ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓂᖓ ᐃᓱᓕᑉᐳᖅ ᐃᖃᓗᑦᑑᑦᑎᐊᒥ

(ᐆᑦᑐᑉᕙ 26, 2017 – ᐃᖃᓗᑦᑑᑦᑎᐊᖅ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓴᖅᑎᑦᓯᖅᑲᐅᔪᖅ ᐅᓪᓗᒥ ᑐᓐᖓᕕᒃᑯᑦ ᐃᓱᓕᑦᓯᐊᓚᐅᕐᓂᖓᓂᒃ 2017 ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓂᖓᓂᒃ (ᑲᑎᒪᓂᕐᔪᐊᖅ) ᐃᖃᓗᑦᑑᑦᑎᐊᒥ.

 

“ᐃᓚᒋᔭᐅᔪᑦ ᐋᔩᕋᕈᑎᖃᓚᐅᖅᑐᑦ ᐅᓄᖅᑐᓂᒃ ᐱᖕᒪᕆᐅᔪᓂᒃ ᓈᖕᒪᖏᓪᓕᐅᕈᑎᓂᒃ ᓲᕐᓗ ᐅᓄᕐᓯᒋᐊᕆᐊᖃᕐᓂᖏᑦ ᐃᓄᐃᑦ ᐃᖅᑲᓇᐃᔭᖅᑐᑦ ᐊᒻᒪᓗ ᐱᕚᓪᓕᑎᑦᓯᓂᕐᒥᒃ ᐃᓄᒃᑐᑦ ᐅᖃᐅᓯᕐᒥᒃ. ᑐᓐᖓᕕᒃᑯᑦ ᐊᔭᐅᖅᑐᐃᕐᔪᑎᖃᓚᐅᕐᒥᔪᑦ ᑮᓇᐅᔭᑲᓪᓚᒻᒪᕆᓐᓂᒃ ᐱᖁᑎᕐᔪᐊᑎᒍᑦ ᐃᓱᕐᕆᐅᑎᒃᓴᓂᒃ ᐱᓕᕆᐊᒃᓴᓂᒃ,” ᐅᖃᓚᐅᖅᑐᖅ ᐊᖓᔪᖅᑳᖅ ᑰᑦᑎᖅ. “ᖁᓚᓐᖏᓚᖓ ᐃᓱᒪᓕᐅᕈᑕᐅᓚᐅᖅᑐᑦ ᐊᕐᕌᒍᑦᑎᓐᓂ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓂᕐᒥ ᐊᕐᕌᒍᕋᓵᓗᓐᓄᑦ ᐊᒃᑐᐃᓂᖃᕐᓂᐊᕐᓂᖏᓐᓂᒃ ᐊᒻᒪᓗ ᐃᑲᔫᑎᖃᕐᓂᐊᕐᓂᖏᓐᓂᒃ ᐊᑯᓂᐅᔪᒧᑦ−ᐱᕙᓪᓕᐊᓂᖃᕈᑕᐅᓗᑎᒃ ᐊᒻᒪᓗ ᐱᕚᓪᓕᕈᑕᐅᓗᑎᒃ ᐃᓄᐃᑦ ᐃᓕᖅᑯᓯᖓᓂᒃ ᐊᒻᒪᓗ ᖃᓄᓐᖏᑦᓯᐊᕈᑎᒃᓴᖏᓐᓂᒃ.”

 

ᐅᔾᔨᕐᓇᓗᐊᕐᓂᖏᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓂᕐᒥ ᐱᖁᔨᕗᖔᕈᑕᐅᓚᐅᖅᑐᑦ:

 

