ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖏᒃ ᓴᖅᑮᖃᑕᐅᕘᒃ ᓄᑖᒥᒃ ᑮᓇᐅᔭᒥ 

 (ᐃᐱᕆ 7, 2017 –ᐃᖃᓗᐃᑦ ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ ᐅᓪᓗᒥ ᐅᐸᒃᓯᒪᖃᑕᐅᓂᐊᕐᐴᒃ ᓴᖅᑭᑕᐅᑎᓪᓗᒍ ᓄᑖᖅ ᑮᓇᐅᔭᖅ $10 ᐃᖅᑲᐅᒪᔾᔪᑕᐅᓪᓗᓂ ᑎᑎᕋᐅᔭᕐᑎᒥᒃ ᕿᓐᓄᐊᔪᐊᖅ ᐋᓯᕙᖕᒥᒃ. ᑰᑦᑎᖅ ᐊᒻᒪᓗ ᐊᕿᐊᕈᖅ ᐅᐸᒃᓯᒪᖃᑕᐅᖅᑲᐅᕘᒃ ᐃᓚᖃᖅᑐᑎᒃ ᐋᓯᕙᐅᑉ ᐃᓚᔮᖏᓐᓂᒃ ᐊᒻᒪᓗ ᓄᓇᕗᖕᒥ ᐃᓄᖕᓂᒃ ᐊᒻᒪ ᑲᓇᑕᒥᐅᑕᓂᒃ ᓂᕈᐊᖅᑕᐅᓯᒪᔪᓂᒃ.

ᐊᖓᔪᖅᑳᖅ ᐅᐱᒍᓱᓐᓂᕋᖅᑐᓂ ᐅᖃᖅᑲᐅᔪᖅ ᑕᑯᒐᒥ ᓴᓇᓯᒪᔭᖓᓂᒃ ᑎᑎᕋᐅᔭᕐᑎᐅᑉ ᑖᓐᓇᓗ ᖃᐅᔨᒪᔭᐅᓪᓗᓂ ᓄᓇᕐᔪᐊᓕᒫᕐᒥ ᑎᑎᕋᐅᔭᕐᓯᒪᔭᖏᓐᓄᑦ ᑎᑎᕋᐅᔭᕐᑕᒥᓂᖓ ᑮᓇᐅᔭᒥ ᑕᕐᓴᕆᔭᐅᖕᒪᑦ.

“ᐅᓪᓗᒥ ᐃᖅᑲᐅᒪᕙᕗᑦ ᕿᓐᓄᐊᔪᐊᖅ ᐋᓯᕙᐅᑉ ᐃᑲᔪᕐᓯᒪᓂᖓ ᐅᕙᒍᑦ ᐃᓅᖃᑎᖏᓐᓄᑦ. ᑖᓐᓇ ᐱᒻᒪᕆᐅᕗᑦ ᐃᓚᔮᖏᓐᓄᑦ ᐊᒻᒪᓗ ᓄᓇᖅᑲᑎᖏᓐᓄᑦ ᐊᒻᒪ ᐃᓄᓕᒫᓄᑦ,” ᐅᖃᖅᑐᖅ ᑰᑦᑎᖅ. “ᖁᕕᐊᓱᒍᑎᒋᕙᕗᑦ ᐃᓄᐃᑦ ᓴᓇᑦᑑᓂᖏᑦ ᐊᒻᒪᓗ ᓴᖅᑭᑎᒍᓐᓇᕐᓯᒪᔭᖏᑦ. ᑲᓇᑕᒥᐅᑕᐃᑦ ᑕᑯᓂᖅᑕᒫᑦ $10-ᒥ, ᐃᖅᑲᐃᔾᔪᑕᐅᕙᓐᓂᐊᕐᐳᖅ ᐃᓄᐃᑦ ᒫᓃᓯᒪᒻᒪᑕ 150 ᐅᑭᐅᑦ ᐅᖓᑖᓂ.”

“ᖁᕕᐊᓱᓪᓚᕆᒃᐳᖓ ᖁᕕᐊᓱᖃᑎᒋᔭᐅᒐᒪ ᑲᓇᑕᒥᐅᑕᓕᒫᓂ ᑖᓐᓇ ᕿᓐᓄᐊᔪᐊᖅ ᐋᓯᕙᒃ ᑎᑎᕋᐅᔭᕐᓯᒪᔭᖓ ᐱᒻᒪᕆᐅᒋᔭᐅᓂᖓᓂᒃ ᑮᓇᐅᔭᒃᑯᕕᖓᓄᑦ ᑲᓇᑕᐅᑉ. ᕿᓐᓄᐊᔪᐊᖅ ᐋᓯᕙᐅᑉ ᑎᑎᕋᐅᔭᓐᓂᑯᖏᑦ ᖃᐅᔨᒪᔭᐅᖕᒪᑕ ᓄᓇᕐᔪᐊᓕᒪᕐᒥ. ᖁᔭᓕᕗᖓ ᐅᕙᓃᒍᓐᓇᕋᒪ ᐱᖃᑕᐅᓪᓗᖓ ᐃᓚᔮᖏᓐᓄᑦ ᖁᕕᐊᓱᒍᑕᑎᓪᓗᒍ ᐃᓱᒪᑐᔪᒻᒪᕆᐊᓗᒃ ᐃᓅᓪᓗᓂ ᐊᕐᓇᖅ ᕿᑭᖅᑖᓗᖕᒥᐅᑕ.” ᑕᐃᒪᓐᓇ ᐅᖃᐅᓯᕆᖅᑲᐅᔭᖓ ᐊᕿᐊᕉᑉ.