ᓴᒃᑯᑕᐅᑲᐅᑎᒋᔭᕆᐊᓕᒃ
(ᔫᓂ 24, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᖅᑐᐃᕕᒻᒥ ᐅᓂᒃᑳᖅᑲᐅᕗᑦ ᐱᕋᔭᑦᑕᒥᓃᑦ ᐊᑦᑐᖅᑕᐅᓂᖓᑕ ᐅᓂᒃᑳᖓᓂᒃ ᓄᓇᕗᑦ ᐃᖅᑲᖅᑐᐃᕕᒻᒥ ᐅᓪᓗᒥ. ᓄᓇᕗᑦ ᑐᙵᕕᒃ ᑎᒥᖓ ᐅᑕᖅᑭᔪᑦ ᐃᖅᑲᖅᑐᐃᔨᒧᑦ ᖃᓄᐃᑕᐅᓂᐊᕐᓂᕐᒥᓂᒃ ᑲᕆᒪ ᒪᓐᔨ, ᓂᕆᐅᒋᔭᐅᓪᓗᓂ ᖃᓄᐃᑕᐅᒐᔭᕐᓂᖓᓂᒃ ᕿᑎᖅᑰᑕᐅᓕᖅᐸᑦ, ᔫᓂ 27, 2024, ᓄᓇᕗᑦ ᐃᖅᑲᖅᑐᐃᕕᖓᓂ ᓴᓪᓗᓪᓗᓂ ᐱᕋᔭᒃᑐᓂ ᐊᑎᓕᐅᖅᓯᔪᒥᓂᐅᓂᖓᓂᒃ ᐃᓄᓪᓚᑦᑖᖑᙱᑦᑑᒃ ᒪᕐᕈᓕᐊᖏᒃ ᐸᓂᖏᒃ ᐊᒥᕋ ᐊᒻᒪᓗ ᓇᑕᐃᔭ ᒋᐅᓪ ᑕᐃᒃᑯᑎᒎᓇᖅ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓄᑦ, ᑮᓇᐅᔭᖅᑖᖅᑐᒥᓂᐅᓪᓗᑎᒃ ᐊᒻᒪᓗ ᐱᕕᖃᖅᑎᑕᒥᓂᐅᓪᓗᑎᒃ ᐋᖅᑭᒃᑕᐅᓯᒪᔪᓄᑦ ᓄᓇᕗᒻᒥᐅᑦ ᐃᓄᖏᖕᓄᑦ. ᐃᖅᑲᖅᑐᐃᔨ ᒪᓄᑦᓯᐅ ᐃᓱᒪᓕᐊᒥᓂᕐᓂᒃ ᓴᒃᑯᑕᐅᓯᒪᖁᔭᐅᓂᖓᓂᒃ ᐃᖅᑲᖅᑐᐃᔨᒧᑦ ᖃᓄᐃᑕᐅᓇᓱᐊᕐᓂᖓᓂᒃ ᖁᔭᓈᖅᓯᖅᑲᐅᕗᖅ ᐊᒻᒪᓗ ᑎᒍᔭᐅᒃᑲᖅᑐᓂᐅᒃ ᐃᖅᑲᖅᑐᐃᔨᒧᑦ ᖃᓄᐃᑕᐅᓇᓱᐊᕐᓂᖓᓂᒃ.