  • ᐃᓛᒃᑯᑦ 23, ᑐᓐᖓᕕᒃᑯᓐᓂ ᐃᓚᒋᔭᐅᔪᑦ ᐅᖃᐅᔾᔨᓗᑎᒃ ᑲᓇᑕ ᐊᒻᒪᓗ ᓄᓇᕗᑦ ᒐᕙᒪᖏᓐᓂᒃ ᐋᖅᑭᑦᓱᐃᑲᐅᑎᒋᖁᓗᒋᑦ ᓴᓐᖏᓂᓕᖕᒥᒃ ᐃᓄᐃᑦ ᐃᖅᑲᓇᐃᔮᖏᓐᓄᑦ ᐸᕐᓇᐅᑎᓂᒃ (IEP) ᐱᓕᕆᒡᕕᓕᒫᖏᓐᓄᑦ, ᓇᓗᓇᐃᖅᑐᕆᐊᓖᓪᓗ ᑮᓇᐅᔭᓕᑕᐅᒍᑕᐅᒋᐊᓖᓪᓗ ᐊᖏᕈᑕᐅᓗᑎᒃ ᑎᑭᐅᑎᒍᑎᒃᓴᒧᑦ 85% ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ.

 

  • ᐅᖃᐅᓯᓕᕆᓂᕐᒧᑦ, ᑐᓐᖓᕕᒃᑯᓐᓂ ᐃᓚᒋᔭᐅᔪᑦ ᐊᐱᕆᓚᐅᖅᑐᑦ ᑲᓇᑕ ᒐᕙᒪᒃᑯᖏᓐᓂᒃ ᐃᓕᓴᕆᔭᐅᖁᔨᓪᓗᑎᒃ ᐃᓄᒃᑑᑦ ᐅᖃᐅᓯᕐᒥᒃ ᓄᓇᕗᒻᒥ, ᐊᒻᒪᓗ ᑮᓇᐅᔭᓖᖁᔨᓪᓗᑎᒃ ᓄᓇᕗᒻᒥ ᒪᕐᕉᓐᓂᒃ ᐅᖃᐅᓯᖃᕐᓗᑎᒃ ᐱᔨᑦᓯᕈᑎᒃᓴᓂᒃ ᓇᓕᒧᖏᓐᓂᒃ ᐅᐃᕖᑎᑐᑦ ᑮᓇᐅᔭᓕᑕᐅᖃᑦᑕᕐᓂᖏᓐᓂᒃ.
  • ᑐᓐᖓᕕᒃᑯᓐᓂ ᐃᓚᒋᔭᐅᔪᑦ ᐅᖃᐅᔾᔨᓚᐅᖅᑐᑦ ᒐᕙᒪᒃᑯᓐᓂᒃ ᓯᕗᓪᓕᕐᐸᐅᔾᔭᐅᔭᕆᐊᓕᖕᓅᖁᔨᓪᓗᑎᒃ ᓴᖅᑮᓂᕐᒥᒃ ᐅᑭᐅᖅᑕᖅᑐᒥ ᐃᓕᓐᓂᐊᕕᔾᔪᐊᒥᒃ ᐃᓄᐃᑦ ᓄᓇᖓᓂ ᐱᒋᐊᕐᓯᒪᔪᒥᒃ ᐃᓄᐃᑦ ᐃᓕᖅᑯᓯᖓᓂᒃ ᐅᖃᐅᓯᖓᓂᓪᓗ.

 

