2014-11-07

2006-ᒥ ᐃᓄᐃᑦ ᓄᓇᕐᔪᐊᕐᒥ ᑲᑎᒪᔨᖏᑦ ᑲᑎᒪᕕᒡᔪᐊᕐᓂᖃᖅᑎᓪᓗᒋᑦ ᐹᕈ, ᐊᓛᔅᑲᒥ, ᓄᕕᐱᕆ 7 ᓇᓗᓇᐃᖅᑕᐅᓯᒪᓕᓚᐅᕐᒪᑦ ᐃᓄᐃᑦ ᐅᑉᓗᕆᔭᖓᓂᒃ ᐅᐱᒍᓱᒍᑎᒋᓪᓗᒍ ᐃᓄᐃᑦ ᓄᓇᕐᔪᐊᕐᒥ ᑲᑎᒪᔨᖏᑕ ᓂᕆᐅᒋᔭᒥᓂᒃ ᐅᓂᒃᑳᖅᑎᐅᔪᑉ ᐃᓅᓕᕐᕕᐊᓂᒃ, ᐄᐱᓐ ᕼᐋᑉᓴᓐ ᐊᖓᔪᒃᖠᖅ.

ᐃᓄᐃᑦ ᐅᑉᓗᖓᑦ ᐊᑐᖅᑎᓪᓗᒍ ᐃᑲᔪᖅᑐᐃᓂᖃᕈᑎᐅᖕᒪᑦ “ᑕᒪᕐᒥᒃ ᐃᓄᐃᑦ ᒐᕙᒪᒋᔭᖏᑦ, ᓴᓇᕝᕕᒋᔭᖏᑦ, ᐊᒻᒪᓗ ᓄᓇᓕᒋᔭᖏᑦ ᐅᑭᐅᑕᒫᑦ ᓇᓗᓇᐃᖅᓯᔨᐅᖃᑦᑕᖁᓪᓗᒋᑦ ᑖᔅᓱᒥᖓ ᐅᑉᓗᕐᒥᒃ ᐃᓄᐃᑦ ᐅᑉᓗᕆᖕᒪᒍ, ᐊᒻᒪᓗ ᓈᒻᒪᒃᑐᑎᒍᑦ ᖁᕕᐊᓱᒍᑎᖃᖅᑎᑦᑎᕙᒃᓗᑎᒃ ᖃᓄᐃᓕᐅᖅᑎᑦᑎᓂᖃᖅᐸᒃᓗᑎᒃᓗ.”

ᑕᕝᕙᓂ ᐅᑭᐅᕆᔭᑦᑎᓐᓂ, ᐃᓕᑦᓯᓐᓂᑦ ᑐᓴᖅᑎᑕᐅᔪᒪᕗᒍᑦ! ᓄᕕᐱᕆ 7-ᒥ, ᐊᑐᕐᓗᓯᐅᒃ ᖃᕆᑕᐅᔭᑎᒍᑦ ᐅᖃᓘᑎᐊᓛᑎᒍᓪᓗ ᐅᓇ #inuujunga ᐃᓚᒋᔭᐅᖃᑕᐅᓕᖅᓯᒪᖁᓪᓗᓯ, ᐊᑐᕐᓗᓯᐅᒃ ᑐᓴᐅᒪᖃᑦᑕᐅᑎᓕᕆᔾᔪᑎᓯ – ᓲᕐᓗ Facebook-ᑯᑎᒍᑦ, Twitter-ᑯᑎᒍᑦ ᐊᓯᖏᑎᒍᓪᓗ… – ᐅᖃᓯᖃᕐᓗᓯ ᐱᔾᔪᑎᖃᖅᑐᓂᒃ ᐃᓄᖕᓂᒃ, ᐅᓂᒃᑳᕐᑐᐊᓂᒃ, ᐊᔾᔨᓕᐅᖅᓯᒪᔭᑦᓯᓐᓂᒃ, ᖃᓄᐃᓪᓚᕆᒃᑑᓂᕐᓂᒃ ᓱᓕᔫᓪᓗᑎᒃ, ᖁᕕᐊᓱᒍᑎᖃᕐᓂᕐᓂᒃ ᐅᕝᕙᓘᓐᓃᑦ ᓱᓇᑐᐃᓐᓇᒥᒃ ᐃᓅᓂᕐᓄᑦ ᖁᕕᐊᓱᒍᑎᒋᔭᕐᓂᒃ.

ᐊᑏᑦ ᓄᓇᕐᔪᐊᑉ ᐅᑭᐅᖅᑕᖅᑐᖓᓂᕐᒥᐅᖑᓪᓗᑕ ᐃᓅᓂᕗᑦ ᖁᕕᐊᓱᒍᑎᒋᓚᐅᕐᓚᕗᑦ ᓄᕕᐱᕆ 7-ᖑᓕᖅᐸᑦ, ᐃᓄᐃᑦ ᐅᑉᓗᖓᑦ!