ᑐᓴᕋᑦᓴᓕᕆᔩᑦ

ᓯᓚᓕᕆᓂᖅ ᓯᕗᓕᖅᑕᐅᔪᖅ ᐃᓄᓐᓄᑦ ᐊᒻᒪᓗ ᓄᓇᕗᑦ ᐃᓄᖏᓐᓅᖓᔪᖅ

ᓄᓇᕗᑦ ᑐᓐᖓᕕᒃᑯᑦ ᑎᒥᖓᓄᑦ (ᑐᓐᖓᕕᒃ) ᐊᖓᔪᖅᑳᑉ−ᑐᒡᓕᐊ, ᔭᐃᒥᓯ ᐃᑦᑐᓗᒃ ᐃᓅᕕᒃ, ᓄᓇᑦᓯᐊᒥ ᐅᖃᓕᒪᓚᐅᖅᑐᖅ ᐃᓄᐃᑦ ᖃᐅᔨᒪᓂᖏᓐᓂᒃ ᓯᓚᓕᕆᓂᕐᒧᑦ ᐊᑐᐊᒐᕐᓂᒃ ᐊᒻᒪᓗ ᐃᓱᒪᓕᐅᕈᑕᐅᒋᐊᓕᓐᓂᒃ ᓴᒃᑯᑕᐅᑎᓪᓗᒍ ᑲᓇᑕᒥ ᐃᓄᐃᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑐᑭᒧᐊᒍᑎᒃᓴᓄᑦ ᐃᓅᕕᒃ, ᓄᓇᑦᓯᐊᒥ, ᑲᓇᑕ.

“ᓄᓇᕗᒻᒥ, ᑕᐃᒃᑯᐊᑎᑐᑦ ᐃᓄᐃᑦ ᓄᓇᖓᓂ ᓴᓂᓪᓕᕗᑦ, ᐃᑉᐱᒋᒐᑦᑎᒍ ᐊᒃᑐᐃᓂᖓ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐅᕙᑦᑎᒍᑦ. ᐊᐅᒃᐸᓪᓕᐊᔪᑦ ᓄᓇᐅᑉ ᖁᐊᖑᓂᖓᓂᒃ ᓱᕋᑉᐸᓪᓕᐊᒍᑕᐅᔪᑦ ᐊᖅᑯᑎᓄᑦ, ᐊᖏᕐᕋᐃᑦ ᑐᓐᖓᕕᖏᑦ ᐸᓚᓐᖓᑦᑕᐅᔪᑦ ᐊᒻᒪᓗ ᐅᓗᕆᓇᕐᓯᕙᓪᓕᐊᑐᐃᓐᓇᖅᑐᖅ ᐊᖑᓇᓱᓐᓂᒃᑯᑦ ᐊᒻᒪᓗ ᒪᑭᒪᔾᔪᑎᒃᓴᓄᑦ ᐊᐅᓚᓂᐅᔪᑦ.” ᐃᑦᑐᓗᒃ ᐅᖃᖅᑐᖅ.

“ᐃᑲᕐᕋᕋᓵᓗᓐᓂᒃ ᓯᓚᒥᒃ ᖃᐅᔨᒪᓂᐅᔪᑦ ᑎᒍᔭᐅᕙᑦᑐᑦ ᐊᕐᕌᒍᑕᒫᑦ ᐃᓄᓐᓄᑦ ᐊᒻᒪᓗ ᖃᐅᔨᒪᓂᖏᓐᓃᖔᖅᑐᖅ ᓯᕗᓕᑦᑕ. ᑕᒪᓐᓇ ᑎᒍᒥᐊᖅᑕᒻᒪᕆᐅᔪᖅ ᖃᐅᔨᒪᓂᖅ ᓄᓇᒥᒃ ᐃᓚᓕᐅᔾᔭᐅᓯᒪᒋᐊᓕᒃ ᐊᐅᓚᑕᐅᓂᖓᓂᒃ ᐊᒻᒪᓗ ᐊᑐᐊᒐᖏᓐᓄᑦ ᒐᕙᒪᑐᖃᒃᑯᑦ ᐊᕙᑎᒧᑦ ᐱᓇᓱᐊᒐᖏᓐᓂᒃ ᐅᑭᐅᖅᑕᖅᑐᒥ.” ᐃᑦᑐᓗᒃ ᐅᖃᕆᐊᒃᑲᓐᓂᓚᐅᖅᑐᖅ.