  • ᑐᓐᖓᕕᒃᑯᑦ ᐊᔭᐅᕆᐊᕈᑎᖃᓚᐅᖅᑐᑦ $5 ᒥᓕᔭᓂᒃ ᑐᕌᖓᔪᓂᒃ ᓴᓇᔭᐅᔾᔪᑎᒃᓴᓂᒃ ᐃᓄᐃᑦ ᑕᑯᔭᒐᖃᕐᕕᖓ ᓄᓇᕗᒻᒥ. ᒫᓐᓇ, ᓄᓇᕗᑦ ᑖᓐᓇᑐᐊᖅ ᐊᕕᑦᑐᕐᓯᒪᓂᖏᓐᓂᒃ ᑲᓇᑕᒥ ᐃᑦᑕᕐᓂᓴᖃᕐᕕᖃᓐᖏᑦᑐᑐᐊᖅ ᐅᑉᕙᓘᓐᓃᑦ ᐊᔾᔨᐸᓗᖓᓂᒃ ᐃᓪᓗᒥᒃ. ᐃᓄᐃᑦ ᐃᑦᑕᕐᓂᓴᓕᕆᕕᖓ ᑲᔪᓯᑎᑦᓯᔪᓐᓇᕋᔭᖅᑐᖅ ᐃᓄᓐᓂᒃ ᐅᑎᖅᑎᑦᓯᕙᓪᓕᐊᓂᕐᒥᒃ, ᐃᓂᒃᓴᖃᖅᑎᑦᓯᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᓯᓂᕐᒥᒃ ᐃᓄᐃᑦ ᐱᖁᑎᑐᖃᖏᓐᓂᒃ ᐊᒻᒪᓗ ᐊᓯᖏᓐᓂᒃ ᐃᓕᖅᑯᓯᕐᒨᖓᔪᖤᒃ ᐊᒻᒪᓗ ᐃᓕᖅᑯᓯᕐᒥᑎᒍᑦ ᐱᖅᑯᓯᕐᒥᒍᑦ ᓱᓇᒃᑯᑖᕆᖃᑦᑕᕐᓯᒪᔭᖏᓐᓂᒃ ᓄᓇᒋᔭᒥᓂ.

 

  • ᐃᓐᓇᕐᓂᒃ ᐸᖅᑭᑦᓯᕕᒃ, ᑐᓐᖓᕕᒃᑯᓐᓂ ᐃᓚᒋᔭᐅᔪᑦ ᓴᖅᑭᑲᓐᓂᓚᐅᖅᑕᖏᑦ ᐃᓱᒫᓘᑏᑦ ᐱᑕᖃᕆᐊᖃᒻᒪᕆᓐᓂᖓᓂᒃ ᓈᖕᒪᒃᑐᓂᒃ ᐸᖅᑭᔭᐅᕕᒃᓴᓂᒃ ᐃᓐᓇᐃᑦ ᓄᓇᕗᑦ ᓄᓇᓕᖏᓐᓂ ᐸᖅᑭᔭᐅᑦᓯᐊᖃᑦᑕᖁᓪᓗᒋᑦ ᐊᖏᕋᕐᓯᒪᓗᑎᒃ ᓄᓇᒥᖕᓂ.

 

  • ᑐᓐᖓᕕᒃᑯᓐᓂ ᐃᓚᒋᔭᐅᔪᑦ ᓴᖅᑮᓚᐅᕐᒥᔪᑦ ᐱᖕᒪᕆᐅᔪᒥᒃ ᐃᓱᒫᓘᑕᐅᔪᒥᒃ ᑲᓇᑕ ᒐᕙᒪᒃᑯᖏᑕ ᐸᕐᓇᐅᑎᖓᓂᒃ ᒪᓕᒐᕐᓅᖅᑕᐅᓂᐊᓕᕐᓂᖓᓂᒃ ᐋᖓᔮᕐᓇᖅᑐᒥᒃ ᔪᓚᐃ 1, 2018−ᒥ. ᐃᓚᒋᔭᐅᔪᑦ ᐅᖃᐅᔾᔨᓚᐅᖅᑐᑦ ᒐᕙᒪᒃᑯᓐᓂᒃ ᑭᖑᕙᕆᐊᖅᑕᐅᖁᓪᓗᒍ ᒪᓕᒐᕐᓅᖅᑕᐅᓂᐊᕐᓂᖓ, ᑐᓴᕆᐊᕐᕕᖃᓚᐅᕐᓗᑎᒃ ᐃᓄᖕᓐᓂᒃ ᑖᑦᓱᒧᖓ ᐃᓚᒋᔭᐅᓗᑎᒃ ᒪᓕᒐᕐᓅᖅᑕᐅᒋᐊᖃᕐᒪᖔᖅ ᐋᒡᒐᓘᓐᓃᑦ, ᐱᑉᕕᖃᖅᑎᑕᐅᓗᑎᒃ ᐊᒻᒪᓗ ᐃᑯᓪᓚᐅᒥᑎᑦᓯᒍᑎᒃᓴᓂᒃ ᓈᖕᒪᖏᑦᑐᓄᑦ ᓴᖅᑭᕈᑕᐅᒃᑲᓐᓂᕈᑕᐅᑉᐸᑦ ᖃᓄᐃᓕᐅᕈᑕᐅᓇᔭᕐᓂᖓᓂᒃ. ᐃᓚᒋᔭᐅᔪᑦ ᐊᐱᕆᓚᐅᕐᒥᔪᑦ ᒪᒥᓴᕐᕕᖕᓂᒃ ᐊᒻᒪᓗ ᐊᓂᒍᐃᒋᐊᕐᕕᒃᓴᓂᒃ ᐃᑲᔪᖅᑕᐅᕕᖕᓂᒃ ᐅᐃᕆᓯᒪᔪᓄᑦ ᐋᖓᔮᕐᓇᖅᑐᓂᒃ ᐃᒥᐊᓗᖕᒥᓪᓗ ᓴᖅᑭᖅᑕᐅᖁᓪᓗᒋᑦ ᓄᓇᕗᒻᒥ ᐃᓚᒋᔭᐅᓗᓂ ᒪᓕᒐᕐᓅᖅᑕᐅᓂᐊᕐᓂᖓᓄᑦ ᐸᕐᓇᐅᑎᓂ.

