(ᔪᓚᐃ 31, 2025 – ᓅᒃ, ᑲᓛᑦᖡᑦ ᓄᓇᖓ) ᒥᓂᔅᑕᖓ ᒧᐅᑦ ᕗᐅᕈᑉ ᐃᐊᔨᑎ, ᑲᓛᑦᖡᑦ ᓄᓇᖓᑕ ᒥᓂᔅᑕᖓ ᑮᓇᐅᔭᓕᕆᓂᕐᒧᑦ ᐊᒻᒪᓗ ᑖᒃᓯᓕᕆᓂᕐᒧᑦ, ᑲᑎᒪᖃᑎᒋᓚᐅᖅᑕᖏᑦ ᒥᓂᔅᑕ ᑕᐃᕕᑎ ᐊᕿᐊᕈᖅ, ᒥᓂᔅᑕᖓ ᓄᓇᓕᖕᓂ ᐱᔨᑦᑎᕋᖅᑎᒃᑯᑦ ᓄᓇᕗᑦ ᒐᕙᒪᒃᑯᓂ (GN), ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓ ᐊᖓᔪᖅᑳᖓ ᔨᐅᓕᒥ ᑐᓐᕋᓗᒃ, ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, ᐊᖓᔪᖅᑳᖓ ᐅᓚᔪᒃ ᐊᑭᓱᒃ, ᐊᑎᓕᐅᓚᐅᖅᑐᑦ ᑎᑎᕋᖅᓯᒪᔪᑦ ᑐᑭᓯᖃᑎᒌᒍᑎᒥᖕᓂᒃ ᐱᐅᓯᕚᓪᓕᖁᓪᓗᒋᑦ ᑐᑭᓯᓇᓱᖃᑎᒌᖃᑦᑕᕐᓂᖅ ᐃᑲᔪᖅᑎᒌᖕᓂᖅ ᐊᒻᒪᓗ ᐱᓕᕆᖃᑎᒌᖕᓂᖅ ᐊᑐᖅᑕᐅᔪᓐᓇᓄᑦ ᑐᕌᖅᓗᑎᒃ ᓄᖑᑕᐅᕙᓪᓕᐊᓐᖏᓪᓗᑎᒃ ᐃᖃᓗᒐᓱᒡᕕᑦ ᐱᕙᓪᓕᐊᑎᑎᓂᖅ ᓄᓇᕗᒻᒥ ᐊᒻᒪᓗ ᑲᓛᑦᖡᑦ ᓄᓇᖓᓂ.
ᐅᓇ ᑎᑎᕋᖅᓯᒪᔪᑦ ᑐᑭᓯᖃᑎᒌᒍᑎᒥᖕᓂᒃ ᐋᕿᒃᓱᖅᑕᐅᓚᐅᖅᑐᖅ 2022 ᐊᖏᕈᑎᖏᑦ ᐊᕙᑖᓂᑦ ᓄᓇᕗᑦ ᐊᒻᒪᓗ ᑲᓛᑦᖡᑦ ᓄᓇᖓ, ᓴᖕᖏᒃᑎᒋᐊᖁᓪᓗᒋᑦ ᐃᑲᔪᖅᑎᒌᖕᓂᖅ ᓄᖑᑕᐅᕙᓪᓕᐊᓐᖏᓪᓗᑎᒃ ᐃᖃᓗᒐᓱᖕᓂᖅ, ᐊᒻᒪᓗ ᐱᕚᓪᓕᖅᑎᓪᓗᒋᑦ ᐊᕙᑎᑦᑎᓂ, ᒪᑭᒪᓇᓱᐊᕈᑎᑦ, ᐊᒻᒪᓗ ᐃᓅᓯᓕᕆᓂᕐᒧᑦ ᓯᕗᓪᓕᐅᑎᒋᐊᓕᑦ ᓄᓇᖏᓐᓂ. ᐅᓇ ᐱᓯᒪᓂᖃᖅᑐᖅ ᑕᒪᐃᓐᓂᑦ ᐊᖏᖅᑕᐅᓯᒪᔪᓂᒃ ᖃᑭᔾᔪᑎᒃᓴᓕᐅᕈᑎᒋᓗᒋᑦ ᐃᖃᓗᒐᓱᖕᓂᖅ ᐅᓇᓗ ᐃᖏᕐᕋᑎᑦᑎᔨᐅᔪᖅ ᓄᓇᓕᖕᓂᒃ ᐊᒻᒪᓗ ᒪᑭᒪᓇᓱᐊᕐᓂᕐᒧᑦ ᑮᓇᐅᔭᓕᐅᕐᓂᕐᒧᑦ ᐱᕙᓪᓕᐊᑎᑦᑎᓂᕐᒧᑦ.
