(English) BACKGROUNDER – Historic Ruling from the Nunavut Court of Justice Upholding Inuit Rights
- ᓄᓇᕗᑦ ᑐᓐᖓᕕᒃᑯᑦ ᑲᑎᒪᔨᖏᑦ ᐱᓇᓱᐊᒐᑦᓴᓕᐅᓚᐅᖅᑐᑦ ᑐᓐᖓᕕᒃᑯᑦ ᐊᐃᕙᔨᒻᒪᕆᖓᓄᑦ ᕕᑉᕗᐊᓕ 2001, ᐊᐃᕙᔾᔪᑎᒃᓴᖏᓐᓄᑦ ᐋᖅᑭᒋᐊᕈᑎᓂᒃ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᑳᓐᑐᓛᓂᒃ ᐊᒻᒪᓗ ᓄᑖᓐᖑᖅᑎᑕᐅᒋᐊᖁᓪᓗᒋᑦ ᑮᓇᐅᔭᖅᑑᑎᒃᓴᖅᑖᕆᔭᐅᕙᑦᑐᑦ 2003-ᒥᒃ 2013-ᒧᑦ ᑲᔪᓯᕙᓪᓕᐊᑦᓯᐊᖁᓪᓗᒍ ᓈᖕᒪᑦᓯᐊᖅᑐᒃᑯᑦ ᐊᑐᓕᖅᑎᑕᐅᕙᓪᓕᐊᖁᓪᓗᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ.
- ᑲᓇᑕᐅᑉ ᒐᕙᒪᖓ ᐊᒻᒪᓗ ᓄᓇᕗᑦ ᒐᕙᒪᖓ ᐊᐃᕙᒋᐊᓯᓚᐅᖅᑐᑦ ᒪᐃ, 2001.
- ᐊᐃᕙᓂᖓᑦ ᓯᖁᑦᑎᓚᐅᖅᑐᖅ ᔭᓐᓄᐊᓕ 2003, ᑕᐃᑦᓱᒪᓂ ᐃᓄᓕᕆᔨᑐᖃᒃᑰᓚᐅᖅᑐᑦ ᐃᓚᓕᐅᔾᔨᔪᒪᓚᐅᓐᖏᓐᓂᖏᓐᓄᑦ ᖃᐅᔨᓴᖅᑕᐅᑲᓐᓂᕆᐊᖃᕐᓂᖏᓐᓂᒃ ᑮᓇᐅᔭᖅᑑᑎᒃᓴᓄᑦ ᐱᒋᐊᓐᖓᐅᑕᐅᓚᐅᖅᑐᓄᑦ ᐃᓱᒪᒋᔭᐅᓚᐅᖅᑐᑦ, ᐊᒻᒪᓗ ᐱᓕᕆᐊᒃᓴᒥᓂᒃ ᑲᒪᒍᒪᐃᖅᓱᑎᒃ ᐃᓛᒃᑯᑦ 23 ᑲᔪᓯᑎᑕᐅᒋᐊᖃᕐᓂᖓᓄᑦ.
- ᕕᑉᕗᐊᓕ 2003, ᒐᕙᒪᑐᖃᒃᑯᑦ ᐊᐃᕙᔨᖓ ᐲᖅᑕᐅᕗᖅ.
- ᒪᐃ, 2003, ᐃᓄᓕᕆᔨᑐᖃᒃᑯᓐᓂ ᒥᓂᔅᑕᐅᑉ ᑐᒡᓕᐊ ᑎᑎᕋᓚᐅᖅᑐᖅ ᑐᓐᖓᕕᒃᑯᓐᓄᑦ ᒪᓂᒪᑎᑦᓯᒍᑎᒥᓂᒃ ᐊᑯᓂᐅᔪᒧᑦ-ᐃᓕᖓᔪᒥᒃ ᐸᕐᓇᓂᕐᒥᒃ ᐃᓛᒃᑯᑦ 23-ᒧᑦ ᐊᒻᒪᓗ ᒫᓐᓇᐃᓇᕐᒧᑦ-ᐃᓕᖓᔪᒥᒃ ᐱᒋᐊᕈᑎᒃᓴᒥᒃ. ᑖᓐᓇ ᑐᓐᖓᕕᓕᐅᔾᔭᐅᓚᐅᖅᑐᖅ ᑐᓐᖓᕕᒃᑯᓐᓄᑦ ᐊᒻᒪᓗ ᐊᐃᕙᓃᑦ ᐱᒋᐊᒃᑲᓐᓂᖅᑐᑎᒃ.
