ᑐᓴᕋᑦᓴᓕᕆᔩᑦ

ᐃᓄᐃᑦ ᓇᓪᓕᐅᓂᖅᓯᐅᕈᑎᖃᖅᐳᑦ ᓄᓇᕗᒻᒥ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᑎᒍᔭᐅᓂᖏᓐᓂᒃ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ ᐊᖏᖃᑎᒌᒍᑕᐅᓪᓗᑎᒃ

(ᔫᓂ 12, 2009 – ᐃᖃᓗᐃᑦ) ᐃᑦᑑᑏᑦ ᑲᑎᒪᔨᖏᑦ ᑲᓇᑕᒥ ᐃᓘᓐᓇᖏᓐᓄᑦ ᐊᖏᖅᑕᐅᓪᓗᓂ ᖄᖏᖅᑎᑦᓯᓚᐅᖅᐳᑦ ᓄᓇᕗᒻᒥ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐱᖁᔭᖏᓐᓂᒃ ᐊᐃᕙᔾᔪᑎᖃᒻᒪᕆᖃᑦᑕᓚᐅᖅᑳᖅᓱᑎᒃ ᐋᑐᕚᒥ ᔫᓂ 11, 2009.
ᐱᖁᔭᖅ ᐊᖏᖃᑎᒌᒍᑕᐅᔭᕆᐊᖃᓚᐅᕐᒪᑦ ᑲᓇᑕᐅᑉ ᐱᖁᔭᓕᐅᕐᕕᔾᔪᐊᖓᓂᒃ ᒪᓕᓪᓗᒋᑦ ᐊᕕᑦᑐᖅᓯᒪᓂᖓ 38 ᓄᓇᕗᒻᒥ ᐱᖁᔭᑦ.

ᑐᓐᖓᕕᒃᑯᑦ ᐊᖏᔪᖅᑳᖓ ᐹᓪ ᖃᓗᔾᔭᖅ ᐅᖃᓚᐅᖅᑐᖅ, “ᒫᓐᓇ ᐊᑐᖅᑕᐅᓚᐅᖅᓯᒪᓐᖏᑦᓯᐊᖅᑐᒥᒃ ᐊᑐᖅᑐᒍᑦ. ᐃᓄᐃᑦ ᐅᖃᐅᓯᖓ ᒫᓐᓇ ᐃᓕᓴᕆᔭᐅᓯᒪᖃᑕᐅᓕᖅᑐᖅ ᐅᖃᐅᓯᕐᓄᑦ ᑲᓇᑕᒥ ᓴᓐᖏᓂᖃᕐᕕᖃᖅᑐᓂ ᓄᓇᕗᒻᒥ. ᐅᕙᒍᑦ, ᐃᓅᔪᒍᑦ, ᐅᐱᒍᓱᒻᒪᕆᑉᐳᒍᑦ ᑲᔪᓯᑎᑕᐅᒍᓐᓇᓚᐅᕐᒪᑦ.”

ᐊᖏᔪᖅᑳᐅᑏᑦ ᓄᓇᕗᑦ ᑐᓐᖓᕕᒃ ᑎᒥᖓᓂᒃ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐅᖃᕆᐊᖅᑐᓚᐅᖅᐳᑦ ᑲᑎᒪᔨᕋᓛᖏᓐᓄᑦ ᐃᑦᑑᑏᑦ ᒪᓕᒐᓕᕆᓂᕐᒧᑦ ᐊᒻᒪᓗ ᑐᓐᖓᕕᓕᕆᓂᕐᒧᑦ ᒪᓕᒐᕐᔪᐊᖑᔪᓂᒃ ᐱᓇᓱᐊᕈᓯᑦᑎᓐᓂ ᐊᔭᐅᖅᑐᐃᒋᐊᕆᐊᖅᑐᖅᓱᑎᒃ ᑲᔪᓯᑎᑕᐅᖁᓪᓗᒍ ᐱᖁᔭᖅ. ᐊᖏᔪᖅᑲᐅᑏᑦ ᑐᑭᓯᑎᑦᓯᒋᐊᕈᓐᓇᓚᐅᕐᒥᔪᑦ ᐃᓚᖏᓐᓂᒃ ᐃᓱᒫᓘᑕᐅᔪᓂᒃ ᐅᖃᐅᓯᕆᔭᐅᖃᑦᑕᓚᐅᖅᑐᓂᒃ ᐃᑦᑑᑏᑦ ᑲᑎᒪᔨᖏᓐᓄᑦ.

