(ᐅᑐᐱᕆ 20, 2022, ᑲᖏᖅᖠᓂᖅ, ᓄᓇᕗᑦ) ᑲᑎᒪᔪᑦ ᓄᓇᕗᑦ ᑐᙵᕕᒃᑯᑦ ᐊᕐᕌᒍᑕᒫᖅᓯᐅᑎᖓᓂᒃ ᐱᖁᔨᕗᖔᕈᑎᒥᒃ ᐃᑳᖅᑎᑦᑎᓚᐅᖅᑐᑦ ᑎᓕᐅᕆᔪᒥᒃ ᒐᕙᒪᑐᖃᒃᑯᓐᓂᑦ ᑲᓇᑕᒥ ᐊᒻᒪᓗ ᓄᓇᕗᑦ ᒐᕙᒪᖓᓂ ᑲᒪᒋᔭᖃᕆᐊᕐᓗᑎᒃ ᒪᓕᒐᑎᒍᑦ, ᐊᑐᐊᒐᓕᐅᕐᓂᒃᑯᑦ ᐊᒻᒪᓗ ᑮᓇᐅᔭᖃᖅᑎᑦᑎᓂᒃᑯᑦ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᖃᑦᑕᕐᓂᖓ ᒥᑭᒡᓕᕙᓪᓕᐊᓂᖓᓂᒃ ᓄᖅᑲᖅᑎᑦᑎᓗᑎᒃ. ᐃᓄᒃᑐᑦ ᑕᐃᒎᓯᖅ ᐃᓚᖃᖅᑐᖅ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ ᐅᖃᐅᓯᕆᔭᐅᖕᒪᑕ ᓄᓇᕗᒻᒥ.
ᓄᓇᕗᑦ ᑐᙵᕕᒃᑯᑦ ᑎᓕᐅᕆᖕᒥᔪᑦ ᒐᕙᒪᒃᑯᓐᓂᑦ ᖃᓄᑐᐃᓐᓇᖅ ᐱᓕᕆᓗᑎᒃ ᐊᙳᑎᓂᐊᕐᓗᑎᒃ ᐱᖁᔭᐅᓯᒪᔪᓂᒃ ᐃᓗᐊᓂᑦ ᓄᓇᕐᔪᐊᑦ ᐊᑕᐅᓯᐅᖃᑎᒌᖏᑦ ᓇᓗᓇᐃᖅᓯᓯᒪᓂᖓᓂᒃ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ, ᑕᒡᕗᖓ ᒪᓕᒐᖓᑦ, ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᒪᓕᒐᖅ, ᓄᓇᕗᑦ ᐃᓕᑕᕆᔭᐅᓯᒪᔪᑦ ᐅᖃᐅᓯᕐᓄᑦ ᒪᓕᒐᖅ ᐊᒻᒪᓗ ᐃᓄᐃᑦ ᐅᖃᐅᓯᖓᓂᒃ ᓴᐳᒻᒥᓂᕐᒧᑦ ᒪᓕᒐᖅ ᐊᒻᒪᓗ ᐱᒻᒪᕆᐅᓕᖅᑎᑦᑎᓗᑎᒃ ᐊᒃᓱᕉᑎᖃᕐᓂᐊᕐᓂᕆᓯᒪᔭᖏᓐᓂᒃ ᐱᓕᕆᖃᑎᖃᕐᓂᕐᒥᒃ ᐅᐱᒍᓱᖃᑎᒌᒡᓗᑎᒃ, ᒪᑐᐃᖓᑦᑎᐊᕐᓗᑎᒃ ᐊᒻᒪᓗ ᑕᑯᒃᓴᐅᑦᑎᐊᕐᓗᑎᒃ ᓴᙱᓕᖅᑎᑦᑎᓂᐊᕐᓗᓂ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᖃᑦᑕᕐᓂᖓ ᐊᒻᒪᓗ ᐅᓄᖅᓯᑎᒋᐊᕐᓗᒋᑦ ᐊᑐᐃᓐᓇᐅᔪᑦ ᐱᔭᒃᓴᑦ ᐱᔨᑦᑎᕋᐅᑎᓪᓗ ᐃᓄᒃᑐᑦ ᐅᖃᐅᓯᕐᒧᑦ ᑐᕌᖓᔪᑦ ᓄᓇᕗᒻᒥ.