“ᓄᓇᖃᖅᑳᖅᓯᒪᔫᓂᕋᖅᑐᑦ ᑲᓇᑕᒥ ᐅᖃᐅᑕᐅᖃᑦᑕᕐᓂᖅᓴᐅᓕᕐᒪᑕ” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᐅᓚᑦᓯᔨᒻᒪᕆᒃ ᑭᓕᒃᕙᒃ ᖃᑉᓗᓈᖅ. “ᐋᓐᓂᕈᑎᒋᔭᐅᓯᒪᔪᑦ ᑕᒪᒃᑯᐊ ᓴᓪᓗᔾᔪᑎᖃᖅᑐᒥᓂᐅᔪᑦ ᐃᓅᓂᕋᖅᑐᑎᑦ ᒪᒥᓴᖅᑎᒐᒃᓴᐅᙱᓚᑦ, ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓ ᓂᕆᐅᑦᑐᑦ ᑲᕆᒪ ᒪᓐᔨᑉ ᐃᖅᑲᖅᑐᐃᔨᒧᑦ ᐃᓱᒪᓕᐅᕈᑕᐅᓂᐊᕐᓂᖓᓂᒃ ᖃᓄᐃᓕᔭᐅᓂᐊᕐᒪᖔᖅ ᓴᙱᔪᒥᒃ ᐊᔪᕆᑕᐅᓗᓂ ᐃᖅᑲᖅᑐᐃᕕᒻᒥ ᖃᓄᐃᑕᐅᖃᑦᑕᕋᔭᕐᓂᖓᓂᒃ ᐊᒻᒪᓗ ᐅᔾᔨᖅᓱᖅᑎᑦᑎᒍᑕᐅᒐᔭᖅᑐᖅ ᓴᓪᓗᓪᓗᓂ ᐅᓂᒃᑳᓕᐅᖅᑐᒥᓂᐅᓂᖓᓂᒃ ᐊᒻᒪᓗ ᒪᓕᑦᑐᒋᑦ ᐸᓂᖏᑦᑕᒃ ᐃᓅᓂᕋᖅᑐᒥᓂᐅᓂᖏᑦ ᓴᓪᓗᓪᓗᑎᑦ ᐊᒻᒪᓗ ᓱᓕᙱᑦᑐᑎᑦ, ᐊᒻᒪᓗ ᖃᑕᙳᑎᖏᑦ ᐃᓄᒻᒪᕆᐅᙱᑦᑐᑎᑦ ᐱᖁᔭᕐᒥᒃ ᓯᖁᒥᑦᑎᔪᒥᓂᐅᔪᑦ ᐊᒻᒪᓗ ᐱᕋᔭᒃᑐᑎᑦ ᓴᓪᓗᔪᒥᓂᐅᓪᓗᑎᑦ ᑮᓇᐅᔭᖅᑖᖅᑐᒥᓃᒃ ᐊᒻᒪᓗ ᐱᕕᖃᖅᑎᑕᒥᓂᐅᔫᒃ ᓄᓇᕗᒻᒥᐅᑦ ᐃᓄᖏᖕᓅᖓᔪᒥᓂᐅᒐᓗᕐᓂᒃ.”
ᑖᓐᓇ ᓯᕗᓪᓕᖅᐹᖑᕗᖅ ᖃᐅᔨᒪᔭᐅᔪᖅ ᐊᑎᓕᐅᖅᑐᒥᓂᐅᔪᑦ ᐱᕋᔭᒃᑐᑎᑦ ᓄᓇᕗᒻᒥ. ᖃᐅᔨᒪᓂᖏᑦ ᐊᒻᒪᓗ ᐃᓄᐃᑦ ᐃᓚᒌᑦ ᐃᓚᒌᑦᑎᐊᖃᑦᑕᕐᓂᖏᑦ ᓄᓇᕗᑦ ᓄᓇᓕᖏᖕᓂ ᓈᒻᒪᑦᑑᓯᒪᕗᑦ ᓴᐳᒻᒥᐅᓯᖅᑕᐅᓯᒪᒍᑎᐅᓪᓗᓂ ᐱᕋᔭᒃᑐᑎᑦ ᐊᑎᓕᐅᖅᑕᐅᖃᑕᐅᒐᓱᐊᖅᑐᓄᑦ ᒪᓕᑦᑐᒍ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎ. ᑲᕆᒪ ᒪᓐᔨᑉ ᐱᕋᔭᓐᓂᑯᒥᓂᖓ ᐊᓯᔾᔩᓯᒪᕗᖅ ᑕᒪᔅᓱᒥᖓ, ᓄᓇᕗᒻᒥᐅᓂᒃ ᐃᓄᖕᓂᒃ ᐊᑐᓕᖅᑎᑦᑎᓯᒪᓕᕐᒪᑦ ᓴᐳᒻᒥᐅᓯᒃᑲᓐᓂᖅᑕᐅᓪᓗᑎᑦ ᐊᑎᓕᐅᕐᓂᕐᒧᑦ ᐊᐅᓚᓂᖓ, ᓴᙱᔪᕈᖅᑎᑕᐅᒃᑲᓐᓂᖅᑐᓂ ᐸᐃᑉᐹᓕᕆᔾᔪᑎᖏᑦ ᐃᓄᐃᑦ ᐊᒻᒪᓗ ᐅᖓᕙᕆᐊᒃᑲᓐᓂᖅᑎᑦᑎᓯᒪᑐᐃᓐᓇᓕᖅᑐᓂ ᓄᓇᕗᑦ ᐃᓄᐃᑦ ᐊᑎᓕᐅᕋᓱᐊᖅᐸᑦᑐᓄᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