“ᐃᓅᓪᓗᑕ ᐅᖃᐅᓯᕗᑦ ᒫᓐᓇ ᒪᓕᒐᖃᕐᓂᐊᓕᖅᑐᖅ ᑐᓐᖓᕕᒋᒍᓐᓇᓂᐊᖅᑕᒥᓂᒃ ᓴᓐᖏᔫᖏᓐᓇᕈᑎᒃᓴᖓᓂᒃ ᐊᒻᒪᓗ ᓴᕐᖓᖅᑎᑉᐸᓪᓕᐊᑐᐃᓐᓇᕈᑎᒃᓴᖓᓂᒃ. ᒫᓐᓇ ᓄᓇᒋᔭᑦᑎᓐᓂ ᐋᓪᓚᐅᑐᐃᓐᓇᔾᔮᒍᓐᓃᖅᑐᒍᑦ ᐊᖏᕐᕋᕆᔭᑦᑎᓐᓂᒃ, ᐱᔾᔪᑎᒋᓪᓗᒍ ᐃᓄᐃᑦ ᐅᖃᐅᓯᖏᓐᓄᑦ ᐱᔨᑦᓯᕋᐅᑏᑦ ᐊᕙᖕᒧᑦ ᓯᐊᒻᒪᓕᖓᓂᕆᓂᐊᓕᖅᑕᖏᓐᓄᑦ ᐊᑐᐃᓐᓇᐅᓗᑎᒃ ᓄᓇᕗᓕᒫᒥ ᒪᓕᓪᓗᒋᑦ ᒪᓕᒋᐊᖃᖅᑎᑕᐅᔪᑦ ᑎᑎᕋᖅᓯᒪᔪᑦ ᐃᓕᓴᕆᔭᐅᓯᒪᔪᓂ ᐅᖃᐅᓰᑦ ᐱᖁᔭᖏᓐᓂ,” ᐅᖃᓚᐅᖅᑐᖅ ᔫ  ᐊᑕᒍᑦᑖᓗᒃ, ᐊᓪᓚᑦᑎ ᑮᓇᐅᔭᓕᕆᔨᖓ ᕿᑭᖅᑕᓂᒃᑯᑦ ᐊᒻᒪᓗ ᐃᒃᓯᕙᐅᑕᖓ ᕿᑭᖅᑕᓂ ᐅᖃᐅᓯᓕᕆᓂᕐᒧᑦ ᑐᓴᐅᒪᖃᑦᑕᐅᑎᓕᕆᓂᕐᒧᓪᓗ ᑲᑎᒪᔨᕋᓛᑦ.  ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐱᖁᔭᖓ ᐃᓕᓴᖅᓯᐅᒪᒍᑕᐅᕗᖅ ᐃᓄᒃᑎᑐᑦ, ᐃᓄᐃᓐᓇᖅᑐᑦ, ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᓂ ᐅᖃᐅᓯᕐᓂ ᓄᓇᕗᒻᒥ. ᐱᖁᔭᑦ ᓇᓗᓇᐃᖅᓯᒪᒍᑕᐅᓂᐊᓕᖅᑐᑦ ᐱᔨᑦᓯᕋᐅᑏᑦ ᐊᑐᐃᓐᓇᐅᑎᑕᐅᖁᓪᓗᒋᑦ ᐃᓄᐃᑦ ᐅᖃᐅᓯᖓᒍᑦ ᓄᓇᕗᒻᒥ ᐊᒻᒪᓗ ᒐᕙᒪᑐᖃᒃᑯᓐᓂ ᓄᓇᕗᑦ ᐃᓗᐊᓂ, ᒪᓕᒐᕐᓅᖓᔪᓂ ᐊᐅᓚᑦᓯᔾᔪᑕᐅᔪᓂ ᐊᒻᒪᓗ ᓄᓇᕗᑦ ᒪᓕᒐᓕᐅᕐᕕᖓᓂ. ᐱᖁᔭᖅ ᓴᖅᑭᕈᑕᐅᓯᒪᕗᖅ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᔾᔪᑎᒃᓴᖏᓐᓄᑦ ᐱᖁᔭᕐᓄᑦ.

ᒪᒃᑯᒃᑲᓗᐊᖅᑎᓪᓗᒍ ᓄᓇᕗᑦ, ᓄᓇᕗᑦ ᓯᕗᓕᕈᑎᖃᖅᐳᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᓴᐳᑎᔭᐅᓯᒪᒍᑎᒃᓴᓄᑦ, ᐱᕚᓪᓕᕈᑎᒃᓴᓄᑦ ᐊᒻᒪᓗ ᓯᕗᒧᐊᒋᐊᕈᑎᒃᓴᓄᑦ ᑲᓇᑕᒥ. ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐱᖁᔭᖓ ᒪᓕᒐᓐᖑᖅᑎᑕᐅᓂᖓ
ᐊᑐᖅᑕᐅᖃᑦᑕᕐᓂᐊᑐᒃᓴᐅᒐᓗᐊᖅᐳᖅ ᒪᓕᒃᑕᐅᔪᓐᓇᑦᓯᐊᕈᓐᓇᕐᓗᓂ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓄᑦ ᑲᓇᑕᒥ ᓯᓚᕐᔪᐊᓕᒫᒥᓗ ᓯᕗᒧᐊᒃᐸᓪᓕᕈᑎᒋᔭᐅᔪᓐᓇᕐᓗᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓰᑦ ᐱᔪᓐᓇᐅᑎᖏᓐᓄᑦ.

ᑐᑭᓯᒋᐊᒃᑲᓐᓂᕐᕕᒃᓴᐅᔪᖅ:

ᕕᓕ ᔫ ᕚᓐᔅ
ᑐᑭᒧᐊᒃᑎᑦᑎᔨᐅᓚᐅᐱᓪᓚᑦᑐᖅ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4900
ᓱᒃᑲᔪᒃᑰᕈᑖ: (867) 975-4949
ᐊᑭᖃᓐᖏᑦᑐᒧᑦ: 1-888-646-0006

ᕕᓂ ᖃᕆᑕᖅ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
ᐅᖄᓚᐅᑖ: (867) 975-8414
ᓱᒃᑲᔪᒃᑰᕈᑖ: (867) 979-3238
ᐊᑭᖃᓐᖏᑦᑐᒧᑦ: 1-800-667-2742