ᓴᖅᑭᑕᐅᑲᐅᑎᒋᒋᐊᓕᒃ
ᐊᐃᕆᓕ 10, 2024 (ᐃᖃᓗᐃᑦ, ᓄᓇᕗᑦ) – ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐱᓕᕆᖃᑎᖃᖅᖢᑎᒃ ᓄᓇᕗᑦ ᑐᙵᕕᒃᑯᓐᓂ. (ᓄᓇᕗᑦ ᑐᙵᕕᒃᑯᑦ), ᓇᐅᔮᕐᒥᐅᓂᒃ ᑐᓴᖁᔨᕗᑦ ᐳᕙᒡᓗᖕᒪᖔᑦ ᖃᐅᔨᓴᖅᑕᐅᓛᕐᓂᖏᓐᓂᒃ ᐊᐃᕆᓕ 15-ᒥ ᒪᐃ ᐃᓱᐊᓄᑦ. ᖃᐅᔨᓴᖅᐸᓪᓕᐊᖏᓐᓇᖅᑐᑦ ᐅᓄᖅᓯᕙᓪᓕᐊᓂᖏᓐᓄᑦ ᐳᕙᒡᓗᒃᑐᑦ ᓄᓇᓕᖕᓂ.
ᓇᐅᔮᕐᒥᐅᓕᒫᑦ ᐃᓚᐅᔭᕆᐊᖃᓪᓚᕆᒃᐳᑦ ᖃᐅᔨᓴᖅᑕᐅᔪᓂᒃ. ᐳᕙᒡᓗᖕᓇᖅ ᐋᓐᓂᐊᕐᔪᐊᖑᖕᒪᑦ, ᓄᑕᖅᑲᓪᓗ ᐃᓐᓇᐃᓪᓗ ᐊᒃᑐᖅᑕᐅᓴᕋᐃᓐᓂᖅᓴᐅᓪᓗᑎᒃ. ᖃᐅᔨᓴᖅᑕᐅᓵᓕᓂᖅ ᒪᒥᓴᖅᑕᐅᓂᕐᓗ ᐱᒻᒪᕆᐅᔪᑦ ᐱᔪᓐᓃᖅᑎᓪᓗᒍ ᐳᕙᒃᓗᖕᓇᖅ ᓄᖅᑲᖅᑎᓪᓗᒍᓗ ᓯᐊᒻᒪᒃᐸᓪᓕᐊᓂᖓ ᐋᓐᓂᐊᖅ ᐊᓯᖕᓄᑦ.
ᖃᐅᔨᓴᖅᑕᐅᓛᖅᑐᑦ ᓇᐅᔮᑦ ᕼᐋᒻᒪᓚᑦᑯᑦ ᑎᑎᕋᕐᕕᐊᓂ. ᓄᓇᓕᖕᒥᐅᑦ ᖃᐅᔨᒋᐊᕐᕕᐅᖃᑦᑕᕐᓂᐊᖅᐳᑦ ᐃᒡᓗᒥᐅᑕᐅᖃᑎᒌᓕᒫᑦ ᖃᐅᔨᓴᖅᑕᐅᒐᓗᐊᕐᒪᖔᑕ. ᖃᐅᔨᓴᖅᑕᐅᒋᐊᕐᖓᖅᑎᓪᓗᒋᑦ ᐊᐱᖅᓱᖅᑕᐅᔪᑦ, ᐳᕙᒡᓗᖕᓂᕐᒧᑦ ᖃᐅᔨᓴᖅᑕᐅᔪᑦ, ᐊᒻᒪ ᓴᒡᕕᒃᑯᑦ ᐊᔾᔨᓕᐅᖅᑕᐅᔪᑦ. ᖃᐅᔨᓴᖅᑕᐅᒃᑲᓐᓂᕐᓂᖅ ᐃᓚᖃᑐᐃᓐᓇᕆᐊᓕᒃ ᐊᐅᒃᑯᑦ ᖃᐅᔨᓴᒐᒃᓴᓂᒃ ᐅᕝᕙᓘᓐᓃᑦ ᐊᐅᖏᖅᑕᐅᓂᒃᑯᑦ.
“ᖁᔭᓕᔪᒪᕙᒃᑲ ᓇᐅᔮᕐᒥᐅᑦ ᐱᓕᕆᖃᑎᖃᓚᐅᕐᓂᖏᓐᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᒻᒪᕆᖏᓐᓂᒃ, ᐱᓕᕆᖃᑎᒌᒃᖢᑎᒃ ᓄᓇᓕᖕᓂ ᓯᕗᒻᒧᐊᒃᑎᑦᑎᔪᑦ ᐱᐅᓯᒋᐊᖁᓪᓗᒋᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓴᖅᑭᑦᑐᑦ,” ᐅᖃᓚᐅᖅᐳᖅ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ. “ᑭᒃᑯᓕᒫᑦ ᑎᓕᐅᖅᐸᒃᑲ ᐃᑲᔪᖅᓱᐃᖏᓐᓇᖁᓪᓗᒋᑦ ᖃᐅᔨᓴᖅᑕᐅᔪᓂᒃ. ᖃᐅᔨᔭᐅᓵᓕᓂᖅ ᐱᓪᓗᐊᑕᐅᕗᖅ ᐱᑕᖃᕈᓐᓃᖅᑎᑦᑎᓂᐊᕐᓗᓂ ᐳᕙᒡᓗᖕᓂᕐᒥᑦ ᓄᓇᑦᑎᓐᓂᑦ. ᑕᒪᓐᓇ ᑲᔪᓯᑏᓐᓇᕐᓚᕗᑦ ᐱᓕᕆᖃᑎᒌᒡᓗᑕᓗ ᖃᐅᔨᒪᓂᐊᕋᑦᑕ ᖃᓄᐃᙱᑦᑎᐊᕐᓂᖅᓴᒥᒃ ᓯᕗᓂᒃᓴᒥᒃ ᑕᒪᐃᓐᓄᑦᑎᐊᖅ ᓄᓇᕗᒥᐅᓄᑦ.”
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᑦ ᑐᙵᕕᒃᑯᓪᓗ ᐃᑲᔪᖅᑐᖅᑕᐅᓂᐊᖅᐳᑦ ᖃᐅᔨᓴᖅᑕᐅᓂᓕᒫᖏᓐᓂ ᐃᑲᔫᑎᒃᓴᖃᕐᓗᑎᒃ ᐅᓄᖅᑐᓂᑦ ᐱᒻᒪᕆᐅᔪᓂᑦ ᐱᓕᕆᖃᑎᒌᑦ ᑲᑐᔾᔨᖃᑎᒌᖏᓐᓂ, ᐊᒻᒪ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᖏᓐᓂᒃ, ᐅᑯᓂᖓᓗ ᐋᓐᓂᐊᖃᕐᓇᙱᑦᑐᓕᕆᔨᑦ ᑐᑦᑕᕐᕕᖏᑦ ᑲᓇᑕᒥ ᐊᒻᒪ ᓄᓇᖅᑲᖅᑳᖅᓯᒪᔪᑦ ᐱᔨᑦᑎᕋᖅᑎᖏᑦ ᑲᓇᑕᒥ.
