅᑭᔭᐅᓂᖏᖕᓂᒃ ᐊᒻᒪᓗ ᐱᓕᕆᐊᓂᒃ ᕿᒫᕕᑉ ᐊᑐᐃᓐᓇᐅᒪᕝᕕᒋᓲᖏᑦ ᐊᕐᓇᓄᑦ ᐊᒻᒪᓗ ᓄᑕᖅᑲᓄᑦ ᕿᒫᑎᓪᓗᒋᑦ ᐋᓐᓂᖅᑎᖅᑕᐅᔪᖃᖃᑦᑕᖅᑎᓪᓗᒍ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