ᐊᔾᔨᒌᒥᒃ ᐃᓄᐃᑦ ᐱᖁᓯᑐᖃᖓᑦ ᐊᒻᒪᓗ ᐊᑯᓂ ᐃᒻᒪᑲᓪᓛᓗᖕᓂᑦ ᐊᑐᖅᓯᖃᑎᒌᒃᓯᒪᔪᑦ ᐃᖃᓗᒐᓱᒃᕕᒋᓪᓗᒋᑦ ᕿᑭᖅᑖᓗᒃ ᐃᑭᕋᓴᖓ ᐊᒻᒪᓗ ᓴᓐᓂᕈᑎᐅᑉ ᐃᒪᖓ, ᑕᒪᕐᒥᒃ ᐊᕕᒃᑐᖅᓯᒪᔪᓂᑦ ᐃᓕᓴᕆᔭᐅᓯᒪᔪᑦ ᐱᒻᒪᕆᐅᓂᖏᓐᓂᒃ ᐃᖃᓗᒐᓱᒡᕕᒋᓪᓗᒋᑦ ᐋᕿᐅᑎᑦᑎᐊᖅᐸᖕᒪᑕ ᐊᕙᑎᑦᑎᓄᑦ ᐊᒻᒪᓗ ᐃᓅᓯᓕᕆᓂᕐᒧᑦ ᑭᓐᖒᒪᓇᖅᑐᓄᑦ ᒪᑭᒪᔾᔪᑎᒃᓴᖃᖅᑎᑦᑎᓪᓗᑎᒃ ᐱᕕᖃᖅᑎᑦᑎᓪᓗᑎᒃ. ᐅᑯᐊ ᐱᕚᓪᓕᖅᑎᓐᓂᐊᕐᓗᒋᑦ ᑐᕌᖅᑕᕗᑦ, ᑲᓛᑦᖡᑦ ᓄᓇᖓ-ᓄᓇᕗᑦ ᐃᖃᓗᒐᓱᒃᑎᑦ ᑲᑎᒪᔨᕋᓛᑦ ᓴᕿᑕᐅᓂᐊᖅᑐᑦ, ᑭᒡᒐᖅᑐᖅᑎᖃᕐᓗᑎᒃ ᒐᕙᒪᒃᑯᖏᓐᓂᑦ ᑲᓛᑦᖡᑦ ᓄᓇᖓ ᐊᒻᒪᓗ ᓄᓇᕗᑦ, ᓄᓇᕗᑦ ᑐᓐᖓᕕᒃ ᑎᒥᖓ, ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ. ᐅᓇ ᑲᑎᒪᔨᕋᓛᖅ ᐱᔭᕆᐊᑭᒡᓕᑎᑦᑎᓯᒪᓂᐊᖅᑐᖅ ᑐᑭᓯᓇᓱᖃᑎᒌᒍᑕᐅᒋᐊᓕᖕᓂᒃ, ᑐᓴᐅᓴᔭᐅᔭᕆᐊᓕᖕᓂᒃ-ᑐᓴᖅᑎᑦᑎᖃᑦᑕᕐᓗᑎᒃ, ᐊᒻᒪᓗ ᑲᑐᔾᔨᓗᑎᒃ ᐱᓕᕆᐊᒃᓴᓂᒃ ᐃᖃᓗᒐᓱᖕᓂᕐᒧᑦ ᐊᒻᒪᓗ ᑕᒪᒃᑯᓄᖓ ᐱᔾᔪᑕᐅᔪᓄᑦ.
