ᓴᒃᑯᑕᐅᑲᐅᑎᒋᔭᕆᐊᓕᒃ
(ᔮᓐᓄᐊᕆ 23, 2026 – ᐃᖃᓗᐃᑦ, ᓄᓇᕗᑦ) ᐃᒡᓗᕗᑦ ᑯᐊᐳᕇᓴᓐ ᓯᕗᓪᓕᖅᐹᕐᒥᒃ ᑲᑎᒪᔨᖏᑦ ᑲᑎᒪᓚᐅᖅᑐᑦ ᐃᖃᓗᓐᓂ ᐃᑉᐸᔅᓴᖅ, ᓇᓗᓇᐃᒃᑯᓯᖅᓯᓪᓗᑎᑦ ᐱᕚᓪᓕᖅᑐᒻᒪᕆᐅᓂᖓᓂᒃ ᐃᓄᖕᓄᑦ−ᓯᕗᒃᑲᖅᑖᖑᔪᖅ ᐃᒡᓗᓕᕆᓂᖅ ᓄᓇᕗᑦ ᑲᔪᓯᓂᖃᖅᐸᓪᓕᐊᓕᕐᓂᖓᓂᒃ. ᐅᓐᓄᓴᒃᑯᑦ, ᐃᓚᒋᔭᐅᔪᑦ ᑲᑎᒪᓂᖃᖅᑎᓪᓗᒋᑦ ᐊᖏᖅᓯᓚᐅᖅᑐᑦ ᐃᒡᓗᕗᑦ ᒪᓕᒐᕋᓛᖏᖕᓂᒃ, ᑮᓇᐅᔭᖅᑐᕈᑎᒃᓴᓪᓗᐊᕆᓂᐊᖅᑕᖏᑕ ᐊᑐᐊᒐᖏᖕᓂᒃ, ᐊᒻᒪᓗ ᑎᒃᑯᐊᖅᑕᐅᓪᓗᓂ ᑮᓇᐅᔭᓕᕆᔨᒋᓂᐊᖅᑕᖓ, ᐋᖅᑮᓂᖃᖅᑐᑎᑦ ᑯᐊᐳᕇᓴᐅᔫᑉ ᐊᐅᓚᔾᔪᓯᕆᓂᐊᓕᖅᑕᖓᓂᒃ ᐊᒻᒪᓗ ᐱᖁᔭᖅᑎᒍᑦ ᑐᙵᕕᑖᖅᑐᑎᑦ.
“ᑖᓐᓇ ᐱᒻᒪᕆᐊᓘᕗᖅ ᐊᒻᒪᓗ ᐊᑐᖅᑕᐅᔭᕆᐅᖅᑐᓂ ᓯᕗᒧᐊᒍᑎᒋᔭᐅᕙᓪᓕᐊᓂᖓ ᐋᖅᑮᒍᒪᓪᓗᑎᑦ ᐊᑦᑕᕐᓇᙱᑦᑐᓂᒃ ᐃᒡᓗᓕᐅᕐᓗᑎᑦ ᐊᒻᒪᓗ ᐊᑭᑐᓗᐊᙱᑦᑐᓂᒃ ᐃᒡᓗᖃᖅᑎᑦᑎᓗᑎᑦ ᐊᔾᔨᖃᐅᖅᑐᓂᒃ ᐃᓄᐃᑦ ᑭᙴᒪᒋᔭᖏᖕᓂᒃ ᓯᕗᓪᓕᐅᑎᖁᔭᖏᓐᓂᓪᓗ,” ᐅᖃᖅᑐᒥᓂᐅᓪᓗᓂ ᐃᒃᓯᕙᐅᑕᕆᔭᐅᑲᐃᓐᓇᖅᑐᖅ ᐹᓪ ᐃᕐᖓᐅᑦ. “ᐃᒡᓗᕗᑦ ᑐᑭᖃᕐᓂᐊᕐᒪᑦ ᐋᖅᑮᓇᓱᐊᕈᑎᒋᔭᐅᓗᓂ ᐊᑯᓂᐅᔪᒧᑦ ᐃᓄᖕᓄᑦ ᒪᑭᒪᑎᑕᐅᔪᓐᓇᕋᔭᕐᓂᖓᓂᒃ ᐸᕐᓇᐅᓯᐅᖁᓪᓗᒋᑦ, ᓴᓇᓗᑎᑦ, ᐊᒻᒪᓗ ᐊᐅᓚᑦᑎᓗᑎᑦ ᐃᒡᓗᓂᒃ, ᐃᓄᖕᓄᑦ ᐃᒡᓗᓕᐅᕐᓗᑎᑦ, ᐃᒡᓗᓂᒃ ᓴᓇᓗᑎᑦ ᐃᓄᐃᑦ.”
ᑲᑎᒪᔩᑦ ᐋᖅᑭᒃᓯᒪᓂᓖᑦ ᒪᕐᕉᓐᓂᒃ ᑭᒡᒐᖅᑐᐃᔨᖃᖅᑐᑎᑦ ᓄᓇᕗᑦ ᑐᙵᕕᒃ ᑎᒥᖓᓃᙶᖅᑑᒃ ᐊᒻᒪᓗ ᐊᑕᐅᓯᕐᒥᒃ ᐊᑐᓂ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ. ᑲᒪᒋᔭᖃᓗᐊᕐᓂᐊᖅᑐᑦ ᐃᖅᑲᓇᐃᔭᖅᑎᑖᕐᓗᑎᑦ ᐊᖓᔪᖅᑳᖓᓂᒃ ᐊᐅᓚᑦᓯᔨᒻᒪᕆᒻᒥᒃ ᐊᒻᒪᓗ ᓯᕗᒧᐊᒋᐊᓯᓗᑎᑦ ᑲᑎᒪᔨᐅᖏᓐᓇᕐᓂᐊᕐᒪᑕ.