- ᓯᕗᓪᓕᖅᐹᖅ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᑳᓐᑐᓛᒃ ᐸᕐᓇᑕᐅᕕᒃᓴᖓ ᐊᒻᒪᓗ ᑮᓇᐅᔭᖅᑑᑎᒃᓴᓄᑦ ᐋᖅᑭᑦᓯᒪᔭᐅᔪᖅ ᐃᓱᓕᕝᕕᒃᓴᖓᓄᑦ ᑎᑭᐅᑎᔪᖅ ᔪᓚᐃ 9, 2003.
- ᑕᒻᒪᖅᓯᒪᔪᖅᓯᐅᖅᑎᒻᒪᕆᒃ ᑲᓇᑕᒥ ᓴᖅᑮᔪᖅ ᐅᓂᒃᑲᒥᒃ ᕕᑉᕗᐊᓕ 2004, ᖃᕿᐊᖅᓯᓪᓗᓂ ᐃᓄᓕᕆᔨᑐᖃᒃᑯᑦ ᐊᐅᓚᑦᓯᓂᖏᓐᓂᒃ ᐊᑐᓕᖅᑎᑕᐅᒋᐊᖃᕐᓂᖏᓐᓄᑦ ᓄᓇᑖᕐᓂᕐᒧᑦ ᐊᖏᕈᑏᑦ.
- ᐊᐅᒡᒍᓯ 2004. ᐱᖓᓱᑦ ᐊᐃᕙᔩᑦ ᐊᒻᒪᓗ ᐃᖅᑲᓇᐃᔭᖅᑏᑦ ᑲᑎᑦᑐᑦ ᕿᒥᕐᕈᓇᑉᐸᓪᓕᐊᓕᖅᓱᑎᒃ ᐱᕙᓪᓕᐊᓂᖏᓐᓂᒃ ᐊᐃᕙᓃ. ᐊᖏᖃᑎᒌᒍᑕᐅᓚᐅᓐᖏᑦᑐᑦ ᑕᒪᕐᒥᑦᓯᐊᖅ ᐅᖃᐅᓯᕆᔭᐅᔪᓕᒫᑦ. ᒐᕙᒪᑐᖃᒃᑯᑦ ᐊᐃᕙᔨᖓ ᐊᓂᔪᖅ ᑲᑎᒪᓂᕐᒥᒃ.
- ᐊᐅᒡᒍᓯ 2004, ᐱᒋᐊᒃᑲᓐᓂᕋᓱᐊᖅᑐᑦ ᐅᖃᖃᑎᒌᖕᓂᕐᒥᒃ ᑲᔪᓯᓐᖏᑦᑐᒥᒃ ᐃᓄᓕᕆᔨᑐᖃᒃᑯᑦ ᕿᐱᓗᖕᒪᑕ ᓈᖕᒪᑦᑐᒥᒃ ᒪᓂᒪᑎᑦᓯᖁᔭᐅᒐᒥᒃ ᑮᓇᐅᔭᖅᑑᑎᒃᓴᓂᒃ ᓇᓗᓇᐃᖅᓯᑎᑦᓴᐅᓂᐊᖅᑐᒥᒃ ᐱᖕᒪᕆᐅᓂᖓᓂᒃ ᐱᔾᔪᑕᐅᔪᖅ ($10 ᒥᓕᔭᓐ ᐅᑭᐅᓄᑦ ᑕᓪᓕᒪᓄᑦ ᐃᓕᖓᔪᒥᒃ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᓂᕐᒧᑦ).
- ᓅᕙᐃᒻᕙ 2004, ᐃᓄᓕᕆᔨᑐᖃᒃᑯᓐᓂᒃ ᑎᑎᖅᑲᐅᓯᐊᖅ ᐅᖃᖅᓯᒪᔪᖅ ᐱᓂᐊᕐᓂᕋᐅᑎ ᐊᑐᕈᓐᓇᐃᖅᓯᒪᓕᖅᑐᖅ ᐊᒻᒪᓗ ᐸᕐᓇᐅᑎᖃᓐᖏᑦᑐᖅ ᑎᒃᑯᐊᓯᒃᑲᓐᓂᕋᔭᕐᓂᕐᒥᒃ ᓄᑖᒥᒃ ᐊᐃᕙᔨᒋᓂᐊᖅᑕᒥᓂᒃ. ᐃᓄᓕᕆᔨᑐᖃᒃᑯᑦ ᓇᖕᒥᓂᖅ ᐊᓂᑎᑦᑐᑦ ᐊᐃᕙᕕᒋᔭᒥᓂᒃ, ᐊᒻᒪᓗ ᐊᖏᕈᑎᒋᓯᒪᔭᒥᓂᒃ ᓯᖁᒥᑦᓯᔪᑦ ᒪᓂᒪᑎᑕᐅᔪᒧᑦ ᑎᑎᖅᑲᒥᒃ ᒪᐃ 2003.
- ᑕᕝᕗᖓ ᑎᑭᑦᑐᒍ, ᐊᐃᕙᓂᐅᔪᑦ ᓇᓗᓇᐃᖅᑕᐅᔪᑦ ᓄᖅᑲᕐᓂᖏᓐᓂᒃ.
- ᑐᓐᖓᕕᒃᑯᑦ ᑐᒃᓯᕋᐅᑎᓕᐊᕆᔭᒥᓂᒃ ᐊᑎᓕᐅᖃᑎᓖᑦ ᐊᕙᑎᓕᕆᓂᕐᒧᑦ ᑲᒥᓯᓇᒥᒃ ᐃᓄᓕᕆᔨᑐᖃᒃᑯᑦ ᐊᑐᓕᖅᑎᑦᓯᖏᓐᓂᖏᓐᓄᑦ ᓄᓇᕗᒻᒥ ᖃᐅᔨᓴᕐᓂᕐᒧᑦ ᐸᕐᓇᐅᑎᓂᒃ. ᐃᓄᓕᕆᔨᑐᖃᒃᑯᑦ ᖃᐅᔨᒃᑲᐃᔭᕆᐊᖃᖅᑎᑕᐅᓚᐅᖅᑐᑦ ᐅᓂᒃᑳᕐᓗᑎᒃ ᑕᒻᒪᖅᓯᒪᔪᖅᓯᐅᑎᕐᔪᐊᒧᑦ ᑲᓇᑕᒥ ᑖᑦᓱᒧᖓ ᕕᑉᕗᐊᓕ 2005-ᕈᓐᖏᓐᓂᖓᓂ.
- ᒪᐃ, 2005, ᑖᒪᔅ ᕘᔾᔪ ᐊᖏᖃᑎᒌᑦᑐᑎᒃ ᑎᒃᑯᐊᖅᑕᐅᔪᖅ ᐋᖅᑭᒋᐊᒃᑲᐃᔨᓐᖑᖅᑎᑕᐅᓪᓗᓂ ᑕᒪᐃᓐᓄᑦ ᐱᖓᓱᓄᑦ ᐱᓕᕆᖃᑎᒌᑦᑐᓄᑦ ᑖᒃᑯᐊ ᐱᓕᕆᖃᑎᒌᑦᑐᑦ ᐅᑎᖁᓪᓗᒋᑦ ᐱᓕᕆᐊᒥᓄᑦ ᐊᐅᓚᓂᖃᑦᓯᐊᕐᓗᑎᒃ ᐋᖅᑭᑦᑕᐅᖁᓪᓗᒋᑦ ᐊᐃᕙᓂᐅᔪᑦ ᑮᓇᐅᔭᖃᖅᑎᑦᓯᓂᕐᒧᑦ ᐊᒻᒪᓗ ᐸᕐᓇᓂᕐᒧᑦ ᐊᐃᑉᐹᓄᑦ ᐸᕐᓇᓐᓂᐅᔭᕆᐊᓕᖕᒧᑦ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᑳᓐᑐᓛᒃ.
- ᐊᐅᒡᒍᓯ, 2005, ᕘᔾᔪ ᓴᖅᑮᔪᖅ ᐅᓂᒃᑳᓂᒃ ᒫᓐᓇᐃᓇᕐᒧᑦ ᐃᓕᖓᔪᓂᒃ ᐊᑐᓕᖁᔨᔾᔪᑎᓂᒃ ᓴᖅᑮᓪᓗᓂ ᑮᓇᐅᔭᓕᑕᐅᒋᐊᖃᕐᓂᖏᓐᓄᑦ ᑎᒥᓐᖑᖅᑎᑕᐅᓯᒪᔪᑦ ᐊᖏᕈᑎᑎᒍᑦ, ᐊᒻᒪᓗ ᐊᐅᓚᑦᓯᐊᑲᓐᓂᕈᑎᒃᓴᓂᒃ ᐊᑐᓕᖅᑎᑕᐅᕙᓪᓕᐊᓂᐅᒋᐊᓕᖕᓄᑦ ᐊᐃᕙᔾᔪᑕᐅᔪᒧᑦ ᐋᖅᑭᒍᑎᒃᓴᓄᑦ ᐊᐅᓚᓂᐅᔪᑦ ᑖᒃᑯᓄᓐᖓᖓᓐᖏᑦᑐᓂᒃ ᑲᓇᑕᐅᑉ ᒐᕙᒪᒃᑯᖏᑕ ᓄᖅᑲᑎᑦᓯᓂᖓᓄᑦ.
- ᕘᔾᔪ ᑭᖑᓪᓕᖅᐹᖅᓯᐅᑎᓂᒃ ᐅᓂᒃᑳᓕᐅᖅᑐᖅ ᐱᓕᕆᖃᑎᒌᑦᑐᓄᑦ ᑐᕌᖓᔪᓂᒃ ᐃᓛᒃᑯᑦ 23.
- ᑲᓇᑕᐅᑉ ᒐᕙᒪᖓ ᕿᐱᓗᒍᑎᓕᒃ ᐊᖏᕈᒪᓇᓂᒋᑦ ᐊᒻᒪᓗ ᐊᑐᓕᖅᑎᑦᓯᒍᒪᓇᑎᒃ ᕘᔾᔪ ᐋᖅᑭᑦᑕᖏᓐᓂᒃ ᐊᑐᓕᖁᔨᔾᔪᑎᓪᓗᐊᑕᕐᓂᒃ.
- ᑲᓇᑕᐅᑉ ᒐᕙᒪᖓ ᓱᓕ ᓄᖅᑲᖓᑎᑦᓯᔪᖅ ᑕᒪᐃᓐᓂᒃ ᐱᓇᓱᐊᖅᑕᖏᓐᓂᒃ ᑐᓐᖓᕕᒃᑯᑦ ᐊᐃᕙᔾᔪᑏᑦ ᑐᓂᔭᐅᖁᓪᓗᒋᑦ ᓄᓇᕗᒻᒥ ᐋᖅᑭᒋᐊᒃᑲᐃᔩᑦ ᑲᑎᒪᔨᖏᓐᓄᑦ ᑕᒪᒃᑯᐊᕌᓗᒐᓗᐊᖅᑎᓪᓗᒋᑦ ᖃᕿᐊᖅᑕᐅᔾᔪᑏᑦ ᑕᒪᒃᑮᓐᓂᒃ ᑕᒻᒪᖅᓯᒪᔪᖅᓯᐅᑎᕐᔪᐊᒥᒃ ᑲᓇᑕᒥ ᐊᒻᒪᓗ ᕘᔾᔪᒥᒃ.
- ᑲᓇᑕᐅᑉ ᒐᕙᒪᖓ ᐃᓄᖕᓂᒃ ᐊᔪᖅᓴᑎᑦᓰᓇᖅᑐᑦ ᐊᒻᒪᓗ ᖃᓄᐃᒍᑕᐅᔪᓂᒃ ᑮᓇᐅᔭᑎᒍᑦ ᐊᒻᒪᓗ ᐃᑉᐱᓇᖅᑐᒃᑯᑦ ᖁᕕᐊᓱᓐᖏᒍᑎᓂᒃ ᑲᒪᒋᓛᕐᓂᐊᕐᓂᕋᖅᓯᒪᔭᒥᓂᒃ ᑲᔪᓯᑎᑦᓯᑦᑕᐃᓕᒪᓪᓗᑎᒃ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᑎᓕᐅᖅᑕᐅᓚᐅᖅᑐᓂᒃ 1993-ᒥ. ᑲᓇᑕᐅᑉ ᒐᕙᒪᖓ ᐊᖏᕈᑕᐅᓚᐅᖅᑐᓂᒃ ᑐᓂᓯᑦᑕᐃᓕᔪᖅ ᐱᐊᓂᒃᓯᒪᑎᓪᓗᒋᑦ ᓂᐅᕐᕈᑕᐅᓚᐅᖅᑐᑦ. ᑲᓇᑕᒥ ᑭᓱᓕᒫᓂᒃ ᐱᔪᒪᔭᒥᓂᒃ ᐱᓚᐅᖅᑐᖅ ᐊᑎᓕᐅᖅᑕᐅᑐᐊᕐᒪᑦ ᓄᓇᑖᕐᓂᕐᒧᑦ ᐊᖏᕈᑏᑦ. ᐃᓄᐃᑦ ᓱᓕ ᐅᑕᖅᑭᔪᑦ ᐊᑐᓕᖅᑎᑕᐅᓂᒃᓴᖏᓐᓂᒃ ᐊᑕᖏᕐᓗᑎᒃ ᐊᖏᕈᑏᑦ.