 

ᐊᖓᔪᖅᑳᖅ ᑰᑦᑎᖅ ᑐᓴᖅᑎᑦᓯᖅᑲᐅᒻᒥᔪᖅ ᑐᓐᖓᕕᒃᑯᑦ ᑲᑎᒪᔨᖏᑦ ᐃᓱᒪᓕᐅᕈᑎᖃᓚᐅᕐᓂᖏᓐᓂᒃ ᑕᑉᕙᓂ ᐱᓇᓱᐊᕈᓯᕐᒥ ᐊᔭᐅᖅᑐᐃᒍᑎᓂᒃ ᐃᑲᔪᕈᓐᓇᖅᑐᓂᒃ ᑐᓂᓯᓪᓗᑎᒃ $4 ᒥᓕᔭᓐ ᐃᑲᔫᑎᒃᓴᓂᒃ ᓄᓇᕗᑦ ᓯᕗᓂᒃᓴᕗᒻᒥ (NS) ᓴᓇᖁᓪᓗᒋᑦ ᓂᐅᕕᖁᓗᒋᓪᓘᓐᓃᑦ ᑐᑦᑕᕐᕕᒋᓂᐊᖅᑕᒥᓂᒃ ᐊᑕᐅᓯᕐᒦᑦᑐᒥᒃ ᐃᓕᓐᓂᐊᖅᑎᓄᑦ ᐊᖏᕐᕋᖃᕐᕕᒃᓴᒥᒃ. NS, ᐋᑐᕚᒦᑦᑐᖅ, ᐃᓕᓴᕆᔭᐅᓯᒪᔾᔪᑎᓂᒃ ᓵᓚᒃᓴᐅᓯᐊᕆᓪᓗᒍ ᓯᓚᑦᑐᓴᕐᕕᖕᒥ ᐃᓕᓐᓂᐊᑎᑦᓯᖃᑦᑕᕐᓂᖓᓄᑦ ᐃᓄᓐᓂᒃ ᒪᒃᑯᑦᑐᓂᒃ. “ᑲᑎᒪᔩᑦ ᐅᑉᐱᕈᓱᑦᓯᐊᖅᑐᑦ ᐱᖕᒪᕆᐅᓂᖓᓂᒃ ᐊᑐᕋᑦᓴᓕᐅᖅᑕᐅᖃᑦᑕᕆᐊᖃᕐᓂᖏᓐᓂᒃ ᐃᓄᐃᑦ ᐃᓕᓐᓂᐊᑲᓐᓂᕕᖕᓂ ᐃᓕᓐᓂᐊᖅᑐᑦ,” ᐅᖃᖅᑐᖅ ᐊᖓᔪᖅᑳᖅ ᑰᑦᑎᖅ.

 

 

-30-

 

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: