(ᒪᐃ 27, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃᑯᑦ) ᖁᕕᐊᒃᐳᑦ
ᑐᓴᖅᑎᑦᑎᒋᐊᒥᒃ ᑖᒃᑯᐊ ᐃᓄᒃᑑᖅᑕ! ᐃᓄᒃᑐᑦ ᐅᓂᒃᑳᓂᒃ ᑎᑎᕋᑦᑎᐊᕐᓂᑭᓴᐅᑎᔪᑦ ᐱᔾᔪᓯᐊᖅᑖᖅᓴᑦ ᑐᓂᔭᐅᓂᐊᕐᓂᖏᓐᓂᒃ ᑕᑯᒃᓴᐅᓗᑎᒃ ᑕᕝᕙᑲᐅᑎᒋ ᑎᓛᕖᓴᒃᑯᑦ ᖁᕕᐊᓱᒍᑕᐅᑎᓪᓗᒋᑦ ᑎᓴᕐᒥᕐᒥ ᔫᓂ 3, 2021-ᖑᓕᖅᑲᑦ
“ᓇᓗᖅᑯᑎᙱᓂᕐᓴᐅᓕᕐᐳᖓ ᐊᒥᓲᓯᒪᓂᖏᓐᓄᑦ ᐃᓄᒃᑑᖅᑕ! ᐃᓄᒃᑐᑦ ᐅᓂᒃᑳᓂᒃ ᑎᑎᕋᑦᑎᐊᕐᓂᑭᓴᐅᑎᔪᖃᕐᓯᒪᒻᒪᑦ ᐱᔾᔪᓯᐊᖅᑕᕋᓱᐊᕐᑐᓂᒃ. 60-ᖑᓗᐊᓚᐅᕐᒪᑕ ᓇᑦᓯᐅᔾᔨᔪᑦ, ᓇᓗᒋᔪᓐᓃᕐᐸᕋ ᐱᑕᖃᕆᐊᖃᓪᓚᕆᓐᓂᖓᓂᒃ ᐃᓄᒃᑐᑦ ᐅᖃᓖᒪᖔᓂᒃ. ᑕᒪᐃᓐᓄᑦ ᓇᑦᓯᐅᔾᔨᓚᐅᕐᑐᓄᑦ, ᖁᔭᓐᓇᒦᕈᒪᕙᒃᓯ ᐊᒻᒪ ᑎᓕᐅᒃᑲᓂᕐᐸᒃᓯ ᐅᓂᒃᑳᓂᒃ ᑎᑎᕋᐃᓐᓇᖁᓪᓗᓯ,” ᐅᖅᑲᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓᑦ ᓄᓇᕗᑦ ᑐᙵᕕᒃ ᑎᒥᖓᑕ.
ᐃᓄᒃᑑᖅᑕ! ᖁᕕᐊᓱᒍᑕᐅᓂᖓ ᑕᑯᒃᓴᐅᓛᕐᑐᖅ ᔫᓂ 3, 2021-ᒥ 7:00-ᒥᑦ 8:00-ᒧᑦ ᐅᓐᓄᒃᑯᑦ ᑲᓇᓐᓇᐅᑉ ᓯᕿᖑᔭᖓ ᐊᑐᕐᓗᒍ, ᑐᙵᓱᒃᑎᑦᑎᔨᖃᓪᓗᑎᒃ ᐅᕙᒍᑦ ᑎᓖᕖᓴᒃᑯᓐᓂᒃ. ᑕᑯᓐᓇᕈᓐᓇᓛᕐᑕᓯ ᓵ ᑕᐃᕆᐊᑦ (Shaw Direct) ᖃᖓᑦᑕᕐᑎᑕᐅᓯᒪᔪᒃᑯᑦ ᑕᑯᒃᓴᐅᔪᓐᓇᕈᑎᖓᒍᑦ 267, ᐅᑭᐅᖅᑕᖅᑐᒥ ᑯᐊᐸᒃᑯᑦ ᑲᐃᐳᓪᖓᒍᑦ ᑕᑯᓐᓇᕈᓐᓇᐅᑖ 240, ᖃᕆᑕᐅᔭᒃᑯᑦ ᐅᕘᓇ www.uvagut.tv
ᐊᒻᒪ ᑕᑯᒃᓴᐅᑦᑕᐅᑎᒋᓛᕐᑐᑦ ᐅᕙᒍᑦ ᑕᓖᕖᓴᒃᑯᑦ ᖃᕆᑕᐅᔭᕋᓛᒃᑯᑦ ᑕᑯᒃᓴᐅᕕᖓᓂ (Facebook page).
ᑖᓐᓇ ᐃᖃᕐᕋᓪᓗᐊᒥᒃ ᑕᑯᒃᓴᐅᑲᐅᑎᒋᓗᓂ ᑐᙵᓱᒃᑎᑕᐅᓛᕐᑐᑦ ᑐᙵᕕᒃᑯᑦ ᐊᖓᔪᖅᑳᖓᓐᓄᑦ ᐊᓗᑭ ᑰᑦᑎᕐᒧᑦ ᐊᒻᒪ ᓄᓇᕗᑦᒥ ᐃᒻᒥᑰᕐᑐᑦ ᑎᓛᕕᓴ ᑐᑭᒧᐊᒃᑎᑦᑎᔨᖓ ᓘᓯ ᑐᓗᒑᕐᔪᒃ, ᑐᓴᕋᓐᓈᑎᑕᐅᓛᕐᑐᑎᒃ ᑎᐅᕆ ᐅᔭᕋᕐᒧᑦ ᐊᒻᒪ ᐋᓯᕙᖕᒧᑦ.
ᐃᔾᔪᐊᑕᐅᔾᔭᐃᒃᑯᑎᖏᑦ, ᓯᕗᒧᐊᒃᑲᓐᓂᕈᑎᒃᓴᖏᑦ, ᐊᒻᒪᓗ ᐊᑐᓕᕐᑎᑕᐅᒃᑲᓂᕐᓂᖏᑦ ᐃᓄᒃᑐᑦ — ᖃᓄᓕᒫᖅ ᑕᒪᐃᓐᓂᒃ ᐃᓅᓯᕐᒨᖓᔪᓂᒃ ᓄᓇᕗᖕᒥ — ᑐᙵᕕᒃᑯᓐᓂᒃ ᐃᓚᒋᔭᐅᑎᑕᐅᒻᒪᑦ ᑕᓪᓕᒪᐅᑎᓪᓗᒋᑦ ᓯᕗᓪᓕᕐᐹᖑᑎᑕᐅᔪᑦ. ᐃᓄᒃᑑᖅᑕ! ᐃᓄᒃᑐᑦ ᐅᓂᒃᑳᓂᒃ ᑎᑎᕋᑦᑎᐊᕐᓂᑭᓴᐅᑎᓂᕐᒧᑦ ᐱᔾᔪᓯᐊᖅ ᐃᑲᔪᓐᓂᖃᓐᓂᐊᕐᐳᑦ ᑎᑭᐅᑎᒍᑎᒋᓗᒍ ᑐᕌᖅᑕᑎᓐᓄᑦ, ᐃᓄᒃᑐᑦ ᐅᖃᓕᒫᑦ ᐊᒻᒪ ᐅᓄᕐᓯᒍᑕᐅᓂᕐᓴᐅᓗᓂ ᖃᐅᑕᒫᒃ ᐊᑑᑎᖃᖅᑎᑕᐅᓂᖓᓄᑦ ᐊᒻᒪ ᑐᑭᓯᐊᔭᐅᓂᖓᓄᑦ ᐃᓄᒃᑐᑦ.
ᐃᓄᒃᑑᖅᑕ! ᐃᓄᒃᑐᑦ ᐅᓂᒃᑳᓂᒃ ᑎᑎᕋᑦᑎᐊᕐᓂᑭᓴᐅᑎᓂᕐᒧᑦ ᐱᔾᔪᓯᐊᖅ ᑐᓂᔭᐅᓂᐊᕐᐳᖅ ᐊᑕᐅᓯᕐᒧᑦ ᑎᑎᕋᖅᑎᒧᑦ $80,000 ᐊᒻᒪ ᐃᑲᔪᕐᑕᐅᓗᓂ ᐅᓂᒃᑳᓂᒃ ᑎᑎᕋᐃᓐᓇᓂᐊᕐᓂᖓᓄᑦ ᓈᓇᓱᐊᕐᑎᓪᓗᒍ ᐅᑭᐅᒥ ᐊᑕᐅᓯᕐᒥ ᐃᓕᓐᓂᐊᕐᓗᓂ ᐊᒻᒪ ᐃᓕᓴᐃᔨᖃᓪᓗᓂ ᓴᖅᑭᑕᐅᓂᐊᕐᓗᓂ ᐱᔾᔪᓯᐊᖅᑕᕈᑎᒋᔭᖓ ᐅᖃᓕᒫᒐᙳᕐᑎᑕᐅᓂᖓᓄᑦ. ᑎᓴᒪᒃᑲᓐᓃᑦ ᐱᔾᔪᓯᐊᖅᑖᖅᑐᒃᓴᑦ ᑐᓂᔭᐅᓂᐊᕐᒥᔪᑦ $10,000, $5,000, $3,000 ᐊᒻᒪᓗ $2,000. ᓄᓇᕗᑦ ᑐᙵᕕᒃᑯᑦ ᐃᑲᔫᑎᒃᓴᓕᕆᔨᒃᑯᑦ ᐱᓕᕆᖃᑎᖃᓐᓂᐊᕐᓗᑎᒃ ᐅᓂᒃᑳᓂᒃ ᑎᑎᕋᖅᑎᐅᔪᓂᒃ ᐃᓂᕐᓯᓂᐊᕐᒪᑕ ᐊᒻᒪ ᐊᒥᓱᕈᖅᑎᑕᐅᓗᑎᒃ ᐅᖃᓕᒫᒐᐃᑦ ᐊᒻᒪ ᑲᑎᑕᐅᓗᑎᒃ ᐊᓯᖏᑦ ᑎᑎᕋᖅᑕᐅᓯᒪᔪᑦ.
ᑕᓪᓕᒪᑦ ᐱᔾᔪᓯᐊᖅᑖᕐᑐᒃᓴᑦ ᖃᐅᔨᒃᑲᕐᒃᑕᐅᓂᐊᕐᒃᑐᑦ ᐊᓗᑭ ᑰᑦᑎᕐᒧᑦ.