- ᑏᓰᒻᕙ 6, 2006, ᑐᓐᖓᕕᒃᑯᑦ ᐃᖅᑲᖅᑐᐃᕕᖕᒨᑎᑦᓯᔪᑦ ᑲᓇᑕᐅᑉ ᒐᕙᒪᖓᓂᒃ ᐱᓕᕆᐊᓴᒥᓂᒃ ᑲᔪᓯᑎᑦᓯᓚᐅᓐᖏᓐᓂᖏᓐᓄᑦ ᐱᓇᓱᐊᕆᐊᖃᖅᓯᒪᔭᒥᓂᒃ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ. ᑐᓐᖓᕕᒃᑯᑦ ᐊᑭᓕᖅᑕᐅᔪᒪᔪᑦ $1 ᐱᓕᔭᓂᒃ ᓱᕋᑦᑕᐅᓯᒪᓂᕐᒧᑦ.
- ᐳᕋᐃᔅᕗᐊᑕHᐊᐅᔅ PriceWaterhouseCoopers ᒪᓕᒐᕐᓂᐊᖅᑏᑦ ᐅᓂᒃᑳᓕᐅᖅᑐᑦ ᔭᒐᐃᓂᕐᒥᒃ ᒥᑦᓴᐅᓴᑦᓯᒪᔪᓂᒃ ᑲᑎᓪᓗᒋᑦ ᑮᓇᐅᔾᔭᒃᓴᐅᑎᒃᓴᐅᓚᐅᖅᑐᑦ ᐊᒻᒪᓗ ᐃᑲᔫᓯᐊᖑᒋᐊᖃᓚᐅᖅᑐᑦ ᐃᓄᖕᓄᑦ ᐅᓄᕐᓂᓖᑦ $123 ᒥᓕᔭᓐ ᐊᕐᕌᒍᑕᒫᑦ ᒐᕙᒪᒃᑯᑦ ᐊᑐᓕᖅᑎᑦᓯᓚᐅᓐᖏᓐᓂᖏᓐᓄᑦ ᓄᓇᑖᕈᑕᐅᓚᐅᖅᑐᓂᒃ ᐊᒻᒪᓗ ᓱᓕ ᑎᑭᑎᑦᓰᓇᖅᑐᑦ ᖃᓪᓗᓈᓃᓐᖔᖅᑐᓂᒃ ᐃᖅᑲᓇᐃᔭᖅᑎᓂᒃ. ᑕᒪᓐᓇ ᑐᑭᓕᒃ ᑕᐃᒪᓐᖓᑦ ᑐᓐᖓᕕᒃᑯᑦ ᐊᑎᓕᐅᓚᐅᖅᑎᓪᓗᒋᑦ ᓄᓇᑖᕈᑎᓂᒃ, ᐃᓄᐃᑦ ᑮᓇᐅᔭᖅᑖᕈᓐᓇᖅᓯᓯᒪᒐᔭᓕᖅᑐᑦ ᖄᒃᑲᓐᓂᖓᒍᑦ $1 ᐱᓕᔭᓐ ᐅᖓᑖᓃᑦᑐᓂᒃ ᐊᓯᖏᓐᓅᖏᑦᑐᖅ ᑮᓇᐅᔾᔭᒃᓴᐅᑎᑐᐃᓐᓇᕐᓄᑦ.
- ᓄᓇᑖᕐᓂᕐᒧᑦ ᐊᖏᕈᑦ ᒪᕐᕉᓐᓄᑦ ᐊᖏᕈᑕᐅᓯᒪᖕᒪᑦ, ᐃᓄᖕᓄᑦ ᓄᓇᕗᒻᒥ ᐊᒻᒪᓗ ᑯᐃᓐ ᑭᒡᒐᖅᑐᖅᑕᐅᓪᓗᓂ ᑲᓇᑕᒥ ᒐᕙᒪᖓᓄᑦ, ᒐᕙᒪᑐᖃᒃᑯᑦ ᑖᒃᑯᑑᓪᓗᑎᒃ ᐸᓯᔭᑦᓴᐅᓂᕐᒥᒃ ᐊᑎᓕᐅᖅᑕᐅᔪᑦ ᐃᖅᑲᖅᑐᐃᕕᖕᒨᑎᑦᓯᒍᑎᓂ.