“ᐃᖃᓗᒐᓱᖕᓂᖅ ᐃᓄᐃᑦ ᐱᓕᕆᔾᔪᓯᑐᖃᖓ, ᐃᓅᓯᖏᓐᓄᑦ ᐊᑕᔪᖅ ᐊᒻᒪᓗ ᑮᓇᐅᔭᓕᐅᕈᑕᐅᔪᖅ ᑕᒪᒃᑯᐊ ᐱᒻᒪᕆᐅᓂᖅᐹᑦ ᐊᑐᖅᑕᐅᔪᑦ ᑲᓛᑦᖡᑦ ᓄᓇᖓᓂ. ᖁᕕᐊᓱᒃᐳᒍᑦ ᑐᓴᖅᑎᑦᑎᔪᓐᓇᖅᑎᑕᐅᒐᑦᑕ ᐊᑐᖅᓯᒪᔭᑦᑎᓐᓂᒃ ᐱᕙᓪᓕᐊᑎᑦᑎᓪᓗᑕ ᓴᙱᔪᒥᒃ ᐃᖃᓗᒐᓱᒡᕕᖃᕐᓂᐊᕋᑦᑕ ᓴᓂᓕᕗᓪᓗ ᓄᓇᕗᒻᒥ ᐊᒻᒪᓗ ᐱᔭᕆᐊᑭᒡᓕᑎᓯᒪᓗᒋᑦ ᓴᙱᔪᒥᒃ ᐱᓕᕆᖃᑦᑎᒌᑦᑎᐊᕐᓂᑦᑎᒍᑦ ᑲᔪᓯᔪᒥᒃ ᐱᕙᓪᓕᐊᑦᑎᐊᕐᓂᐊᖅᑐᑦ ᓄᓇᕗᒻᒥ ᐊᒻᒪᓗ ᑲᓛᑦᖡᑦ ᓄᓇᖓᓂ. ᐅᓇ ᐊᖏᕈᑎ ᐊᕙᑖᓂᑦ ᑲᓛᑦᖡᑦ ᓄᓇᖓᓂ ᐊᒻᒪᓗ ᓄᓇᕗᑦ ᐃᖃᓗᒐᓱᒃᑎᑦ ᓴᙱᕗᖅ ᑐᑭᓯᓇᓱᖃᑎᒌᑦᑎᐊᖃᑦᑕᕈᓯᖓᑦ ᓄᖑᑕᐅᕙᓪᓕᐊᓐᖏᑦᑐᓂᒃ ᐃᖃᓗᒐᓱᖕᓂᕐᒧᑦ ᐊᐅᓚᑦᑎᓂᕐᒧᑦ ᐊᒻᒪᓗ ᐃᑲᔪᖅᑎᒌᒃᑐᑦ ᐃᖃᓗᒐᓱᒃᑐᓕᕆᓂᕐᒥ.” ᐅᖃᓚᐅᖅᑐᖅ ᒥᓂᔅᑕ ᐳᐊᒃ ᑲᓛᑦᖡᑦ ᓄᓇᖓᓂ ᒐᕙᒪᒃᑯᑦ.
