ᓴᒃᑯᑕᐅᑲᐅᑎᒋᔭᕆᐊᓕᒃ
(ᓄᕖᕝᕙ 27, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᐃᑲᔫᑎᒃᓴᓕᕆᔨᒃᑯᑦ ᑎᒥᖓᑕ ᐃᒃᓯᕙᐅᑕᖓ ᐊᓗᑭ ᑰᑦᑎᖅ ᖁᕕᐊᓱᑉᐳᖅ ᑐᓴᖅᑎᑦᑎᔭᕆᐊᒃᓴᖅ ᑕᓪᓕᒪᑦ (5) ᓵᓚᒃᓴᕈᓐᓇᕐᓂᐊᕐᒪᑕ ᐃᓄᒃᑑᖅᑕ! ᐃᓄᒃᑐᑦ ᑎᑎᕋᑦᑎᐊᕐᓂᑭᓴᐅᑎᓂᕐᒧᑦ ᐱᔾᔪᓯᐊᕐᒧᑦ. ᐱᔾᔪᓯᐊᕋᔭᖅᑐᑦ ᐅᑯᐊᖑᕗᑦ ᑖᓇ ᐋᑕᒻᔅ, ᒪᐃᒐᓐ ᐊᓕᕙᖅᑕᖅ, ᑭᐊᕙᓐ ᖃᑉᓗᑦᓯᐊᖅ, ᓴᕚᓇ ᕿᓕᖅᑎ, ᐊᒻᒪᓗ ᒪᐃᒐᓐ ᐅᖓᓛᖅ.
ᐱᖓᓲᓕᖅᓲᖑᓕᖅᐸᑦ, ᑎᓰᕝᕙ 4th, ᐃᓄᒃᑑᖅᑕ! ᐃᓄᒃᑐᑦ ᑎᑎᕋᕐᓂᑭᓴᐅᑎᓂᕐᒧᑦ ᐱᔾᔪᓯᐊᖅᑖᖅᑐᖃᖅᑎᓪᓗᒍ ᓂᕆᕕᔾᔪᐊᓛᕐᒪᑕ ᐊᖅᓴᕐᓃᑦ ᑐᔪᕐᒥᕕᖓᓂᒃ ᐊᒻᒪᓗ ᑲᑎᒪᕕᖓᓂᒃ ᐃᖃᓗᓐᓂ, ᓄᓇᕗᑦ, ᓵᓚᒃᓴᖅᑐᑦ ᑭᒃᑰᒻᒪᖔᑕ ᑐᓴᖅᑎᑕᐅᓛᖅᑐᑎᑦ ᑕᓪᓕᒪᖓᓐᓂ ᓯᕗᓪᓕᖅᐹᒧᑦ. ᐊᑕᐅᓯᖅ ᐱᔾᔪᓯᐊᕈᓐᓇᖅᑐᖅ ᑐᓂᔭᐅᒐᔭᖅᑐᖅ ᓵᓚᖃᐅᓯᐊᕐᒥᒃ $80,000-ᓂᒃ ᐊᒻᒪᓗ ᐃᑲᔪᖅᑐᖅᑕᐅᓗᓂ ᑎᑎᕋᕐᓂᖓᓂᒃ ᐊᕐᕌᒍ ᐊᑕᐅᓯᖅ ᐅᖓᑖᓄᑦ ᑎᑎᕋᕋᔭᕋᒥᒋᑦ ᑐᓂᔭᖏᑦ ᐅᖃᓕᒫᒐᓕᐊᕆᔭᐅᓛᕐᒪᑦ. ᑎᓴᒪᒃᑲᓐᓃᑦ ᐱᔾᔪᓯᐊᑦ ᑐᓂᔭᐅᒐᔭᕐᒥᔪᑦ ᓵᓚᖃᖅᑐᓄᑦ ᐃᒪᓐᓇᐅᓪᓗᑎᑦ $10,000, $5000, $3000, $2000.
ᐃᓄᒃᑐᖅᑕ! ᐃᓄᒃᑐᑦ ᑎᑎᕋᕐᓂᑭᓴᐅᑎᓂᕐᒧᑦ ᐱᔾᔪᓯᐊᖅᑖᖅᑎᑕᐅᔪᑦ ᓂᕆᕕᔾᔪᐊᖅᑎᓪᓗᒋᑦ ᑕᐅᑐᕋᓐᓈᖅᑎᖃᓛᖅᑐᖅ ᓄᓇᕗᒻᒥᐅᓂᒃ ᑕᐅᑐᕋᓐᓈᖅᑎᑦᑎᔨᓂᒃ ᑎᐅᕆ ᐅᔭᕋᒃ ᐃᒡᓗᓕᖕᒦᙶᖅᑐᖅ, ᔮᑕ ᐊᒻᒪᓗ ᔫᑎ ᑐᓗᕆᐊᓕᒃ ᑕᓗᕐᔪᐊᕐᒥᐅᒃ, ᑖᓇᕙᓐ ᑐᑐ ᑲᖏᖅᖠᓂᖅ, ᔫᐃ ᓇᐅᔪᖅ ᐸᖕᓂᖅᑑᖅ, ᓈᓐᓯ ᒪᐃᒃ, ᑖᓐᓂᐊᓕ ᐊᒻᒪᓗ ᐄᒪᓕ ᑯᓗᓛᖅ ᐃᖃᓗᒻᒥᐅᒃ; ᑕᐅᑐᕈᓐᓈᖅᑎᑦᑎᓗᓂᓗ ᐃᓕᓴᐱ.
ᐃᓯᕈᑏᑦ ᓂᐅᕕᖅᑕᐅᔪᓐᓇᖅᑐᑦ ᖃᕋᓴᐅᔭᒃᑯᑦ ᐃᕕᐊᓐᕗᕋᐃᑦ ᐅᕙᓂ: https://www.eventbrite.ca/e/inuktuuqta-inuktukta-mik-hosted-by-nti-tickets-1078700605549?aff=oddtdtcreator
ᐃᓄᒃᑑᖅᑕ! ᐃᓄᒃᑐᑦ ᑎᑎᕋᑦᑎᐊᕐᓂᑭᓴᐅᑎᓂᕐᒧᑦ ᐱᔾᔪᓯᐊᖅᑎᓪᓗᒋᑦ ᓂᕆᕕᔾᔪᐊᕐᓂᖓ ᑕᑯᒃᓴᐅᑎᑕᐅᓛᖅᑐᖅ ᐅᕙᒍᑦ ᑕᓚᕖᓴᓕᕆᔨᒃᑯᓐᓄᑦ ᐊᒻᒪᓗ ᖃᕋᓴᐅᔭᒃᑯᑦ ᐅᕙᓂ uvagut.tv ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᑕ ᕙᐃᔅᕗᒃ ᒪᑉᐱᒐᖓᓂ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒋᐊᕋᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