- 2006-ᒥᓂᒃ, ᓯᑕᒪᑦ ᒪᓕᒐᖅᑎᒍᑦ ᐊᐅᓚᔾᔭᐃᒋᐊᕈᑏᑦ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᓄᑦ ᓵᖓᓅᖅᓯᒪᓕᖅᑐᑦ ᓄᓇᕗᑦ ᐃᖅᑲᖅᑐᐃᕕᖕᒥ.
- ᑐᓐᖓᕕᒃᑯᑦ ᓵᓚᒃᓴᖅᓯᒪᔪᖅ ᐃᓘᓐᓇᖏᓐᓂ ᓯᑕᒪᓂᒃ ᐊᐅᓚᔾᔭᐃᒋᐊᕈᑎᓂ, ᐃᓚᒋᔭᐅᓪᓗᓂ ᔪᓂ 27, 2012 ᓇᓗᓇᐃᖅᓯᓪᓗᑎᒃ ᓄᓇᕗᒻᒥ ᖃᐅᔨᓴᕐᓂᕐᒧᑦ ᐸᕐᓇᐅᑎᓂᒃ.
- ᐊᑐᖅᑕᐅᓚᐅᖅᓯᒪᓐᖏᑦᑐᒥᒃ ᐱᔪᖃᕆᐅᖅᑐᖅ ᐊᒻᒪᓗ ᓇᓗᓇᐃᖅᓯᒪᔪᖃᕐᓂᐊᓕᖅᑐᖅ ᒪᓕᒐᑦᓴᐅᔪᒥᒃ ᐃᖅᑲᖅᑐᐃᔨ ᐅᕈ ᔮᓐᓴᓐ ᓄᓇᕗᒻᒥ ᐃᖅᑲᖅᑐᐃᕕᖕᒥ ᓇᓗᓇᐃᖅᓯᓂᕆᓚᐅᖅᑕᖓ ᐊᖏᖃᑎᖃᕐᓂᕐᒥᓂᒃ ᓄᓇᕗᑦ ᑐᓐᖓᕕᒃ ᑎᒥᖓᓂᒃ ᓯᕗᒧᐊᒋᐊᓕᖕᓂᒃ ᓯᕗᒧᐊᒃᑎᑦᓯᓯᒪᓐᖏᓐᓂᖏᓐᓂᒃ ᑲᓇᑕᐅᑉ ᒐᕙᒪᖓ ᓴᖅᑭᖅᑕᐅᔭᕆᐊᖃᖅᓯᒪᔪᓂᒃ ᓄᓇᕗᒻᒥ ᖃᐅᔨᒪᔭᐅᓇᓱᐊᕆᐊᖃᕐᓂᖏᓐᓄᑦ ᐸᕐᓇᐅᑎᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᒃᑯᑦ.
- ᐃᖅᑲᖅᑐᐃᔨ ᔮᓐᓴᓐ ᓇᓗᓇᐃᖅᓯᓚᐅᖅᑐᖅ ᐊᖏᖃᑎᖃᕐᓂᕐᒥᓂᒃ ᑐᓐᖓᕕᒃᑯᓐᓂᒃ ᐊᒻᒪᓗ ᑐᓂᓯᔾᔪᑕᐅᓪᓗᓂ $14.8 ᒥᓕᔭᓂᒃ ᓱᕋᐃᓯᒪᓂᖏᓐᓄᑦ.
- ᓱᕋᑦᑕᐅᓚᐅᖅᑐᖅ ᐊᖏᔪᕐᔪᐊᒻᒪᕆᐊᓘᖕᒪᑦ ᐊᒻᒪᓗ ᓇᓗᓇᐃᖅᑕᐅᑦᓯᐊᖅᑐᖅ ᑕᒪᐃᓐᓄᑦ ᑲᓇᑕᒥᐅᓄᑦ ᐊᒻᒪᓗ ᒐᕙᒪᑐᖃᒃᑯᑦ ᓯᖁᒥᑦᓯᓂᖅ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᑭᑐᔪᕐᔪᐊᕌᓗᒃ ᐸᕐᓇᑕᐅᓯᒪᓂᖓ, ᐊᒻᒪᓗ ᓇᓗᓇᐃᖅᑕᐅᑦᓯᐊᕋᓱᐊᖅᓯᒪᓐᖏᓐᓂᖓ.
- ᑐᑭᑖᕈᑕᐅᔪᖅ ᐊᑕᐅᓯᕐᒨᖓᔪᖅ ᐃᓚᐃᓐᓇᖓᓄᑦ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᑦ. ᐊᓯᖏᑦ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᑦ ᓯᖁᒥᑦᓯᒍᑕᐅᓯᒪᔪᑦ, ᐃᓚᒋᔭᐅᓪᓗᓂ ᒐᕙᒪᒃᑯᑦ ᓯᖁᒥᑦᓯᓯᒪᓂᖏᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓂᑦ (ᐃᓛᒃᑯᑦ 23) ᐊᒻᒪᓗ ᒐᕙᒪᒃᑯᑦ ᑳᓐᑐᓛᒃᓯᖃᑦᑕᕐᓂᖏᑦ (ᐃᓛᒃᑯᑦ 24), ᓱᓕ ᐃᖅᑲᖅᑐᐃᕖᑦ ᓵᖓᓃᒍᑕᐅᓂᐊᖅᑐᖅ ᐃᖅᑲᖅᑐᐃᕕᖕᒦᑎᑦᓯᓂᖅ ᐃᖅᑲᑐᖅᑕᐅᔾᔪᑕᐅᓕᖅᐸᑦ 2013-ᒥ.
- ᐃᖅᑲᖅᑐᐃᕕᒃᑯᑦ ᐋᖅᑭᑦᑕᐅᓚᐅᖅᑐᖅ ᑐᑭᓕᐅᕈᑕᐅᓪᓗᓂ ᓴᖅᑮᔪᖅ ᐱᐅᓐᖏᑦᑐᖅ ᒪᓕᒐᖅ ᒐᕙᒪᑐᖃᒃᑯᓐᓄᑦ ᑲᔪᓯᑎᑦᓯᖏᓐᓂᖓᓄᑦ ᐊᑐᓕᖅᑎᑕᐅᔭᕆᐊᖃᖅᓯᒪᔪᓂᒃ ᐊᑐᓕᖅᑎᓯᑦᓯᐊᖃᑦᑕᖅᓯᒪᓐᖏᓐᓂᖏᑦ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᒻᒪᓗ ᐊᓯᖏᓐᓂᒃᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᓂᒃ, ᐊᒻᒪᓗ ᑕᒪᓐᓇ ᑲᔪᓯᑎᑦᓯᖏᓐᓂᕆᓚᐅᖅᑖᑦ ᒪᑭᑉᐸᓪᓕᐊᑦᓯᐊᕈᑕᐅᓚᖓᓚᐅᖅᑑᒐᓗᐊᓂᒃ ᐊᒻᒪᓗ ᓈᖕᒪᑦᓯᐊᑐᒃᑯᑦ ᐋᖅᑭᓯᐊᖅᓯᒪᔪᒃᑯᑦ ᑲᑐᔾᔨᖃᑎᒋᔭᐅᓗᑎᒃ ᐃᓄᐃᑦ ᐊᒻᒪᓗ ᐊᓯᓕᒫᖏᑦ ᓄᓇᑖᖅᓯᒪᔪᑦ.
- ᐃᖅᑲᖅᑐᐃᔨ ᔮᓐᓴᓐ ᑐᑭᑖᕈᑎᖓ ᐋᖅᑭᑦᑕᐅᔪᖅ ᓱᖅᑯᐃᖅᓯᒍᑕᐅᓪᓗᓂ ᑕᒪᕐᒥᒃ ᐃᓄᐃᑦ ᓵᓐᖓᑦᓯᖃᑦᑕᖅᓯᒪᔪᑦ ᐱᓇᓱᐊᖅᑐᑎᒃ ᐃᓄᐃᑦ ᐱᔪᓐᓇᐅᑎᖓᓂᒃ ᐅᑭᐅᖑᓚᐅᖅᑐᓂᒃ 40-ᓂᒃ ᐊᑭᓕᐅᑎᓂᖓᓂᒃ.