ᓄᓇᕗᑦ ᒐᕙᒪᑐᖃᒃᑯᑦ ᐊᕕᒃᑐᖅᓯᒪᓂᕐᔪᐊᖏᓐᓂᒃ ᑖᓐᓇᑑᔪᖅ ᐃᓄᐃᑦ ᐅᓄᕐᓂᖅᐹᖑᔪᑦ ᐊᖏᕐᕋᓖᑦ ᐊᒻᒪᓗ ᑕᒫᓂ ᐃᓄᒃᑐᑦ, ᓄᓇᖃᖅᑳᖅᓯᒪᔪᑦ ᐅᖃᐅᓯᖓᑦ, ᐊᑐᖅᑕᐅᖃᑦᑕᖅᑎᓪᓗᒍ ᐅᓄᕐᓂᖅᐹᓄᑦ ᐊᕕᒃᑐᖅᓯᒪᓂᕐᔪᐊᕐᒥᐅᑕᕐᓄᑦ. ᖃᓄᑐᐃᓐᓇᖅ ᐊᒃᓱᕈᕋᓗᐊᖅᑎᓪᓗᒋᑦ ᐃᓄᐃᑦ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᒐᓱᒃᑲᓗᐊᖅᑎᓪᓗᒍ ᐊᖏᕐᕋᖏᓐᓂᒃ ᐃᓕᓐᓂᐊᖅᑎᒍᒪᓪᓗᒋᑦ ᓄᑕᕋᕐᓄᑦ, ᐃᓄᒃᑐᑦ ᐊᑐᖅᑕᐅᖃᑦᑕᕐᓂᖓ ᓄᓇᕗᒻᒥ ᑲᓇᑕᓕᒫᕐᒥᓗ ᒥᑭᒡᓕᕙᓪᓕᐊᔪᖅ. ᒫᓐᓇ ᒥᑭᒡᓕᕙᓪᓕᐊᓂᖓ ᓱᑲᖕᓂᖓ ᑲᔪᓯᒍᓂ, ᐃᒪᐃᓕᖓᓕᓛᕋᓱᒋᔭᐅᔪᖅ ᐊᕐᕌᒍᑦ 2050 ᑎᑭᒃᑯᓂ, ᐃᓄᒃᑐᑦ ᐊᑐᖅᑕᐅᓕᓛᖅᑐᖅ 4%−ᖏᓐᓇᑐᐃᓐᓇᕐᓄᑦ ᐃᓄᖕᓄᑦ ᓄᓇᕗᒻᒥ. ᑕᒪᓐᓇ, ᐱᓗᐊᖅᑐᒥᒃ, ᐱᔾᔪᑕᐅᔪᖅ ᖃᓪᓗᓈᑎᑑᕐᓂᖅ ᐊᒻᒪᓗ ᐅᐃᕖᑎᑑᕐᓂᖅ ᓴᙱᔪᒻᒪᕆᐊᓘᖕᒪᑎᒃ ᖄᖏᖅᓯᑐᐃᓐᓇᖅᑕᕐᒪᑕ ᓄᓇᕗᒻᒥᐅᑦ ᐃᓄᐃᑦ ᐱᒐᓱᒃᑕᖏᓐᓂᒃ.
ᐃᓄᒃᑐᑦ ᐊᑐᖅᑕᐅᖃᑦᑕᕐᓂᖓᓂᒃ ᒥᑭᒡᓕᕙᓪᓕᐊᓂᖓ ᓄᖅᑲᖅᑎᑕᐅᓂᖓ ᐊᒻᒪᓗ ᓴᕿᔭᐅᓂᖓ ᐃᓱᒪᒋᔪᖕᓇᐃᖃᑎᒌᒍᑕᐅᖃᑕᐅᔪᖅ ᓄᓇᖃᖅᑳᖅᓯᒪᔪᓂᒃ ᑲᓇᑕᒥ ᐊᒻᒪᓗ ᐱᕕᒃᓴᐅᓪᓗᓂ ᒐᕙᒪᒃᑯᑦ ᑕᑯᑎᑦᑎᔪᖕᓇᕐᓂᖓᓂᒃ ᐱᔪᒪᓪᓚᕆᖕᓂᖓᓂᒃ ᓴᙱᔪᓂᒃ, ᓴᖅᑭᑎᑦᑎᓪᓚᕆᓛᖅᑐᓂᒃ ᐱᓕᕆᐊᓂᒃ ᐋᖅᑮᒋᐊᕈᑎᓂᒃ ᐊᒻᒪᓗ ᓴᕿᑎᑦᑎᓗᓂ ᑲᓇᑕᒥ ᐊᑐᖅᑕᐅᓯᒪᔪᑦ ᐊᓯᕈᐃᓯᒪᒻᒪᕆᒃᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᐅᓪᓗᒥᓗ ᐊᑐᐊᒐᐅᔪᓂᒃ ᐃᓚᒋᓪᓗᒋᑦ ᐃᓕᓐᓂᐊᕆᐊᖅᐸᓚᐅᕐᓂᐅᔪᖅ.
-30-
ᑐᑭᓯᒋᐊᕐᕕᒋᓗᒍ:
ᑭᐊᕙᓐ ᖃᑉᓗᑦᑎᐊᖅ
ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᖅ, ᓄᓇᕗᑦ ᑐᙵᕕᒃ ᑎᒥᖓᑦ
ᐅᖄᓚᐅᑦ: (867) 975-4900 ᐊᑭᖃᙱᑦᑐᖅ: 1-888-646-0006