“ᐅᓇ ᐊᖏᕈᑎ ᐋᕿᒃᓱᐃᓯᒪᔪᖅ ᓄᑖᓂᒃ ᐋᕿᒃᓯᒪᕙᒌᖅᑐᑦ ᐱᕈᖅᐸᓪᓕᐊᓂᐊᖅᑐᑦ ᓄᓇᕗᑦ ᐃᖃᓗᒐᓱᒃᑎᖏᑦ ᐱᓕᕆᖃᑎᒋᓗᒋᑦ ᓴᓂᓕᕐᒥᐅᑕᕗᑦ,” ᐅᖃᓚᐅᖅᑐᖅ ᒥᓂᔅᑕ ᐊᕿᐊᕈᖅ. “ᒪᓕᑦᑎᐊᕐᓗᑎᒃ ᑲᓛᑦᖡᑦ ᓄᓇᖓᓂ ᐃᖃᓗᒐᓱᖕᓂᕐᒧᑦ ᐊᐅᓚᑦᑎᓂᖅ, ᓴᕿᑦᑎᓯᒪᕗᒍᑦ ᒫᓐᓇ ᐱᕕᖃᖅᑎᑦᑎᓂᖅ ᐊᖑᓇᓱᒃᑎᓂᒃ ᐊᒻᒪᓗ ᒥᑭᔪᑦ ᓇᖕᒥᓂᖁᑎᒋᔭᐅᔪᑦ ᐋᕿᒃᓱᐃᑎᓪᓗᑕ ᖃᓄᐃᓕᖓᕙᓪᓕᐊᔾᔪᑎᒃᓴᖓᓂᒃ ᐊᑯᓂᐅᔪᒃᑯᑦ ᒪᑭᒪᓇᓱᐊᕈᑎᒃᓴᐃᑦ ᐱᕈᕐᓗᑎᒃ, ᐃᑲᔫᓯᐊᕐᓗᑎᒃ ᑕᒪᕐᒥᒃ ᐊᑯᑭᑦᑐᕐᒥᐅᑦ ᐊᒻᒪᓗ ᓄᓇᕗᒻᒥᐅᑦ.”
“ᐃᓄᐃᑦ ᐊᑐᖅᓯᓗᑎᒃ ᑭᓯᐊᓂᐅᖕᒪᑕ ᐃᒪᕕᖕᒥ ᐊᕙᑖᓂᑦ ᓄᓇᕗᑦ ᐊᒻᒪᓗ ᑲᓛᑦᖡᑦ ᓄᓇᖓᓂ ᓂᕿᖃᕐᕕᐅᔪᑦ ᐃᓚᒌᓂᑦ ᐃᒻᒪᑲᓪᓚᓂᑐᖃᖅ ᐊᕐᕌᒍᓂᑦ ᐊᒥᓱᓂᑦ. ᐅᓪᓗᒥ, ᓄᓇᕗᑦ ᐃᓄᐃᑦ ᐊᒻᒪᓗ ᐃᓄᐃᑦ-ᓇᖕᒥᓂᖃᖅᑐᑦ ᐃᖃᓗᒐᓱᒃᑎᑦ ᑲᒻᐸᓂᐅᔪᑦ ᑲᔪᓯᔪᒥᒃ ᑕᐃᒪᓐᓇ ᐱᓕᕆᕗᑦ. ᐱᒻᒪᕆᐅᕗᖅ ᓴᐳᒻᒥᓗᑕ ᐊᒻᒪᓗ ᓱᕈᖅᑕᐅᑦᑕᐃᓕᓗᒋᑦ ᐃᒪᐃᑦ ᐊᒻᒪᓗ ᓂᕐᔪᑎᑦ ᑕᐃᒪᓗ ᐃᓄᐃᑦ ᑲᔪᓯᓂᐊᕐᒪᑕ ᓂᕿᖃᖅᑎᑦᑎᓗᑎᒃ ᐃᓚᒥᖕᓂᒃ ᐊᑯᓂ ᓯᕗᓂᒃᓴᖃᖅᑎᑦᑎᓗᑎᒃ,” ᐅᖃᓚᐅᖅᑐᖅ ᓄᓇᕗᑦ ᑐᓐᖓᕕᒃ ᑎᒥᖓ ᐊᖓᔪᖅᑳᖅ ᑐᓐᕋᓗᒃ. “ᐅᓇ ᑎᑎᕋᖅᓯᒪᔪᑦ ᑐᑭᓯᖃᑎᒌᒍᑎᒥᖕᓂᒃ ᐊᖏᔪᒥᒃ ᐱᒋᐊᖅᑎᑦᑎᓂᐊᖅᑐᖅ ᑐᑭᓯᓇᓱᖃᑎᒌᑦᑎᐊᖃᑦᑕᕐᓗᑎᒃ ᐃᑲᔪᖅᑎᒌᒡᓗᑎᒃ ᓯᓚᕐᔪᐊᒥ ᐱᓕᕆᖃᑎᒋᔭᒥᖕᓂᒃ, ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓ ᓂᕆᐅᒃᐳᖅ ᐋᕿᒃᓱᐃᑦᑎᐊᕐᓂᐊᕐᒪᑕ ᐃᖃᓗᒐᓱᖕᓂᕐᒧᑦ ᐃᓚᒌᒍᓯᖅ ᐊᕙᑖᓂᑦ ᓄᓇᕗᑦ ᐃᓄᐃᑦ ᐊᒻᒪᓗ ᐱᓇᓱᖃᑎᒋᔭᕗᑦ ᑲᓛᑦᖡᑦ ᓄᓇᖓ ᐊᒻᒪᓗ ᓄᓇᕗᑦ ᒐᕙᒪᒃᑯᑦ.”
“ᑖᒃᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, ᐱᔭᕆᐊᑭᒡᓕᓂᖓ ᐊᒻᒪᓗ ᐊᑐᖅᑕᐅᑦᑎᐊᕐᓂᐊᕐᒪᑕ ᐃᓄᐃᑦ ᐃᓚᐅᓂᖓ ᐊᖑᓇᓱᖕᓂᕐᒥ, ᐃᖃᓗᒐᓱᖕᓂᕐᒥ, ᐊᒻᒪᓗ ᓄᐊᑦᑎᔾᔪᓯᑦ ᐅᑯᐊ ᓄᖑᑕᐅᕙᓪᓕᐊᓐᖏᓪᓗᑎᒃ ᐊᒻᒪᓗ ᓴᖕᖏᒃᑎᒋᐊᕐᓗᑎᒃ ᐃᓄᐃᑦ ᐱᐅᓯᖓ ᐊᒻᒪᓗ ᓂᕿᒃᓴᖃᕐᑎᑦᑎᓂᖅ, ᐱᐅᓯᕚᓪᓕᕐᓗᑎᒃ ᓂᕿᑦᑎᐊᕙᒃᓴᖃᕐᑎᑦᑎᓂᖅ, ᐊᒻᒪᓗ ᐃᑲᔪᕐᓗᑎᒃ ᓄᓇᓕᖕᓂ ᑮᓇᐅᔭᓕᐅᕈᑎᒃᓴᑦ ᐊᑑᑎᖃᒻᒪᕆᖕᒪᑕ ᐋᕿᑦᑎᐊᖅᓯᒪᐃᓐᓇᕐᓂᐊᕐᓗᒍ ᐱᐅᓯᑐᖃᖅᐳᑦ”, ᐅᖃᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᖅ ᐊᑭᓱᒃ. “ᐃᖃᓗᒐᓱᖕᓂᖅ ᑭᒡᒐᖅᑐᐃᔪᖅ ᐱᒻᒪᕆᐅᔪᒥᒃ ᖃᓄᐃᓕᐅᕈᑎᑦ ᑲᓇᑕᐅᑉ ᐅᑭᐅᖅᑕᖅᑐᐊᓂ, ᑐᓂᓯᓯᒪᕗᖅ ᓄᖑᑕᐅᕙᓪᓕᐊᓂᖏᓐᑦᑐᓂᒃ ᐃᑲᔫᑎᓂᒃ ᐊᒻᒪᓗ ᐃᖅᑲᓇᐃᔭᖅᑎᑦᑎᔪᑦ ᑕᐃᑲᓂ ᐃᖅᑲᓇᐃᔮᒃᓴᖃᖅᐸᓐᖏᑦᑐᓄᑦ ᐊᒻᒪᓗ ᐊᑭᑐᔫᖕᒪᑕ ᐃᓅᓯᖃᖅᖢᓂ ᐊᒥᓱᓂᒃ ᐃᓚᖃᖅᑎᓪᓗᒋᑦ ᐊᔾᔨᒋᔭᐅᓐᖏᒻᒪᑦ ᐊᓯᑦᑎᓐᓂ ᑲᓇᑕᒥ, ᐅᓇ ᐊᑎᓕᐅᖅᖢᒍ ᐃᖃᓗᒐᓱᖕᓂᕐᒧᑦ-ᐱᓯᒪᔪᑦ ᑎᑎᕋᖅᓯᒪᔪᑦ ᑐᑭᓯᖃᑎᒌᒍᑎᒥᖕᓂᒃ ᐱᕚᓪᓕᖅᑎᑦᑎᔪᖅ ᐱᕕᖃᖅᑎᑦᑎᓂᕐᒥᒃ ᑐᑭᓯᓇᓱᖃᑎᒌᑦᑎᐊᖃᑦᑕᕐᓗᑎᒃ ᐱᒻᒪᕆᐅᒋᔭᐅᔪᓂᒃ ᐊᕕᒃᑐᖅᓯᒪᔪᑦᑎᓐᓂ ᐊᒻᒪᓗ ᐃᓚᒌᒍᓯᑦᑎᓐᓂᒃ ᐊᕙᑖᓂᑦ ᐃᓄᐃᑦ ᑲᓇᑕᒥ ᐊᒻᒪᓗ ᑲᓛᑦᖡᑦ ᓄᓇᖓᓂ, ᐅᑯᐊ ᐊᑐᖅᓯᓯᒪᔪᐃᓐᓇᐃᑦ ᐃᒻᒪᑲᓪᓚᒻᒪᕆᐊᓗᖕᓂᑦ.”
ᑐᓴᐅᒪᑎᑦᑎᔨᓂᑦ ᖃᐅᔨᒋᐊᕐᓂᖅ:
ᑲᑐᕆᓐ ᑎᕗᓘ
ᐊᐅᓚᑦᓯᔨᖓ ᑐᓴᒐᒃᓴᓕᕆᔨᒃᑯᑦ
ᐊᐅᓚᑦᓯᕕᖓ ᓄᓇᓕᖕᓂ ᐱᔨᑦᑎᕋᖅᑎᒃᑯᑦ
ᓄᓇᕗᑦ ᒐᕙᒪᒃᑯᑦ
ᑲᑕᕆ ᑲᐃᒑᑦ
ᐊᖓᔪᖅᑳᖅ ᐊᐅᓚᑦᓯᕕᖓᓂ, ᒥᓂᔅᑕᖓ ᐃᖃᓗᒐᓱᒃᑎᑦ, ᐊᖑᓇᓱᒃᑎᑦ, ᐱᕈᖅᑐᑦ ᓂᕿᒃᓴᑦ, ᐊᒻᒪᓗ ᐃᒻᒥᒍᑦ‑ᓂᕿᖃᖅᑎᑦᑎᓂᖅ, ᒐᕙᒪᒃᑯᑦ ᑲᓛᑦᖡᑦ ᓄᓇᖓᓂ
ᐃᕙᓗᐊᕐᔪᒃ ᒥᐅᓕᑦ
ᑐᑭᒧᐊᒃᑎᖓ ᑐᓴᐅᑎᓕᕆᔨᒃᑯᑦ
ᓄᓇᕕᑦ ᑐᓐᖓᕕᒃ ᑎᒥᖓ
ᑭᐅᕋᓐ ᐱᓕᐅᕆᑎ
ᑐᑭᒧᐊᒃᑎᖓ, ᐸᕐᓇᐃᓂᖅ ᑐᓴᐅᑎᓕᕆᔨᒃᑯᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(867) 975-8398