ᐃᒡᓗᕗᑦ ᐃᑲᔪᖅᑐᖅᑕᐅᕗᖅ $135 ᒥᓕᐊᓐ ᐃᓄᐃᑦ ᐃᒡᓗᖃᖅᑎᑕᐅᓂᖏᖕᓄᑦ ᑮᓇᐅᔭᕐᓂᒃ, ᓴᓇᔭᐅᓯᒪᔪᑦ ᒪᑭᒪᖁᓪᓗᒋᑦ ᐊᑯᓂᐅᔪᒧᑦ ᐊᑭᑐᓗᐊᙱᑦᑐᓂᒃ ᐃᓄᐃᑦ ᐃᒡᓗᖃᖅᑎᑕᐅᓂᐊᕋᒥᒃ ᐊᒻᒪᓗ ᑕᐃᒪᐃᒃᑯᑎᑦ ᖃᐅᔨᒪᑦᑎᐊᖅᑎᑦᑎᓂᖃᕐᓂᐊᖅᑐᑦ ᒪᑭᒪᔪᓐᓇᖅᑐᓂᒃ ᐃᒡᓗᖃᖅᑎᑕᐅᖃᑦᑕᕐᓂᐊᕋᒥᒃ ᐃᓄᐃᑦ ᐊᓂᒍᖅᐸᓪᓕᐊᑎᓪᓗᒍ. ᑯᐊᐳᕇᓴᐅᔪᖅ ᐊᑯᓂᐊᓗᒃ ᓄᓇᕗᒻᒥ ᐃᒡᓗᖃᐃᓐᓇᖃᑦᑕᙱᓐᓂᖓᓂᒃ ᑲᒪᒋᔭᖃᕐᓂᖅᓴᐅᓂᐊᖅᑐᑦ ᐊᑭᑐᓗᐊᙱᑦᑐᓂᒃ ᐊᑐᖅᑐᐊᖅᑎᑦᑎᖃᑦᑕᕋᔭᖅᑐᑎᑦ ᐃᒡᓗᓂᑦ ᐊᒻᒪᓗ ᓇᒻᒥᓂᖅᑖᕈᓐᓇᕐᓂᕐᒧᑦ ᓂᕈᐊᖅᓯᒍᓐᓇᑎᑦᑎᓪᓗᑎᑦ ᓄᓇᕗᒻᒥᐅᑕᕐᓄᑦ ᐃᓄᖕᓄᑦ, ᓯᓚᑖᓂ ᓄᓇᕗᑦ ᐊᑭᑭᓪᓕᒋᐊᖅᑎᑦᑎᔾᔪᑎᖓᓂᒃ ᑭᒃᑯᑐᐃᓐᓇᕐᓄᑦ ᐃᒡᓗᐃᑦ ᐊᑐᖅᑐᐊᖅᑕᐅᔪᓐᓇᕐᓂᖏᑦ ᐊᒻᒪᓗ ᐃᖅᑲᓇᔭᕐᕕᒋᔭᐅᔪᓄᑦ ᐃᒡᓗᖃᖅᑎᑕᐅᔪᓐᓇᕐᓂᖏᖕᓂᒃ ᐋᖅᑭᒃᓯᒪᐅᖅᑐᓂᒃ.
2025-ᖑᑎᓪᓗᒍ, ᓄᓇᕗᑦ ᑐᙵᕕᒃ ᑲᑎᒪᔨᖏᑦ, ᐱᖁᑎᕐᔪᐊᓕᕆᓂᕐᒧᑦ ᐃᒡᓗᓕᕆᓂᕐᒧᓪᓗ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑎᒍᑦ, ᐃᑲᔪᖅᑐᐃᓚᐅᖅᑐᑦ ᐱᕙᓪᓕᐊᒍᑎᒋᔭᐅᓂᖓᓂᒃ ᐃᒡᓗᕗᑦ ᐊᒻᒪᓗ ᐃᓄᐃᑦ ᐃᒡᓗᓕᐅᖅᑕᐅᓂᖏᖕᓄᑦ ᑮᓇᐅᔭᓂᒃ. ᐃᑉᐸᔅᓴᖅ ᑲᑎᒪᓂᐅᔪᑦ ᓯᕗᒧᐊᑦᑎᑦᑎᓚᖅᑐᑦ ᐊᖏᕐᕋᑦᓴᓕᐅᓚᐅᖅᑕᒥᒃ, ᓄᓇᕗᒻᒥ ᓯᕗᓪᓕᖅᐹᖅ ᐃᓄᐃᑦ ᐃᒡᓗᓕᐅᖅᑕᐅᓂᖏᖕᓄᑦ ᖃᓄᐃᓕᐅᕈᑕᐅᓗᑎᑦ ᐸᕐᓇᐅᑎ, ᓄᓇᕗᑦ ᑐᙵᕕᒃ ᑎᒥᖓᑕᓗ ᑕᐅᑐᙳᐊᖅᑕᖓ ᐊᑐᖅᑕᐅᖁᓛᖅᑐᓂᐅᒃ ᓯᕗᓂᒃᓴᒥ ᐃᓄᐃᑦ ᓄᓇᓕᖏᑦ ᐱᓕᕆᐊᖃᕐᕕᐅᔪᒻᒪᕆᐅᓗᑎᑦ ᑖᒃᑯᑎᒎᓇᖅ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ 2025-2029−ᒧᑦ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒋᐊᕐᕕᒃᓴᖅ
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