“ᖃᔅᓯᐅᓂᖏᑦ ᐳᕙᒡᓗᒃᑐᑦ ᓄᓇᕗᒻᒥ ᖁᑦᑎᖕᓂᖅᓴᒻᒪᕆᐅᕌᓂᒃᐳᑦ ᑲᓇᑕᓕᒫᒥ ᐃᓄᒋᐊᓗᐊᕐᓂᖏᓐᓄᑦ ᐊᖏᕐᕋᕆᔭᐅᔪᑦ ᐊᒻᒪ ᐊᔪᕐᓇᖅᑐᖅᓯᐅᕈᑕᐅᖃᑦᑕᖅᑐᑦ ᐋᓐᓂᐊᕕᖕᒥ ᐱᔨᑦᑎᕋᖅᑕᐅᒋᐊᒃᓴᖅ,” ᐅᖃᓚᐅᖅᐳᖅ ᓄᓇᕗᑦ ᑐᙵᕕᒃᑯᑦ ᑎᒥᖓᑦᑕ ᐊᖓᔪᖅᑳᑉ ᑐᒡᓕᐊ ᐹᓪ ᐃᕐᙵᐅᑦ. “ᐊᓕᐊᓇᐃᒍᓱᒃᐳᒍᑦ ᑲᑐᔾᔨᖃᑎᖃᕈᓐᓇᕋᑦᑕ ᓄᓇᕗᑦ ᒐᕙᒪᖓᓂ ᖃᐅᔨᓴᖅᑎᓪᓗᒋᑦ ᓇᐅᔮᓂ, ᐃᓕᓐᓂᐊᖅᑎᑦᑎᒃᑲᓐᓂᕈᓐᓇᖅᓯᖁᓪᓗᑕ ᐳᕙᒡᓗᖕᓇᐅᑉ ᒥᒃᓵᓄᑦ ᐊᒻᒪ ᐊᐃᑦᑐᕐᓗᐃᑦᑕᐃᓕᒪᓗᑕ ᓄᓇᖅᑲᑎᒌᓂᒃ. ᑕᒪᑦᑕ ᐱᓕᕆᔪᓐᓇᖅᐳᒍᑦ ᓄᖅᑲᖅᑎᑦᑎᓗᑕ ᓯᐊᒻᒪᒃᐸᓪᓕᐊᔪᒥᒃ ᐳᕙᒡᓗᖕᓇᖅᑐᖅ ᖃᑯᒍᑦᑎᐊᖅ ᐱᑕᖃᕈᓐᓃᖅᑎᑦᑎᔪᓐᓇᕐᓂᐊᕋᑦᑕ ᑕᒪᑐᒥᖓ ᒪᒥᑦᑐᓐᓇᖅᑐᒥᒃ ᐋᓐᓂᐊᕆᔭᐅᓕᖅᐸᒃᑐᒥᒡᓗ ᓄᓇᕗᒻᒥᙶᖅᑐᒥᒃ.”
ᑐᑭᓯᒋᐊᒃᑲᓐᓂᕈᑎᒃᓴᐃᑦ ᓴᖅᑭᑕᐅᓂᐊᖅᐳᑦ ᓄᓇᓕᖕᓄᑦ ᓇᓚᐅᑎᒃᑯᑦ ᐅᖃᐅᓯᐅᓗᑎᒃ ᐊᒻᒪ ᓇᐅᔮᓂ ᕼᐋᒻᒪᓚᒃᑯᓐᓂ.
ᑐᓴᕆᐊᒃᑲᓐᓂᕈᑎᓄᑦ ᐳᕙᓪᓗᖕᓇᕐᒥ ᖃᐅᔨᓴᖅᑕᐅᓂᕐᒧᓪᓗ, ᐅᖃᓕᒫᕐᓗᒍ ᐳᕙᒡᓗᖕᓂᕐᒧᑦ ᓱᓕᔪᑦ ᐊᒻᒪᓗ ᐳᕙᒡᓗᖕᓇᒧᑦ ᐅᕕᓂᒃᑯᑦ ᖃᐅᔨᓴᖅᑕᐅᔾᔪᑎ ᕿᒥᕐᕈᐊᒐᖓ.
-30-
ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:
ᑭᐊᕕᓐ ᑲᑉᓗᑦᓯᐊᖅ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐱᐊᕆ ᐃᐊᓱ
ᑐᓴᒐᒃᓴᓕᕆᔨᒻᒪᕆᒃ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