ᑕᓪᓕᒪᑦ ᓯᕗᓪᓕᐅᔾᔭᐅᔭᕆᐊᓖᑦ ᓇᓗᓇᐃᖅᑕᐅᓯᒪᔪᑦ ᑖᒃᑯᓇᓂ ᑐᑭᒧᐊᒍᑎᒃᓴᓂ. ᐃᓚᒋᔭᐅᓪᓗᑎᒃ ᐅᑯᐊ:

  • ᖃᐅᔨᒪᓂᖅ ᐊᐅᓚᑦᓯᒍᓐᓇᓂᕐᓗ. ᐃᓄᐃᑦ ᖃᐅᒪᔨᓂᖓ ᐊᑐᖅᑕᐅᒋᐊᓕᒃ ᐃᓱᒪᓕᐅᕈᑎᓂ.
  • ᐃᓗᓯᖅ, ᖃᓄᐃᓐᖏᓯᐊᕐᓂᖅ ᐊᒻᒪᓗ ᐊᕙᑎ. ᐃᓄᐃᑦ ᐃᓗᓯᖓ ᖃᓄᐃᓐᖏᓯᐊᕐᓂᖓᓗ ᐃᓚᓕᐅᔾᔭᐅᓯᒪᑦᓯᐊᖁᓪᓗᒋᑦ ᓯᓚᓕᕆᓂᕐᒧᑦ ᐊᒃᑐᐊᔪᑦ ᐊᑐᐊᒐᓕᐊᖑᓕᕋᐃᑉᐸᑕ.
  • ᓂᕿᓕᕆᓃᑦ. ᐃᓄᐃᑦ ᓂᕿᓕᕆᔾᔪᓯᖏᑦ ᓴᕐᖓᑦᑎᑕᐅᒋᐊᕈᑎᒃᓴᖏᓐᓂᒃ ᐊᒻᒪᓗ ᓂᕆᔭᒃᓴᖃᑦᓯᐊᓂᕐᒧᑦ ᐃᓚᓕᐅᔾᔭᐅᓯᒪᓗᑎᒃ.
  • ᐱᖁᑎᕐᔪᐊᑦ − ᖃᓄᐃᓕᑦᓴᐅᑎᒋᔪᓐᓇᕐᓂᖏᑦ ᐱᖁᑎᕐᔪᐊᖁᑎᕗᑦ ᐊᓯᔾᔨᐸᓪᓕᐊᓂᖓᓄᑦ ᓯᓚᐅᑉ ᐊᒻᒪᓗ ᖃᓄᐃᓕᑦᓴᐅᑎᒋᔪᓐᓇᕐᓂᖓᓄᑦ ᓄᓇ. ᖃᐅᔨᒪᒋᐊᕆᐊᓕᕗᑦ ᐱᖁᑎᕐᔪᐊᑦ ᐊᑐᖃᑦᑕᖅᑕᕗᑦ ᐊᑦᑕᓇᐃᕐᓯᒪᖁᓪᓗᒋᑦ ᐊᒻᒪᓗ ᐊᑯᓂ ᐊᑐᕈᓐᓇᕐᓗᑎᒃ.
  • ᐊᐅᓚᔪᓐᓇᐅᑎ − ᐃᓄᐃᑦ ᐊᑐᐃᓐᓇᖃᕆᐊᓖᑦ ᒪᑭᒪᔾᔪᑎᒃᓴᒥᒃ ᐊᒻᒪᓗ ᐊᑭᑐᓗᐊᓐᖏᑦᑐᒥᒃ ᐊᐅᓚᔪᓐᓇᐅᑎᓅᖓᔪᓂᒃ.

ᓴᖅᑭᖅᑕᐅᑎᓪᓗᒍ ᑐᑭᒧᐊᒍᑎᒃᓴᖅ $1 ᒥᓕᔭᓐ ᐊᖏᕈᑕᐅᓚᐅᖅᑐᑦ ᐃᓄᓐᓄᑦ ᓯᕗᓕᖅᑕᐅᔪᓂᒃ ᐱᓇᓱᐊᕈᑎᒃᓴᐅᓪᓗᑎᒃ ᑐᓴᖅᑎᑦᓯᒍᑕᐅᓚᐅᖅᑐᖅ ᐊᖓᔪᖅᑳᖅ ᒥᓂᔅᑕ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑲᓇᑕ ᒐᕙᒪᒃᑯᖏᓐᓂ, ᑳᑐᕆᓐ ᒪᒃᑭᓇ.

“ᑕᒫᓃᑦᑐᒍᑦ ᑲᔪᓯᑎᑦᓯᔪᒃᓴᒫᖑᓪᓗᑕ ᐱᓇᓱᐊᒐᑦᑎᒍᑦ ᐃᓚᖓᑦ ᓯᕗᓕᖅᑏᑦ ᐃᑯᓪᓚᐅᒥᑎᑦᓯᒐᓱᐊᕐᓂᖓᓄᑦ ᐊᒻᒪᓗ ᓱᖏᐅᑎᔭᕐᓂᕐᒧᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᖃᐅᔨᒪᔪᒍᑦ ᑖᓐᓇ ᐱᒋᐊᕐᓂᑐᐃᓐᓇᐅᒻᒪᑦ.”

-30-

ᑐᑭᓯᒋᐊᒃᑲᓂᕐᕕᒃᓴᖅ:

ᕗᕌᓐᑯ ᐳᓯᒥ
ᑐᑭᒧᐊᒃᑎᑦᑎᔨᐅᓚᐅᐱᓪᓚᑦᑐᖅ ᑐᓴᒪᐅᔾᔪᑎᓕᕆᓂᕐᒧᑦ
ᓄᓇᕗᑦ ᑐᓐᖓᕕᒃ ᑎᒥᖓ

www.tunngavik.com